Psalms 58

₂Magtiges, is julle werklik besig

met regspraak,

oordeel julle mense billik?

₃Selfs in julle harte beoefen julle onreg;

in die land maak die geweld

van julle hande

vir julle die pad skoon.

₄Vanaf die moederskoot

dwaal goddeloses af,

vanaf hulle geboorte

raak leuenaars die pad byster.

₅Hulle gif is dieselfde as slanggif;

hulle is soos 'n dowe horingslang

wat sy ore toestop,

₆wat nie luister na die besweerders

se stem nie –

hulle wat bedrewe is in die besweerkuns.

₇O God, breek hulle tande

in hulle monde,

verbrysel die kake

van die jong leeus, Here.

₈Mag hulle verdwyn

soos water wat wegvloei;

mag Hy hulle vertrap soos gras.

Mag hulle verdroog

₉soos 'n slak wat in sy slym seil,

soos misgeboortes van vroue

wat nooit die son sien nie.

₁₀Voordat hulle dit besef,

is hulle soos dorings,

soos steekdorings

wat uitgeroei word,

soos bossies wat die stormwind

wegwaai.

₁₁Die regverdige sal bly wees

wanneer hy vergelding sien;

hy sal sy voete afspoel in die bloed

van die goddelose.

₁₂Die mense sal sê:

“Daar ís beloning vir die regverdige,

daar ís 'n God wat reg laat geskied

in die land.”