Spreuke 31

₂Moenie, my seun,

ja, moenie, seun van my skoot,

ja, moenie, seun van my geloftes,

₃moenie aan vroue jou lewenskrag

bestee nie,

of jou paaie daarop rig om konings

uit te wis nie.

₄Dit is vir konings nie gepas nie,

Lemuel,

dit is vir konings nie gepas

om wyn te drink nie,

vir hooggeplaastes om te wees

waar daar sterk drank is nie.

₅Anders drink hy, en vergeet

wat as voorskrifte neergelê is,

en skend hy die regte

van al die magteloses.

₆Gee sterk drank aan die een

wat ten gronde gaan,

en wyn aan mense

met verbitterde siele.

₇Laat hy drink en sy armoede

vergeet,

sy swaarkry nie meer onthou nie.

₈Maak jou mond oop

vir die stemlose,

vir die regsaak van almal

wat wegkwyn.

₉Maak jou mond oop,

oordeel regverdig,

en handhaaf die reg

van die magtelose en behoeftige.

₁₀'n Knap vrou, wie sal haar vind?

Ver bo korale is haar waarde.

₁₁Die hart van haar man

vertrou op haar,

en aan besittings sal dit hom

nie ontbreek nie.

₁₂Sy doen goed aan hom

en nie kwaad nie,

al die dae van haar lewe.

₁₃Sy soek wol en linne uit,

en werk met ywerige hande.

₁₄Sy is soos die skepe

van 'n handelaar,

van ver af bring sy haar brood in.

₁₅Sy staan op terwyl dit nog nag is;

sy voorsien voedsel

vir haar huisgesin,

en porsies vir haar diensmeisies.

₁₆Sy dink na oor 'n stuk grond

en koop dit;

met die verdienste van haar hande

plant sy 'n wingerd.

₁₇Daadkragtig omgord sy

haar heupe;

sy steek haar hande uit haar moue.

₁₈Sy merk dat sy goeie wins maak;

snags gaan haar lamp nie dood nie.

₁₉Sy steek haar hande uit

na die spinstok,

en haar handpalms

hou die spoel vas.

₂₀Haar handpalms strek sy uit

na magteloses;

haar hande steek sy uit

na behoeftiges.

₂₁Sy is nie bekommerd

oor haar huisgesin

wanneer dit sneeu nie,

want haar hele gesin is geklee

in karmosynrooi weefstof.

₂₂Sy maak vir haar dekens;

haar bokleed is van linne

en purperrooi wol.

₂₃Haar man is bekend

in die stadspoorte

wanneer hy saam met

die oudstes van die land sit.

₂₄Sy maak klere van linne

en verkoop dit;

gordels lewer sy aan die handelaars.

₂₅Krag en luister is haar bokleed;

sy lag onbesorg oor die toekoms.

₂₆Haar mond maak sy oop

met wysheid,

en liefdevolle onderrig

is op haar tong.

₂₇Sy hou haar oog op die werk

in haar huis;

brood van luiheid eet sy nie.

₂₈Haar kinders tree na vore

en noem haar gelukkig;

haar man, hy besing haar lof:

₂₉“Baie vroue het hulle knap gedra,

maar jy, jy oortref hulle almal.”

₃₀Sjarme is bedrieglik

en skoonheid is nietig;

'n vrou wat vir die Here ontsag het,

sy moet geprys word.

₃₁Gee aan haar 'n deel

van die vrug van haar hande;

mag hulle haar in die stadspoorte

vir haar dade prys!