Spreuke 28

₁'n Goddelose vlug sonder

dat iemand hom agtervolg,

maar regverdiges is vol vertroue,

soos 'n jong leeu.

₂Wanneer 'n land oortree,

is daar baie •aanvoerders,

maar deur die toedoen van iemand

met insig en kennis

sal dit wat reg is, voortduur.

₃'n Man wat arm is en armes uitbuit,

is soos reën wat verspoel –

dan is daar geen brood nie.

₄Dié wat die wet verontagsaam,

prys goddeloses,

maar dié wat die wet nakom,

staan hulle teë.

₅Slegte mense verstaan nie

wat reg is nie,

maar hulle wat die Here soek,

verstaan alles.

₆'n Arme wat onberispelik leef,

is beter as 'n vals persoon

wat op twee paaie loop

terwyl hy ryk is.

₇Wie hou by die wet,

is 'n seun met insig;

wie egter met roekeloses meng,

steek sy vader in die skande.

₈Wie sy rykdom vermeerder

deur rente en woekerrente –

hy maak dit net bymekaar

vir iemand wat hom

oor armes ontferm.

₉Wie sy oor wegdraai,

sodat hy nie na die wet

hoef te luister nie –

selfs sy gebed is afstootlik.

₁₀Hy wat opregtes laat afdwaal

op 'n verkeerde pad,

sal self in sy vanggat val;

maar hulle wat onberispelik is,

sal die goeie in besit neem.

₁₁'n Ryk man is wys in sy eie oë,

maar 'n arme met insig

sien deur hom.

₁₂Wanneer regverdiges jubel,

is die roem groot;

maar wanneer goddeloses oorneem,

kruip die mense weg.

₁₃Wie sy oortredings bedek,

sal nie sukses behaal nie;

maar hy wat dit bely en dit laat vaar,

ervaar ontferming.

₁₄Gelukkig is 'n mens

wat voortdurend

ontsag koester vir God!

Maar wie sy hart verhard,

stort in die ellende.

₁₅'n Leeu wat grom,

en 'n beer wat aangestorm kom,

so is 'n goddelose wat heers

oor 'n arm volk.

₁₆'n •Leier wat 'n groot

uitbuiter is,

het 'n gebrek aan insig;

hulle wat egter 'n weersin het

in onregverdige wins,

sal lank bly leef.

₁₇'n Mens belas met die bloed

van 'n ander,

sal moet vlug, tot die dood toe –

mense moet hom nie ondersteun nie.

₁₈Wie onberispelik leef,

ontvang hulp;

maar wie twee krom paaie volg,

sal op een tot 'n val kom.

₁₉Wie sy grond bewerk,

eet hom versadig aan brood;

maar wie nietighede najaag,

sal hom versadig eet aan armoede.

₂₀'n Betroubare man

ervaar baie seëninge;

maar wie vinnig ryk wil word,

sal nie ongestraf bly nie.

₂₁Om partydig te wees,

is nie goed nie;

vir 'n stukkie brood

kan 'n man oortree.

₂₂'n Gierigaard is oorywerig

om ryk te word,

en hy weet nie dat gebrek

vir hom voorlê nie.

₂₃Wie 'n mens teregwys,

ervaar daarna goedgesindheid,

meer as hy wat vlei met die tong.

₂₄Wie sy vader en moeder beroof

en sê,

“Dit is geen oortreding nie”,

is die bondgenoot van 'n verwoester.

₂₅'n Gulsige persoon

sit 'n stryery aan die gang;

maar wie op die Here vertrou, gedy.

₂₆Wie op sy eie hart vertrou,

hy is 'n dwaas;

maar wie met wysheid leef,

hy kom vry.

₂₇Wie aan 'n arme gee,

ly geen gebrek nie;

maar wie sy oë sluit,

word baie vervloek.

₂₈Wanneer goddeloses oorneem,

soek mense skuiling;

maar wanneer goddeloses omkom,

word die regverdiges meer.