Filippense 4

₂Ek vermaan Euodia en ek vermaan Sintige om in die Here eensgesind te wees. ₃Ja, ek vra jou ook, getroue medewerker, help hierdie vroue. Hulle het saam met my vir die saak van die evangelie gestry, ook saam met Klemens en my ander medewerkers wie se name in die boekrol van die lewe staan. ₄Verbly julle altyd in die Here! Ek herhaal: Verbly julle! ₅Laat julle vriendelikheid aan alle mense bekend word. Die Here is naby. ₆Moet oor niks bekommerd wees nie, maar maak in alles julle versoeke deur gebed en smeking met danksegging aan God bekend. ₇En die vrede van God, wat alle begrip oortref, sal in •Christus Jesus oor julle harte en gedagtes waak.

₁₀Ek is in die Here besonder bly dat julle nou uiteindelik opnuut aan my gedink het. Eintlik het julle wel aan my gedink, maar julle het net nie die geleentheid daarvoor gehad nie. ₁₁Ek sê dit nie omdat ek gebrek ly nie, want ek het geleer om in alle omstandighede tevrede te wees. ₁₂Ek weet wat dit is om te min te hê, en ek weet wat dit is om oorvloed te hê; ek is in elke opsig in al hierdie dinge ingewy: om versadig te wees, sowel as om honger te ly; om oorvloed te hê, sowel as om gebrek te ly. ₁₃Tot dit alles is ek in staat deur Hom wat my krag gee. ₁₄Nogtans was dit goed van julle om in my swaarkry te deel. ₁₅Julle weet ook, Filippense, dat aan die begin van my evangelieverkondiging, toe ek van Macedonië vertrek het, geen •gemeente tot my rekening van inkomste en uitgawes bygedra het nie, behalwe slegs julle. ₁₆Ook in Thessalonika het julle meer as een maal iets vir my behoeftes gestuur. ₁₇Dit is nie dat ek van julle 'n bydrae verlang nie; ek verlang eerder dat die opbrengs op julle belegging toenemend sal groei. ₁₈Ek is ten volle vergoed, en het meer as genoeg; ek is ten volle versorg, noudat ek van Epafroditus ontvang het wat van julle af kom: 'n geurige offer, 'n aanneemlike offergawe wat God behaag. ₁₉En my God sal ruimskoots in al julle behoeftes voorsien, in ooreenstemming met sy heerlike rykdom in •Christus Jesus. ₂₀Aan ons God en Vader kom die heerlikheid toe vir ewig en ewig! •Amen.

₂₁Groet elke heilige in Christus Jesus. Die broers wat hier by my is, stuur vir julle groete. ₂₂Al die •heiliges, veral dié van die keiser se huishouding, stuur vir julle groete.

₂₃Die genade van die Here Jesus •Christus bly met julle gees!