Josua 11

₁Toe Jabin, die koning van Gasor, dit hoor, het hy 'n boodskap gestuur na Jobab, die koning van Madon, na die koning van Simron, na die koning van Agsaf ₂en na die konings in die noorde: in die bergland, in die Araba suid van Gennesaret, in die Sjefela, en in die heuwelland by Dor in die weste – ₃die Kanaäniete in die ooste en weste, die Amoriete, die Hetiete, en Feresiete, die Jebusiete in die bergland en die Hewiete onderkant Hermon in die Mispestreek.

₄Hulle het met al hulle leërs saam met Jabin uitgetrek, met baie manskappe, so talryk soos die sand wat langs die seestrand is en met 'n groot aantal perde en strydwaens. ₅Al hierdie konings het kragte saamgesnoer, gegaan en kamp opgeslaan by die waters van Merom om teen Israel oorlog te voer. ₆Die Here het vir Josua gesê: “Moenie vir hulle bang wees nie, want môre teen hierdie tyd sal Ek hulle almal doodgemaak aan Israel oorlewer. Hulle perde se hakskeensenings moet jy afkap, en hulle strydwaens moet jy verbrand.”

₇Josua en al die weerbare manskappe saam met hom het hulle by die waters van Merom verras en hulle oorval. ₈Die Here het hulle in die hand van Israel gegee, en Israel het hulle verslaan en agtervolg tot by Groot-Sidon, Misrefot-Majim en die Mispevallei in die ooste. Hulle het hulle verslaan, totdat daar van hulle niemand oor was wat ontvlug het nie. ₉Josua het met hulle gemaak soos die Here vir hom gesê het: Hulle perde se hakskeensenings het hy afgekap en hulle strydwaens het hy verbrand.

₁₀In daardie tyd het Josua teruggedraai, Gasor ingeneem en sy koning met die swaard doodgemaak. Vroeër was Gasor immers die belangrikste van al daardie koninkryke. ₁₁Hy het elke lewende persoon daarin met die skerpte van die swaard verslaan, hulle met die banvloek getref. Niemand wat asemhaal, het oorgebly nie; en toe het hy Gasor afgebrand. ₁₂Al hierdie koningstede, met al hulle konings, het Josua verower. Hy het hulle met die skerpte van die swaard verslaan en hulle met die banvloek getref soos Moses, die dienskneg van die Here, beveel het. ₁₃Net die stede wat op puinheuwels staan, is nie deur Israel afgebrand nie. Gasor was die enigste uitsondering – Josua het net dit afgebrand. ₁₄Al die buit van hierdie stede en die vee het die Israeliete vir hulleself gevat. Net die mense het hulle met die skerpte van die swaard getref, totdat hulle uitgedelg was. Hulle het niemand wat asemhaal, laat oorbly nie. ₁₅Soos die Here Moses, sy dienskneg, beveel het, so het Moses vir Josua opdrag gegee, en presies so het Josua dit gedoen. Hy het niks agterweë gelaat van alles wat die Here Moses beveel het nie.

₁₆Josua het hierdie hele landstreek verower: die bergland, die hele Negev, die hele Gosenstreek, die Sjefela en die Araba, die berggebiede van Israel en sy laer liggende dele, ₁₇van die berg Galak af wat oploop na Seïr, tot by Baäl-Gad in die Libanonvallei onderkant die berg Hermon. Al hulle konings het hy gevange geneem, hulle neergevel en hulle doodgemaak. ₁₈Vir 'n geruime tyd het Josua teen al die konings oorlog gevoer. ₁₉Daar was nie 'n stad wat vrede gesluit het met die Israeliete nie, behalwe die Hewiete wat in Gibeon woon. Al hierdie stede het die Israeliete in die oorlog verower. ₂₀Dit was immers deur die Here se toedoen dat hulle hulle harte verhard het om teen Israel oorlog te voer, sodat Israel hulle met die banvloek kon tref en daar nie vir hulle genade sou wees nie – ja, sodat Israel hulle kon verdelg soos die Here Moses beveel het.

₂₁Josua het in hierdie tyd die Enakiete gaan uitroei – uit die bergland, uit Hebron, Debir en Anab, uit die hele bergland van Juda en uit die hele bergland van Israel. Josua het hulle saam met hulle stede met die banvloek getref. ₂₂Daar het geen Enakiete in die land van die Israeliete oorgebly nie; net in Gasa, Gat en Asdod het daar van hulle oorgebly.

₂₃Josua het die hele landstreek verower, net soos die Here vir Moses gesê het. Josua het dit aan Israel as erfdeel gegee, ooreenkomstig die indeling van hulle stamme. Die land het toe gerus van oorlog.