Daniël (Grieks) 13

₁'n Man met die naam Jojakim het in Babilon gewoon. ₂Hy het getrou met 'n vrou genaamd Susanna, dogter van Hilkia. Sy was baie mooi en iemand wat ontsag gehad het vir die Here. ₃Aangesien haar ouers opregte mense was, het hulle hulle dogter volgens die •Wet van Moses opgevoed. ₄Jojakim was baie ryk en het 'n pragtige tuin by sy huis gehad. Die Jode het gewoonlik by hom byeengekom omdat hy die meeste aansien van hulle almal gehad het.

₅In daardie jaar is twee oudstes uit die volk as regters aangestel. Hulle was van die soort van wie die Here gesê het: “Wetteloosheid het uit Babilon voortgekom – van oudstes, regters, wat veronderstel was om die volk te regeer!” ₆Hierdie twee het baie tyd in Jojakim se huis deurgebring en almal wat regsake gehad het, het na hulle gekom.

₇Wanneer die mense teen die middag vertrek het, het Susanna gewoonlik haar man se tuin binnegegaan en daar rondgestap. ₈Die twee oudstes het haar elke dag daar sien ingaan en rondstap, en hulle is oorval deur 'n begeerte na haar. ₉Hulle denke het pervers geraak en hulle het hulle oë afgewend om nie na die hemel te kyk en hulle aan regverdige oordele te herinner nie. ₁₀Al twee was siek van hartstog oor haar, maar hulle het nie vir mekaar van hulle pyniging oor haar vertel nie, ₁₁omdat hulle skaam was om hulle begeerte om intiem met haar te verkeer, teenoor mekaar te erken. ₁₂Hulle het haar egter elke dag gretig afgeloer om na haar te kyk.

₁₃Eendag het die een vir die ander gesê: “Laat ons dadelik huis toe gaan; dit is etenstyd.” Hulle het uitgegaan en is afsonderlik daar weg, ₁₄maar al twee het omgedraai en by dieselfde plek uitgekom. Toe hulle mekaar vra wat die rede is, het hulle hulle hartstog teenoor mekaar erken. Hulle het toe saam 'n tyd afgespreek waarop hulle haar alleen sou kon kry. ₁₅Hulle het gewag op 'n geskikte geleentheid. Toe gebeur dit dat sy met net twee diensmeisies die tuin binnegaan soos sy die vorige dag en die dag daarvóór gedoen het. Sy wou in die tuin bad omdat dit warm was. ₁₆Daar was niemand anders nie behalwe die twee oudstes, wat weggekruip en haar dopgehou het. ₁₇Sy het vir die diensmeisies gesê: “Gaan haal vir my olie en seep, en sluit die tuin se hekke sodat ek kan bad.” ₁₈Hulle het gemaak soos sy gesê het, die hekke van die tuin gesluit en by die syhek uitgegaan om te gaan haal wat sy hulle beveel het. Die diensmeisies het nie die oudstes gesien nie omdat hulle weggekruip het.

₁₉Toe die diensmeisies uit is, het die twee oudstes opgestaan en op Susanna afgestorm ₂₀en vir haar gesê: “Kyk, die hekke van die tuin is gesluit, niemand sien ons nie en ons smag na jou. Gee nou toe en verkeer intiem met ons. ₂₁Maar weier jy, gaan ons teen jou getuig en sê dat 'n jong man by jou was en dat dit is hoekom jy die diensmeisies van jou af weggestuur het!”

₂₂Susanna het gekreun: “Ek is heeltemal vas! As ek dit doen, beteken dit my dood. As ek dit nie doen nie, sal ek nie uit julle mag kan ontsnap nie. ₂₃Maar dit is vir my beter om dit nie te doen nie en in julle mag te val, eerder as om voor die Here te sondig.” ₂₄Susanna begin toe luidkeels skreeu, en die twee oudstes het ook geskreeu, maar teen haar. ₂₅Een van hulle het gehardloop en die hekke van die tuin oopgemaak. ₂₆Toe die mense in die huis die geskreeu in die tuin hoor, storm hulle deur die syhek in om te sien wat haar oorgekom het. ₂₇Toe die oudstes hulle stories vertel, het die dienaars baie skaam gekry omdat iets soortgelyks nog nooit tevore van Susanna gesê is nie.

₂₈So gebeur dit die volgende dag, toe die mense weer in die huis van Susanna se man Jojakim bymekaarkom, dat die twee oudstes ook gekom het, gedryf deur die bose bedoeling om Susanna te laat doodmaak. ₂₉Hulle het voor al die mense gesê: “Laat haal Susanna, dogter van Hilkia, die vrou van Jojakim!” Hulle het haar laat haal. ₃₀Sy het gekom saam met haar ouers, haar kinders en haar hele familie. ₃₁Susanna was besonder fyn en het 'n mooi figuur gehad. ₃₂Omdat sy 'n sluier gedra het, het die booswigte beveel dat die sluier afgehaal word sodat hulle hulle aan haar skoonheid kon versadig, ₃₃maar dié wat saam met haar was en ook die ander wat haar gesien het, het gehuil. ₃₄Die twee oudstes het tussen die mense opgestaan en hulle hande op haar kop gesit. ₃₅Sy het egter gehuil en opgekyk na die hemel omdat haar hart op die Here vertrou het. ₃₆Maar die oudstes sê toe: “Terwyl ons alleen in die tuin gestap het, het hierdie een met twee diensmeisies ingekom, die hekke van die tuin gesluit en die diensmeisies laat gaan. ₃₇Toe kom 'n jong man wat weggekruip het, na haar en gaan lê by haar. ₃₈Ons was in die hoek van die tuin en toe ons die oortreding sien, het ons na hulle gehardloop. ₃₉Ons het gesien dat hulle intiem verkeer, maar ons kon hom nie vashou nie omdat hy sterker as ons was, en die hekke oopgemaak en uitgestorm het. ₄₀Ons het háár egter gegryp en gevra wie die jong man was, ₄₁maar sy wou ons nie sê nie. Dit getuig ons.” Die vergadering het hulle geglo omdat hulle oudstes van die volk en regters was, en hulle het haar tot die dood veroordeel.

₄₂Maar Susanna het luidkeels uitgeroep: “Ewige God, U ken dit wat verborge is; U weet alles voordat dit gebeur. ₄₃U weet dat hulle vals teen my getuig het, en kyk, nou gaan ek sterf, hoewel ek niks gedoen het van dit alles waarvan hulle my kwaadwillig beskuldig het nie!” ₄₄Die Here het haar geroep gehoor.

₄₅Toe sy weggelei word om doodgemaak te word, het God die heilige gees van 'n baie jong man met die naam Daniël opgewek. ₄₆Hy het met 'n harde stem uitgeroep: “Ek is onskuldig aan die bloed van hierdie vrou!” ₄₇Al die mense het omgedraai na hom toe en gevra: “Wat beteken hierdie woorde wat jy gesê het?” ₄₈Hy het tussen hulle gaan staan en gesê: “Israeliete, is julle so onnosel? Julle het sonder ondervraging en sonder om die waarheid te bepaal 'n dogter van Israel veroordeel. ₄₉Gaan terug hof toe, want hierdie twee het vals teen haar getuig.”

₅₀Al die mense het haastig teruggegaan. Die ander oudstes het vir Daniël gesê: “Kom, sit tussen ons en vertel ons, want God het jou die gesag van 'n oudste gegee.” ₅₁Daniël sê toe vir hulle: “Vat hulle ver weg van mekaar en ek sal hulle ondervra.”

₅₂Toe hulle van mekaar weggeneem is, het hy een van hulle geroep en vir hom gesê: “Jy, wat in boosheid oud geword het – die sondes wat jy in die verlede gedoen het, het jou nou ingehaal! ₅₃Jy het onregverdige uitsprake gelewer, die onskuldiges veroordeel en die skuldiges vrygelaat, terwyl die Here tog sê, ‘'n Onskuldige en regverdige mens mag jy nie om die lewe bring nie.’ ₅₄Nou, as jy regtig die vrou gesien het, sê dan onder watter boom het jy hulle intiem met mekaar sien verkeer.” Hy antwoord: “Onder 'n gomboom.” ₅₅Daniël sê toe: “Reg so! Jou gelieg kos jou jou kop, want 'n engel van God het reeds die vonnis van God ontvang en hy sal jou middeldeur sny!”

₅₆Daniël het hom eenkant laat staan en opdrag gegee dat die ander een gebring moet word. Hy sê toe vir hom: “Kind van Kanaän en nie van Juda nie – skoonheid het jou mislei en begeerte het jou hart verderf! ₅₇Dit is hoe julle die dogters van Israel gereeld behandel het. Hulle het uit vrees intiem met julle verkeer, maar hierdie dogter van Juda het nie julle wetteloosheid geduld nie! ₅₈Sê dan nou vir my onder watter boom het jy hulle betrap terwyl hulle intiem met mekaar verkeer het.” Hy antwoord: “Onder 'n terebint.” ₅₉Daniël sê vir hom: “Reg so! Jou gelieg kos jou ook jou kop, want die engel van God staan reg met die swaard om jou middeldeur te kap en so julle al twee uit te wis!”

₆₀Die hele vergadering het hard geskreeu en God geloof wat diegene verlos wat op Hom hoop. ₆₁Hulle tree toe teen die twee oudstes op omdat Daniël hulle deur hulle eie woorde as vals getuies ontmasker het. En die vergadering het met hulle gehandel soos húlle beplan het om aan hulle naaste te doen. ₆₂Die vergadering het toe volgens die Wet van Moses gehandel, en hulle tereggestel. So is die verspilling van onskuldige bloed daardie dag voorkom.

₆₃Hilkia en sy vrou het God geprys vir hulle dogter Susanna – so ook haar man Jojakim en die hele familie, omdat geen spoor van 'n skandelike daad by haar gevind is nie. ₆₄Van daardie dag af het Daniël groot aansien by die volk geniet.