Psalms 53

₂Dwase sê in hulle hart:

Daar is geen God nie.

Hulle tree gruwelik en afstootlik op.

Daar is nie een wat goed doen nie.

₃God kyk vanuit die hemel na die mense

om te sien of daar iemand is

wat verstandig is,

iemand wat God soek.

₄Almal het afgedwaal,

saam het hulle ontaard;

daar is nie een wat goed doen nie,

selfs nie een nie.

₅Is almal wat onreg pleeg

dan sonder insig,

hulle wat my volk eet

soos 'n mens brood eet?

Hulle roep God nie aan nie.

₆Dan oorval skrik hulle

as daar niks te vrese is nie.

Want God het die beendere

van hulle wat jou beleër het, verstrooi.

Jy laat hulle beskaamd staan,

want God het hulle verwerp.

₇Mag daar uit Sion redding kom

vir Israel!

Wanneer God die lot van sy volk

omkeer,

moet Jakob juig,

moet Israel bly wees.