Psalms 28

Na U, Here, roep ek!

My Rots, moet U nie vir my

doof hou nie,

sodat ek nie, wanneer U

teenoor my sou swyg,

word soos dié wat in die put

afdaal nie.

₂Luister na my smeekgebed,

as ek na U om hulp roep,

as ek my hande uitstrek

na die heiligste deel

van u heiligdom.

₃Moet my nie wegvoer

saam met goddeloses nie –

mense wat onreg pleeg,

wat oor vrede praat met hulle naaste

terwyl daar kwaad in hulle harte is.

₄Vergeld hulle ooreenkomstig

hulle dade, hulle bose optrede;

vergeld hulle vir hulle handewerk,

gee hulle hulle verdiende loon.

₅Omdat hulle nie ag slaan

op die Here se dade

en op sy handewerk nie,

sal Hy hulle afbreek

en nie opbou nie.

₆Die Here moet geprys word,

want Hy het na my smeekgebed

geluister.

₇Die Here is my krag en my skild;

op Hom vertrou my hart.

Ja, ek het hulp ontvang

en my hart jubel,

met my lied wil ek Hom prys:

₈“Die Here is vir sy volk 'n krag.

Hy is die toevlug van verlossing

vir sy gesalfde.

₉“Verlos tog u volk

en seën u erfdeel;

wees vir hulle 'n herder

en dra hulle vir altyd!”