Psalms 138

Ek wil U prys met my hele hart;

voor die gode wil ek U besing.

₂Ek wil in aanbidding buig

na u •heilige •tempel;

ek wil u Naam prys

oor u troue liefde, oor u trou;

Want U het u beloftes

bo al u roem laat uitstyg.

₃Die dag toe ek geroep het,

het U my geantwoord.

U maak my innerlik sterker.

₄Al die konings van die aarde

moet U prys, Here,

wanneer hulle die woorde

van u mond hoor.

₅Hulle moet sing oor die weë

van die Here:

“Groot is die heerlikheid van die Here.

₆Ja, verhewe is die Here,

maar nederiges sien Hy raak

en hoogmoediges ken Hy van ver af.”

₇As ek in diep benoudheid verkeer,

bewaar U my lewe;

teen die toorn van my vyande

steek U u hand uit;

u regterhand verlos my.

₈Die Here self tree vir my in.

Here, u troue liefde duur vir ewig;

u handewerk –

moet dit nie laat vaar nie!