Lukas 17

₁Jesus het vir sy dissipels gesê: “Dit is onvermydelik dat daar struikelblokke kom, maar wee die een deur wie dit kom. ₂Dit is beter vir hom dat 'n maalklip om sy nek gehang en hy in die see gegooi word, as dat hy een van hierdie geringes laat struikel. ₃Wees dus op julle hoede. As jou broer sondig, wys hom tereg, en as hy berou het, vergewe hom. ₄En as hy sewe maal op een dag teen jou sondig, en sewe maal na jou terugkom en sê, ‘Ek het berou’, moet jy hom vergewe.”

₅Toe sê die •apostels vir die Here: “Gee ons meer geloof!” ₆En die Here antwoord: “As julle geloof soos 'n mosterdsaadjie gehad het, sou julle vir hierdie wildevyeboom gesê het, ‘Trek jou wortels uit die grond en gaan plant jouself in die see,’ en hy sou na julle geluister het.

₇“Wie van julle sal, as hy 'n slaaf het wat besig is om te ploeg of skape op te pas, vir hom sê, wanneer hy van die veld af kom, ‘Kom leun dadelik aan om te eet.’ ₈Sal hy nie eerder vir hom sê, ‘Maak vir my iets gereed om te eet, omgord jou heupe en bedien my, totdat ek geëet en gedrink het; en daarna kan jy eet en drink!’ nie? ₉Hy bedank tog nie die slaaf net omdat hy sy opdragte uitgevoer het nie! ₁₀Dieselfde geld vir julle: Wanneer julle alles gedoen het wat aan julle opgedra is, sê dan, ‘Ons is nikswerd slawe. Ons het net gedoen wat ons moes doen.’ ”

₁₁Op 'n keer het Jesus op pad na Jerusalem deur die grensgebied tussen Samaria en Galilea gereis. ₁₂Toe Hy 'n sekere dorpie binnegaan, het tien melaatse mans Hom tegemoet gekom. Hulle het op 'n afstand bly staan ₁₃en uitgeroep: “Jesus, Meester, ontferm U tog oor ons!” ₁₄Toe Hy hulle sien, sê Hy vir hulle: “Gaan wys julleself vir die priesters.” Op pad daarheen is hulle gereinig. ₁₅Een van hulle het, toe hy sien dat hy gesond geword het, omgedraai en God met 'n harde stem geloof. ₁₆Hy het op sy gesig aan Jesus se voete neergeval en Hom gedank. Hy was 'n Samaritaan. ₁₇Jesus antwoord hom toe: “Is daar dan nie tien gereinig nie? Waar is die ander nege? ₁₈Was daar niemand onder hulle te vinde wat omgedraai het om God te loof, behalwe hierdie vreemdeling nie?” ₁₉Toe sê Hy vir die man: “Staan op en gaan! Jou geloof het jou gered.”

₂₀Toe Jesus op 'n keer deur die •Fariseërs gevra is wanneer die •koninkryk van God kom, het Hy hulle geantwoord: “Die koninkryk van God kom nie met duidelik waarneembare tekens nie. ₂₁Mense sal nie sê, ‘Kyk, hier is dit!’ of ‘Daar is dit!’ nie, want kyk, die koninkryk van God is in julle midde.” ₂₂Hy het aan sy dissipels gesê: “Daar kom 'n tyd wanneer julle sal begeer om maar één van die dae van die •Seun van die Mens te sien, maar julle sal dit nie sien nie. ₂₃Dan sal die mense vir julle sê, ‘Kyk daar!’ of ‘Kyk hier!’ Moenie gaan nie, en moenie agter hulle aanloop nie. ₂₄Want soos 'n weerligstraal die hemel van die een kant af tot aan die ander kant verlig, só sal die Seun van die Mens op sy dag verskyn. ₂₅Maar eers moet Hy baie lyding verduur en deur hierdie geslag verwerp word. ₂₆Net soos in die dae van Noag gebeur het, so sal dit ook wees in die dae van die Seun van die Mens. ₂₇Hulle het geëet, gedrink, in die huwelik getree en in die huwelik uitgegee, tot op die dag dat Noag die ark binnegegaan en die vloed gekom en almal vernietig het. ₂₈Net so het dit ook in die dae van Lot gegaan – hulle het geëet, gedrink, gekoop, verkoop, geplant en gebou; ₂₉maar op die dag dat Lot uit Sodom weggetrek het, het daar vuur en swael uit die hemel gereën en almal vernietig. ₃₀Dit sal net so wees op die dag wanneer die Seun van die Mens geopenbaar word. ₃₁Wie op daardie dag op sy dakstoep sal wees, met sy besittings nog in die huis, moenie ondertoe gaan om dit te gaan haal nie. Net so moet die een op die landerye nie terugdraai na wat agter is nie. ₃₂Onthou Lot se vrou!