Job 9

₂“Inderdaad! Ek weet dat dit so is.

Maar hoe kan 'n sterfling voor God

die reg aan sy kant hê?

₃As iemand graag 'n regstryd

met Hom wil voer,

sal hy hom nie eers

een uit 'n duisend keer kan verweer nie.

₄God wat wys van hart en sterk in vermoë is –

wie was al in verset teen Hom

en het ongedeerd daarvan afgekom?

₅Hy is die een wat berge verskuif

sonder dat hulle dit agterkom,

wat hulle in sy toorn omkeer;

₆Hy wat die aarde uit sy plek skud,

sodat sy pilare bewe;

₇Hy wat die son aanspreek,

sodat dit nie skyn nie,

en wat so die sterre verseël;

₈wat die hemel oopspan, Hy alleen,

wat op die see se rûe trap;

₉wat die sterrebeeld van die

Leeu, Orion en die Sewester gemaak het,

ook die kamers van die suide;

₁₀wat groot en ondeurgrondelike dinge,

ontelbare wonders, doen.

₁₁Kyk, Hy kom langs my verby,

maar ek sien Hom nie raak nie.

Hy gaan verby,

maar ek gewaar Hom nie.

₁₂Kyk, Hy ruk weg;

wie kan Hom teenhou?

Wie kan vir Hom sê,

‘Wat doen U?’

₁₃God wend nie sy toorn af nie –

onder Hom kruip die helpers van Rahab.

₁₄Hoe kan ék my dan

teen Hom verweer,

my woorde in verweer teen Hom kies,

₁₅ek wat, al het ek gelyk,

my nie sal kan verweer nie?

By my teenstander

moet ek om genade smeek.

₁₆As ek my op Hom beroep,

en Hy antwoord my,

glo ek nie dat Hy

op my roepstem sal ag slaan nie,

₁₇Hy wat my met 'n stormwind vasgryp,

en my wonde sonder rede

meer maak.

₁₈Hy laat my nie toe om my asem

terug te kry nie,

maar versadig my met bitterheid.

₁₉As dit oor krag gaan –

Hy is die Sterke!

As dit oor reg gaan,

sê Hy, ‘Wie kan My dagvaar?’

₂₀Al het ek gelyk,

verklaar my mond my skuldig;

al tree ek onberispelik op,

toon dit dat ek verkeerd is.

₂₁Ek tree onberispelik op.

Ek gee nie om vir my lewe nie;

ek verag my bestaan.

₂₂Dit is om't ewe.

Daarom sê ek,

‘Onberispelik of goddeloos –

Hy vernietig albei.’

₂₃As 'n ramp onverwags die dood bring –

Hy dryf die spot met die wanhoop van onskuldiges.

₂₄Die aarde is oorgegee

in die hand van goddeloses;

die gesigte van die aarde se regters bedek Hy.

As dit nie Hy is nie,

wie is dit dan?

₂₅“My dae is vinniger as 'n hardloper,

dit het weggeglip;

dit het niks goeds opgelewer nie,

₂₆dit gly verby saam met papirusbootjies,

soos 'n arend wat sweef bo 'n prooi.

₂₇As ek sê,

‘Ek wil my klagte vergeet,

my gesigsuitdrukking verander

en vrolik lyk,’

₂₈word ek bang vir al my lyding:

Ek weet dat U my nie sal vryspreek nie.

₂₉Ek is die een wat skuldig sal bly.

Waarom sou ek my dan nog vermoei vir niks?

₃₀Al was ek my met sneeuwater,

en reinig my hande met potas,

₃₁sal U my steeds in 'n kuil

dompel,

sodat selfs my klere my afstootlik vind.

₃₂“Ja, Hy is nie 'n mens, soos ek,

dat ek my teenoor Hom kan verweer,

en ons saam na die gereg kan gaan nie.

₃₃As daar maar iemand was

wat die saak tussen ons kon besleg,

wat sy hand oor ons albei kon hou!

₃₄God sou sy staf van my moes verwyder;

sy verskrikking sou my dan nie ontstel nie.

₃₅Dan kon ek praat

sonder om Hom te vrees;

maar in my geval is dit nie so nie.