Genesis 25

₁Abraham het weer 'n vrou geneem; haar naam was Ketura. ₂Sy het vir hom Simran, Joksan, Medan, Midian, Jisbak en Suag in die wêreld gebring. ₃Joksan het Skeba en Dedan verwek. Die nageslag van Dedan was die Assuriete, die Letusiete en die Leümiete. ₄Midian se seuns was Efa, Efer, Ganog, Abida en Eldaä. Hulle almal was die nageslag van Ketura.

₅Abraham het alles wat aan hom behoort, vir Isak gegee. ₆Vir die seuns van Abraham se byvroue het Abraham geskenke gegee, en hulle nog tydens sy leeftyd van sy seun Isak ooswaarts weggestuur, na die land van die ooste.

₇Dit is die aantal jare van Abraham wat hy geleef het – 175 jaar. ₈Abraham het sy asem uitgeblaas en op 'n hoë ouderdom gesterf, oud en ná 'n vol lewe, en hy is met sy mense verenig. ₉Isak en Ismael, sy seuns, het hom begrawe in die grot van Magpela wat oos van Mamre lê, op die grond van Efron, die seun van Sogar, die Hetiet, ₁₀die grond wat Abraham van die Hetiete gekoop het. Daar is Abraham begrawe, en ook Sara, sy vrou. ₁₁Ná Abraham se dood het God sy seun Isak geseën. Isak het toe by Beër-Lagai-Roï gewoon.

₁₂Hier volg die familiegeskiedenis van Ismael, die seun van Abraham, wat Hagar, die Egiptiese slavin van Sara, vir Abraham in die wêreld gebring het. ₁₃Hier volg die name van Ismael se nageslag. Hulle name is volgens hulle familiegeskiedenis: Die eersgeborene van Ismael was Nebajot, dan Kedar, Adbeël, Mibsam, ₁₄Misma, Duma, Massa, ₁₅Gadad, Tema, Jetur, Nafis en Kedma. ₁₆Dit was die nageslag van Ismael, en dit was hulle name – twaalf leiers van hulle stamme in hulle gehuggies en kampe.

₁₇En dit was Ismael se lewensjare – 137 jaar. Hy het sy asem uitgeblaas en gesterf, en hy is met sy mense verenig. ₁₈Ismael se nageslag het gewoon van Gawila af tot by Sur, wat oos van Egipte lê in die rigting van Assirië. Aan die oostekant van al sy bloedverwante het hy hom gevestig.

₁₉Hier volg die familiegeskiedenis van Isak, die seun van Abraham:

Abraham het Isak verwek. ₂₀Isak was veertig jaar oud toe hy Rebekka, die dogter van Betuel, 'n Arameër uit Paddan-Aram, die suster van Laban, die Arameër, vir hom as vrou geneem het. ₂₁Isak het by die Here gepleit ter wille van sy vrou, want sy was onvrugbaar. Die Here het hom verhoor, en Rebekka, sy vrou, het swanger geword. ₂₂Die kinders in haar het mekaar weggestoot. Toe sê sy: “As dit so is, waarom moet juis ek dit oorkom?” Sy het gegaan om die Here te raadpleeg. ₂₃Die Here het vir haar gesê:

₂₄Toe haar tyd aanbreek om geboorte te gee, is daar 'n tweeling in haar moederskoot! ₂₅Die eerste een het uitgekom, asof met 'n mantel van hare, heeltemal rooibruin. Hulle het hom Esau genoem. ₂₆Daarna het sy broer uitgekom, met sy hand wat aan Esau se hakskeen vashou. Hulle het hom toe Jakob genoem. Isak was sestig jaar oud by hulle geboorte.

₂₇Die seuns het opgegroei. Esau het 'n knap jagter geword, 'n man van die veld; en Jakob was 'n fatsoenlike man wat in tente gewoon het. ₂₈Isak het van Esau gehou, want wildsvleis was na sy smaak; Rebekka, daarenteen, het van Jakob gehou.

₂₉Jakob was besig om 'n gereg gaar te maak, toe Esau van die veld af kom – hy was uitgeput. ₃₀Esau sê toe vir Jakob: “Gee my asseblief 'n sluk van die rooi goed, hierdie rooi goed, want ek is uitgeput.” (Daarom word hy Edom genoem.) ₃₁Jakob het geantwoord: “Verkoop eers jou eersgeboortereg aan my.” ₃₂Toe sê Esau: “Kyk, ek is op die punt om dood te gaan; wat is 'n eersgeboortereg dan vir my werd?” ₃₃Jakob het gesê: “Lê eers vir my 'n eed af.” Hy het toe vir hom 'n eed afgelê en sy eersgeboortereg aan Jakob verkoop. ₃₄Jakob gee toe vir Esau brood en die kooksel lensies. Hy het geëet en gedrink, opgestaan en weggegaan. So het Esau sy eersgeboortereg geminag.