Galasiërs 6

₁Broers, as iemand deur een of ander sonde oorval word, moet julle wat met die Gees vervul is, so iemand in 'n gees van sagmoedigheid reghelp; maar let op jouself, dat ook jy nie versoek word nie.

₂Dra mekaar se laste, en vervul so die wet van •Christus. ₃As iemand werklik meen dat hy iets is, terwyl hy niks is nie, bedrieg hy homself. ₄Elkeen moet sy eie dade beoordeel. Dan sal hy trots kan wees slegs wat homself betref, en nie wat 'n ander persoon betref nie; ₅want elkeen moet sy eie las dra.

₆Wie onderrig in die Woord ontvang, moet die een wat hom onderrig, laat deel in al die goeie dinge wat hy besit.

₇Moet julle nie laat mislei nie – God laat Hom nie bespot nie! Wat die mens ook al saai, sal hy maai. ₈Hy wat in die vlees saai, sal uit die vlees vernietiging oes, maar hy wat in die Gees saai, sal uit die Gees die ewige lewe oes. ₉Laat ons daarom nie moeg raak om goed te doen nie, want as ons nie verslap nie, sal ons op die regte tyd oes. ₁₀Laat ons dan, terwyl ons die geleentheid het, aan almal goed doen, maar veral aan die huisgesin van die geloof.

₁₁Kyk met watter groot letters skryf ek nou vir julle in my eie handskrif! ₁₂Mense wat deur die uiterlike 'n indruk wil maak – dit is hulle wat julle probeer dwing om besny te word, net sodat hulle nie ter wille van die kruis van •Christus vervolg sal word nie. ₁₃Want diegene wat hulle laat besny, onderhou self nie die wet nie, maar hulle wil hê dat julle besny word, sodat hulle hulle op julle liggame kan beroem. ₁₄Maar wat my betref, mag dit my tog nie oorkom dat ek my op iets beroem nie, behalwe op die kruis van ons Here Jesus Christus, waardeur die wêreld vir my gekruisig is, en ek vir die wêreld. ₁₅Want nóg besnedenheid, nóg onbesnedenheid beteken hoegenaamd iets, maar wel 'n nuwe skepping. ₁₆Vir hulle wat volgens hierdie beginsel leef: vrede en ontferming – en vir die Israel van God!

₁₇Ten slotte: Laat niemand my verder moeite aandoen nie, want ek dra die littekens van Jesus aan my liggaam.

₁₈Die genade van ons Here Jesus •Christus bly met julle gees, broers! •Amen.