2 Samuel 22

“Die Here is my rotsvesting,

my bergskuiling, my bevryder.

₃My God is my rots by wie ek skuil,

my skild en die horing van my redding,

my toevlugsoord, my skuilplek,

my verlosser –

van geweld het U my verlos.

₄Die Een wat geloof moet word –

roep ek uit – is die Here!

En van my vyande word ek verlos.

₅Ja, bande van die dood

het my omsluit;

strome van vernietiging

het my verskrik;

₆bande van die •doderyk

het my verstrengel;

vangstrikke van die dood

het my ingewag.

₇In my benoudheid

het ek na die Here bly roep;

na my God het ek geroep.

In sy paleis het Hy my stem gehoor;

my hulpgeroep het sy ore bereik.

₈“Toe het die aarde

geskud en geruk;

die fondamente van die hemel

het gebewe.

Dit het geskud want sy toorn

het ontbrand:

₉Rook het uit sy neus opgestyg,

'n verterende vuur uit sy mond;

gloeiende kole het daaruit opgevlam.

₁₀Hy het die hemel afgebuig

en neergedaal;

diepe duisternis was onder sy voete.

₁₁Hy het op 'n gerub gery,

Hy het gevlieg,

verskyn op die vlerke van die wind.

₁₂Hy het van die donker rondom

Hom 'n beskutting gemaak,

swaar wolke,

waaruit water neersif.

₁₃Uit die glans voor Hom

het gloeiende kole vuur gebrand.

₁₄Die Here laat uit die hemelruim

die donder weerklink;

die Allerhoogste laat sy stem hoor.

₁₅Hy stuur sy pyle

en jaag hulle uiteen,

weerligstrale,

en bring hulle in verwarring.

₁₆Die beddings van die see

het sigbaar geword;

die fondamente van die aarde is ontbloot

deur die dreiging van die Here,

deur die windvlaag uit sy neus.

₁₇“Uit die hoogte

het Hy sy hand uitgestrek,

my gegryp,

my uit die watermassa opgetrek.

₁₈Hy het my weggeruk

van my magtige vyand,

weg van my haters,

want hulle was sterker as ek.

₁₉Op die dag van my teenspoed

het hulle my ingewag,

maar die Here was vir my 'n stut:

₂₀Hy het my na 'n oopte uitgelei;

Hy het my bevry,

omdat Hy my goedgesind is.

₂₁“Die Here het aan my goed gedoen,

op grond van my geregtigheid;

omdat my hande skoon is,

het Hy my vergoed.

₂₂Want ek het op die Here se paaie gebly;

en my nie skuldig gemaak

voor my God nie.

₂₃Ja, ek hou al sy wette voor oë,

en sy vaste voorskrifte –

daarvan wyk ek nie af nie.

₂₄Ek was onberispelik voor Hom,

en het my weerhou van sonde.

₂₅Die Here het my vergoed,

op grond van my geregtigheid,

omdat my hande skoon is in sy oë.

₂₆“Teenoor getroue volgelinge

tree U getrou op;

teenoor die held

wat onberispelik is,

tree U onberispelik op;

₂₇teenoor dié wat hulle rein hou,

bewys U Uself rein;

maar teenoor dié wat vals is,

tree U berekenend op!

₂₈'n Magtelose volk

word deur U verlos,

en u oë hou hoogmoediges dop;

U verneder hulle.

₂₉Ja, U is my lig, Here;

die Here verlig my donkerte.

₃₀Ja, met U hardloop ek

oor 'n skans,

met my God spring ek

oor 'n muur.

₃₁“God, sy weg is volmaak;

die woord van die Here is gelouter.

Hy is 'n skild vir almal wat by Hom skuil.

₃₂Ja, wie is God behalwe die Here?

Wie is 'n rots buiten ons God?

₃₃God is my sterk toevlug;

Hy maak my pad volmaak.

₃₄Hy maak my voete

soos dié van wildsbokke;

op hoë plekke laat Hy my vasstaan.

₃₅Hy maak my hande bedrewe

vir die geveg,

sodat my arms 'n bronsboog

kan span.

₃₆“U het vir my u skild

van verlossing gegee;

u antwoord maak my sterk.

₃₇U skep ruimte vir my voetstappe;

my enkels swik nie.

₃₈Ek agtervolg my vyande

en delg hulle uit;

ek draai nie om voordat ek hulle

uitgewis het nie.

₃₉Ek wis hulle uit,

ek verpletter hulle,

sodat hulle nie opstaan nie;

hulle val onder my voete.

₄₀U omgord my met krag

vir die geveg;

U laat my teenstanders

die knie voor my buig.

₄₁My vyande –

U het hulle vir my laat vlug;

en my haters –

ek kon hulle vernietig.

₄₂Hulle het rondgekyk,

maar daar was geen verlosser nie,

selfs na die Here gekyk,

maar Hy het hulle

nie geantwoord nie.

₄₃Ek het hulle fyngestamp

soos die stof van die aarde;

soos modder in die strate

het ek hulle verpoeier,

ek het hulle vertrap.

₄₄U het my van die gestry

onder my volk bevry;

U beskerm my, die hoof van nasies.

Mense wat ek nie geken het nie,

dien my;

₄₅vreemdes veins onderdanigheid

aan my;

sodra hulle van my hoor,

gehoorsaam hulle my.

₄₆Vreemdes verloor moed;

bewend kom hulle

uit hulle kerkers.

₄₇“Die Here leef!

Lofwaardig is my rots;

die God wat die rots

van my verlossing is,

is verhewe!

₄₈God is die Een wat my toelaat

om wraak te neem;

Hy onderwerp volke aan my,

₄₉Hy wat my weglei

van my vyande.

Ja, U verhoog my

bo my teenstanders;

van manne van geweld ruk U my weg.

₅₀Daarom sal ek U prys

onder die nasies, Here;

u Naam sal ek besing.

₅₁Dit is Hy wat aan sy koning

groot oorwinnings gee,

wat troue liefde bewys

aan sy gesalfde,

aan Dawid en sy nageslag vir altyd.”