1 Samuel 5

₁Toe die Filistyne die ark van God weggevoer het, het hulle dit van Eben-Haeser af na Asdod toe gebring. ₂Die Filistyne het die ark van God geneem, dit in die tempel van Dagon ingebring en langs Dagon neergesit.

₃Toe die mense van Asdod vroeg die volgende môre opstaan – daar lê Dagon met sy gesig teen die grond voor die ark van die Here! Hulle het Dagon geneem en hom op sy plek teruggesit. ₄Maar toe hulle die oggend daarna vroeg opstaan – daar lê Dagon met sy gesig teen die grond voor die ark van die Here! Dagon se kop en sy twee hande lê toe afgekap op die drumpel. Net Dagon se lyf het van hom oorgebly. ₅Daarom trap die priesters van Dagon, en almal wat die tempel van Dagon binnegaan, tot vandag toe nie op die drumpel van Dagon in Asdod nie.

₆Die hand van die Here was swaar op die mense van Asdod. Hy het paniek gesaai onder hulle, en Hy het hulle, dit is Asdod en sy omliggende gebied, getref met swelsels. ₇Toe die manne van Asdod sien wat gebeur, sê hulle: “Die ark van die God van Israel kan nie by ons bly nie, want sy hand rus swaar op ons en op Dagon, ons god.”

₈Hulle het al die Filistynse regeerders ontbied en by hulle byeengebring. Hulle vra toe: “Wat moet ons doen met die ark van die God van Israel?” Hulle antwoord was: “Die ark van die God van Israel moet na Gat verskuif word.” Hulle het toe die ark van die God van Israel verskuif.

₉Maar nadat hulle dit verskuif het, was die hand van die Here teen die stad. Daar het baie groot paniek geheers. Hy het die mense van die stad getref, klein en groot, en swelsels het op hulle uitgebreek. ₁₀Toe stuur hulle die ark van God na Ekron; maar die oomblik toe die ark van God by Ekron aankom, het die mense van Ekron uitgeskreeu: “Hulle het die ark van die God van Israel na ons verskuif om ons en ons volk dood te maak!”

₁₁Hulle het al die Filistynse regeerders ontbied, hulle byeengebring en vir hulle gesê: “Stuur die ark van die God van Israel weg, sodat dit na sy plek kan teruggaan en nie ons en ons volk doodmaak nie.” Daar het immers 'n doodspaniek in die hele stad geheers. Die hand van God was baie swaar daarop. ₁₂Die mense wat nie dood is nie, is getref met swelsels; en die noodkreet van die stad het na die hemel gestyg.