Josua 15

₁Hulle het lootjies getrek vir die families in die Juda-stam en hulle het vir hulle die land gegee tot ver suid van die Sin-woestyn, teen die grens van Edom. ₂Die suidgrens van Juda begin by die Sout-see, by die punt wat suid is ₃en dan gaan die grens suid van Skerpioen-pas verby na die stad Sin. Daarna gaan die grens op na 'n plek suid van die stad Kades-Barnea en dan verder verby die stad Gesron. Daarna gaan die grens op na die stad Addar en dan draai dit na die stad Karka. ₄Daarna gaan die grens verby die stad Asmona en dan saam met Egipte-spruit tot by die see. Dit is die suidgrens van Juda.

₅Die oosgrens van Juda is die Sout-see tot waar die Jordaan-rivier in die see vloei.

Die noordgrens begin waar die Jordaan-rivier in die see vloei. ₆Daarna gaan dit op na die stad Bet-Gogla, en dit gaan noord langs die stad Bet-Araba verby. Dan gaan die grens op na die Klip van Bohan seun van Ruben. ₇Daarna gaan die grens van die Akor-vallei na die stad Debir, en dan draai dit noord na die stad Gilgal oorkant Adummim-pas, suid van die vallei. Die grens gaan dan verby na Semes-fontein en tot by Rogel-fontein. ₈Dan gaan die grens op deur die Ben-Hinnom-vallei tot suid van Jebusiete-berg, dit is Jerusalem, en dan gaan dit op na die boonste punt van die berg wes van die Ben-Hinnom-vallei langs die noordekant van Spook-laagte. ₉Van die boonste punt van die berg draai die grens na Neftoag-fontein, dan verder na die stede teen Efron-berg, en dan draai dit na die stad Baäla, dit is Kirjat-Jearim. ₁₀Van Baäla draai die grens wes na Seïr-berg, en dan langs die noordekant van Jearim-berg, dit is Kesalon, en dan af na die stad Bet-Semes en verby die stad Timna. ₁₁Die grens gaan daarna tot by die noordekant van die stad Ekron, dan draai dit na die stad Sikkaron. Dan gaan dit verby Baäla-berg na die stad Jabneël en daarna tot teen die see.

₁₂Die wesgrens van Juda is die strand van die Groot See.

Dit is die grense van die grond van die families in die Juda-stam.

₁₃Josua het vir Kaleb seun van Jefunne 'n deel van die land gegee tussen die Juda-mense. Dit was die stad Hebron, hulle het die stad voorheen Kirjat-Arba genoem. Arba was die pa van Enak. Die Here het vir Josua gesê hulle moet die plek vir Kaleb gee. ₁₄Kaleb het die Enak-mense Sesai, Agiman en Talmai weggejaag uit Hebron. Hulle was die nageslag van Enak. ₁₅Kaleb het toe na die stad Debir gegaan, die naam van Debir was voorheen Kirjat-Sefer. ₁₆Kaleb het gesê: “Ek sal my dogter Aksa gee vir die man wat die stad Kirjat-Sefer oorwin en wat dit vat, my dogter sal daardie man se vrou wees.”

₁₇Otniël seun van Kenas broer van Kaleb het die stad oorwin, en Kaleb het sy dogter Aksa vir hom gegee om sy vrou te wees. ₁₈Toe Aksa by Otniël kom, het sy gesê hy moet vir haar pa 'n stuk grond vra waar hulle kan ploeg en plant. Maar toe sy afklim van die donkie, het Kaleb vir haar gevra wat sy wil hê. ₁₉Sy sê toe: “Jy moet vir my vrugbare grond gee. Jy het vir my die Suid-land gegee, maar nou moet jy vir my ook plekke gee waar daar water is.”

Kaleb het toe vir haar plekke gegee waar daar water was in die berge en in die valleie.

₂₀Die families in die Juda-stam het hierdie stede gekry: ₂₁Ver in die suide langs die grens van die land Edom het hulle die stad Kabseël gekry, en ook Eder, Jagur, ₂₂Kina, Dimona, Adada, ₂₃Kedes, Gasor, Jitnan, ₂₄Sif, Telem, Bealot, ₂₅Gasor-Gadatta, Kerijot-Gesron, dit is Gasor, ₂₆Amam, Sema, Molada, ₂₇Gasar-Gadda, Gesmon, Bet-Pelet, ₂₈Gasar-Sual, Berseba, Bisjoteja, ₂₉Baäla, Ije-Abarim, Esem, ₃₀Eltolad, Kesil, Gorma, ₃₁Siklag, Madmanna, Sansanna, ₃₂Lebaot, Silgim, Ajin en Rimmon. Dit was almal saam 29 stede en die dorpies daar naby. ₃₃In die Laeveld was daar Estaol, Sora, Asna, ₃₄Sanoag, En-Gannim, Tappuag, Enajim, ₃₅Jarmut, Adullam, Soko, Aseka, ₃₆Saärajim, Aditajim, Gedera en Gederotajim. Dit was 14 stede en die dorpies daar naby. ₃₇Hulle het ook hierdie stede gekry: Senan, Gadasa, Migdal-Gad, ₃₈Dilan, Mispe, Jokteël, ₃₉Lakis, Boskat, Eglon, ₄₀Kabbon, Lagmas, Kitlis, ₄₁Gederot, Bet-Dagon, Naäma en Makkeda. Dit was 16 stede en die dorpies daar naby. ₄₂Die Juda-stam het ook hierdie stede gekry: Libna, Eter, Asan, ₄₃Jiftag, Asna, Nesib, ₄₄Keïla, Aksib en Maresa. Dit was nege stede en die dorpies daar naby. ₄₅Die Juda-stam het ook Ekron, en die woonplekke en dorpies daar naby, gekry, ₄₆en wes van Ekron het hulle al die stede naby Asdod, en die dorpies daar naby, gekry, ₄₇en Asdod en die woonplekke en dorpies daar naby, en Gasa en die woonplekke en dorpies daar naby, tot teen Egipte-spruit en die strand van die Groot See. ₄₈In die Bergland het hulle hierdie stede gekry: Samir, Jattir, Soko, ₄₉Danna, Kirjat-Sanna, dit is Debir, ₅₀Anab, Estemoa, Anim, ₅₁Gosen, Golon en Gilo, elf stede en die dorpies daar naby. ₅₂Daar was ook hierdie stede: Arab, Duma, Esan, ₅₃Janum, Bet-Tappuag, Afeka, ₅₄Gumta, Kirjat-Arba, dit is Hebron, en Sior. Dit was nege stede en die dorpies daar naby, en ₅₅Maon, Karmel, Sif, Jutta, ₅₆Jisreël, Jokdeam, Sanoag, ₅₇Kain, Giba, Timna. Dit was tien stede en die dorpies daar naby, en ₅₈Galgul, Bet-Sur, Gedor, ₅₉Maärat, Bet-Anot, Eltekon. Dit was ses stede en die dorpies daar naby, en ook ₆₀Kirjat-Baäl, dit is Kirjat-Jearim, en Rabba. Dit was twee stede en die dorpies daar naby. ₆₁In die woestyn was daar Bet-Araba, Middin, Sekaka, ₆₂Nibsan, Ir-Melag en En-Gedi. Dit was ses stede en die dorpies daar naby. ₆₃Die mense van Juda kon nie die Jebusiete, die mense van Jerusalem, oorwin en wegjaag nie. Hulle woon vandag nog daar saam met die mense van Juda.