Job 41

₁Die krokodil is wreed wanneer jy

hom wakker maak.

“As mense bang is vir 'n krokodil,

wie kan dan voor Mý bly staan?

₂Alles op die aarde behoort aan My.

Niemand kan sê dat Ek iets vir hom skuld nie.

₃“Ek wil ook praat oor die liggaamsdele

van die krokodil,

en Ek wil praat oor hoe sterk

en goed gebou hy is.

₄Niemand kan hom van voor aanval

en sy vel afslag nie,

sy vel is soos 'n harnas.

₅Niemand kan sy kakebene oopmaak nie,

almal is bang vir sy tande.

₆Die rye skubbe op sy rug

lê vas teen mekaar,

₇so vas dat die wind nie

daardeur kan waai nie.

₈Die skubbe is so vas teen mekaar

dat niemand hulle kan losmaak

van mekaar nie.

₉Wanneer die krokodil nies,

dan lyk dit soos vuurvlamme,

en sy oë is so rooi

soos die son vroeg in die oggend.

₁₀Daar kom vuur uit sy bek,

die vuurvlamme skiet uit sy bek.

₁₁Daar kom stoom uit sy neusgate,

soos uit 'n pot wat kook.

₁₂Sy asem steek vuur aan die brand,

daar kom vlamme uit sy bek.

₁₃Sy nek is baie sterk,

almal skrik wanneer hulle hom sien.

₁₄Die sagste deel van sy liggaam

is so hard soos metaal.

₁₅Hy is vir niks bang nie,

sy hart is so hard soos klip,

so hard soos die onderste maalklip.

₁₆Wanneer hy opkom uit die water,

dan skrik almal wat sterk is,

hulle vlug wanneer hy die water

slaan met sy stert.

₁₇Dit help nie om hom te steek

met 'n swaard nie,

ook nie met 'n spies of 'n pyl nie.

₁₈Yster en brons is vir hom soos kaf,

soos vrot hout.

₁₉Hy vlug nie vir 'n pyl en boog nie,

klippe uit 'n slingervel maak hom nie seer nie.

₂₀'n Knopkierie kan niks doen aan hom nie,

en hy lag wanneer mense spiese na hom gooi.

₂₁Die skubbe op sy pens

is soos die stukkies van 'n kleipot,

waar hy loop, daar lyk dit of iemand

'n dors-slee oor die grond gesleep het.

₂₂Hy laat die diep water kook soos 'n pot,

hy laat die water skuim soos 'n pot vol medisyne.

₂₃Wanneer 'n krokodil swem,

dan lê daar 'n blink streep agter hom,

dit lyk of daar skuim lê op die diep water.

₂₄Ook op die grond kan niemand

hom wen nie, hy is vir niks bang nie.

₂₅Hy dink dat al die trotse diere

minder belangrik is as hy,

hy is hulle koning.”