Job 22

₂“God kan alles self doen,

Hy het nie mense nodig nie,

nee, Hy het ook nie slim mense nodig nie.

₃Dink jy die Almagtige moet bly wees

omdat jy reg gelewe het?

Of dink jy dit het Hom gehelp

dat jy nooit verkeerd gedoen het nie?

Nee.

₄Job, dink jy dat Hy jou straf omdat jy

Hom gedien het,

dink jy dat Hy wil sê dit is hoekom jy

skuldig is?

₅Nee, dit is omdat jy baie sleg gelewe het,

jy het so baie sonde gedoen

dat 'n mens dit nie kan tel nie.

Dít is hoekom Hy jou straf.

₆Ja, jy het jou eie mense se klere gevat,

ook toe hulle niks vir jou geskuld het nie,

jy het arm mense kaal laat loop.

₇Jy het nie water gegee vir mense

wat moeg is nie,

jy het nie kos gegee

vir honger mense nie.

₈Al die grond behoort

aan die man wat ryk en sterk is,

en sy vriende woon daarop.

₉Jy het niks gegee vir weduwees nie,

jy het weeskinders se goed gevat.

₁₀Dit is hoekom daar vangstrikke om jou is,

dit is hoekom jy nou baie bang geword het.

₁₁Dit het vir jou so donker geword

dat jy niks kan sien nie.

Dit is soos wanneer daar baie water

oor jou vloei.

₁₂Jy dink dat God ver bo in die hemel is,

ja kyk, Hy is bokant die sterre wat baie hoog is.

₁₃En jy vra: ‘Wat weet God?

Kan Hy deur die donker wolke sien

om mense te oordeel?’

₁₄Jy dink dat die wolke Hom toemaak

sodat Hy nie kan sien nie,

jy dink dat Hy bokant die hemeldak loop.

₁₅Wil jy dan aanhou lewe

soos die mense wat vóór jou gelewe het,

die mense wat sleg gelewe het?

₁₆Daardie mense het gesterf toe hulle

jonk was,

hulle was soos huise wat weggespoel het.

₁₇Hulle het vir God gesê: ‘Gaan weg van ons!’

Hulle het gesê: ‘Wat kan die Almagtige aan ons doen?

Niks.’

₁₈Hulle het dit gesê vir Hom

wat hulle ryk gemaak het.

Die mense wat verkeerd doen,

dink nie soos ek dink nie.

₁₉Mense wat reg doen,

die onskuldige mense, is bly

en hulle lag wanneer hulle sien

dat God die sondaars straf.

₂₀Die mense wat reg doen, sê dan:

‘Ons vyande is dood,

en alles wat hulle gehad het,

het verbrand.’

₂₁Job, jy moet vrede maak met God,

dan sal dit weer goed gaan met jou.

₂₂Jy moet luister na wat Hy vir jou sê,

jy moet dit goed onthou.

₂₃As jy terugkom na die Almagtige toe,

as jy ophou om sonde te doen,

dan sal jy weer word soos jy voorheen was.

₂₄Jy moet onthou dat goud

nie méér kosbaar is as stof nie,

jy moet onthou dat die beste goud

nie méér kosbaar is

as die klippe in die rivier nie.

₂₅Dan sal die Almagtige vir jou wees

soos goud, soos die beste silwer.

₂₆Ja, dan sal jy bly wees

dat die Almagtige jou God is,

jy sal weet dat Hy goed wil wees vir jou.

₂₇Jy sal dan tot Hom bid,

en Hy sal doen wat jy vra,

en jy sal jou geloftes betaal.

₂₈Jy sal besluit oor iets, en dit sal gebeur,

daar sal lig wees op jou pad.

₂₉Wanneer God mense onbelangrik laat word,

en jy vra dat Hy hulle weer belangrik moet laat word,

dan sal God dit doen, Hy red nederige mense.

₃₀God sal 'n mens red,

ook wanneer die mens skuldig is.

En Hy sal jóú red as jy onskuldig is.”