Ek sal dit weer goed laat gaan met Juda en Israel
1Die Here het weer met Jeremia gepraat. Jeremia was nog in die tronk in die binneplaas van die wagte. 2Die Here het gesê: “Dit is die Here wat praat. Ek het die aarde gemaak, Ek het dit gebou sodat dit vas moet staan, my Naam is die Here. 3Jeremia, jy moet tot My bid, dan sal Ek jou antwoord. Ek sal vir jou groot geheime vertel wat jy nie geweet het nie.
4“Ek, die Here, die God van Israel, praat oor die huise van hierdie stad en oor die paleise van die konings van Juda. Hulle het party huise afgebreek om die muur van die stad sterk te maak vir die oorlog. 5Die Galdeërs kom om die huise vol te maak met die lyke van mense wat Ek laat sterf het. Ek was baie kwaad, Ek wou nie meer die mense van hierdie stad sien nie, want hulle het slegte dinge gedoen. 6Maar nou sal Ek die stad weer bou. Ek sal sy mense gesond maak en Ek sal hulle veilig laat woon. 7Ek sal dit weer goed laat gaan met Juda en met Israel. Ek sal hulle bou, en hulle sal wees soos hulle voorheen was. 8Ek sal hulle reinig en die sondes vergewe wat hulle gedoen het toe hulle verkeerd gedoen het en opstandig was teen My. 9Al die volke op die aarde sal hoor van die goeie dinge wat Ek vir Jerusalem gedoen het, en hulle sal weet dat Ek trots is op die mooi stad wat my Naam het. Die volke sal skrik en verbaas wees omdat Ek al die goeie dinge doen vir die stad en omdat die mense veilig woon in die stad.”
10Die Here sê: “Julle sê Jerusalem is net 'n hoop klippe, daar is nie mense of diere in die stede van Juda en op die strate van Jerusalem nie, alles is verwoes, daar woon niemand nie en daar is nie diere nie. Maar Ek sê julle sal weer hoor 11dat die mense vrolik en bly is, en dat hulle weer sal trou en bruilof hou. Hulle sal sing en sê:
“ ‘Prys die Here wat oor alles regeer,
want die Here is goed,
en Hy doen altyd wat Hy belowe het.’
“Julle sal hoor die mense bring weer dank-offers in die tempel. Hulle sal dit doen, want Ek sal dit weer goed laat gaan in die land, soos voorheen.”
Dit sê die Here. 12Die Here wat oor alles regeer, sê: “Hierdie plek is nou net hope klippe, en hier is nie een mens of dier nie. Maar hier sal weer weiveld wees waar die wagters hulle skape en bokke oppas. 13Dit sal gebeur in die stede van die Bergland, in die stede van die Laeveld, in die stede van die Suid-land, in die land Benjamin, rondom Jerusalem, en in die stede van Juda. Die mense sal weer hulle skape tel.”
Dit sê die Here. 14Die Here sê: “Kyk, die tyd sal kom wanneer Ek sal doen wat Ek belowe het toe Ek gesê het daar sal 'n goeie ding gebeur met die volk Israel en die volk Juda. 15Daardie tyd sal Ek 'n regte afstammeling van Dawid koning laat word, en hy sal reg doen aan die mense in die land. 16Daardie tyd sal Ek Jerusalem red, en sy mense sal veilig woon. Die naam van die stad sal wees: ‘Die Here doen reg aan ons.’ ”
17Ja, die Here sê: “Daar sal altyd iemand van die nageslag van Dawid wees wat op die troon van die volk Israel sit. 18En daar sal altyd 'n priester of 'n Leviet wees wat vir My brand-offers en koring-offers of ander offers bring.”
19Jeremia het gehoor die Here sê vir hom: 20“Die Here sê: Ek het 'n ooreenkoms met die dag en die nag gemaak, sodat die dag en die nag sal kom wanneer hulle moet kom. Julle kan nooit daardie ooreenkoms breek nie.
21“Net so sal Ek nooit my verbond met Dawid breek nie, iemand van sy nageslag sal altyd koning wees. Ek sal ook nooit my verbond breek met die priesters en die Leviete wat vir My werk nie, 22want Ek sal die nageslag van Dawid en die Leviete wat vir My werk, baie laat word, so baie soos die sterre in die lug, niemand kan hulle tel nie. Hulle sal so baie wees soos die sand by die see, niemand kan dit meet nie.”
23Jeremia het gehoor die Here sê vir hom: 24“Het jy gehoor wat sê hierdie volk? Hulle sê Ek het die twee groepe stamme wat Ek gekies het, gelos. Hulle dink my volk beteken niks. Hulle dink die Israeliete kan nie meer 'n volk wees nie. 25Maar Ek sê: Ek sal nooit my verbond met die dag en die nag breek nie, en Ek sal ook nie alles wat in die hemel en op die aarde gebeur, laat ophou nie. 26Net so sal Ek nooit die nageslag van Jakob los nie. Ek sal aanhou om mense te kies van my dienaar Dawid se nageslag, hulle sal regeer oor die nageslag van Abraham, Isak en Jakob. Ek sal dit weer goed laat gaan met hulle, Ek sal jammer wees vir hulle en Ek sal hulle help.”
