Genesis 5

₁Hier is 'n lys van Adam se nageslag.

God het die mense gemaak om in sy plek te regeer. ₂Hy het hulle so gemaak dat daar mans en vroue is. Hy het die mense gemaak en hulle geseën, en Hy het hulle “mense” genoem.

₃Toe Adam 130 jaar oud was, het sy vrou weer 'n seun gekry. Hy was soos sy pa, en Adam het hom Set genoem. ₄Nadat Set gebore is, het Adam nog 800 jaar gelewe. Hy het ook nog ander seuns en dogters gehad. ₅Adam was 930 jaar oud toe hy gesterf het.

₆Set was 105 jaar oud toe hy pa geword het van Enos. ₇Daarna het Set nog 807 jaar gelewe. Hy het ook nog ander seuns en dogters gehad. ₈Set was 912 jaar oud toe hy gesterf het.

₉Enos was 90 jaar oud toe hy pa geword het van Kenan. ₁₀Daarna het Enos nog 815 jaar gelewe. Hy het ook nog ander seuns en dogters gehad. ₁₁Enos was 905 jaar oud toe hy gesterf het.

₁₂Kenan was 70 jaar oud toe hy pa geword het van Mahalalel. ₁₃Daarna het Kenan nog 840 jaar gelewe. Hy het ook nog ander seuns en dogters gehad. ₁₄Kenan was 910 jaar oud toe hy gesterf het.

₁₅Mahalalel was 65 jaar oud toe hy pa geword het van Jered. ₁₆Daarna het Mahalalel nog 830 jaar gelewe. Hy het ook nog ander seuns en dogters gehad. ₁₇Mahalalel was 895 jaar oud toe hy gesterf het.

₁₈Jered was 162 jaar oud toe hy pa geword het van Henog. ₁₉Daarna het Jered nog 800 jaar gelewe. Hy het ook nog ander seuns en dogters gehad. ₂₀Jered was 962 jaar oud toe hy gesterf het.

₂₁Henog was 65 jaar oud toe hy pa geword het van Metusalag. ₂₂Henog het God gedien, hy het naby Hom gelewe. Nadat Henog pa geword het van Metusalag, het Henog nog 300 jaar gelewe. Hy het ook nog ander seuns en dogters gehad. ₂₃Henog het 365 jaar oud geword. ₂₄Henog het God gedien, hy het naby God gelewe. Maar later was hy nie meer op die aarde nie, want God het hom weggeneem.

₂₅Metusalag was 187 jaar oud toe hy pa geword het van Lameg. ₂₆Daarna het Metusalag nog 782 jaar gelewe. Hy het ook nog ander seuns en dogters gehad. ₂₇Metusalag was 969 jaar oud toe hy gesterf het.

₂₈Lameg was 182 jaar oud toe hy pa geword het. Sy vrou het 'n seun gekry ₂₉en Lameg het hom Noag genoem. Lameg het gesê: “Ons werk hard met ons hande om kos te kry, want die Here het die grond vervloek. Hierdie seun Noag sal ons help sodat ons kan rus nadat ons so hard moes werk.”

₃₀Daarna het Lameg nog 595 jaar gelewe. Hy het ook nog ander seuns en dogters gehad. ₃₁Lameg was 777 jaar oud toe hy gesterf het.

₃₂Toe Noag 500 jaar oud was, het hy drie seuns gehad. Hulle name was Sem, Gam en Jafet.