Genesis 27

₁Isak was al baie oud. Hy kon nie meer sien nie. Hy roep toe sy oudste seun Esau en hy sê vir hom: “My seun.”

En Esau sê: “Hier is ek.”

₂Toe sê Isak: “Ek is baie oud, en ek weet nie hoe lank ek nog sal lewe nie. ₃Neem asseblief jou pyl en boog en gaan skiet vir my 'n wildsbok in die veld. ₄Maak dit dan vir my lekker gaar soos ek daarvan hou en bring dit vir my. Ek wil dit eet en dan wil ek jou seën voordat ek sterf.”

₅Rebekka het gehoor wat Isak vir sy seun Esau sê. Toe Esau na die veld gegaan het om 'n bok te gaan skiet, ₆sê Rebekka vir haar seun Jakob: “Ek het gehoor jou pa praat met jou broer. Hy het vir Esau gesê ₇dat hy 'n bok moet gaan skiet en dat hy dit vir hom moet gaarmaak. Jou pa wil dit eet en dan wil hy vir Esau seën voordat hy sterf. ₈My seun, luister nou mooi na my en doen wat ek vir jou sê. ₉Gaan vang gou twee mooi bok-lammers. Ek sal hulle gaarmaak soos jou pa daarvan hou. ₁₀Dan bring jy dit vir jou pa sodat hy dit kan eet en sodat hy jou kan seën voordat hy sterf.”

₁₁Jakob sê toe vir Rebekka: “Maar Esau se vel is vol hare en my vel is glad. ₁₂Miskien voel Pa aan my, en dan dink hy dat ek met hom wil spot. Dan sal hy my vervloek en my nie seën nie.”

₁₃Toe sê sy ma vir hom: “My seun, as jou pa jou vervloek, dan sal die straf op my kom. Jy moet luister na my. Gaan vang vir my die twee bokkies.”

₁₄Jakob het gegaan en hy het die bokkies gevang en vir sy ma gebring. Sy het hulle gaargemaak soos sy pa daarvan hou. ₁₅Toe neem Rebekka haar oudste seun Esau se klere wat by haar in die tent was, en sy trek dit vir haar jongste seun aan. ₁₆Sy neem ook die bok-lammers se velle en sy trek dit om Jakob se arms en om sy gladde nek.

₁₇Toe gee sy die lekker vleis en die brood wat sy gemaak het vir haar seun Jakob, ₁₈en hy gaan na sy pa toe en sê vir hom: “Pa.”

En Isak sê: “Hier is ek. Wie is jy, my seun?”

₁₉Jakob het vir sy pa gesê: “Ek is Pa se oudste seun Esau. Ek het gemaak soos Pa vir my gesê het. Sit asseblief regop en eet van my wildsvleis sodat Pa my kan seën.”

₂₀Toe vra Isak vir sy seun: “Hoe het jy so gou 'n bok gekry, my seun?”

En Jakob antwoord: “Die Here, Pa se God, het my gehelp om gou 'n bok te kry.”

₂₁Isak sê toe vir Jakob: “My seun, kom asseblief nader sodat ek aan jou kan voel. Is jy my seun Esau of nie?”

₂₂Jakob het nader gekom na sy pa Isak toe, en Isak het aan hom gevoel. Hy sê toe: “Jou stem is soos Jakob se stem, maar jou arms voel soos Esau se arms.”

₂₃Isak het nie geweet dat dit Jakob is nie, want Jakob se arms was vol hare soos sy broer Esau se arms. Isak het toe vir Jakob geseën. ₂₄Maar hy het eers weer gevra: “Is jy regtig my seun Esau?”

En Jakob het gesê: “Ja, ek is.”

₂₅Toe sê Isak: “My seun, bring vir my die wildsvleis, sodat ek daarvan kan eet, want Ek wil jou seën.”

Jakob gee dit toe vir hom, en hy het geëet. Jakob het ook wyn vir hom gebring, en hy het dit gedrink. ₂₆Toe sê sy pa Isak vir hom: “My seun, kom asseblief nader en soen my.”

₂₇En Jakob het nader gegaan en hom gesoen. Isak het die klere geruik wat Jakob aangehad het, en toe het hy vir Jakob geseën en gesê:

₃₀So het Isak vir Jakob geseën.

Toe Jakob weggaan van sy pa, kom Esau terug uit die veld waar hy die wildsbok geskiet het.

₃₁Esau maak toe ook 'n lekker ete gaar en bring dit vir sy pa en sê vir hom: “Pa, sit asseblief regop en eet van my wildsvleis, sodat Pa my kan seën.”

₃₂Isak vra toe vir hom: “Wie is jy?”

En hy antwoord: “Ek is jou oudste seun Esau.”

₃₃Toe skrik Isak baie groot en hy begin bewe. Hy vra toe vir Esau: “Iemand het 'n wildsbok geskiet en hy het dit vir my gebring. Wie was dit? Ek het van alles geëet en ek het hom geseën voordat jy gekom het. En ek kan nie sy seën wegvat nie.”

₃₄Toe Esau hoor wat sy pa sê, het hy hard geskree en begin huil. Hy sê toe vir sy pa: “Pa, seën asseblief ook vir my.”

₃₅Isak het gesê: “Dit is jou broer wat my bedrieg het en wat jou seën gevat het.”

₃₆En Esau sê: “Ja, sy naam is Jakob, hy is skelm. Hy het my twee maal bedrieg. Hy het my regte gevat en nou het hy ook my seën gevat. Kan Pa my ook seën?”

₃₇Isak het vir Esau gesê: “Ek het klaar gesê Jakob sal jou hoof wees. Jakob se hele familie sal hom dien. Ek het hom geseën, en hy sal altyd baie koring en wyn hê. My seun, wat is daar nog wat ek vir jou kan gee?”

₃₈Toe sê Esau vir sy pa: “Het Pa net een seën? Seën my ook asseblief.”

En Esau het hard begin huil.

₃₉Sy pa sê toe vir hom:

₄₁Esau het vir Jakob gehaat omdat sy pa vir Jakob geseën het. Esau het gedink: My pa sal nie meer lank lewe nie, en wanneer hy dood is, dan sal ek vir Jakob doodmaak.

₄₂Die slawe het vir Rebekka vertel wat haar oudste seun gesê het, en sy het iemand gestuur om vir Jakob te roep. Sy het vir hom gesê: “Pasop! Jou broer Esau is so kwaad dat hy jou wil doodmaak. ₄₃My seun, luister nou mooi wat ek vir jou sê. Jy moet na my broer Laban toe vlug. Hy woon in die land Haran, ₄₄jy moet 'n tyd lank by hom bly totdat jou broer nie meer kwaad is nie. ₄₅Wanneer jou broer vergeet het wat jy aan hom gedoen het en nie meer vir jou kwaad is nie, dan sal ek iemand stuur om jou te roep. Hoekom moet ek altwee my seuns op een dag verloor?”

₄₆Rebekka het vir Isak gesê: “Ek het nou genoeg gehad van die twee Hetitiese vroue van Esau. As Jakob ook 'n Hetitiese vrou neem soos hierdie skoondogters, dan wil ek nie meer lewe nie.”