Genesis 25

₁Abraham het weer getrou. Die vrou se naam was Ketura. ₂Ketura en Abraham se seuns was Simran, Joksan, Medan, Midian, Jisbak en Suag.

₃Joksan was die pa van Skeba en Dedan. Dedan se nageslag was die mense van Assur, Letus en Leüm.

₄Midian se seuns was Efa, Efer, Ganok, Abida en Eldaä. Hulle was almal die nageslag van Ketura.

₅Isak het alles gekry wat Abraham gehad het.

₆Abraham het vir die kinders van sy byvrou Ketura presente gegee terwyl hy nog gelewe het, en hy het hulle weggestuur na die ooste, weg van Isak.

₇Abraham het 175 jaar oud geword. ₈Hy was baie oud. Hy het gesterf en hy is begrawe. ₉Sy seuns Isak en Ismael het hom begrawe in die Makpela-grot oorkant Mamre. Dit was op die grond wat voorheen behoort het aan Efron die Hetiet. Efron was die seun van Sogar. ₁₀Abraham het voorheen hierdie stuk grond gekoop by die Hetiete en hy het sy vrou Sara daar begrawe.

₁₁Ná Abraham se dood het God Abraham se seun Isak geseën, en Isak het by Lagai-Roï-fontein gaan woon.

₁₂Hier is 'n lys van die nageslag van Ismael, Abraham en Hagar se seun. Hagar was Sara se slavin. Sy het uit Egipte gekom. ₁₃Hier is die name van Ismael se nageslag: Ismael se oudste seun was Nebajot. Die ander seuns was Kedar, Adbeël, Mibsam, ₁₄Misma, Duma, Massa, ₁₅Gadad, Tema, Jetur, Nafis en Kedma. ₁₆Dit is die name van Ismael se twaalf seuns. Hulle was leiers van hulle families en stamme. Hulle het in kampe en klein dorpies gewoon. Die plekke en die seuns het dieselfde name gehad.

₁₇Ismael het 137 jaar oud geword. Toe het hy gesterf en hulle het hom begrawe.

₁₈Ismael se nageslag het tussen Gawila en Sur gewoon. Sur was oos van Egipte naby Assur. Ismael het weg van sy familie gaan woon.

₁₉Hier is die verhaal van Isak, Abraham se seun.

₂₀Toe Isak 40 jaar oud was, het hy getrou met Rebekka, die dogter van Betuel, 'n Arameër uit Paddan-Aram. Sy was die suster van Laban die Arameër.

₂₁Isak het tot die Here gebid oor sy vrou, want sy kon nie kinders kry nie. Die Here het geluister na sy gebed, en sy vrou Rebekka het swanger geword. ₂₂Die kinders in haar het baie teen mekaar geskop, en sy het gesê: “Hoekom skop die kinders so?”

Sy het gaan bid en vir die Here gevra hoekom dit gebeur.

₂₃Die Here het vir haar gesê:

₂₄Toe die kinders gebore is, was dit 'n tweeling. ₂₅Toe die eerste seun gebore is, sien hulle hy is rooi en hy het baie hare op sy lyf, so baie hare soos op 'n dier se vel. Daarom het hulle hom Esau genoem. ₂₆Daarna is sy broer gebore. Sy broer se hand het aan Esau se voet vasgehou. Hulle het hom Jakob genoem. Isak was 60 jaar oud toe die twee seuns gebore is.

₂₇Die seuns het grootgeword, en Esau kon goed jag. Hy het gehou van die veld. Jakob was 'n rustige man en hy het geboer met skape en bokke. ₂₈Isak was meer lief vir Esau, want Isak het gehou van wildsvleis. Maar Rebekka was meer lief vir Jakob.

₂₉Eendag was Jakob besig om sop te kook. Esau het van die veld gekom en hy was baie moeg. ₃₀Esau sê toe vir Jakob: “Ek is baie honger. Gee my asseblief van daardie rooi sop van jou.”

Daarom het hulle Esau ook Edom genoem.

₃₁Maar Jakob sê vir hom: “Gee dan vir my eers die regte wat jy het omdat jy eerste gebore is.”

₃₂Toe sê Esau: “Goed. Ek is baie honger. Ek voel ek sal sterf. Die regte sal my niks help wanneer ek dood is nie.”

₃₃Jakob sê toe: “Jy moet dit eers vir my belowe.”

Esau het dit belowe en hy het sy regte vir Jakob gegee. ₃₄Jakob het vir Esau brood en die lensiesop gegee. Esau het dit geëet en hy het opgestaan en geloop. So het Esau sy regte weggegee. Dit was nie vir hom belangrik nie.