Deuteronomium 16

₁Moses het gesê: “Jy moet die maand Abib onthou. Jy moet die Paasfees vir jou God die Here vier, want jou God die Here het julle in die maand Abib uit Egipte gebring, in die nag. ₂Jy moet 'n Paasfees-offer vir jou God die Here bring, jy moet 'n skaap of 'n bok of 'n bees slag op die plek wat die Here sal kies waar julle Hom moet aanbid. ₃Jy moenie suurdeeg eet saam met die Paasfees-offer se vleis nie. Jy moet sewe dae lank ongesuurde brood eet saam met die vleis. Hierdie brood sal jou laat onthou dat julle swaargekry het toe julle vinnig uit die land Egipte moes gaan. So moet jy altyd die dag onthou toe julle uit Egipte gegaan het. ₄Daar moet sewe dae lank niks suurdeeg in julle hele land wees nie. En daar mag nie van die vleis oorbly tot die volgende oggend nie, die vleis wat jy die aand van die eerste dag ge-offer het. ₅Jy mag ook nie die Paasfees-offer bring in een van die woonplekke wat julle God die Here vir julle gee nie. ₆Nee, jy moet die Paasfees-offer gaan offer op die plek wat jou God die Here sal kies sodat julle Hom daar kan aanbid. Jy moet dit in die aand doen wanneer die son ondergaan. Dit was die tyd toe julle weggegaan het uit Egipte. ₇Jy moet die vleis gaarmaak en eet op die plek wat jou God die Here sal kies. Die volgende oggend moet jy dan teruggaan na jou tent. ₈Dan moet julle ses dae lank ongesuurde brood eet, en die sewende dag moet 'n gewyde feesdag wees vir julle God die Here. Dan mag julle nie werk doen nie.”

₉“Jy moet sewe weke tel van die dag wanneer julle begin om die koring af te sny met die sekel. ₁₀Dan moet julle die Fees van die Weke vier vir jou God die Here. Jy moet self besluit hoeveel offers jy wil bring omdat jou God die Here jou geseën het. ₁₁Julle moet feesvier voor julle God die Here op die plek wat Hy sal kies sodat julle Hom daar kan aanbid, julle en julle kinders, en julle slawe en slavinne, en die vreemdelinge en weeskinders en weduwees wat by julle woon. ₁₂Julle moet onthou dat julle ook slawe was in die land Egipte en julle moet doen wat hierdie wette sê.”

₁₃“Wanneer julle klaar koring getrap het op die dorsvloer en klaar wyn gemaak het in die parskuip, dan moet julle die Hutte-fees sewe dae lank vier. ₁₄Julle moet saam feesvier, julle en julle kinders, en julle slawe en slavinne, en die vreemdelinge en weeskinders en weduwees wat by julle woon. ₁₅Julle moet die fees sewe dae lank vir julle God die Here vier op die plek wat die Here sal kies, want julle God die Here sal dit goed laat gaan met julle koring-oeste en met alles wat julle doen. Julle sal graag hierdie fees wil vier.”

₁₆“Al julle mans en seuns moet drie maal elke jaar julle God die Here kom aanbid op die plek wat Hy sal kies. Hulle moet dit doen op die Fees van die Ongesuurde Brood, die Fees van die Weke en die Hutte-fees. En elkeen moet iets saambring vir die Here. ₁₇Elkeen moet presente saambring, hy moet self besluit hoeveel hy wil gee omdat sy God die Here hom geseën het en dit alles vir hom gegee het.”

₁₈“Julle moet regters en voormanne vir al die stamme kies en aanstel in al die woonplekke wat julle God die Here vir julle gee. Hulle moet die mense oordeel en hulle moet regverdig wees wanneer hulle besluit. ₁₉Julle moenie sê skuldige mense is onskuldig en onskuldige mense is skuldig nie, julle moenie téén party mense wees en vír ander mense wees nie. Julle moenie presente neem van skuldige mense en dan sê hulle is onskuldig nie, want presente maak wyse mense blind en laat dit sleg gaan met mense wat reg doen. ₂₀Julle moet reg doen, julle moet nét reg doen, sodat julle kan aanhou lewe in die land wat julle God die Here vir julle gee.”

₂₁“Julle mag nie vir julle gewyde pale in die grond plant by die altaar wat julle vir julle God die Here maak nie. ₂₂Julle mag nie klip-pale in die grond plant nie, die Here haat dit.”