1 Kronieke 11

₁Die hele Israel het na Dawid toe gekom in die stad Hebron en hulle het vir hom gesê: “Jy weet ons is jou mense. ₂Toe Saul nog ons koning was, het jy ook vir Israel in die oorlog gelei, en die Here het vir jou gesê:

₃Al die leiers van Israel het na die koning toe gekom in Hebron, en Dawid het met hulle 'n ooreenkoms gemaak by die tempel in Hebron. Hulle het vir Dawid gesalf om koning te wees van Israel. Dit het gebeur soos die Here gesê het toe Hy vir Samuel gestuur het.

₄Dawid en al die manne van Israel het na die stad Jerusalem gegaan. Jerusalem se naam was toe Jebus, die Jebusiete het daar gewoon. ₅Die mense van Jebus het vir Dawid gesê: “Jy sal nie hier kan inkom nie.”

Maar Dawid het die stad Sion wat sterk mure gehad het, oorwin, dit is nou die Dawidstad. ₆Dawid het gesê: “Die eerste man wat 'n Jebusiet doodslaan, sal die hoof en leier word.”

Joab seun van Seruja het eerste aangeval, en hy het die hoof geword. ₇Dawid het gaan woon in die stad wat sterk mure het. Daarom het hulle dit die “Dawidstad” genoem. ₈Dawid het nog 'n muur rondom die stad gebou, van die terras en verder af. Joab het die ander mure reggemaak. ₉Dawid het 'n belangrike koning geword. Die Here wat oor alles regeer, was by Dawid.

₁₀Hier is die name van die hoofde van die spesiale manne van Dawid. Hulle het hom gehelp om 'n belangrike koning te word. Hulle en al die Israeliete het vir Dawid koning gemaak. Dit het gebeur soos die Here gesê het oor Israel. ₁₁Hier is die lys van die name van die spesiale manne van Dawid:

Jasobam van die stad Gakmon was die hoof van die 30 spesiale manne. Hy het 300 manne op een plek doodgemaak met sy spies. ₁₂Ná Jasobam was daar Eleasar seun van Dodo van die stad Agoag. Hy was een van drie spesiale manne. ₁₃Dit is hy wat by Dawid in Pas-Dammim was toe die Filistyne daar bymekaargekom het om oorlog te maak. Daar was 'n stuk grond vol gars. Die manne van Dawid het gevlug vir die Filistyne, ₁₄maar die spesiale manne het op die stuk grond bly staan en hulle het gekeer, die Filistyne kon nie die grond vat nie. Die spesiale manne het die Filistyne oorwin. Die Here het hulle gered en Hy het hulle laat wen teen al die Filistyne.

₁₅Drie van die 30 leiers het afgegaan na die rots by die Adullam-grot. Dawid was toe daar. Die tente van die Filistyne was in Spook-laagte. ₁₆Dawid het daardie tyd weggekruip in 'n veilige plek in die berge, en die Filistyne het manne in die stad Betlehem laat bly om die stad op te pas. ₁₇Dawid het dors geword en gesê: “Ek wens iemand bring vir my water uit die watergat in die poort van Betlehem.” ₁₈Die drie manne het tussen die tente van die Filistyne deurgeloop en hulle het water geskep uit die watergat in die poort van Betlehem. Hulle het dit vir Dawid gebring, maar Dawid wou dit nie drink nie. Hy het dit vir die Here gegee, dit was 'n drank-offer. ₁₉Dawid het gesê: “My God moet keer as ek hierdie water wil drink. As hierdie manne gesterf het toe hulle die water gaan haal het, dan was dit my skuld.”

Dawid wou nie die water drink nie, maar dit is wat die drie manne gedoen het. ₂₀Abisai broer van Joab was die leier van hierdie drie manne. Hy het 300 manne doodgemaak met sy spies. Maar hy was nie een van die eerste drie spesiale manne nie. ₂₁Hy was die belangrikste van die tweede drie spesiale manne en hy was hulle leier, maar hy het nie een van die eerste drie manne geword nie. ₂₂Benaja seun van Jojada van die stad Kabseël was 'n dapper man wat groot dinge gedoen het. Dit is hý wat daardie twee baie sterk manne van Moab oorwin het. En eendag toe dit gesneeu het, het hy afgegaan in 'n gat en hy het 'n leeu doodgemaak. ₂₃Dit is ook hý wat die Egiptenaar oorwin het. Die Egiptenaar was 'n groot man, hy was vyf el lank, en hy het 'n spies in sy hand gehad. Die spies was so groot soos die balk van 'n weefstoel. Maar Benaja het net 'n stok saamgeneem toe hy afgegaan het. Hy het die spies uit die Egiptenaar se hand gevat en hy het die Egiptenaar met sy eie spies doodgemaak. ₂₄Dit is wat Benaja seun van Jojada gedoen het. Die 30 spesiale manne het toe gedink Benaja is baie belangrik. ₂₅Hy was die belangrikste van die 30 manne, maar hy het nie een van die eerste drie manne geword nie. Dawid het hom gekies en aangestel om die hoof te wees van die manne wat die koning moes oppas. ₂₆Die spesiale manne was: Asael broer van Joab, Elganan seun van Dodo van die stad Betlehem, ₂₇Sammot van die stad Haror, Geles van die stad Pelon, ₂₈Ira seun van Ikkes van die stad Tekoa, Abiëser van die stad Anatot, ₂₉Sibbekai van die stad Gusa, Ilai van die stad Agoag, ₃₀Magri van die stad Netofa, Geled seun van Baäna van die stad Netofa, ₃₁Itai seun van Ribai van die stad Gibea in die land Benjamin, Benaja van die stad Piraton, ₃₂Gurai van die stad Nagale-Gaäs, Abiël van die stad Bet-Araba, ₃₃Asmawet van die stad Bagurim, Eljagba van die stad Saälbon, ₃₄die seuns van Hasem van die stad Gison, Jonatan seun van Sage van die stad Harar, ₃₅Agiam seun van Sakar van die stad Harar, Elifal seun van Ur, ₃₆Gefer van die stad Mekera, Agija van die stad Pelon, ₃₇Gesro van die stad Karmel, Naärai seun van Esbai, ₃₈Joël broer van Natan, Mibgar seun van Hagri, ₃₉Selek die Ammoniet, Nagrai van die stad Beërot, Nagrai het die wapens gedra van Joab seun van Seruja, ₄₀Ira en Gareb van die stad Jeter, ₄₁Urija die Hetiet, Sabad seun van Aglai, ₄₂Adina seun van Sisa van die Ruben-stam, Adina was 'n leier van die stam en daar was 30 manne by hom. ₄₃Daar was ook Ganan seun van Maäka, Josafat van die stad Meten, ₄₄Ussia van die stad Astarot, Sama en Jeïel seuns van Gotam van die stad Aroër, ₄₅Jediael seun van Simri, sy broer Joga van die stad Tis, ₄₆Eliël van die stad Magawi, Jeribai en Josauja seuns van Elnaäm, Jitma die Moabiet, ₄₇Eliël, Obed en Jaäsiël van die stad Mesoba.