Psalms 32

Dit gaan goed met 'n mens

wanneer die Here hom vergewe dat hy opstandig was,

wanneer die Here hom nie straf oor sy sonde nie.

₂Dit gaan goed met 'n mens

wanneer die Here nie sê dat hy skuldig is nie.

Dit gaan goed met 'n mens

wat nie ander mense bedrieg nie.

₃Ja, toe ek stilgebly het oor my sondes,

het ek die hele dag gekla en gesug

en ek het maer geword,

₄want U het my elke dag en nag gestraf.

Dit het gevoel of daar 'n vuur in my brand.

₅Toe het ek my sonde vir U bely,

ek het nie probeer wegsteek

dat ek verkeerd gedoen het nie,

ek het gesê ek sal vir die Here bely

dat ek opstandig was.

En U het my sonde vergewe.

₆Daarom moet elke mens wat in U glo, tot U bid

wanneer dit met hom sleg gaan.

Dan sal die watervloed hom nie wegspoel nie.

₇U beskerm my, U hou my weg van gevaar,

U maak my vry, en ek kan daaroor sing.

₈Ek wil vir jou leer en vir jou sê hoe jy moet lewe,

ek wil vir jou raad gee en ek wil kyk wat jy doen.

₉Jy moenie soos 'n perd of 'n muil wees

wat dom is nie.

'n Mens moet 'n stang en 'n toom hê

om so 'n dier mak te maak en om hom by jou te hou.

₁₀Dit gaan baie sleg met 'n mens wat verkeerd doen,

maar die Here doen wat Hy belowe het

vir die mens wat in Hom glo.

₁₁Julle almal wat reg lewe, julle moet bly wees,

julle moet juig oor wat die Here gedoen het.

Julle almal wat eerlik lewe, julle moet bly wees en skree.