Psalms 145

My God, my Koning, ek wil U prys,

ek wil u Naam prys,

altyd en altyd.

₂Ek wil U elke dag prys,

ek wil u Naam prys, altyd en altyd.

₃Die Here is groot,

al die mense moet Hom prys.

Niemand weet hoe groot Hy is nie.

₄Elke geslag moet die dinge prys

wat U gedoen het.

Hulle moet praat oor die groot dinge

wat U gedoen het.

₅Ek wil dink oor U, die Koning.

Almal moet U respekteer en dien

oor die wonderlike dinge wat U doen.

₆Die mense moet bang word vir U wat sterk is,

hulle moet daaroor praat,

hulle moet vertel dat U groot is.

₇Almal weet dat U groot en goed is,

hulle moenie ophou praat daaroor nie,

hulle moet sing en sê dat U altyd reg doen.

₈Die Here is genadig,

Hy is goed vir mense wat swaarkry,

en Hy is geduldig.

Hy doen altyd wat Hy belowe het.

₉Die Here is goed vir almal,

Hy is goed vir almal wat Hy gemaak het,

vir almal wat swaarkry.

₁₀Here, almal wat U gemaak het, moet vir U dankie sê,

die mense wat in U glo, moet U prys.

₁₁Hulle moet praat oor U wat die Koning is,

hulle moet vertel van die groot dinge

wat U gedoen het,

₁₂sodat hulle vir die mense kan leer

van die groot dinge wat U gedoen het.

U is die Koning,

almal moet U respekteer en dien.

₁₃U sal altyd Koning wees,

U sal oor al die geslagte regeer.

₁₄Die Here hou die mense regop wat wil val,

Hy tel die mense op wat nie meer kan staan nie.

₁₅Almal wag vir U om vir hulle kos te gee,

en U gee dit vir hulle op die regte tyd.

₁₆U maak u hand oop, U gee vir almal wat lewe,

U gee vir hulle alles wat hulle vra.

₁₇Die Here doen altyd reg,

Hy doen altyd wat Hy belowe het.

₁₈Die Here is naby almal wat tot Hom bid,

almal wat eerlik tot Hom bid.

₁₉Hy doen wat die mense vra, die mense wat Hom dien,

Hy hoor wanneer hulle roep en vra

dat Hy hulle moet help, en Hy red hulle.

₂₀Die Here beskerm almal wat lief is vir Hom,

maar Hy maak die mense dood wat verkeerd doen.

₂₁Ek wil die Here prys, en almal wat lewe,

moet sy heilige Naam prys, altyd en altyd.