Spreuke 8

₁Die wysheid, die verstand, is soos 'n vrou.

Sy praat hard, sodat almal haar kan hoor.

₂Sy gaan staan op die hoë plekke

langs die pad,

by die plek waar die paaie bymekaarkom,

₃en ook langs die poorte

waar 'n mens ingaan in die stad.

Sy staan by die deure en sy skree:

₄“Mense, ek praat met julle.

Mense, ek roep julle.

₅Julle wat baie min weet,

julle moet leer wat julle moet doen,

julle wat soos dwase is,

julle moet verstandig word.

₆Julle moet luister, want ek wil belangrike dinge sê.

Wanneer ek praat, dan sê ek dinge wat reg is.

₇Ja, ek sal die waarheid praat,

ek haat verkeerde dinge.

₈Alles wat ek sê, is reg.

Niks wat ek sê, is vals en verkeerd nie.

₉Mense wat wil leer en wil verstaan, sal weet

dat al my woorde eerlik en reg is.

₁₀Julle moet doen wat ek vir julle sê,

dit is beter as om silwer te hê.

Om dinge te weet,

is beter as om die beste goud te hê.

₁₁Ja, wysheid is beter as koraal,

wysheid is beter as enige iets

wat jy graag sal wil hê.

₁₂Ek is wysheid.

Waar ek is,

daar weet mense wat om te doen,

ek weet wat mense moet leer

om die regte dinge te kan doen.

₁₃Mense wat nie daarvan hou om ander mense

te bedrieg nie,

is mense wat die Here respekteer en Hom dien.

Ek haat mense wat hoogmoedig en trots is,

mense wat sleg lewe en vals is

wanneer hulle praat.

₁₄Ek help mense om reg te besluit

en om die regte wysheid te kry,

ek maak mense slim en sterk.

₁₅Konings gebruik my wanneer hulle regeer,

leiers gebruik my wanneer hulle moet sê

wat reg is.

₁₆Amptenare, belangrike mense,

almal wat reg moet oordeel, gebruik my.

₁₇Ek is lief vir mense wat lief is vir my,

mense wat my soek, kry my.

₁₈Mense wat wysheid het, sal baie goed hê,

en ander mense sal hulle respekteer.

Hulle sal ryk wees,

en dit sal goed gaan met hulle.

₁₉Ek gee vir mense dinge

wat beter is as goud,

beter ook as goeie goud,

beter as die beste silwer.

₂₀Waar ek gaan, daar lewe mense reg,

en daar doen hulle reg aan ander mense.

₂₁Ek maak die mense ryk wat lief is vir my,

ek maak hulle stoorkamers vol.”

“Die Here het my gemaak,

Hy het my eerste gemaak.

Ek is die eerste ding wat Hy gemaak het.

₂₃Ek is lankal daar, van die begin af,

voordat die aarde daar was.

₂₄Ek was klaar daar toe die diep water

nog nie daar was nie,

toe daar nog nie fonteine vol water was nie.

₂₅Ek het gekom voordat die Here die berge

op hulle plekke gesit het,

voordat daar heuwels was.

₂₆Dit was voordat die Here die aarde en die veld

gemaak het,

voordat daar grond in die wêreld was.

₂₇Ek was ook daar toe die Here die hemeldak

gemaak het,

toe Hy besluit het waar die diep water moet ophou

en waar die lug moet begin,

₂₈toe Hy vir die wolke daarbo 'n plek gemaak het

en die sterk fonteine van die diep water oopgemaak het.

₂₉Ek was daar toe Hy gesê het hoe ver

die water van die see mag kom

en toe Hy die fondamente van die aarde

neergesit het.

₃₀Ek het alles by Hom geleer wat ek weet,

Hy was elke dag bly dat ek daar is,

dit was vir my lekker om altyd

naby Hom te wees.

₃₁Ek het dit geniet tussen die mense

wat op sy aarde woon,

dit was vir my lekker tussen die mense.

₃₂Daarom, kinders, julle moet luister na my.

Dit gaan goed met mense wat lewe soos ek lewe.

₃₃Julle moet luister na wat ek vir julle leer,

dan sal julle wysheid kry.

Julle moenie dit los nie.

₃₄Dit gaan goed met mense wat luister na my,

mense wat wakker bly en elke dag staan en wag

by my deure, die deure waardeur julle kan inkom

na my toe.

₃₅Want mense wat wysheid kry, kry die lewe,

en die Here hou van hulle.

₃₆Maar die mense wat nie wysheid wil hê nie,

is mense wat hulleself wil laat swaarkry.

Almal wat nie van my hou nie,

is mense wat lief is vir die dood.”