Job 24

“Hoekom besluit die Allerhoogste God nie

wanneer Hy wil oordeel nie?

Hoekom moet die mense wat Hom ken,

aanhou wag vir daardie tyd?

₂Mense vat ander mense se grond,

hulle steel skape en bokke

en laat hulle wei saam met hulle eie diere.

₃Hulle vat die weeskind se donkie,

hulle hou die weduwee se bees vir hulleself

omdat die weduwee geld skuld vir hulle.

₄Hulle gee nie vir die arm mense

'n plek om te lewe nie,

die mense in die land wat niks het nie,

moet wegkruip.

₅Die arm mense moet soos

wildedonkies lewe,

hulle moet in die woestyn kos gaan soek

vir hulleself en vir hulle kinders.

₆Hulle moet gras bymekaarmaak om te eet,

hulle moet die druiwe steel wat oorgebly het

in die wingerde van die ryk mense,

die mense wat verkeerd doen.

₇Die arm mense moet kaal slaap,

sonder klere,

hulle het nie komberse

wanneer dit koud is nie.

₈Hulle word waternat

wanneer dit hard reën in die berge,

hulle probeer om agter die rotse

weg te kruip.

₉Mense gryp die arm mense se kinders

uit hulle ma's se arms,

hulle maak die arm mense se kinders hulle slawe.

₁₀Die arm mense loop kaal,

hulle het nie klere nie,

die arm mense bring die ryk mense

se koring uit die land,

maar hulle self bly honger.

₁₁Hulle stamp olywe stukkend

tussen die mure,

hulle trap die druiwe

in die parskuipe,

maar hulle kry nie iets

om te drink nie.

₁₂Arm mense wat sterf,

kla en huil in die stad,

hulle het baie seerplekke

en hulle skree en vra

dat God hulle moet help,

maar God luister nie.

₁₃“Slegte mense hou nie van die lig nie,

hulle wil nie hê dat mense moet sien

wat hulle doen nie.

₁₄Die moordenaar staan op

voordat dit lig word,

en hy vermoor mense

wat hulleself nie kan help nie,

hy vermoor arm mense

en hy steel wanneer dit nag is.

₁₅Die persoon wat egbreuk wil pleeg,

wag totdat dit donker word,

hy dink niemand sal hom sien nie

en hy sit 'n sluier oor sy gesig.

₁₆Diewe wat inbreek,

werk in die donker

en hulle kruip weg in die dag,

hulle wil nie die lig sien nie.

₁₇Vir daardie mense is die donker

soos die oggend,

hulle weet hoe dit is om in die nag

bang te wees.”

₁₈“Hierdie slegte mense is soos dinge

wat lig is en vinnig op die water wegdryf.

God het hulle grond vervloek,

niemand gaan werk in hulle wingerde nie.

₁₉Wanneer dit droog en warm is,

dan smelt en verdwyn die sneeu.

Dit is dieselfde met sondaars,

hulle verdwyn in die doderyk.

₂₀Die sondaar se eie ma vergeet hom,

die wurms hou daarvan om hom te vreet,

niemand dink nog aan hom nie.

Die mens wat slegte dinge doen,

breek soos 'n stuk hout,

₂₁want hy het die goed gesteel

van die vrou wat nie kinders kon kry nie,

hy het nooit goed gedoen aan 'n weduwee nie.

₂₂Maar God is sterker as sterk mense.

Wanneer Hy besluit om iets te doen,

dan kan die mens wat slegte dinge doen,

nie aanhou lewe nie.

₂₃God laat daardie mens veilig voel,

hy dink dat God hom help,

maar God sien alles wat hy doen.

₂₄Mense wat verkeerde dinge doen,

is net 'n kort tydjie belangrik,

maar dan verdwyn hulle.

God laat hulle sterf

soos al die plante

wat droog word en verlep,

hulle sterf soos koring-are

wanneer mense dit afsny.

₂₅Dit is waar, niemand kan sê

dat ek nie die waarheid praat nie.”