Genesis 7

₁Toe Noag die ark klaar gemaak het, het die Here vir hom gesê: “Jy en jou hele huisgesin moet in die ark ingaan. Jy is die enigste man op die aarde wat reg lewe. ₂Jy moet sewe mannetjies en sewe wyfies van elke soort rein dier neem, en een mannetjie en een wyfie van elke soort onrein dier. ₃Jy moet ook sewe mannetjies en sewe wyfies van elke soort voël saamneem, sodat hulle kan aanhou lewe op die aarde. ₄Jy moet dit doen, want oor sewe dae sal Ek dit laat reën op die aarde. Dit sal 40 dae en 40 nagte aanmekaar reën. Ek sal alles wat lewe, alles wat Ek gemaak het, doodmaak en wegvee van die aarde af.”

₅Noag het alles gedoen wat die Here vir hom gesê het. ₆Noag was 600 jaar oud toe die watervloed oor die aarde gekom het. ₇Noag het in die ark ingegaan voordat die watervloed gekom het. Sy seuns en sy vrou en sy skoondogters het saam met hom in die ark ingegaan.

₈Al die rein diere, al die onrein diere, al die voëls en al die diere wat kruip, het na Noag toe gekom. ₉Hulle het twee-twee na Noag toe in die ark gekom, 'n mannetjie en 'n wyfie, soos God vir Noag gesê het. ₁₀Sewe dae daarna het dit begin reën, en die watervloed het oor die aarde gestroom. ₁₁Noag was 600 jaar oud en dit was die sewentiende dag van die tweede maand van die jaar. Die fonteine onder die grond het oopgegaan en die water het uitgekom. God het ook die water wat bokant die ronde dak is, op die aarde laat val. ₁₂Die reën het 40 dae en 40 nagte lank op die aarde geval. ₁₃Dit het begin reën dieselfde dag toe Noag in die ark ingegaan het saam met sy seuns Sem, Gam en Jafet, en ook sy vrou en sy drie skoondogters. ₁₄Hulle was saam met al die wilde diere, al die mak diere, al die diere wat kruip en al die voëls. ₁₅Al die diere het twee-twee na Noag toe in die ark gekom. ₁₆'n Mannetjie en 'n wyfie van elke soort dier het gekom, soos God vir Noag gesê het. Daarna het die Here die ark se deur agter hulle toegesluit.

₁₇Dit het 40 dae aanmekaar gereën, en die water het oor die aarde gestroom. Die water het meer en meer geword. Die water het die ark opgelig. ₁₈Die water het baie diep geword en die ark het bo-op gedryf. ₁₉Die water was bo-oor die hele aarde en oor al die hoë berge. ₂₀Dit het nog hoër geword en dit was later 15 el hoër as die berge. ₂₁Alles wat op die aarde lewe, het verdrink – al die diere wat kruip, al die voëls, die mak diere, die wilde diere en ook al die mense. ₂₂Alles wat asemhaal, het verdrink. ₂₃God het alles doodgemaak wat op die aarde gelewe het. Al die mense, al die diere en al die voëls het verdrink. Net Noag en almal wat by hom in die ark was, het oorgebly. ₂₄Die water was 150 dae lank oor die aarde.