Genesis 33

₁Jakob het gekyk en hy het vir Esau gesien wat na hom toe aankom. Daar was 400 manne by Esau. Jakob het toe die kinders verdeel tussen Lea en Ragel en die twee slavinne. ₂Hy het die slavinne en hulle kinders voor laat loop. Agter hulle het Lea en haar kinders geloop, en Ragel en Josef was laaste. ₃Jakob het voor hulle geloop en hy het sewe maal laag gebuig, tot hy by sy broer gekom het. ₄Esau het na hom toe gehardloop en hy het vir Jakob omhels. Hy het sy arms om Jakob se nek gesit en hom gesoen, en hulle het gehuil. ₅Toe Esau kyk, sien hy die vroue en die kinders en hy vra: “Wie is hierdie mense by jou?”

Jakob het geantwoord: “Dit is die kinders wat God vir my gegee het. God was baie goed vir my.”

₆Toe kom die slavinne en hulle kinders nader en hulle buig voor Esau, ₇en ná hulle kom ook Lea en haar kinders nader en hulle buig. Laaste het Josef en Ragel nader gekom en hulle het gebuig.

₈Toe vra Esau: “Hoekom het jy al daardie goed vir my gegee?”

En Jakob antwoord: “Dit is 'n present sodat Meneer vriendelik sal wees met my.”

₉Toe sê Esau: “My broer, ek het self baie goed. Hou dit alles, dit moet joune bly.”

₁₀Maar Jakob het gesê: “Nee, as Meneer vriendelik wil wees met my, dan moet jy asseblief my present aanvaar, want ek het dit vir jou gegee soos 'n mens iets vir God gee. En jy was vriendelik met my. ₁₁Neem asseblief die present wat ek vir jou gebring het, want God was goed vir my, en ek het alles wat ek moet hê.”

So het Jakob aangehou, en Esau het toe die present geneem.

₁₂Esau het vir Jakob gesê: “Kom ons gaan verder. Ek sal voor jou gaan.”

₁₃Maar Jakob het vir hom gesê: “Meneer, jy weet die kinders by ons is klein en swak. Ek moet ook nog die skape en beeste oppas, en die lammers en kalwers wat aan hulle suip. Hulle sal doodgaan as ek hulle net een dag te vinnig aanjaag. ₁₄Meneer, gaan asseblief voor my. Dan kan ek stadig agter jou loop, so vinnig soos die diere en die kinders kan loop, totdat ek by Meneer in Seïr-land kom.”

₁₅Toe sê Esau: “Ek sal party van my manne by jou laat bly.”

Maar Jakob sê: “Hoekom wil jy dit doen? Glo my asseblief.”

₁₆Esau het daardie dag teruggegaan na Seïr-land. ₁₇Jakob het na 'n ander plek gegaan en hy het daar vir hom 'n huis gebou. Hy het takke geneem en hy het veekrale gemaak vir sy skape en bokke. Daarom het hulle die plek Sukkot genoem.

₁₈Jakob het later veilig aangekom in Sigem se stad in Kanaän. Hy het van die stad Paddan-Aram daarnatoe gegaan. Hy het sy tente naby die stad opgeslaan. ₁₉Hy het die stuk grond gekoop waar hy sy tente opgeslaan het. Hy het dit gekoop by die seuns van Gamor, Sigem se pa. Hy het 100 kesita daarvoor betaal. ₂₀Jakob het daar 'n altaar gebou en hy het dit genoem “Die God van Israel is God, net Hý is God.”