Genesis 10

₁Hier is 'n lys van die nageslag van Noag se seuns, Sem, Gam en Jafet. Ná die watervloed het hulle kinders gehad.

₂Jafet se nageslag was die mense van Gomer en Magog, die Mediërs, die Grieke en die mense van die lande Tubal, Mesek en Tiras.

₃Gomer se nageslag was die mense van die lande Askenas, Rifat en Togarma. ₄Elisa en Tarsis, die Kittiërs en die Dodaners was afstammelinge van die Grieke. ₅Party van hierdie mense het oral in ander lande en naby die see gaan woon. Daar was verskillende families en volke. Elke volk het in sy eie land gewoon en het sy eie taal gepraat.

₆Gam se nageslag was die mense van die lande Kus, Egipte, Put en Kanaän.

₇Kus se nageslag was die mense van die lande Seba, Gawila, Sabta, Rama en Sabteka. Rama se nageslag was die mense van die lande Skeba en Dedan. ₈Kus het ook 'n seun gehad, sy naam was Nimrod. Hy het 'n baie sterk en belangrike man geword. ₉Hy was 'n goeie jagter. Die Here het hom so gemaak. Daarom, as iemand goed kan jag, dan sê die mense: “Hy is 'n goeie jagter, soos Nimrod.”

₁₀Nimrod was eers die koning van die stede Babel, Erek, Akkad en Kalne in die land Babel. ₁₁Hy het uit die land Babel na die land Assirië gegaan en hy het die stede Nineve, Regobot-Ir en Kalag gebou. ₁₂Hy het ook die stad Resen tussen Nineve en Kalag gebou. Resen was 'n groot stad.

₁₃Die mense van Egipte was die voorvaders van die Ludeërs, die Anammers, die Lehabeërs, die Naftoagiete, ₁₄en die mense van die lande Patros, Kasluag en Kaftor. Die mense van Kasluag was die voorvaders van die Filistyne.

₁₅Die mense van Kanaän was die voorvaders van die mense van die lande Sidon en Het. Sidon was die oudste. ₁₆Kanaän was ook die voorvader van die Jebusiete, die Amoriete, die Girgasiete, ₁₇die Hewiete, die Erekiete, die Siniete, ₁₈die Arwadters, die Semariërs en die Hamatters. Later het Kanaän se families oral gaan woon. ₁₉Die grense van hulle grond was van die land Sidon tot by die stad Gasa naby die stad Gerar, en tot by die stad Lesa naby die stede Sodom, Gomorra, Adma en Sebojim.

₂₀Al hierdie mense was die nageslag van Gam. Elke familie het sy eie taal gepraat en het in sy eie land gewoon. Hulle het verskillende volke geword.

₂₁Sem het ook 'n nageslag gehad. Hy was die voorvader van al die Hebreërs. Sem se oudste broer was Jafet. ₂₂Sem se nageslag was die mense van die lande Elam, Assirië, Arpaksad, Lud en Aram.

₂₃Aram se nageslag was die mense van die lande Us, Gul, Geter en Mas.

₂₄Arpaksad was die pa van Selag, en Selag was die pa van Heber. ₂₅Heber het twee seuns gehad. Die een seun se naam was Peleg. In die tyd toe Peleg gelewe het, het hulle die land verdeel. Peleg se broer was Joktan.

₂₆Joktan was die pa van Almodad, Selef, Gasarmawet, Jerag, ₂₇Hadoram, Usal, Dikla, ₂₈Obal, Abimael, Skeba, ₂₉Ofir, Gawila en Jobab. Hulle was almal Joktan se nageslag. ₃₀Hulle het gewoon tussen Mesa en Sefar, in die berge in die ooste.

₃₁Sem was die voorvader van al hierdie mense. Elke familie het sy eie taal gepraat en het in sy eie land gewoon. Hulle het verskillende volke geword.

₃₂Dit is die nageslag van Noag se seuns. Hulle was die voorvaders van al die volke wat ná die watervloed oral op die aarde gaan woon het.