Esegiël 24

₁Ek het gehoor die Here praat met my. Dit was in die negende jaar, in die tiende maand, op die tiende dag van die maand. Hy het gesê: ₂“Mens, jy moet opskryf watter dag dit is, presies hierdie datum. Die koning van Babel het Jerusalem vandag aangeval. ₃Jy moet vir hierdie opstandige volk 'n gelykenis vertel. Jy moet vir hulle sê: Die Here, Hy wat Here is, sê: Jy moet 'n pot op die vuur sit, jy moet dit opsit en jy moet water daarin gooi. ₄Dan moet jy die stukke vleis in die pot sit, boude en skouerblaaie, jy moet dit volmaak met die beste vleis en bene. ₅Jy moet van die beste skape en bokke neem, jy moet hout onder die pot pak, en jy moet alles kook. Jy moet die vleis en die bene in die pot gaarmaak.”

₆Die Here, Hy wat Here is, sê: “Waarlik, dit sal sleg gaan met die stad waar baie mense se bloed gevloei het. Die stad is soos 'n pot wat geroes is, die roes kan nie afkom nie. Jy moet elke stuk vleis uithaal, jy moenie uitsoek en kies nie. ₇Want die mense in die stad het mense vermoor, en hulle het die bloed van daardie mense op 'n kaal rots laat bly lê, hulle het nie die bloed op die grond uitgegooi sodat die stof dit kan toemaak nie. ₈Ek het die bloed daar op die kaal rots laat bly waar almal dit kon sien. Die bloed moes My baie kwaad laat word, sodat Ek hulle sal straf.”

₉Die Here, Hy wat Here is, sê: “Daarom, dit sal sleg gaan met die bloedstad. Ek sal self 'n groot vuur maak. ₁₀Jy moet baie hout bring, jy moet die vuur aansteek en die vleis gaarmaak. Jy moet speserye by die vleis gooi en jy moet die bene verbrand. ₁₁Dan moet jy die pot leegmaak en jy moet dit op die vuur laat staan sodat dit baie warm kan word. Doen dit sodat die pot rooiwarm word en alles kan smelt wat die pot onrein maak. Dan sal die roes kan afkom. ₁₂Iemand wat probeer om die roes af te brand, sal hard probeer en moeg word, maar die roes aan die pot sal nie afkom nie. ₁₃Jy, Jerusalem, is onrein, jy het slegte dinge gedoen. Dit is die roes aan die pot. Ek wou jou rein laat word, maar jy het nie rein geword nie en jy sal nie rein word nie. Ek is kwaad en Ek sal jou straf. ₁₄Ek, die Here, het gepraat. Jou straf sal kom, Ek sal dit doen. Ek sal dit nie los nie, Ek sal nie jammer wees vir jou nie, Ek sal nie my plan verander nie. Ek sal jou straf oor die dinge wat jy gedoen het.”

Dit het die Here gesê, Hy wat Here is.

₁₅Ek het gehoor die Here sê vir my: ₁₆“Mens, Ek weet jy is baie lief vir iemand. Ek wil daardie persoon skielik wegneem, maar jy moenie rou en huil nie, jou trane moenie vloei nie. ₁₇Jy moet saggies kla en sug sodat niemand jou hoor nie, jy moenie huil en treur nie. Jy moet jou tulband op jou kop hou en jy moet jou skoene aan jou voete hou. Jy moenie jou gesig toemaak nie en jy moenie begrafnis-kos eet nie.”

₁₈Ek het in die oggend met die volk gepraat, en my vrou het daardie aand gesterf. Die volgende oggend het ek gedoen wat die Here vir my gesê het. ₁₉En toe vra die mense vir my: “Sê asseblief vir ons, wat beteken hierdie dinge wat jy doen, wat beteken dit vir ons?”

₂₀Ek het toe vir hulle gesê: “Ek het gehoor die Here sê vir my: ₂₁Jy moet vir die volk Israel sê: Die Here, Hy wat Here is, sê: Julle is trots op my tempel, julle dink die tempel beskerm julle. Julle is lief vir die tempel en julle is bly dat dit hier is. Maar Ek sal die tempel laat ontwy. Die vyande sal julle wegvat, en julle seuns en dogters wat in die stad oorbly, sal in oorlog sterf. ₂₂Dan sal julle doen wat ek nou doen. Julle sal nie julle gesigte toemaak nie en julle sal nie begrafnis-kos eet nie. ₂₃Julle tulbande sal op julle koppe wees en julle skoene sal aan julle voete wees. Julle sal nie rou en huil nie. Julle sondes sal julle swak laat word, julle sal by mekaar sit en kla. ₂₄Esegiël sal vir julle 'n teken wees. Julle sal doen wat hy nou doen. Wanneer dit gebeur, dan sal julle weet dat Ek die Here is, Hy wat Here is. ₂₅En jy, mens, hulle dink die tempel beskerm hulle. Die tempel is vir hulle mooi en hulle is bly dat dit daar is, hulle is lief vir die tempel en dit maak die lewe vir hulle mooi. Maar Ek sal dit wegvat van hulle, en Ek sal ook hulle seuns en hulle dogters wegvat. ₂₆Wanneer Ek dit doen, dan sal iemand wat vry weggekom het uit Jerusalem, na jou toe kom en hy sal die slegte nuus vir jou vertel. ₂₇Daardie dag sal jy weer kan praat. Jy sal met die man praat en jy sal vir jou mense 'n teken wees, en hulle sal weet dat Ek die Here is.”