2 Kronieke 4

₁Salomo het 'n altaar van brons laat maak. Die altaar was 20 el lank en 20 el breed en tien el hoog. ₂Hy het ook 'n waterbak laat maak. Die waterbak was rond en dit was tien el van die een kant tot by die ander kant. Dit was vyf el hoog en dit was 30 el rondom. ₃Onder teen die waterbak was daar beelde van beeste. Daar was tien beeste op elke el. Die beeste was in twee rye, en hulle het dit ook gemaak van brons, soos die waterbak. ₄Die waterbak het gestaan op die beelde van twaalf beeste. Drie beeste het noord gekyk, drie beeste het wes gekyk, drie beeste het suid gekyk en drie beeste het oos gekyk. Die beeste was onder die waterbak, en hulle boude was na die binnekant. ₅Die waterbak se rand was een sesde el dik, en die rand was soos die rand van 'n beker. Die rand het gelyk soos 'n lelieblom. Die waterbak het 3 000 bat water gehou.

₆Salomo het tien was-skottels laat maak. Hy het vyf skottels regs langs die waterbak neergesit, en vyf skottels links. Die priesters moes die gereedskap vir die brand-offer afspoel in die skottels. Die priesters moes hulleself in die waterbak was. ₇Salomo het ook die goue lampstaanders laat maak soos die Here gesê het hulle moet wees. Hy het die lampstaanders in die voorste kamer van die tempel gesit, vyf regs en vyf links. ₈Hy het tien tafels gemaak en hy het hulle in die voorste kamer gesit, vyf regs en vyf links. Hy het ook 100 goue bakke laat maak. ₉Hy het die mure laat bou rondom die oop stuk grond waar die priesters kon kom, en rondom die groot oop stuk grond waar ander Israeliete ook kon kom. Daar was deure in die mure, en hy het die deure met brons-plate laat toemaak. ₁₀Hy het die waterbak laat neersit by die regter-kant, suid-oos van die tempel. ₁₁Hiram het potte en grawe en bakke gemaak. Hy het die werk klaargemaak wat hy vir koning Salomo by die tempel moes doen. ₁₂Hy het die twee pilare gemaak, die bakke en die kapitele bo-op die pilare, die nette wat die bakke bo-op die twee kapitele toemaak, ₁₃die 400 granate vir die nette, twee rye granate op elke net wat die bakke bo-op die kapitele toemaak, ₁₄die staanders en die was-skottels op die staanders, ₁₅die waterbak, die twaalf beeste onder die waterbak, ₁₆die potte, die grawe en die vurke en al die ander gereedskap. Die meester-ambagsman Hiram het dit vir koning Salomo gemaak om in die tempel te gebruik. Hy het dit gemaak van brons wat hy blink gevryf het. ₁₇Die koning het al die goed laat smelt in die kleigrond tussen die stad Sukkot en die stad Saretan. ₁₈Salomo het al hierdie goed laat maak. Dit was baie, ja, die brons was te veel, hulle kon dit nie alles weeg nie. ₁₉Salomo het ook al die goed laat maak wat in die tempel moes kom: Dit was die goue altaar, die tafels vir die offer-brood, ₂₀die lampstaanders en hulle lampe wat moes brand voor die binnekamer. Salomo het alles van skoon goud gemaak, ₂₁dit was die blomme en die lampe en hulle goue tangetjies, alles was heeltemal van goud. ₂₂Die skêre, die bakke, die panne en die vuurbakke was ook alles van skoon goud. Die ingang van die voorste kamer, die binnedeure na die hoog-gewyde kamer en die deure van die voorste kamer was alles van goud.