Mary Jones le Bibele ya gagwe

Ka nako e nngwe, kgalekgale, mosetsana yo a bitšwago Mary o be a dula kgolekgole nageng, ye e bitšwago Wales, le mmagwe le tatagwe. Ba be ba se na tšhelete e ntši. Go be go se na sekolo kgauswi le moo Mary a bego a dula gona, ka gona o be a sa kgone go bala le go ngwala.

Sontaga se sengwe le se sengwe, Mary o be a eya kerekeng la batswadi ba gagwe. Moo, o be a theeletša moruti a bala go tšwa Bibeleng. Mary o lekile go gopola dikanegelo ka moka tše moruti a di badilego ka karekeng, eupša go be go le boima.

Ka letšatši le lengwe, tatago Mary o fihlile gae a swere ditaba tše botse. Sekolo se be se bulwa motseng wa gabo!

“Mafelelong ke tla ithuta go bala le go ngwala!” gwa nagana Mary. “Bjale ke tla bala dikanegelo tša Bibele ka bonna!”

Mehleng yeo, le ge go le bjalo, dipuku di be di tura. Mohumagadi Evans, yo a bego a dula kgauswi, o be a na le mahlatse kudu go ba le Bibele. O be a tseba ka fao Mary a ratago dikanegelo tša Bibele. Ke letšatši le lengwe, o laleditše Mary ntlong ya gagwe go tla a tlo bala go tšwa Bibeleng.

“Ke duma o ka re ke be ke na le Bibele ye e lego ya ka!” Mary a realo.

Gona moo, o tšere sephetho sa go dira se sengwe le se sengwe go hwetša Bibele ye e lego ya gagwe.

Mary o šomile ka thata go boloka tšhelete. O kgobokeditše dikgong le mae, gomme a di rekiša mmarakeng. Gape o be a roka diaparo le go hlokomela bana.

Mafelelong, morago ga mengwaga ye tshela, o be a na le tšhelete ye e lekanego go reka Bibele. Eupša, go be go se na diBibele toropong ya gabo. Mary o be a swanetše go sepela go ya toropong ya kgole ye e bitšwago Bala, go yo reka Bibele. Mehleng yeo, go be go se na dikoloi goba dipese, gomme o be a swanetše go sepela ka maoto.

O sepetše a sa rwala dieta letšatši ka moka ditsejaneng tša dithaba tša maswika, a boloka dieta tša gagwe gore o tla di apara ge a fihla Bala. A lapile le go swara ke tlala, Mary o fihlile Bala pele letšatši le dikela.

Mesong ye e latelago, Mary o kitimile go yo bona Moruti Charles yo a bego a tla mo rekišetša Bibele. “Ke mo go tlo reka Bibele, gore ke bale Bibele nako le nako ge ke nyaka.”

“Ke maswabi, eupša ke feletšwe ke diBibele,” Moruti Charles a araba.

Mary o kwele bohloko kudu! O ile a lla. “Eupša ke tšwa kgolekgole. Ke be ke boloka tšhelete mengwaga ye tshela.”

Moruti Charles o bone ka fao Bibele e bego e le bohlokwa go Mary gomme a tšea sephetho sa go mo thuša. “Ke tla go nea ye nngwe ya diBibele tša ka, Mary.”

“Ke a leboga Morena Charles. Ke leboga go menagane! Ke leboga kudukudu!”

Mary yo a thabilego o tšere Bibele a boela morago go batswadi ba gagwe. Bjale, o be a se sa letela Sontaga ka kerekeng, o be a bala Bibele nako le nako ge a be a nyaka.

Morago ga ketelo ya Mary, Moruti Charles o ile kopanong moo baruti go ralala le naga ba bego ba bokane. Moo, o anegile kanegelo ya Mary. Baruti ka moka ba tšere sephetho sa go hwetša diBibele tše ntši ka ditheko tša tlase go batho ba Wales.

Yo mongwe wa baruti o rile, “Ge re direla Wales, go reng e se lefase ka bophara?”

Ke ka fao Mokgatlo wa Bibele wa pele o thomilego ka gona. Lehono, go na le Mekgatlo ya Bibele ya go feta ye 140 lefase ka bophara ye e thušago batho bjalo ka Mary.

Mešongwana: