Jesu o a belegwa

Josefa le Maria ba ile ba tloga motseng wa Nasaretha ba ya go wa Betlelehema. Ge ba fihla Betlelehema ba hwetša ka ntlong ya baeng go tletše go se na phapoši ye ba ka dulago ka go yona.

Kua Betlelehema Maria a belega ngwana wa mošemane. A mo phuthela ka mašela, a mo robatša ka legopong.

Badiša ba bangwe ba be ba letše kua merakeng. Ba be ba dišitše mehlape ya bona.

Morongwa wa Morena a iponagatša go bona. Letago la Morena la ba bonegela. Ba boifa kudu.

Morongwa yoo a re go bona: “Le se ke la boifa! Ke le tlišeditše taba ye botse. Lehono kua Betlelehema go tswetšwe Jesu. Ke yena Morena. Le tla mo hwetša a phuthetšwe ka mašela, a robaditšwe ka legopong.”

Gateetee gwa tšwelela sehlopha sa barongwa ba go tšwa legodimong, ba opela ba re: “A go tumišwe Modimo legodimong la godimodimo, gomme lefaseng khutšo e tlele bao ba mo kgahlago.”

Ke moka barongwa bale ba gomela legodimong. Ya ba badiša ba a botšana ba re: “A re yeng Betlelehema re yo bona se se hlagilego.”

Ba nama ba itlhaganela ba tloga, gomme ba hwetša Maria le Josefa, ba bona le ngwana a robetše ka legopong.

Boradinaledi ba bangwe ba tla ba nyaka Jesu. Ba be ba etšwa kgole bohlabela. Ba bona naledi. Naledi yeo ya ba thuša go hwetša moo Jesu a lego gona.

Naledi yeo e ile ya eta boradinaledi bale pele, ya fihla ya ema ka godimo ga felo moo ngwana a bego a le gona. E rile ge banna bao ba bona naledi yeo, ba thaba kudu.

Banna bale ba tsena ka ntlong. Ge ba bona ngwana le Maria, mmagwe, ba mo khunamela.

Ba nama ba ntšhetša ngwana dimpho. E be e le gauta le setlolo le seorelo.

Lukase 2:1-18

Mateu 2:1-12

Mešongwana:

Diswantšho ka Annie Vallotton © Bible Society of South Africa
Go tlotša seswantšho ka mebala © 2018, Bible Society of Brazil (SBB)
Ditokelo tšohle di šireleditšwe.  www.sbb.org.br  E šomišwa ka tumelelo.