An eye on eternity - 23 November 2023

₁₀Ke a bona gore Modimo o file batho mešomo ye e lapišago gore ba e dire.

₁Ka buša ka nagana ka mo batho ba hlakišwago ka gona mo lefaseng. Bahlakišwa ba be ba lla, eupša mohomotši a se gona; ba se na wa go ba homotša, ka ge bahlakiši ba bona e le diganka. ₂Ke mo ke naganego gore ba ba hwilego ba na le mahlatse, ka gobane ba ithobaletše, ba na le mahlatse go phala ba ba sa phelago. ₃Eupša ba ba phalago bao bohle ke ba ba se ba kago ba tswalwa, ba ba se ba kago ba bona dilo tše mpe tše di dirwago mo lefaseng.

₄Ke lemogile le gore batho ba katanela go tšwelela ka ge ba tsebafelana. Gomme le sona seo ke lefeela, se swana le go phuthela phefo ka kobo. ₅Lešilo le phutha matsogo, gomme le hwa lehu la tlala. ₆Go kgotsofatšwa ke bonnyane bjo o nago nabjo go phala go katana kudu, gona go swanago le go phuthela phefo ka kobo.

₇Sengwe se ke lemogilego gore ke lefeela lefaseng ₈ke mmotlana, mohlokamorwa, mohlokamorwarragwe. Fela ke madulaakatana, a sa kgotsofale ka ruo la gagwe. O ipotšiša a re: “Ke katanela mang, ge ke itlhokiša boipshino bjale?” Seo le sona ke lefeela, ke go itapišetša lešidi.

₉Babedi ba phala o tee, gobane ge ba katana mmogo ba tla tšwelela. ₁₀Mongwe ge a wele o tla tsošwa ke mongwekayena; kganthe motee ge a wele, ke dibonwakeyena, gobane yena o tla hloka motsoši. ₁₁Le marobalong, ge babedi ba robetše mmogo ba a ruthetšana; motee yena a ka ruthela bjang? ₁₂Motee a ka fenywa ke mohlasedi, eupša babedi ba ka mo palela. Gape thapo ya melogo ye meraro ga e kgaoge fela.

₁₃Lesogana la go itlhakela eupša le hlalefile le phala kgoši ya mokgalabje ya lešilo, ye e se sa dumelago go eletšwa. ₁₄Lona le ka no ba le etšwa kgolegong go tlo ba kgoši, le ge le tswaletšwe mohlakong mmušong wa kgoši yela. ₁₅Ke ile ka bona bohle ba go phela lefaseng ba ema le lesogana leo la go hlatlama kgoši. ₁₆La buša batho ba ba sa balwego, fela ba go tla ka morago ba se le rate. Ye taba le yona ke lefeela, e dio ba go phuthela phefo ka kobo.

₁₇Ge o eya ntlong ya Modimo o itlhokomele. Go yela go theeletša go phala go yo dira dihlabelo bjalo ka mašilo a go se lemoge sebe se a se dirago.

₁O nagane pele o bolela, gomme o se potlakele go tshepiša Modimo. Yena o kua legodimong, kganthe wena o mo lefaseng; ka gona, o se ke wa bolela go feta ka mo o swanetšego. ₂Ge o balabala kudu o tla lora ditoro tše mpe, le ge o bolela kudu o tla no fela o bolela tša botlaela. ₃Ka gona, ge o enetše Modimo keno, o hlaganele go e phetha, gobane yena ga a kgahlwe ke mašilo. Wena o phethe se o ikannego ka sona. ₄Go kaone gore o se ikane go na le gore o re go ikana o se phethe keno ya gago. ₅O se ke wa dirišwa ke dipolelo tša gago sebe, mo o ka bago wa tla wa botša motseta wa Modimo gore ga se wa dira ka boomo. O reng o dira gore Modimo a go galefele, a fediše tše o di dirilego? ₆Go lora kudu ga go hole selo, gomme go bolediša motho kudu. Wena sa gago a e be go boifa Modimo.

₇Ge o ka bona badiidi ba gateletšwe ebile ba hlokišwa toka le ditshwanelo mo nageng ya geno, o se makale, gobane mohlankedi yo mongwe le yo mongwe o emelelwa ke mookamedi wa gagwe, gomme ka babedi ga bona ba emelelwa ke bahlankedi ba ba ba okametšego.

₈Se se holago naga kudu ke ge kgoši ya gona e rata temo.

₉Motho yo a ratago tšhelete o dula a e galala; yo a ratago lehumo ga a ke a ipshina ka lona. Seo le sona ke lefeela. ₁₀Yo a atelwago ke lehumo o atelwa le ke baji ba lona. Ga le mo hole ka selo, ge e se go le boga. ₁₁Mošomi o robala boroko, le ge a eja ka bosese, goba a khora. Mohumi yena o ja go feta tekanyo mo e lego gore o šitwa ke go robala.

₁₂Go na le taba ya go kweša bohloko kudu ye ke e bonago mo lefaseng: Motho o ikgobokeletša lehumo, mme le tle le mo tlišetše masetlapelo; ₁₃a le lobe ka madimabe. A re go tswala morwa a hloke se a ka mo šadišetšago sona. ₁₄Bjalo ka ge a tswetšwe a le fela, o tla tloga a le fela. Le ge a katane bjang le bjang, ga go se a ka tlogago le sona. ₁₅Se sengwe sa go kweša bohloko kudu ke ge motho a tloga ka mokgwa wola a tlilego ka wona. Go katana go mo thušitše eng? E dio ba go phuthela phefo ka kobo. ₁₆Godimo ga moo bophelo bja gagwe o bo phetše bošuleng le mahlokong a mantši a balabala, a selekegile kudu.

₁₇Ka gona nna ke fetša ka go re: Se se loketšego motho gape se mo lebanego ke go ja le go nwa le go ipshina ka tše a di katanetšego bophelong bjo bokopana bjo Modimo a mo filego bjona, ka ge go mo lebane. ₁₈Ge Modimo a file motho mahumo le thoto mme a mo dumeletše go ipshina ka tšona, le go leboga tše a di filwego, le go ipshina ka tše a di katanetšego, tšeo ke mpho ye e tšwago go Modimo. ₁₉Ka ge Modimo a mo phediša ka lethabo, a ka se hlwe a hlobaetšwa ke bokopana bja bophelo bjono.

₁Go na le ye nngwe taba ye e kwešago batho bohloko ye ke e bonago mo lefaseng: ₂Ke ge Modimo a efa motho lehumo le thoto le bohlomphegi – tšohle tše motho a di nyakago – fela a se ke a mo dumelela go ipshina ka tšona, di lewe ke motho o šele. Ye taba ke lefeela, ke masetlapelo a magolo. ₃Le ge motho a ka tswala bana ba lekgolo a ba a phela nako ye telele, le ge a ka tšofala bjang le bjang, ge a se a ka a ipshina ka menate ya bophelo le gona a se a bolokwa gabotse, gona ke re o phalwa le ke sefolotšana; ₄gobane go tswalwa ga sona ga go thuše selo, ga se bone seetša, le go rewa leina ga se rewe, ₅le letšatši ga se le bone, ga se tsebe selo, fela se ikhuditše go phala yena. ₆Yena, le ge a be a ka phela mengwaga ye sekete a e boeletša a sa ipshine ka bophelo, a ke re o ya felo gotee le sefolotšana?

₇Motho o itapiša go dio hwetša diyamaleng, le ge go le bjalo ga a khore. ₈Na mohlalefi o phala setlaela ka eng? Modiidi yena go mo thušang go tseba go phedišana le batho? ₉Go kgotsofala ka tše o nago natšo go kaone go phala go ba le pelo ye telele, gobane go ba le megabaru le gona ke lefeela, ke go phuthela phefo ka kobo.

₁₀Tšohle tše di lego gona di šetše di theilwe maina, le gona go a tsebja gore motho ke motho, mme a ka se sekišane le yo a mo fetago ka maatla. ₁₁Go bolela kudu ke go itshwenya, gomme go hola motho ka eng? ₁₂Kgane ke mang yo a tsebago tše di holago motho bophelong bjo bokopana bjo bja go se re selo, bja go feta bjalo ka moriti? Ke mang yo a ka mmotšago se se tlago hlaga mo lefaseng ge yena a hwile?

₁Seriti se phala senkgabose sa theko ye kgolo, le letšatši la go hwa ga motho le phala la go tswalwa ga gagwe. ₂Go ya lapeng la mahloko go phala go ya go la monyanya, ka gobane ba ba phelago ba swanetše go dula ba ikgopotša gore lehu ke mafelelo a bohle. ₃Manyami a phala lesego; motho le ge a bonala a nyamile, ka pelong a ka no ba a thabile. ₄Wa go dula a nagana ka lethabo ke setlaela. Wa go nagana ka lehu yena ke mohlalefi. ₅Go solwa ke mohlalefi go phala go retwa ke ditlatla. ₆Lesego la lešilo le swana le go thathapa ga meetlwa sebešong. Le sona seo ke lefeela. ₇Kgatelelo e ka diriša mohlalefi tša bošilo. Tsogolekobong le sentšha motho. ₈Mathomo a selo a phalwa ke mafelelo a sona. Bopelotelele bo phala boikgogomošo. ₉Se phakiše go ngongorega; go ba le metsoto ke botlaela. ₁₀O se ke wa re: “Mehleng yeno go reng go phalwa ke mehleng yela?” Yeo ga se potšišo ye bohlale.

₁₁Bohlale, go no swana le bohwa, ke selo se sebotse, gomme bo hola bohle ba ba phelago. ₁₂Bjalo ka ge tšhelete e šireletša motho, bohlale le bjona bo bjalo. Go tseba go na le mohola wa go re bohlale bo lota mong wa bjona.

₁₃Akanya tše Modimo a di dirilego. Kgane ke mang yo a ka otlollago se se kgopamišitšwego ke Modimo? ₁₄Ge go iketlilwe o thabe, gomme ge go etla bothata o gopole gore boiketlo le bothata di romelwa ke Modimo. Ke ka lebaka leo motho a sa kgonego go tseba se se tlago mo hlagela.

₁₅Bophelong bjo bja ka bja go se re selo ke bone dilo tše dintši – moloki o a hwa etšwe a lokile, gwa re yo kgopo a šale a phela etšwe e le yo mobe. ₁₆Ka gona, o se ke wa loka go feta tekanyo, goba wa hlalefa go feta tekanyo – o tla be o ipolaelang? ₁₇Le gona o se ke wa ba yo mobe kudu, goba wa ba setlaela – o tla be o hwela eng nako ya gago e sešo ya fihla? ₁₈Ke mo gobotse go phetha taelo yela ya mathomo, o sa tlogele ye ya bobedi. Gomme yo a boifago Modimo o tla atlega go tšona ka dipedi.

₁₉Motho yo bohlale o holega kudu ka bohlale bja gagwe go feta motse wo o holegago ka balaodi ba lesome. ₂₀Ruri, mo lefaseng ga go mothomoloki modiratšebolo yo a sa kego a dira sebe.

₂₁O se ke wa šetša se sengwe le se sengwe se se bolelwago ke batho, ka gore o ka tla wa kwa le ge mohlanka wa gago a go roga, ₂₂gobane ka pelong o a tseba gore le wena ke gantši o roga batho.

₂₃Tšohle tše ke di lekotše ka temogo ya ka. Ke be ke nyaka go ba yo bohlale, eupša ka palelwa. ₂₄Tše di hlagilego kgale di kgole, di tebile, ga di kwešišege – di ka fihlelelwa ke mang? ₂₅Fela nna ke ile ka ikgafela go tseba le go nyakišiša; ka ikemišetša go tsoma bohlale le temogo, ka hwetša gore bokgopo ke botlaela, le bošilo ke bogafi.

₂₆Ka lemoga ge se se fetišago lehu ka bohloko e le mosadi yo lerato la gagwe e lego moreo le moutlo, yo matsogo a gagwe nkego ditlemo. Yo a kgahlago Modimo o phonyokga mosadi yoo, modiradibe yena o a mo tanya. ₂₇Mmoledi o re: Seo ke se ke se lemogilego ka go bapiša sengwe le sengwe gore ke tle ke kwešiše ka mo dilo di lego ka gona. ₂₈Seo e lego kgale ke se nyaka mme ke se ka hlwago ke se hwetša sese: Gare ga batho ba sekete, monna wa nnete ke hweditše o tee; ge e le mosadi wa nnete mo gare ga bao bohle, yena ke mo hlokile. ₂₉Se ke ithutilego sona fela sese: Modimo o hlodile batho ba lokile, eupša bona ba itirela mathaithai a mantši.

₁Ke mang yo a swanago le monna yo bohlale? Yo a kgonago go hlatholla dilo yena ke mang? Bohlale bja motho bo mo ediša sefahlego, bo mo dira le gore a se šinyalale.

₂Phetha taelo ya kgoši, ka gobane o ikanne ka Modimo. ₃O se potlakele go tloga go kgoši. O se ngangabale tabeng ye mpe, ka gobane kgoši e dira se e se ratago. ₄Lentšu la kgoši le agelwa lešaka, kgane ke mang yo a ka mo sekišago ge a dira tša gagwe? ₅Yo a phethago melao ya gagwe a ka se tsene mathateng; motho yo bohlale le yena o tseba nako ya gona le mokgwa. ₆Dilo tšohle di na le nako ya tšona le mokgwa wa go di dira, le ge motho yena a tshwenywa kudu ₇ke go se tsebe tša ka moso, ka ge go se yo a ka mmotšago tšona. ₈Ga go motho yo a ka thibelago lehu la gagwe, goba a diegiša letšatši la gagwe la go hwa. Ge go lwewa ga go mohlabani yo a dumeletšwego go ya gae, le modiratšekgopo a ka se phološwe ke bokgopo bja gagwe.

₉Tšeo ka moka ke di bone ge ke ntše ke nagana ka tšohle tše di dirwago mo lefaseng, ge motho a laola yo mongwe, a mo hlakiša. ₁₀Ke bone le bakgopo ba yo bolokwa mabitleng, mola baloki bona ba tloga motseng mme ba lebalwa. Seo le sona ke lefeela.

₁₁Ka ge disenyi di diegelwa go otlwa, batho ba ikgafela bosenyi. ₁₂Modiradibe o senya gantšintši mme a no tšwela pele le go phela, fela nna ke tseba gore ba ba theeletšago Modimo ke bona ba ba tlago phela gabotse ka lebaka la tlhompho ya bona. ₁₃Fela yo kgopo yena di ka se mo sepelele gabotse, le bophelo bja gagwe bo ka se telefale bjalo ka moriti, ka ge a sa theeletše Modimo. ₁₄Go na le se sengwe sa lefeela mo lefaseng: Nako ye nngwe moloki o hlagelwa ke se se swanetšego yo kgopo, yo kgopo a hlagelwe ke se se swanetšego moloki. Nna ke re seo le sona ke lefeela.

₁₅Ka gona, ke re go botse ge batho ba ithabiša, gobane mo lefaseng ga go se sekaone go phala go ja, le go nwa, le go ithabiša. Se sona a ka se kgona ge a sa ntše a katana bophelong bjo a bo filwego ke Modimo mo lefaseng.

₁₆Ka mehla ge ke be ke re ke leka go tseba bohlale le go lebelela tše batho ba di dirago mo lefaseng ba itlhokiša boroko bošego le mosegare, ₁₇ke be ke bona tšohle tše Modimo a di dirago, le gore ga go yo a ka kwešišago tše di diregago mo lefaseng. Le ge motho a ka leka bjang le bjang a ka se kgone. Mohlalefi le ge a ka re o a tseba a ka se kwešiše.

₁Tše ka moka ke di nagantšhitše kudu, gomme ka lemoga gore batho ba go loka le ba bohlale gotee le mediro ya bona ba laolwa ke Modimo. Motho ga a tsebe ge eba o tla swarwa ka lerato goba ka lehloyo. Tšohle tše di hlagelago batho ₂ke lefeela, ka ge ka moka ba hlagelwa ke tše di swanago: moloki, yo kgopo, yo a dirago tše botse, le yo mobe, mohlweki le yo e sego mohlweki, moišasehlabelo le yo e sego moišasehlabelo. Se se hlagelago moloki le modiradibe se a mo hlagela; wa go ikana o hlagelwa ke se se hlagelago wa go šia go ikana. ₃Yeo ke ye nngwe ya taba tše mpe tše di diregago mo lefaseng, ge bohle ba lebanwa ke tše di swanago. Le gona dipelo tša bona di dula di tletše bobe le bošilo bophelong bja bona ka moka, mme ka morago ba hwe. ₄Fela motho ge a sa ntše a phela mo lefaseng o na le kholofelo; mpša ye e phelago e phala tau ye e hwilego. ₅Ba ba phelago ba a tseba gore ba tlilo hwa, ba ba hwilego bona ga ba tsebe selo. Ga go moputso wo ba sa o letetšego; ba lebetšwe širešire. ₆Lerato la bona le lehloyo la bona le mafolofolo a bona ke kgale di hwile. Ba ka se sa tsoga ba kgathile tema go tšohle tše di dirwago mo lefaseng.

₇Ge go le bjalo, gona wena eya o itšele dijo tša gago o thabile, o inwele beine ya gago o thakgetše, gobane Modimo o šetše a kgahlilwe ke mediro ya gago. ₈O dule o apere diaparo tše ditšhweu, o inathiše hlogo ka makhura. ₉Ge o sa ntše o phela bophelo bjo bja go se re selo bjo Modimo a go filego bjona mo lefaseng, o ithabiše le mosadi wa gago yena yo o mo ratago. O ithabiše le yena bophelong bja gago ka moka bja matšatši a go se re selo, ka gobane woo ke wona moputso wa maitapišo a gago ge o sa phela mo lefaseng. ₁₀Tšohle tše o ka ikhwetšago o di dira, o di dire ka mafolofolo, ka gobane kua bodulabahu o yago gona ga go na go šutha, goba go nagana, goba go tseba, goba go hlalefa.

₁₁Se sengwe se ke se lemogilego mo lefaseng ke gore ba lebelo ga se bona bao ka mehla ba thopago sefoka, le bagale ga se bona bafenyi ka mehla; ba bohlale ga se bona bao ka mehla ba nago le tša go ja; lehumo ga se la ba tlhaologanyo ka mehla, le ba ba nago le tsebo ga se bona bao ka mehla ba ratwago. Sengwe le sengwe se tlela motho ka nako le sebaka sa gona. ₁₂Gape motho ga a tsebe gore ya gagwe nako e tla neng. Bjalo ka ge hlapi e swarwa ka lelokwa le e ka se le phonyokgego, le nonyana e tanywa ka sefu, motho le yena o tanywa ke madimabe ge a mo wela.

₁₃Se sengwe se ke se lemogilego mo lefaseng ke ka moo bohlale bo tšewago ka gona, gomme ka bona e le taba ye bohlokwa. ₁₄Go kile gwa ba le motsana wo o se nago le batho ba bantši. Wa hlaselwa ke kgoši ye maatla. Ya o dikanetša, ya bopelela dintotoma tša mobu go o dikologa. ₁₅Gona moo motsaneng go be go dula monna yo mongwe wa modiidi, fela e le yo bohlale. A phološa motsana woo ka bohlale bja gagwe, eupša ka morago a se sa gopolwa ke motho. ₁₆Ke mo ke ilego ka bona gore bohlale bo phala maatla, le ge bohlale bja modiidi bo nyatšwa, le dipolelo tša gagwe di sa šetšwe ke motho. ₁₇Go theeletša monna yo bohlale yo a bolelelago fase go phala go theeletša mmuši yo a hlabago mašata gare ga mašilo. ₁₈Bohlale bo phala marumo, mosenyi o tee yena a ka senya dilo tše dintši tše dibotse.

₁Gape dintšhi tše di hwilego di bodiša senkgabose sa raditlolo, sa nkga, gomme le botlaela bjo bonyenyane bo fekeetša bohlale le tlhompho.

₂Motho yo bohlale o kganyoga tše di lokilego, mola setlaela sona se kganyoga tše di sego tša loka. ₃Botlaela bja gagwe bo bonagala le ge a sepela ka tsela, mme o bontšha mang le mang gore ke setlaela.

₄Ge mmuši wa gago a ka go galefela, o se ke wa ngala modiro, gobane go itshwara go phephiša motho diphošo tše dikgolo.

₅Go na le bobe bjo ke bo lemogilego mo lefaseng, phošo ye e felago e dirwa ke babuši: ₆mašilo a bewa maemong a godimo, mola bahumi bona ba le maemong a fase. ₇Ke hlwa ke bona makgoba a sepela ka dipere, mola bakgomana bona ba sepela ka maoto mo nkego ke makgoba.

₈Moepamolete a ka wela go wona, le mokgerešamorako a ka longwa ke noga. ₉Moepamaswika a ka gobatšwa ke maswika, mophaphadikgong le yena a ka gobatšwa ke tšona. ₁₀Yo a remago ka selepe se se kubegilego a sa se lootše, o swanetše go ikokoropa. Gape motho o tšweletšwa ke bohlale bja gagwe. ₁₁Ge noga e ka kobola e sešo ya upiwa, moupi o tla loba moputso. ₁₂Dipolelo tša mohlalefi di a kgahliša, mola mantšu a setlaela ona a bolaya mmoledi wa ona. ₁₃Setlaela ge se bolela se thoma ka tša bošilo, sa feleletša ka tša botlatlatlatla. ₁₄Se bolela motšhaotšhele.

Ga go motho yo a tsebago tša ka moso. Kgane ke mang yo a ka botšago motho se se tlago hlaga ge a hwile?

₁₅Semaumau se lakalela modiro wo boima, le tsela ya go ya motseng ga se e tsebe.

₁₆Go madimabe naga ye e bušwago ke kgoši ya mošemanyana, yeo bakgomana ba yona ba ketekago e sa le gosasa. ₁₇Fela ye lehlogonolo naga ke yeo kgoši ya yona e lego kgoši ka madi, yeo bakgomana ba yona ba ketekago ka nako ye e lebanego, bao ba nwelago go itapološa, e sego go tagwa.

₁₈Tlhaka ya ntlo e wela ka gare ka lebaka la bobodu bja mong; e nela ka lebaka la ge yena e le naladiarotha.

₁₉Menyanya e direlwa boipshino, le beine e thakgatša batho, fela tšohle di nyaka tšhelete.

₂₀O se bolele kgoši gampe, ešita le ka pelong ya gago, le mohumi o se mmolele gampe, ešita le ka phapošing ya gago ya go robala; gobane nonyana ye e fofago e ka go tšea lentšu, ramafofa a ka yo go boletša.

₁Rekiša thoto ya gago ya kgwebo moše wa mawatle, mme mafelelong o tla boelwa. ₂Arolela thoto ya gago ya kgwebo mafelong a mmalwa – a ke re a mantši – ka gobane ga o tsebe madimabe ao a ka hlagago mo lefaseng.

₃Ge maru a hlomile, a neša pula lefaseng. Sehlare ge se wetše ka thoko ye goba ka thoko yela, se rapalala moo se wetšego gona. ₄Yo a lebelelago phefo a ka se bjale, le yo a lebelelago maru a ka se bune. ₅Bjalo ka ge o sa tsebe gore bophelo bo tsena bjang ngwaneng ka popelong ya mmagwe, le modiro wa Modimo, Mohlodi wa tšohle, ga o o tsebe. ₆Bjala peu ya gago e sa le gosasa, le mathapama o se ke wa khutša, gobane ga o tsebe ye e tlago mela, goba ge eba di tla mela gabotse ka dipedi.

₇Seedi se bose, le go bona letšatši go a thabiša. ₈Ge motho a phetše mengwaga ye mentši, a a e thabele yohle, fela a gopole gore ye a sa tlilego go e fetša a hwile le yona ke ye mentši. Tšohle tše di sa tlago go hlaga ke lefeela.

₉Wena mofsa, ipshine bofseng bja gago. Ithabiše o sa lekanetše. Dira tše o di ratago le tše di go kgahlago tše o di bonago. Fela o gopole gore Modimo o tlilo go sekišetša tšohle tše o di dirilego.

₁₀O se ke wa tshwenywa ke selo pelong, o šikologe malwetši, gobane bofsa le botse ke lefeela.