Tšwela pele ka ntle le poifo – Letšatši la 21

[Ke ruma lelokelelo ka bopaki bjo mmalwa bja babadi:]

Mmadi wa 1, Martie: “Tseleng ya ka go ya Rustenburg go etela batswadi ba ka, ke rapeletše leeto le le bolokegilego. Gomme ka letša mmino wa bodumedi gomme ka opela mmogo le CD. Pejana ga Marikana, go na le karolo ya mmila ye e nago le sekoti se e ka bago dimetara tše 20 tše di se nago dikokwane tša tšhireletšo kgauswi le mmila. Pele ke fihla fao, ke lemogile gore ke be ke otlela ka lebelo la go feta lebelo la tekenyatšo. Ke ile ka fokotša lebelo le semeetseng gomme lori ya mpheta ka lebelo. Lori e be e le ka pele ga sefatanaga sa ka ge setsekana sa tšhipi ye e ka bago dimetara tše pedi se bofologa gomme se tla se lebile koloi ya ka. Se se diregile ka ponyo ya leihlo. Pele ke tseba, setsekana sa tšhipi se be se le ka tlase ka koloi go leotwana la pele gomme leotwana la go otlela la swayelwa ka go la go ja koloi ya ka ya leba lešing la sekoti. Ke be nkase bethe poriki ka ge difatanaga bi be di etla ka go la nngele le la go ja. Se ke bego ke se dira ke go kgoelela kudu, ‘Morena, nthuše!’Gateetee ka kwa lentšu la tlasana le re go nna, ‘Swayela leotwana la koloi go la nngele!’ Ke dirile bjalo gomme koloi ya ka ya ema lešing la sekoti. Ke be ke le kgauswi kudu moo ke paletšego ke go tšwa ka koloing. Ge ke gadima morago, ke a tseba gore Modimo o be a laola koloi ya ka. O ntšhireleditše le go ntlhahla. Ke tumiša Leina la Gagwe le le botse!”

Mmadi wa 2, Christa: “Mosadi wa morwa wa ka o monyenyane o imile ngwana wa bona wa boraro. Ba lahlegetšwe ke ngwana a na le dibeke tše 30. Morwa wa bona wa bobedi o belegilwe a phetše gabotse ka Phuphu, 2013. Sona ya bobedi ya go ima ga bjale, e laeditše gore matsogo a ngwana yo a sego a belega a ka ba a golofetše gomme ngwana a belega le bolwetši bja Down syndrome. Ka Ngwatobošego 12, 2015, sona e nngwe e dirilwe. Seela sa amnotiki se ntšhitšwe gomme diteko tše dingwe tše ntši tša dirwa. Re thomile sehlopha sa go rapela gomme ra tshepha Modimo ka phodišo ye e feletšego. Maabane ba hweditše dipoelo tša pele, di laetša gore ngwana o phetše gabotse! Go ya ka ngaka ye e be e le teko e bohlokwa kudu gomme o profeta gore dilo ka moka di tla ba gabotse. Ke lemogile gape gore re rapela Modimo yo a phelago, wa lerato. Ditheto ka moka di ye go Yena!”

Mmadi wa 3, Leon: “Ka 9 Moranang lenyaga lori ya ka e senyegile mmileng wa N3 kgauswi le leporogo la Noka ya Tugela. Ka bo-02:00 mesong ke tšere sepheto sa go robala metsotso e mmalwa ge ke sa letile molokiši go fihla. Banna ba bararo bao ba bego ba swere dithunya ba ntlhasela. Ba thunya mafestere a lori gomme ba nkgapeletša gore ke namele mmotwana. Fao ba ntaela gore ke pshikologe ka lepai ba le gare ba ntšhupa leboelela ka dithunya hlogong, molaleng le go kgorometša sethunya kgahlanong le mogolo wa ka.

“Ka khunama ka matolo diatla tša ka di le godimo ga hlogo ke le gare ke lla ke ba kgopela gore ba se nthunye. Ka lebelela lafaufaung gomme ka bona gore maru a be a le tlase. Ka motsotswana woo, ka ipotšiša gore kolo e tla ba hlogong goba mokokotlong le gore ke tla hwa le semeetseng. Ka tshepha Modimo, eupša ke be ke se na nnete ya gore ke tla ya legodimong ge ke e hwa.

“Bahlakodi ba tšere dilo ka moka go nna, go akaretša sellathekeng, diaparo le gaešita Bibele ya ka e kgolo mosadi wa ka a mphilego yona kgwedi pela ga letšatši la ka la matswalo ge ke fetša mengwaga ye 50. Ba be ba nagana gore ke khomphutha ya go šikarwa. Ge ke be ke nagana gore ke kgauswi le go hwa, molokiši a fihla gomme a bonega mmotwana ka mabone a go fahla kudu. A tšhošitše bahlakodi gomme a phološa bophelo bja ka. Lehono ke a tseba gore Modimo o be a le fao go ntšhireletša. O mphile monyetla wa bobedi go hwetša kgonthišetšo ya tumelo. Ga bjale ke latela Yena ka mo go feletšego ka khutšo pelong ya ka. Gomme ke a tseba gore ge nka hwa, ke tla ba le Mophološi wa ka.”

Babadi ba ba nepile. Ge Modimo a le lehlakoreng la rena, re ka tšwela pele ka ntle le poifo. Go Pesalome 23:4 re bala gore: “Le ge nka sepela molapong wo o šiišago, nka se boife selo …” Gomme go Jakobose 5:16 go ngwetšwe gore: “Thapelo ya moloki e na le maatla a magolo.” A re tsepeletšeng mahlo a rena go Modimo ka gare ga boemo bjo bongwe le bjo bongwe bjo boima le go ikgopotša gore o kgauswi le rena go feta ka mo re naganago – gomme ka dinako tše dingwe go nyakega gore re be ka gare ga maemo a go tšhoša go ikgopotša gape ka therešo e! Modimo a go šegofatše.