Tšwela pele ka ntle le poifo – Letšatši la 19

[Mengwaga e mmalwa ya go feta, babadi ba bantši ba pakile ka tšhireletšo ya Modimo maphelong a bona. Mo ke ditsopolwa go tšwa go e tee ya diemeile.]

Rudolf: “Ka Moranang 30 lenyaga, ka bo-17:00 mathapama, nna le mosadi wa ka re hlasetšwe ke bahlakodi ba bahlano bao ba bego ba itlhamile polaseng ya rena ka ntle ga Weenen kua KwaZulu-Natal. Ba thuntše mpša ya rena, ba re bofa gomme ba re iša ka ntlong, moo ba dirilego gore re eme kgahlanong le lebota, ba re roga gomme ba tšhošetša go re bolaya.

“Bahlokodi ba tšere dithunya tša ka gomme ba tšea tšhelete ya lebenkele ka polokelong. Gomme ba tšea mosadi wa ka, ba mmeile thipa molaleng, ba mo iša ka kamoreng e nngwe ba beile sethunya hlogong ya ka. Seo ke bego ke se dira ke go rapela. Ka rapela gore Modimo a re lebalele, a re šireletše le go okobatša seemo. Ke nagana gore ka dinako tše dingwe re nyatša maatla a go rapela Thapelo ya Morena. Ge re kgopela gore Mmušo wa Gagwe o tsene ka gare ga boemo, re ka ba le nnete ya gore O fao.

“Morago ga metsotso e mmalwa, bahlakodi ba tliša mosadi wa ka ka kamoreng moo ke bego ke le gona. Ka retologela go yena ka mantšu a: ‘Go sa šetšwe gore go direga eng, re tla ba mmogo legodimong gomme re gokarelane.’ Go tloga ka nako yeo, atemosfere ya thoma go fetoga. Go be o ka re bahlakodi ba okobetše gomme ba thoma go re swara ka tlhompho. Ge ba sa hwetša tšhelete ye nngwe gape ka ntlong ya rena, ba re tsentše ka morago ga koloi ya rena le dilo tše ba di utswitšego godimo ga rena. Ba otlela mo e ka bago metsotso e 45 pele ba ema tšhemong. Ke be ke nagana gore ba tlo re bolaya. Go e na le moo bahlakodi ba phumola koloi ya hlekwa ka mankgeretla, ba bofolla dithapo matsogong a rena, ba bušetša sekhwama sa ka le dikarata tša panka, laesense ya go otlela le gaešita tšhelete ya ka ka gare go sona gomme ba thuša mosadi wa go namela ka pele ga koloi. Gomme ba ntebelela ba bolela mantšu a: ‘Niemand, eya gae.’ Ra lokollwa. Ba re nea le ditaelo tša gore re fihla bjang gae!

“Re boetše gae ka ntle le dikgobalo gomme mpša ya rena ye e bego e thuntšhitšwe ya phela. Morago ga tiragalo ye. Ga gona kgonono kgopolong ya ka gore Modimo o maatla gape o lokile, gomme o ikemešeditše go re šireletša ge re bitša leina la Gagwe. Ka nnete ga go na lerato le le fetago lerato la Modimo. Letago ka moka ke la Gagwe!”

Rudolf o nepile. Ka moka re na le go itemogela ditlhohlo tša go swana le tše. Re phela lefaseng le le robegilego gomme lenaba le nyaka ditsela tša go ka re kweša bohloko, gomme re bala go Pesalome 121:1-5,8: “Ke lelalela kua dithabeng; ke botile go thušwa ke mang? Ke botile go thušwa ke Morena, Mohlodi wa legodimo le lefase. A ka se go lese o kgopša; Mošireletši wa gago ga a potume. Ee, Mošireletši wa Israele ga a potume, le gona ga a robale. Morena ke Mošireletši wa gago; o šika le wena go go leta. … O tla go šireletša mayong le maboong a gago, gonabjale le go ya go ile.” Go Pesalome 91:11: “Modimo o tla laela barongwa ba gagwe gore ba go hlokomele, ba go šireletše gohle mo o yago gona.”

Modimo ga a potume goba go robala. Gomme letsogo la Gagwe ga se le le kopana go ka re hlakodiša gape le tsebe ya Gagwe ga e a thibana go kwa dithapelo tša rena. Nka se makale gore phapoši ka moka e be etletše ka barongwa nako ye Rudolf a thoma go rapela. Gopola, ge re bitša leina la Modimo dinakong tša rena tša tlalelo goba poifo, O gona – O ikemišeditše go re šireletša. Modimo a go šegofatše.