To The Word – Day 91

₁Pukung ye go hwetšwa melaetša ye Modimo a ilego a e botša Jesaya, morwa wa Amotse, mabapi le Juda le Jerusalema mehleng ya Usia, Jotamo, Ahase le Hiskia, magoši a Juda.

₂Morena o rile: “Lena magodimo, theeletšang, lena mafase, hlwayang tsebe! Ke fepile bana ka ba godiša, eupša bjale bona ba ntsogetše maatla. ₃Dikgomo di tseba mong wa tšona, le dipokolo di tseba moo mong wa tšona a di fudišago gona. Eupša Baisraele bona ga ba ntsebe, setšhaba sa ka ga se kwešiše selo!”

₄Jonna, morafe wo mobe, setšhaba se se imelwago ke dibe tša sona, moloko wo o dirago tše mpe le tša bokgopo! Le tlogetše Morena, le nyaditše Modimo yo mokgethwa wa Israele, la mo furalela. ₅Le reng le fela le ngangabetše? Na le sa nyaka go bethwa kae? Ga ke re dihlogo tša lena ke dintho fela, le mebele ya lena e a fokola? ₆Go tloga ka monwana wa leoto go fihla hlogong ga go mo go rego tswee. Mebele ya lena e tletše megogoma, matetelo, le dintho tše di sa tšwago madi. Dintho tša lena ga se tša hlatswiswa goba tša tlengwa. Ga se tša tlotšwa ka makhura.

₇Naga ya lena e fetošitšwe lešoka, le metse e tšhumilwe thokgethokge. Mašemo a lena a sentšwe ke bašele lena le ba lebeletše, gomme ba fediša se sengwe le se sengwe. ₈Motse wa Jerusalema o šetše o nnoši, o bjalo ka motse wo o dikaneditšwego ke manaba; o a tekateka, o etša mošašana wa mohlapetši ka serapeng sa merara, goba mohlahlana wa moleti wa bošego ka tšhemong ya magapu. ₉Ge nkabe Morena Ramaatlaohle a se re šadišetše mašaledi a se makae, re ka be re fedišitšwe bjalo ka Sodoma le Gomora.

₁₀Jerusalema, babuši ba gago le setšhaba sa gago ba swana le bale ba Sodoma le ba Gomora. Wena o theeletše se Morena a go botšago sona, o ele hloko se Modimo wa rena a go rutago sona. ₁₁Morena o re: “Dihlabelo ka moka tše le ntirelago tšona ga se selo! Dihlabelo tša go tšhungwa ka moka tše le di dirago ka dikgapa le ka makhura a dikgomo tša lena tše le di nontšhitšego di ntenne. Madi a dipoo le a dikgapana le a diphooko tša lena ga a nthabiše. ₁₂Ke mang a le kgopetšego go ntlišetša dihlabelo tše ge le etla go nkhunamela? Le kgopetšwe ke mang go gatagata ka Tempeleng ya ka? ₁₃Le se sa ntlišetša dikabelo tše tša go se be le mohola! Monkgo wa diorelo tše le di tšhumago o a ntšhišimiša. Menyanya ya lena ya Lebalana le Disabatha tša lena le dipitšo tša lena tša diphuthego ga ke di kgotlelele; dikopano tšeo di senywa ke dibe tša lena. ₁₄Ke hloile Menyanya ya lena ya Lebalana le menyanya ya lena ye mengwe; ke morwalo wo o nkimelago gomme o ntapišitše.

₁₅“Ge le emiša matsogo le rapela ke tla ikhupetša mahlo. Le ge le ka rapela bjang le bjang nka se le theeletše, ka gore diatla tša lena di tletše madi. ₁₆Hlapang le itlhwekišeng! Tlogelang tše mpe tše ke bonago le di dira. Lesang go dira tše kgopo, ₁₇le ithuteng go dira tše di botse. Dirang tše di lokilego, solang bao ba gatelelago ba bangwe, thušang ditšhuana ge di tlile tshekong, le emelele bahlologadi.”

₁₈Morena o re: “Bjale etlang re sekišaneng molato wa lena. Le ge le hwibitše perr ka dibe tša lena, le tla šweufala twaa! Le ge le re hwibii, le tla šweufala pšoo! ₁₉Ge le ka dumela go ntheeletša, le tla ja dijo tše bose tša naga ya lena. ₂₀Eupša ge le ka gana, la fela le ntsogetše maatla, gona ke lena le tlago lewa ke tšhoša, ka gobane go boletše nna, Morena.”

₂₁Joo, motse wola o bego o botega bjale o fetogile sefebe! Pele e be e le motse wa toka; go wona go be go letše boloki. Eupša bjale o tletše babolai fela. ₂₂Jerusalema, o kile wa ba bjalo ka silibera, eupša bjale o manyedi; o be o swana le bjala bjo bogale, eupša bjale o tšhetšwe meetse. ₂₃Baetapele ba gago ke batsošameferefere le bagwera ba mahodu; ka moka ga bona ba gabile tsogolekobong gomme ba ithatela fela dimpho. Ga ba rerelele ditšhuana tshekong goba ba theeletša ge bahlologadi ba bega melato ya bona.

₂₄Bjale ge, theeletšang se Morena Ramaatlaohle, Mong wa lena, Modimo yo maatla wa Israele, a se bolelago: “Ke tla tshwela kgalefo ya ka godimo ga bao ba ntshwenyago, ka itefeletša ka lena manaba a ka. ₂₅Ke tlilo le otla. Ke tla le hlwekiša boka tshipi moubelong, gomme ka le ntšha tšhila yohle. ₂₆Ke tla le beela babuši bjalo ka pele, ka le fa baeletši bjalo ka mathomong. Ke gona Jerusalema e tlago bitšwa motse wa toka, felo ga potego.”

₂₇Jerusalema e tla phološwa ka go otlwa, gomme bao ba sokologelago go Morena bona ba tla phološwa ka toka ya Morena. ₂₈Eupša ba ba mo tsogelago maatla le badiradibe o tla ba pšhatlaganya mmogo; o tla bolaya yo mongwe le yo mongwe yo a mo hlanamelago.

₂₉Le tla lewa ke dihlong ka ge le kile la rapela mehlare, la gagabiša mahlo ka lebaka la dirapa tše le bego le di khunamela go na le gore le khunamele nna. ₃₀Le tla omelela bjalo ka mohlare wo o ponago matlakala, la ba bjalo ka serapa se se sa nošetšwego. ₃₁Bjalo ka ge mooko o tšhungwa ke tlhase, dinatla le tšona di tla fedišwa ke mediro ya tšona ye mebe, gwa se be le motho yo a timago mollo woo.

₁Wo ke molaetša wo Modimo a o boditšego Jesaya, morwa wa Amotse, mabapi le Juda le Jerusalema:

₅Bjale etlang, lena ditlogolo tša Jakobo, le sepeleng seetšeng seo Morena a re fago sona.

₆Joo, Modimo, o lahlile setšhaba sa gago, ditlogolo tša Jakobo! Naga e tletše bodupe bja bohlabela le malopo a go swana le a Bafilista. Nageng ka moka go agile bafaladi. ₇Naga e tletše silibera le gauta, gomme mahumo a Juda ga a fele. E tletše dipere, gomme dikoloi tša bona tša ntwa ke tše dintšintši. ₈Naga ya bona ke medimo fela, gomme ba khunamela dilo tše ba itiretšego tšona ka diatla.

₉Ka tsela ye batho ba itirile banyatšegi, ba ikgobošitše. Morena, o se ke wa ba swarela!

₁₀Lena batho, tšhabelang ka maweng, khutang ka meleteng le tšhabeng kgalefo ya Morena le letago la gagwe le le fahlago! ₁₁Letšatši le etla leo ka lona boikgogomošo bja motho bo tlago fedišwa, le boikgantšho bja gagwe bja kokobetšwa. Mohlang woo go tla godišwa Morena fela. ₁₂Ka tšatši leo Morena Ramaatlaohle o tla kokobetša bohle ba maemo, bohle ba go ikgogomoša le ba go ikgantšha. ₁₃O tla fediša mesedere ka moka ye metelele ya go letla ya Lebanone, le meeike yohle nageng ya Bashane. ₁₄O tla phušola dithaba ka moka tše di phagamego le meboto yohle ye megolo, ₁₅le ditora ka moka tše ditelele gotee le merako ka moka ye e tiišitšwego. ₁₆O tla nweletša maselawatle ohle a magolo a mabotse.

_17-18Boikgogomošo bja motho bo tla fedišwa, boikgantšho bja gagwe bo tla kokobetšwa. Medimo e tla timelela sa ruri, gomme gwa godišwa Morena fela tšatši leo.

₁₉Batho ba tla tsena ka maweng le ka meleteng ba tšhaba kgalefo ya Morena le letago la gagwe le le fahlago, ge a etla go šikinya lefase. ₂₀Ge letšatši leo le fihla, ba tla lahla medimo ya gauta le ya silibera ye ba itiretšego yona, gomme ba e tlogelela dirunya le bomankgagane. ₂₁Ge Morena a tliša tšhikinyego ya lefase, batho ba tla tšhabela ka maweng le ka dimphatšeng ba tšhaba kgalefo ya gagwe le letago la gagwe le le fahlago.

₂₂Le se sa tshepha motho wa nama – ga se selo!

₁Bjale tsebang gore Mong wa lena, yena Morena Ramaatlaohle, o kgauswi le go amoga badudi ba Jerusalema le ba Juda batho bohle ba ba ba botilego, le dilo tšohle tše ba ikantšego tšona. O tlilo ba amoga meetse le dijo ka moka, ₂bagale le bahlabani, baahlodi le baprofeta, didupe le bagolo ba setšhaba, ₃balaodi ba madira le baetapele ba setšhaba, baeletši le bakgoni ba mediro ya diatla, le boramaselamose ba bagolo. ₄Morena o tla bea bašemane baetapele ba setšhaba, mme ba matepe ya ba babuši ba sona. ₅Setšhaba se tla phenkgišana, motho a bakišana le wa gabo. Bafsa ba tla nyatša ba bagolo go bona, gomme ba e sego selo ba tla nyatša bahlomphegi.

₆Nako e etla yeo ka yona motho a tlago swara morwarragwe a re: “Wena seaparo o na le sona, ka gona eba moetapele wa rena mo mabakeng a mabe a.”

₇Eupša yena o tla hlaboša lentšu a re: “Aowaowaa, nna nka se kgone go le hlokomela. Le nna ka ga ka ga ke ne dijo le diaparo. Le se ntire moetapele wa lena!”

₈Ee, Jerusalema e a tekateka, Juda e a wa, ka gobane setšhaba se tsogetše Morena maatla ka mantšu le ka ditiro yena a se lebeletše. ₉Morena o tla ba bona molato ka ge ba be ba kgetholla batho tshekong. Ba dira dibe pepeneneng bjalo ka batho ba Sodoma. Ba lahlegile; ba ikgogoletše magala hlogong.

₁₀Begang gore baloki tša bona di tla sepela gabotse. Ba tla ipshina ka tše ba di šometšego. ₁₁Eupša bakgopo bona ba lahlegile. Tše ba di dirilego ba bangwe bjale ba tla dirwa tšona.

₁₂Baadimiši ba ditšhelete ba amoga setšhaba sa ka dilo ka moka, batho ba ba nyakago mašokotšo a mantšintši ba gatelela batho ba ka.

Lena setšhaba sa ka, baetapele ba lena ba a le timetša, ba le rarakanyetša ditsela.

₁₃Morena o šetše a itokišeditše go sekiša setšhaba sa gagwe, o kgauswi le go se ahlola. ₁₄Morena o thoma go ahlola bagolo le baetapele ba setšhaba. O ba bona molato o re: “Le hutše dirapa tša merara, gomme tše le di amogilego badiidi di ka malapeng a lena. ₁₅Le reng le gatelela setšhaba sa ka, le hula badiidi? Go bolela nna, Mong wa lena, Morena Ramaatlaohle.”

_16-17Morena o rile: “Ke tlilo otla basadi ba Jerusalema ka gobane ba a ikgantšha, ba sepela ba šinyaletše. Ba goketša banna, ba sepela ba ipona ba letša maseka a maoto. Nna, Morena, ke tla ba boola dihlogo ba šala ba se ne moriri.”

₁₈Letšatši le etla leo ka lona Morena a tlago apola basadi ba Jerusalema tšohle tše ba ikgabišago ka tšona – maseka a maoto, mefapahlogo, dipheta tša melala, ₁₉mangina, le maseka a matsogo. O tla ba amoga mašira, ₂₀dikgabišo tša moriri, mefiri ya maoto, mapanta a botšhepi, dinkgabose, maralana a diatla, ₂₁dipalamonwana, mefiri ya dinko, ₂₂diaparo tša menyanya, diaparo tše telele, dikobo, dikhwama, ₂₃diipone, diaparo tše boletiana, dituku tša hlogo le dituku tše dingwe.

₂₄Bakeng sa go nkga bose ba tla nkga lefetla; bakeng sa mapanta ba tla ipofa ka dithapo; bakeng sa leetse ba tla tšwa mafatla; bakeng sa diaparo tše boleta ba tla apara tša go ba gohla tša go ilela, mme bakeng sa go ba ba babotse ba tla ba le mabadi a bokgoba.

₂₅Banna ba motse ba tla bolawa ka tšhoša, gomme bagale ba hwela ntweng. ₂₆Dikgoro tša motse di tla golola tša ilela, mme motse ka bowona wa swana le mosadi yo a pharamego fase a tlogetšwe ke batho ka moka.

₁Ge nako yeo e fihla, basadi ba ba šupago ba tla swara monna o tee ba re: “Re tla iphepa ra ikapeša, fela re dumelele gore re re o monna wa rena, gore re ikhutše kgobogo ya ge re se ra nyalwa.”

₂Nako e etla yeo ka yona tšohle tše Morena a di medišitšego nageng di tlago gola ya ba tše dibotse. Mašaledi a Israele ka moka a tla thaba a ikgodiša ka dibjalo tše di kgahlišago tša mašemo a ona. ₃Mang le mang yo e lego lešaledi Sione, a šetšego Jerusalema, yo Modimo a mo kgethilego gore a phologe, o tla bitšwa yo mokgethwa. ₄Morena o tla ahlola setšhaba, gomme a se hlwekiša ka moya wa gagwe wo o tšhumago, a hlatswa Jerusalema ditšhila le madi a a se nago molato ao a ilego a tšhollwa fao. ₅Ke gona Morena a tlago hloma leru mosegare, le muši le seetša sa mollo wo o laumago bošego godimo ga thaba ya Sione le godimo ga mafelo ao batho ba kgobokanago go ona. ₆Letago la Morena le tla šireletša motse wohle. E tla ba moriti wa motse ge letšatši le fiša, gomme la o dira felo mo go bolokegilego, mo go tšhabelwago ledimo le pula.

₃Bjale yo ke mo ratago o re: “Lena badudi ba Jerusalema le lena batho ba Juda, nke le nkahloleng, le ahloleng le serapa sa ka sa merara. ₄Kgane go sa na le se sengwe se ke sego ka se direla serapa sa ka? Bjale ke ka lebaka lang se entšwe diterebe tša go bola, ya se be tše dibotse bjalo ka ge ke be ke fišegela?

₅“Bjale ke le botša se ke tlago se dira serapa se sa ka: Ke tla hlahlamolla legora la sona ka le tšhuma, ka kgereša morako wa sona gomme ka se lesa se gatakelwa. ₆Ke tla se ngala, nka se kgothe merara goba ka e hlagolela, gomme mehlašana ya meetlwa le mabjang di tla mela go sona. Ke tla laela maru gore a se ke a se nešetša pula.”

₈Le lahlegile, lena le ikokeletšago dintlo, la ikokeletša le mašemo go fihlela go se sa na le mo go šetšego, mme naga ka moka e le ya lena le le noši. ₉Ke kwele Morena Ramaatlaohle a ena a re: “Dintlo tšeo tše dintši tše dikgolo tše dibotse e tla ba marope a a rego hoo. ₁₀Ditemeng tša matšatši a lesome tša serapa sa merara go tla ntšhwa moruswi o tee fela wa beine. Mokotla wa peu o tla ntšha ntlatlana e tee fela ya mabele.”

₁₁Go madimabe lena le tsogelago bjaleng, ya ba ya ba mašegogare le duletše botagwa. ₁₂Menyanyeng ya lena go letšwa dikgapa le diharepa le meropana le dinaka; beine yona le nayo, eupša mošomo wa Morena wona ga le o šetše, modiro wa gagwe ga le o hlokomele. ₁₃Ka lebaka leo, ka gobane setšhaba sa ka ga se nyake go ntseba, se tla išwa bothopša. Baetapele ba lena ba tla hwa ka tlala, gomme bathofela bona ba hwa ka lenyora. ₁₄Bodulabahu bo nyaka go ba kwametša, bo ahlamišitše legano go feta tekanyo. Bo kwametša bakgomana ba motse wa Jerusalema le lešaba la wona le le tladitšego lešata.

₁₅Bohle ba tla gobošwa, baikgogomoši ba kokobetšwa. ₁₆Morena Ramaatlaohle o laetša bogolo bja gagwe ka go dira toka, gomme o bontšha gore ke yo mokgethwa ka go ahlola ka tshwanelo. ₁₇Dikwanyana di tla fula maropeng a metse go no swana le ge di fula nageng, mme le diputšane tša go nona tša iphulela moo.

₁₈Le lahlegile, lena le itlemagantšego le bobe ka boradia bja lena, lena le kgomaganego le dibe tša lena bjalo ka kgomo ye e gogago koloi. ₁₉Le re: “Morena a a phakiše a dire ka pela se a nyakago go se dira, re se bone. Modimo yo mokgethwa wa Israele a a phethe ka pela se a ikemišeditšego sona, re se tsebe.”

₂₀Go madimabe lena le rego bobe ke botse, mme botse ke bobe. Le fetoša leswiswi seetša, seetša la se fetoša leswiswi. Le dira se se babago se sebose, mme se sebose la se dira se se babago.

₂₁Le lahlegile, lena le iponago le le ba bohlale, le gopolago gore le na le kwešišo.

₂₂Go madimabe lena bagale madileng, lena bakgoni ba go hlakanya mabjala ka dipitšeng. ₂₃Eupša le lokolla motho yo a nago le molato ka tsogolekobong, mme yo a se nago molato la mo tima ditshwanelo tša gagwe. ₂₄Bjalo ka ge mollo o fiša dikutwana tša mahlaka mme hlaga e lorela kgabong, le tla fedišwa taa go swana le medu ye e bodilego le matšoba a a omeletšego mme a tšewago ke phefo. Tšeo di tla direga ka gobane le lahlile melao ya Morena Ramaatlaohle, le nyaditše tše Modimo yo mokgethwa wa Israele a re rutilego tšona. ₂₅Ka gona Morena o ile a galefela setšhaba sa gagwe, gomme a emiša letsogo a se otla. Dithaba di ile tša šikinyega, ditopo le tšona tša tlogelwa mekgotheng bjalo ka ditlakala. Le ge go le bjalo kgalefo ya Morena ga se ya okobala, eupša letsogo la gagwe o sa le emišeditše go otla.

₂₆Morena o hlomile sefoka o bitša setšhaba sa kgole. O se bitša ka molodi gore se tle se etšwa magomong a lefase. Gomme šebao, ba tla ba kitima ka lebelo! ₂₇Ga go yo a lapilego, ga go yo a thetšwago. Ga ba potume, ga ba swarwe ke boroko. Ga go yo a sego a tiiša lepanta, ga go yo a kgaogetšwego ke lerala la dieta. ₂₈Mesebe ya bona ke ye bogale, le mara a bona a ngangegile. Ditlhako tša dipere tša bona ke tše thata boka leswika, le maotwana a dikoloi tša bona tša ntwa a thwethwa ka lebelo bjalo ka sesesedi. ₂₉Ba rora bjalo ka ditau, ba bopa boka ditawana tše di bolailego phoofolo ge di e gogagogela mo go sego yo a ka di amogago yona.

₃₀Mohlang woo ba tla rorela Israele bjalo ka lewatle. Bonang, naga ke leswiswi le masetlapelo fela! Seetša se fifatšwa ke maru a maso.

₁Ge e le Saulo yena o be a kwana le bokebeka bjo bja polao ya Stefane.

Lona tšatšing leo badumedi ba Jerusalema ba thoma go tlaišwa kudu. Badumedi ka moka ntle le baapostola ba phatlalala le selete sa Judea le sa Samaria. ₂Banna ba bangwe ba barapedi ba boloka Stefane, ba mo llela kudu.

₃Saulo yena a leka go fediša kereke, a tsena ntlwana ka ntlwana, a goga banna le basadi a ba lahlela ka kgolegong.

₄Badumedi bale ba go phatlalatšwa ba ya gohle ba tšama ba bega molaetša wa Modimo. ₅Filipi a ya mošate wa naga ya Samaria a fihla a begela batho ba gona tša Kriste. ₆Mašaba a batho a mo theeletša ge ba ekwa tše a di bolelago, ba bona le mehlolo ye a e dirago. ₇Meoya ye mebe e be e etšwa bathong ba bantši ka go goelela, le barephaditho ba bantši le digole tše dintši ba be ba fodišwa. ₈Ka gona gwa thakgalwa kudu motseng woo.

₉Gona motseng woo go go be go na le monna yo mongwe yo ba bego ba re ke Simone, yo e bego e šetše e le lebakanyana a tlaba batho ba Samaria ka maleatlana a gagwe, mme a itirile motho yo mogolo, ₁₀a theeletšwa ke batho ka moka, ba bagolo le ba bannyane. Ba re: “Ke yena yo e lego maatla a Modimo a go thwego ke ‘Magolo’.” ₁₁Ba be ba mo hlwaela tsebe ka ge e be e šetše e le kgale a ba tlaba ka maleatlana a gagwe. ₁₂Fela e rile ge ba seno kgolwa Filipi ge a ba begela Taba ye Botse ya mmušo wa Modimo le wa Jesu Kriste, ba kolobetšwa, e le banna le basadi. ₁₃Yo Simone le yena o ile a dumela, gomme a re go kolobetšwa a hlwa le Filipi, a tlabega kudu ge a bona mehlolo le dimakatšo tše dikgolo tše di dirwago.

₁₄Jerusalema baapostola ba kwa gore Basamaria ba amogetše lentšu la Modimo, ka gona ba roma Petrose le Johanese go bona. ₁₅Ba fihla ba ba rapelela gore ba amogele Moya wo Mokgethwa, ₁₆gobane o be o sešo wa theogela go bona, ba be ba kolobeditšwe go ba ba Morena Jesu ya ba moka. ₁₇Baapostola bao ba ba bea diatla, gomme bona ba amogela Moya wo Mokgethwa.

₁₈Simone ge a bona gore badumedi ba filwe Moya wo Mokgethwa ka go bewa diatla ke baapostola, a leka go ba reka ka tšhelete ₁₉a re: “Le nna mpheng maatla ao gore yo ke mmeago diatla a amogele Moya wo Mokgethwa.”

₂₀Petrose a mo fetola a re: “Nke o ka hwa mmogo le tšhelete yeo ya gago, ka ge o nagane gore o ka reka mpho ya Modimo ka tšhelete! ₂₁Le gatee o ka se šome le rena mo modirong wa rena, ka gobane Modimo o a bona gore o na le pelo ye mpe. ₂₂Ka gona, sokologa bobeng bjoo bja gago, o rapele Modimo gore a go swarele ge o nagane taba ya mohuta wo. ₂₃Gobane ke a bona gore o tletše lehufa, gomme sebe sa gago se go fetošitše mogolegwa wa sona.”

₂₄Simone a re: “Nthapeleleng go Morena gore ke se ke ka hlagelwa ke se sengwe sa tše le di boletšego tše.”

₂₅Baapostola ba rile go fetša go hlatsela le go bega molaetša wa Morena ba gomela Jerusalema, ba tšama ba bega ditaba tše dibotse tšeo metseng ye mentši ya Samaria.

₂₆Morongwa wa Morena a re go Filipi: “Ema o ye ka thoko ya borwa tseleng ye e tšwago Jerusalema e leba Gasa.” Tsela ye ga e sa sepelwa kudu. ₂₇Filipi a ema a tloga. Mo tseleng a hwetša moamogwabonna yo mongwe wa Moetopia, mohlankedi yo mogolo wa go hlokomela mahumo a kandase, kgošigadi ya Etopia. Yena o be a etšwa Jerusalema go rapela, ₂₈gomme a boela gae ka koloi, a tšama a bala puku ya moprofeta Jesaya. ₂₉Moya wo Mokgethwa wa re go Filipi: “Batamela koloi yela o e tle phaphi.” ₃₀Filipi a phakiša a ya go yona, gomme a kwa monna yoo a bala ka pukung ya moprofeta Jesaya. A mmotšiša a re: “Na seo o se balago o a se kwešiša?”

₃₁Mohlankedi yoo a mo fetola a re: “Nka se kwešiša bjang ke se na wa go ntlhalošetša?” A kgopela Filipi gore a namele a dule le yena ka koloing. ₃₂Temana ye a bego a e bala ka Mangwalong a Makgethwa še:

₃₄Mohlankedi yoo a botšiša Filipi a re: “Nke o mpotše gore moprofeta ge a realo o ra mang. O ra yena mong goba o ra yo mongwe?”

₃₅Ke ge Filipi a thoma go mo hlalošetša; go tloga ka yona temana ye a mo anegela Taba ye Botse ya Jesu Kriste. ₃₆Ge ba ntše ba swere tsela bjalo ba fihla mo go nago le meetse, gomme mohlankedi yoo a re: “Meetse šea. Bjale ke sa šitišwa ke eng go kolobetšwa?”

₃₈A laela gore koloi e emišwe, ba theogela ka meetseng ka babedi, Filipi le mohlankedi yoo, gomme Filipi a mo kolobetša. ₃₉Ge ba etšwa ka moo meetseng, Moya wo Mokgethwa wa široša Filipi. Mohlankedi yola a se sa mmona, fela a tšwela pele ka leeto la gagwe a thabile. ₄₀Filipi o ile a ikhwetša a le kua Ashdode; a sepela le metse yohle, a eta a bega Taba ye Botse ya Jesu, a ba a yo fihla Kesarea.

₁Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo. ₂E sa le a eba go Modimo go tloga le go tloga. ₃Tšohle di hlodilwe ka yena, gomme go tše di hlodilwego ga go le se tee se se sego sa hlolwa ka yena. ₄Dihlolwa tšohle di hweditše bophelo ka yena, bophelo bjo e bilego seetša sa batho. ₅Seetša seo se bonega leswiswing, gomme leswiswi ga se la kgona go se fenya.

₆Modimo o kile a roma monna yo mongwe yo leina la gagwe e bego e le Johanese. ₇O be a tlile go begela batho seetša, gore bohle ba kwe se a se begago gomme ba se dumele. ₈Yena ka boyena e be e se seetša; se a bego a se tletše e be e le go bega seetša. ₉Seetšaetša sa go bonegela batho bohle se be se etla lefaseng.

₁₀Lentšu o be a le lefaseng, gomme le ge Modimo a hlodile lefase ka yena, batho ba lona ga se ba mo amogela. ₁₁O be a tlile ga gabo, fela ba gabo ba se mo amogele. ₁₂Eupša ba ba ilego ba mo amogela mme ba dumela go yena, bona a ba fa tokelo ya go ba bana ba Modimo. ₁₃Ya ba bana ba Modimo, e sego ka go tswalwa bjalo ka bana ba bangwe, e sego ka go tswalwa ka tumo ya nama, goba ka thato ya monna, eupša ka go tswalwa ke Modimo ka boyena.

₁₄Yena Lentšu e bile motho, a dula le rena e le yo botho kudu go rena, a re utollela ka botlalo se Modimo a lego sona. Ra bogela letago la gagwe, letago le a le filwego ke Tatagwe, e le yena Morwa a nnoši wa Tatagwe.

₁₅Johanese o be a bolela ka yena mola a goeletša a re: “Ke be ke era yena yo ge ke be ke re: ‘Yo a ntlhatlamago o mpheta ka maemo, ka gobane o be a le gona pele nna ke tswalwa.’ ”

₁₆Ka ge a re loketše kudu, o re šegofaditše bohle, a re šegofatša leboelela. ₁₇Melao Modimo o re file yona ka Moshe, gomme ka Jesu Kriste a re utollela ka mo e lego yo botho go rena ka gona, a ba a re utollela se a lego sona. ₁₈Ga go motho yo a kilego a bona Modimo. Batho ba mo tseba ka go mo utollelwa ke Morwagwe, Motswalwanoši, yo ka boyena e lego Modimo, yo a lego kgauswi le Tatagwe.

₁₉Mola baetapele ba Bajuda Jerusalema ba romile baprista le Balefi go Johanese gore ba ye go mmotšiša gore ke yena mang, yena o ile a ipega, ₂₀a se gane go ba fetola, a bolela phaa a sa iphihle a re: “Ga se nna Mesia.”

₂₁Ba mmotšiša ba re: “Bjale o mang? Kgane ke wena Eliya?”

Yena a re: “Aowa, ga ke yena.”

Ba re: “Kgane e ka ba o yena Moprofeta?”

A ba fetola a re: “Aowa.”

₂₂Ba napa ba re: “Gona re botše gore o mang, gore re yo botša ba ba re romilego. O reng ge o ipega?”

₂₃Johanese a ba fetola ka go tsopola se se boletšwego ke moprofeta Jesaya a re:

₂₄Baromiwa bao ba bego ba romilwe ke Bafarisei ₂₅ba botšiša Johanese ba re: “Bjale ge eba ga o Mesia, ga o Eliya, ebile ga o yena Moprofeta, o reng o kolobetša?”

₂₆Johanese a ba fetola ka go re: “Nna ke kolobetša ka meetse, fela mo gare ga lena go na le yo le sa mo tsebego. ₂₇Ke yena yo a ntlhatlamago, eupša nna le go mmofolla marala a dieta ga se gwa ntshwanela.”

₂₈Ditaba tšeo ka moka di diregile Bethania ka mošola wa noka ya Jordane, moo Johanese a bego a kolobetša gona.

₂₉Ka tšatši le le latelago Johanese a bona Jesu a etla go yena. A re: “Bonang Kwanyana ya Modimo ye e tlošago dibe tša lefase! ₃₀Ke yena yo ke bego ke bolela ka yena mola ke re: ‘Monna yo a ntlhatlamago o mpheta ka maemo, ka gobane o be a le gona pele nna ke tswalwa.’ ₃₁Le nna ke be ke sa tsebe gore ke ofe, etšwe ke tšwetše ke kolobetša ka meetse gore a tle a utollelwe setšhaba sa Israele.”

₃₂Johanese o hlatsetše ka go re: “Ke bone Moya o theoga legodimong nke ke leeba, wa fihla wa dula godimo ga gagwe. ₃₃Nna ke be ke sa tsebe gore ke yena, fela Modimo yo a nthomilego go yo kolobetša ka meetse o be a rile go nna: ‘Yo o bonago Moya o theogela go yena o dula godimo ga gagwe, ke yena yo a kolobetšago ka Moya wo Mokgethwa.’ ₃₄Bjale ke bone, gomme ke hlatsela gore ke yena Morwa wa Modimo.”

₃₅Ka tšatši le le latelago Johanese o be a le moo gape a na le ba babedi ba barutiwa ba gagwe. ₃₆Ya re ge a bona Jesu a feta, a re: “Bonang Kwanyana ya Modimo!”

₃₇Barutiwa bao ba babedi ba mo kwa ge a realo, gomme ba latela Jesu. ₃₈Jesu a retologa, a ba bona ba mo latela, a ba botšiša a re: “Etse le nyakang?”

Bona ba re: “Rabi,” (ke go re “Moruti”), “na o dula kae?”

₃₉A ba fetola a re: “A re yeng le yo bona.” E be e šetše e le iri ya bone mathapama. Ke moka ba ya le yena ba yo bona mo a dulago gona, ba hlwa le yena tšatši leo.

₄₀Yo mongwe wa bao ba babedi ba go re go kwa Johanese a bolela ba latela Jesu e be e le Andrease, ngwanaboSimone Petrose. ₄₁Yena a raka a yo nyaka Simone, mogolwagwe, gomme ge a mo hweditše, a re: “Re hweditše Mesia!” (Ke go re “Kriste”.)

₄₂A nama a iša Simone go Jesu.

Jesu ge a mmona a re: “Etse ke wena Simone, morwa wa Johanese, fela o tla bitšwa Kefase.” (Ke go re “Petrose”.)

₄₃Ka tšatši le le latelago Jesu ge a re o ya Galilea a hwetša Filipi, gomme a re go yena: “Ntatele!” ₄₄Yo Filipi ga gabo e be e le Betsaida, motse wa gaboAndrease le Petrose. ₄₅O rile go hwetša Nathaniele, a re go yena: “Re hweditše yola Moshe a ngwadilego ka yena ka pukung ya melao, le baprofeta ba ngwadilego ka yena; ke Jesu wa Nasaretha, morwa wa Josefa.”

₄₆Nathaniele a mmotšiša a re: “Na go na le se sebotse se se ka tšwago Nasaretha?”

Filipi a mo fetola a re: “A re ye o yo bona.”

₄₇Ge Jesu a bona Nathaniele a etla go yena, a bolela ka yena a re: “Šo Moisraele wa mmakgonthe yo a se nago bomenetša.”

₄₈Nathaniele a mmotšiša a re: “O ntsebela kae?”

Jesu a mo fetola a re: “Ke go bone o le mola moriting wa mogo, pele ga ge Filipi a go bitša.”

₄₉Nathaniele a mo fetola a re: “Moruti, o Morwa wa Modimo! Ke wena Kgoši ya Israele!”

₅₀Jesu a re: “Na o dumela ka ge ke go boditše gore ke go bone o sa le mola moriting wa mogo? O sa tlilo bona tše di fetago tšeo.” ₅₁A tšwela pele a re: “Ruri, ruri, ke le botša gore le tla bona legodimo le bulegile gomme barongwa ba Modimo ba namelela ba bile ba theogela go Morwamotho.”