To The Word – Day 88

₁Ka tšona nako tšeo gwa tla batho ba bangwe ba botša Jesu tša Bagalilea bale Pilato a bego a ba bolaile ba direla Modimo dihlabelo. ₂Jesu a ba fetola a re: “Ka ge Bagalilea bao ba bolailwe ka tsela ye, na kgane le gopola gore bona e be e le badiradibe ba bagolo go feta Bagalilea bohle? ₃Le gatee! Gomme nna ke le botša gore ge le sa sokologe le tla bolawa go etša bona. ₄Bale ba lesome le metšo ye seswai ba go welwa ke tora ya Siloamo ya ba bolaya, bona kgane le re e be e le badiradibe ba bagolo go feta batho ka moka ba ba agilego Jerusalema? ₅Le gatee! Gomme nna ke le botša gore ge le sa sokologe le tla bolawa bjalo ka bona.”

₆Jesu a ba botša seswantšho a re: “Go be go na le monna yo mongwe yo a bego a na le mogo ka serapeng sa gagwe sa merara. A re ge a re ke yo fula mago go wona a hwetša a se gona. ₇Ke moka a re go molemi wa serokolo: ‘Bona, bjale ke mengwaga ye meraro ke etla mo ke nyaka mago mo mogong wo, fela ke a hloka. O reme. O hlagaletšang mobu?’ ₈Molemi a mo fetola a re: ‘Morena, o lese lenyaga fela. Ke tla o hlagolela ka ba ka o tšhelela mmutedi. ₉Gomme ge ngwaga wo o tlago o ka enywa, go tla loka; ge o ka pala, ke gona o ka o remago.’ ”

₁₀Ka tšatši le lengwe la Sabatha Jesu o be a ruta batho ka sinagogeng. ₁₁Gona moo go be go na le mosadi yo a tsenwego ke moya wo mobe, mme o mo lwaditše mengwaga ye lesome le metšo ye seswai. O be a kokoropane, a sa kgone go hlophologa le go se nene. ₁₂Jesu ge a mmona a mmitša a re a tle go yena. Ge a fihla a re go yena: “Mmagobatho, o imolotšwe bolwetšing bja gago!” ₁₃A mmea diatla, mosadi yoo a nama a hlophologa le semeetseng, gomme a reta Modimo.

₁₄Mookamedi wa sinagoge yeo a galefa ka gobane Jesu a fodišitše motho ka tšatši la Sabatha, gomme a botša batho bao a re: “Matšatši a go šoma a a selela. Etlang ka ona matšatši ao go fodišwa, e sego ka Sabatha.”

₁₅Morena a mo fetola a re: “Baikaketši tenang, na kgane ka tšatši la Sabatha motho mang le mang wa lena ga a ke a bofolla kgomo goba pokolo ya gagwe ka lešakeng a yo e noša? ₁₆Bjale le ra gore mosadi yo e lego setlogolo sa Abrahama yo, yo a feditšego mengwaga ye lesome le ye seswai a bofilwe ke Sathane, yena a se ke a bofollwa ditlemong tša gagwe ka tšatši la Sabatha?” ₁₇Ge a realo, bale ba bego ba mo ganetša ba inyatša, mola lešaba ka moka lona le thabela dilo tše di makatšago tše a di dirago.

₁₈Jesu a ba botšiša a re: “Na mmušo wa Modimo o ka swantšhwa ka eng? Nka o bapiša le eng? ₁₉O bjalo ka thorwana ya peu ya mohloko ye motho a e tšeago a e bjala ka serokolong sa gagwe, ya mela ya ba sehlare seo dinonyana di agelago dihlaga makaleng a sona.”

₂₀Jesu a ba botšiša gape a re: “Mmušo wa Modimo nka o swantšha le eng? ₂₁O ka swantšhwa ka komelo ye mosadi a e tšeago a e tswakanya le bupi bja dikelo tše tharo go fihlela motswako wohle o omelega.”

₂₂Jesu a theta le metse le metsana a ntše a ruta batho, a lebile Jerusalema. ₂₃Motho yo mongwe a mmotšiša a re: “Morena, na kgane ba ba tlago phološwa ke ba mmalwa fela?”

Jesu a re go bona ka moka: ₂₄“Le leke ka maatla go tsena ka mojako wo o pitlaganego, gobane ke a le botša, ke ba bantši ba ba tlago leka go tsena, eupša ba tla palelwa. ₂₅Nako e etla mo monglapa a tlago tsoga a tswalela lebati. La re le eme ka ntle le kokota mojako le re Morena a le bulele, yena a le araba a re: ‘Nna ga ke le tsebe.’ ₂₆Ke mo le tlago mo fetola la re: ‘Re be re eja re bile re enwa le wena; le gona o be o ruta mekgotheng ya motse wa gaborena.’ ₂₇Yena o tla boeletša a re: ‘Ke re ga ke le tsebe. Ntlogeleng, lena bakgopo bohle!’ ₂₈Ya ba le lla le lomanya meno ge le bona Abrahama le Isaka le Jakobo le baprofeta ka moka legodimong, mola lena le ntšhetšwa ka ntle. ₂₉Batho ba tla tla monyanyeng legodimong ba etšwa bohlabela le bodikela le leboa le borwa, ke go re mo gohle lefaseng. ₃₀Ke mo bao bjale e sego ba maemo e tlago ba ba maemo, mme bao bjale e lego ba maemo e tlago ba ba ba se nago maemo.”

₃₁Ka yona nako yeo Bafarisei ba bangwe ba tla go Jesu ba fihla ba mo sebotša ba re: “Tloga mo o tšhabe, ka gobane Heroda o nyaka go go bolaya.”

₃₂Jesu a ba fetola ka go re: “Sepelang le yo botša mokadikadi yola le re: ‘Tseba gore ke leleka bademone ebile ke fodiša batho lehono le gosasa, gomme go hlwa gosasa ke tla be ke feleletša mošomo wo wa ka.’ ₃₃Fela lehono le gosasa le go hlwa gosasa ke swanetše go ba ke sepela, ka gobane ke taba ye e sa gopolwego gore moprofeta a ka bolaelwa mo gongwe ntle le Jerusalema.

₃₄“Joo, Jerusalema, joo, Jerusalema, wena o bolayago baprofeta gape o keketago ka maswika bao Modimo a ba romilego go wena! Ke gakae ke ratile go phutha badudi ba gago bjalo ka kgogo ge e phutha matswiana a yona ka diphego tša yona, eupša o gana? ₃₅Ka gona Modimo o tla ngala Tempele ya gago ya šala e le lešope. Ke go botša gore o ka se sa mpona, go fihlela go etla nako yeo ka yona o tlago re: ‘A go retwe yo a tlago a romilwe ke Morena!’ ”

₁Ka tšatši le lengwe la Sabatha Jesu a ya go ja ka ga yo mongwe wa bagolo ba Bafarisei. Batho ba be ba tloga ba mmeile leihlo. ₂A bona a lebane le monna yo mongwe wa go ruruga maoto le matsogo. ₃A botšiša boramangwalo le Bafarisei a re: “Na go fodiša motho ka tšatši la Sabatha go dumeletšwe?”

₄Bona ba homola. Ke ge Jesu a tšea molwetši yola a mo fodiša, mme a mo lesa a itshepelela. ₅Ke moka a re go bona: “Ke mang mo go lena yo e ka rego morwagwe a wetše ka sedibeng goba go wetše kgomo ya gagwe, a se e ntšhe le semeetseng le ge e le ka lona tšatši la Sabatha?”

₆Bona ba se kgone go mo fetola mo tabeng yeo.

₇Jesu ge a bona balaletšwa ba bangwe ba ipea madulong a ka pele a ba botša ka go swantšha a re: ₈“Ge motho a go laleditše monyanyeng wa lenyalo, o se ke wa fihla wa ipea madulong a bohlomphegi, ka gore e ka no ba e le gore go laleditšwe le yo mongwe yo a hlomphegago kudu go feta wena, ₉gomme yo a le laleditšego ka babedi a tla a re go wena: ‘Šutelela yo.’ Gomme ya ba gona o yago go dula madulong a ka moragorago ka dihlong. ₁₀Wena ge o laleditšwe o fihle o ipee madulong a ka moragorago, gore ge molaletši wa gago a etla a re go wena: ‘Mogwera, fetela kua madulong a makaone!’ Gomme o tla godišwa ke ba ba laleditšwego le wena. ₁₁Gobane mang le mang yo a ikgodišago o tla kokobetšwa, gwa re yo a ikokobetšago a godišwa.”

₁₂A botša le yola molaletši wa gagwe a re: “Ge o laletša batho go tlo ja le wena dijo tša mosegare le ge e le tša mantšiboa, o se ke wa laletša ba e lego bagwera ba gago, goba banabeno, goba meloko yeno, goba baagišani ba gago ba bahumi, gobane le bona ba ka tla ba go laletša, gomme ya ba ge o boelwa ke tše o kilego wa ba direla tšona. ₁₃Wena ge o dira monyanya, o laletše badiidi le dihlotša le digole le difofu, ₁₄gomme o tla ba le mahlogonolo, gobane bao ga ba na se ba ka go bušetšago ka sona. O tla bušetšwa ke Modimo mohla a tsoša baloki bahung.”

₁₅Yo mongwe wa balaletšwa ba ba bego ba le dijong, ge a ekwa Jesu a realo, a re go yena: “Go lehlogonolo bao ba tlago tla dijong mmušong wa Modimo!”

₁₆Jesu a re go yena: “Motho yo mongwe o kile a dira monyanya wo mogolo, mme a laletša batho ba bantši. ₁₇Ge nako ya go keteka e fihla a roma mohlanka wa gagwe gore a yo botša balaletšwa a re: ‘Etlang, tšohle di lokišitšwe!’ ₁₈Eupša bona ka moka ba itatola ka o tee ka o tee. Wa mathomo a re go mohlanka yoo: ‘Ke rekile tšhemo, gomme ke swanetše go yo e bona. Hle, o mpolelele gore ke swaregile.’ ₁₉Yo mongwe a re: ‘Ke rekile dipholo tše lesome, gomme ke a ya go bona ge eba di tla goga gabotse. Hle, o mpolelele gore nka se kgone go tla.’ ₂₀Yo mongwe a re: ‘Ke sa tšo nyala mosadi, gomme ke sona se se ntšhitišago go tla.’

₂₁“Mohlanka yola a boela morago a yo di botša mong wa gagwe. Yena a galefa, a botša mohlanka yoo a re: ‘Itlhaganele o ye mekgotheng le mekgothaneng ya motse, o boe le badiidi le dihlotša le digole le difofu.’ ₂₂Ka morago mohlanka yoo a boa, a re: ‘Ke phethile se o rilego ke se dire, morena, fela go sa na le madulo.’ ₂₃Monglapa a re go yena: ‘Eya ditseleng le mebileng o yo gapeletša batho go tlo tsena, gore ntlo ya ka e tle e tlale. ₂₄Gomme ke le botša gore le o tee wa banna ba ba bego ba laleditšwe a ka se latswe dijo tša ka.’ ”

₂₅Ya re ge batho ba bantšintši ba ntše ba sepela le yena, a retologa, a re go bona: ₂₆“Yo a tlago go nna a sa nthate go feta ka mo a ratago tatagwe, le mmagwe, le mosadiagwe, le bana ba gagwe, le bomorwarragwe, le dikgaetšedi tša gagwe, ešita le yena mong, a ka se kgone go ba morutiwa wa ka. ₂₇Yo a sego a ikemisetša go tlaišwa bjalo ka nna mme a ntatela, a ka se kgone go ba morutiwa wa ka.

₂₈“Ga ke re ge o nyaka go aga tora o thoma ka go dula fase wa akanya tshenyegelo ya gona, gore o bone ge eba o na le tšhelete ye e lekanego go phetha modiro woo? ₂₉Gape ge o ka se dire bjalo, o tla re o beile motheo wa tla palelwa ke go phetha tora yeo, gomme wa kwerwa ke bohle ba ba di bonago. ₃₀Ba re: ‘Moisa yo o kgonne go thoma go aga, fela go phetha go mo paletše.’

₃₁“Kgoši yona ke efe ye e ka rego e eya go lwa le ye nngwe ya se dule fase ya lebeledišiša ge eba e tla kgona ka bahlabani ba dikete tše lesome go lwa le yo a tšwilego ka bahlabani ba dikete tše masome a mabedi? ₃₂Ge a bona gore a ka se kgone, o tla roma batseta ba yo loba yola a sa le kgole.” ₃₃Jesu a fetša ka go re: “Ka wona mokgwa woo, yo a sa tlogelego tšohle tše a nago le tšona a ka se kgone go ba morutiwa wa ka.”

₃₄“Letswai ke selo se sebotse, fela ge le ka tapa, le ka hlwa le sa tswailošwa ka eng? ₃₅Ga le sa hola mobu ka selo ešita le wona mmutedi; sa lona ke go dio tšhollwa. Yo a nago le tsebe a a kwe!”

₁Balekgetho le badiradibe ka moka ba be ba hlwa ba etla go Jesu gore ba mo kwe. ₂Gomme Bafarisei le boramangwalo ba tsoša tshele ba re: “Moisa yo o amogela badiradibe, ebile o ja nabo!” ₃Ke moka Jesu a ba swantšhetša ka go re:

₄“Ga ke re ge o ka re o na le dinku tše lekgolo, wa timelelwa ke e tee ya tšona, o tlogela tšela tše masome a senyane a metšo ye senyane madišong, wa yo nyaka yela e timetšego go fihlela o e hwetša? ₅Etse ge o e hweditše o e atha magetleng o thabile. ₆Ge o fihla gae o bitša bagwera ba gago le baagišani wa re: ‘Thabang le nna, ka gobane ke bone nku ya ka ye e bego e timetše!’ ₇Ke a le botša, ka wona mokgwa wo mobjalo kua legodimong modiradibe o tee yo a sokologago dibeng tša gagwe o tla thabelwa go feta batho ba masome a senyane le metšo ye senyane ba go loka ba ba sa hlokego go sokologa.”

₈“Ga ke re ge mosadi a ka re a na le dipapetlana tše lesome tša silibera, a timelelwa ke e tee ya tšona, o thumaša lebone a fiela ntlo ya gagwe, a e nyakišiša go fihlela a e bona? ₉Gomme ge a e bone, o bitša bagwera ba gagwe le baagišani a re: ‘Thabang le nna, ka gobane ke bone papetlana ya ka ye e bego e timetše!’ ₁₀Ka wona mokgwa wo mobjalo ke le botša gore kua legodimong barongwa ba Modimo ba thabela modiradibe o tee yo a sokologago.”

₁₁Jesu a tšwela pele a re: “Go kile gwa ba le motho yo mongwe a na le barwa ba babedi. ₁₂Yo monyenyane a re go yena: ‘Tate, mphe kabelo ye e ntebanego ya lefa la gago.’ Ke moka monna yola a abaganyetša barwa ba gagwe ka babedi lefa. ₁₃Ge go fetile matšatši a se makae morwagwe yo monyenyane a rekiša kabelo yohle ya gagwe, gomme a tloga. A ya nageng ya kgole moo a fihlilego a senya tšhelete ya gagwe ka bohlaswa, ₁₄a e fetša taa. Ke ge naga yeo e welwa ke tlala ye kgolo, mme a thoma go hloka. ₁₅A ba a yo šomela yo mongwe wa badudi ba naga yeo, gomme yena a mo roma go yo diša dikolobe tša gagwe kua merakeng. ₁₆A duma go intšha tlala ka matlakala a photla a a lewago ke dikolobe, fela le ona gwa se be le yo a mo fago ona. ₁₇Mafelelong a rarologelwa mme a re: ‘Etse bathwalwa ba tate ke ba bantši, fela tša go ja di a ba patla, mme nna šemo, ke hwa ka tlala. ₁₈Ke tla tloga ka ya go tate ka fihla ka re go yena: Tate, ke fošeditše Modimo le wena. ₁₉Ga ke sa swanelwa ke go bitšwa morwago; hle, ntshware bjalo ka yo mongwe wa bathwalwa ba gago.’ ₂₀Ke moka a tloga a boela go tatagwe.

“O rile a sa le kgole tatagwe a mmona; a mo hlomogela pelo, a mo kitimela, a mo gokarela, a mo atla. ₂₁Morwagwe a re go yena: ‘Tate, ke fošeditše Modimo le wena. Ga ke sa swanelwa ke go bitšwa morwago.’ ₂₂Tatagwe a bitša bahlanka ba gagwe a re: ‘Itlhaganeleng, le tliše kobo ye botsebotse le mo apeše. Le mo apeše le palamonwana le dieta. ₂₃Le nape le yo tšea namane ye e nonnego le e hlabe, gomme re ketekeng! ₂₄Gobane yo morwa wa ka o be a hwile, eupša bjale šo o a phela; o be a timetše, eupša šo o hweditšwe.’ Ke moka ba thoma go keteka.

₂₅“Morwagwe yo mogolo o be a sa ile mašemong. E rile ge a boa a le kgauswi le ka gae, a kwa go opelwa, go binwa. ₂₆Ke ge a bitša yo mongwe wa bahlanka a mmotšiša a re: ‘Go diregang?’ ₂₇Mohlanka yoo a mo fetola a re: ‘Gape morathoago o boile, gomme tatago o hlabile namane yela ya go nona ka ge a mmone a sa phela gabotse.’

₂₈“Morwa yo mogolo a befelwa kudu mo a ilego a ba a gana le go tsena ka gae. Tatagwe a ba a tšwa a yo mo rapela gore a tsene. ₂₉Yena a re go tatagwe: ‘Bona, nna ke go šometše mengwagangwaga bjalo ka lekgoba; ga se ka ka ka nyatša taelo ya gago; fela ga se wa ka wa mpha le ge e le putšane gore ke ithabiše le bagwera ba ka. ₃₀Eupša bjale ge yo morwago a etla a meditše lefa lela la gago le digwebakathobalo, o mo hlabela namane ye e nonnego.’ ₃₁Tatagwe a mo fetola a re: ‘Ngwanaka, wena o na le nna ka mehla, gomme sengwe le sengwe se ke nago le sona ke sa gago. ₃₂Go lebane ge re keteka, ka gobane yo ngwaneno o be a hwile, gomme bjale o a phela; o be a timetše, gomme bjalo o hweditšwe.’ ”

₁Jesu a ba a botša barutiwa ba gagwe taba ye nngwe a re: “Go kile gwa ba le monna yo mongwe wa mohumi a na le molaodi wa thoto ya gagwe. Molaodi yoo a tla a pharwa ka taba ya go re o senya thoto ya mong wa gagwe. ₂Ka gona mohumi yoo a mmitša a mmotšiša a re: ‘Ke dilo mang tše ke di kwago di bolelwa ka wena? Nke o ntaodišetše tša bolaodi bja gago, ka gobane ga o sa tlo ba molaodi wa thoto ya ka.’ ₃Molaodi yoo a re ka pelong: ‘Bjale ge mong wa ka a nthakile modirong ke tla dirang? Etse go lema go a mpalela, go kgopela le gona go nteša dihlong. ₄Bjale gona ke gopotše se ke tlago se dira, gore ge ke seno senyegelwa ke modiro, go be le batho ba ba tlago nkamogela ka malapeng a bona.’

₅“A bitša ba ba nago le molato go mong wa gagwe, ba tla ka o tee ka o tee. A botšiša wa mathomo a re: ‘Molato wo o o tšerego go mong wa ka ke bokae?’ ₆Yena a mo fetola a re: ‘Ke metšega ye lekgolo ya makhura a mohlware.’ Molaodi a re: ‘Tšea lengwalo la gago la molato, o dule fase o phakiše o ngwale masome a mahlano.’ ₇Ke moka a botšiša yo mongwe a re: ‘Wena o tšere bokae?’ Yena a mo fetola a re: ‘Ke mekotla ye lekgolo ya korong.’ Molaodi a re: ‘Tšea lengwalo la gago la molato o ngwale masome a seswai.’

₈“Mong wa molaodi yoo wa senokwane a mo reta ka lebaka la bonokwane bjo bja gagwe. Gape batho ba lefase le ka bonokwane bjo ba diranago ka bjona seng sa bona, ba feta batho ba seetša.”

₉Jesu a iša pele a re: “Le nna ke le botša ke re: Itireleng bagwera ka mahumo a lefase le lebe le, gore mola mahumo a se sa le hola ka selo, ba tle ba le amogele legaeng le le sa felego. ₁₀Yo a botegago go tše dinyenyane, le go tše dikgolo o tla botega; yo a sa botegego go tše dinyenyane, le go tše dikgolo a ka se botege. ₁₁Ge le sa botege mahumong a lefaseng, mahumong a mmannete gona ke mang yo a ka le botago? ₁₂Ge le sa botege go se e lego sa yo mongwe, ke mang yo a ka le fago selo gore e be sa lena?

₁₃“Ga go mohlanka yo a ka hlankelago marena a mabedi; o tla hloya yo mongwe a rata yo mongwe; a botegela yo mongwe a nyatša yo mongwe. Le ka se hlankele Modimo le mahumo ka nako e tee.”

₁₄Bafarisei ge ba ekwa ditaba tšeo ka moka ba mo kodutla ka gobane tšhelete yona ba be ba e rata. ₁₅Jesu a re go bona: “Etse ke lena bale le dirago gore batho ba bone nke le lokile, etšwe yo a tsebago se le lego sona e le Modimo. Gobane tše batho ba bonago e le tše bohlokwa, Modimo yena o bona di šišimiša.

₁₆“Melao ya Moshe le mangwalo a baprofeta di feleletše ka Johanese Mokolobetši. Go tloga moo go begwa Taba ye Botse ya mmušo wa Modimo, gomme mang le mang o leka ka maatla go tsena ka mmušong wo. ₁₇Fela go timelela ga legodimo le lefase go boleta go feta go hlahlamoga ga tabanyana ye nyenyane mo melaong ya Moshe.

₁₈“Motho yo a ka hlalago mosadi wa gagwe a nyala yo mongwe, o a otswa, le yena monna yo a ka nyalago mosadi yo a hladilwego, o a otswa.”

₁₉“Go kile gwa ba le monna yo mongwe wa mohumi a apara diaparo tše dibotse, le gona a dula a ipshina ka tša matsaka. ₂₀Lesorong la gagwe go be go hlwa go tlišwa monna yo mongwe wa modiidi wa go tlala dišo, yo leina la gagwe e bego e le Lasarose. ₂₁Yena o be a duma go iphepa ka marathana a a wago tafoleng ya mohumi yoo. Dimpša le tšona di be di fela di etla di mo latswa dišo.

₂₂“Monna yola wa modiidi a ikhwela, gomme barongwa ba mo kuka ba yo mmea madulong a a hlomphegago kgauswi le Abrahama legodimong. Mohumi yola le yena a tla a hwa, a bolokwa. ₂₃Ya re ge a le kua bodulabahu a ekwa bohloko bjo bogolo, a lelala gomme a bona Abrahama a le kgole, a dutše le Lasarose. ₂₄Ke moka a goeletša a re: ‘Tate Abrahama, nke o ntšhokele, hle! Roma Lasarose a ine ntlha ya monwana ka meetseng, a tle a ntimole mo lelemeng, gobane ke kwa bohloko e le ruri ka mo mollong wo!’

₂₅“Abrahama a mo fetola a re: ‘Ngwanaka, gopola gore mola o sa phela lefaseng o be o atlegile, kganthe Lasarose yena o be a tlaišegile. Bjale yena mo o iketlile, wena o kwa bohloko. ₂₆Le gona go na le legaga le legolo mo mokgahlo wa rena le lena, gomme ba ba lego ka mono ge ba rata go tshelela ka moo ga ba kgone, le bona ba ba lego ka moo go lena ga ba kgone go tshelela ka mono go rena.’ ₂₇Mohumi yola a re: ‘Gona tate, ke a go rapela, mo rome a ye kua ga gešo, ₂₈gobane moo go na le banabešo ba bahlano. A yo ba sebotša gore bona ba se tlo tla felo mono ga masetlapelo.’

₂₉“Abrahama a re: ‘Ba na le Moshe le baprofeta. A ba theeletše bona.’ ₃₀Mohumi yola a re: ‘Aowii, tate Abrahama! Ge ba ka tlelwa ke yo mongwe wa ba ba hwilego ba ka sokologa.’ ₃₁Abrahama yena a re: ‘Ge ba sa theeletše Moshe le baprofeta, le ge yo mongwe wa ba ba hwilego a ka tsoga ba ka se kgolwe.’ ”

₁Jesu a re go barutiwa ba gagwe: “Dilo tše di dirišago batho dibe tšona di swanetše go no ba gona, fela go madimabe yo di tlago ka yena. ₂Go ka ba kaone ge a ka kgokelelwa lwala molaleng a lahlelwa ka lewatleng, go na le gore a kgeloše yo mongwe wa ba banyenyane ba. ₃Ka gona le itlhokomele go tše le di dirago.

“Ge ngwaneno a dira phošo o mo kgale; ge a ka itshola, o mo swarele. ₄Ge a ka go fošetša gašupa ka tšatši le tee, mme nako le nako a tla go wena a re: ‘Ntshwarele,’ o mo swarele.”

₅Baapostola ba re go Morena: “Re okeletše tumelo.”

₆Yena a ba fetola a re: “Ge le ka be le na le tumelo ye nyenyane ya go lekana le thorwana ya mphogo, le be le ka botša sehlare se la re: ‘Tomoga, o yo ipšala ka kua lewatleng!’ Gomme se be se tla phetha taelo yeo.”

₇“Na kgane ge o na le mohlanka yo a go lemelago goba a go dišetšago, e ka re e le gona a boago mašemong wa mo kgareeletša go ja? ₈Ga ke re o re go yena: ‘Nkapeele tša go lalela, o ntsholele ke je, ke nwe, o kgone o eja, o enwa’? ₉Kgane mohlanka o tle a retelwe go phetha taelo ya mong wa gagwe? ₁₀Agaa, le lena ge le phethile tšohle tše le bego le laetšwe go di dira, le swanetše le re: ‘Aowii, rena ga re bahlanka ba selo; sa rena e bile go dio phetha modiro wo o bego o re lebane.’ ”

₁₁Jesu ge a eya Jerusalema, o ile a šika le mollwane wa Samaria le Galilea. ₁₂Ya re ge a tsena motsaneng wo mongwe, a gahlana le banna ba lesome ba ba bolawago ke bolwetši bja letlalo bja go ba tšhilafatša. Ba emela kgojana, ₁₃ba mo goelela ba re: “Jesu, Mong wa rena, hle, nke o re šokele!”

₁₄Jesu ge a ba bona a re go bona: “Eyang go baprista ba le bone.”

Ba rile ba sa ya ba ipona ba fodile ba hlwekile. ₁₅Yo mongwe wa bona ge a ipona a fodile, a boa a goeletša a tumiša Modimo. ₁₆A itahlela fase ka sefahlego pele ga Jesu, a mo leboga. Yena e be e le Mosamaria. ₁₇Jesu a re: “Ga ke re go fodišitšwe banna ba lesome, bjale bale ba bangwe ba senyane ba kae? ₁₈Go reng go boile fela yo e sego Moisraele yo go tlo leboga Modimo?” ₁₉Ke moka a re go monna yoo: “Emelela o sepele; tumelo ya gago e go fodišitše.”

₂₀E rile ge Bafarisei ba bangwe ba botšiša Jesu gore na mmušo wa Modimo o tlilo hlongwa neng, yena a ba fetola ka go re: “Mmušo wa Modimo ga o hlongwe ka mokgwa wo o bonagalago. ₂₁Ga go yo a tlago re: ‘Bonang, šo!’ goba a re: ‘Šolee!’ gobane mmušo wa Modimo o ka mo gare ga lena.”

₂₂A botša barutiwa ba gagwe a re: “Go tla tla nako ye le tlago duma go bona le lengwe la matšatši a Morwamotho, eupša le ka se le bone. ₂₃Ba bangwe ba tla le botša ba re: ‘Bonang, šo!’ goba ba re: ‘Šolee!’ Le se ke la ya goba la ba šala morago. ₂₄Ge nako ya gore Morwamotho a tle e fihla, o tla tla bjalo ka legadima ge le gadima go putla leratadima, le le bonega ka gohle. ₂₅Fela pele ga ge a etla o swanetše go tlaišwa kudu le go tšwiwa ke batho ba mehleng yeno. ₂₆Pele ga ge Morwamotho a etla go tla no ba go swana le nakong yela ya Noa. ₂₇Etse batho ba be ba eja, ba enwa, ba nyala goba ba nyalwa, gwa ba gwa fihla letšatši le Noa a tsenego ka lona ka leselawatleng, gomme meetsefula a tla a gogola batho ka moka. ₂₈Gapegape go tla no ba bjalo ka nakong yela ya Lota. Batho ka moka ba be ba dulela go ja, le go nwa, le go reka, le go rekiša, le go bjala, le go aga. ₂₉E rile tšatši le Lota a tšwilego motseng wa Sodoma ka lona, gwa tšhologa mollo le tshebela di etšwa legodimong, tša ba swielela taa. ₃₀Le mohla Morwamotho a tšwelela go tla ba bjalo.

₃₁“Mohlang woo yo a tlago be a le godimo ga ntlo ya gagwe, a se ke a fologela ka ntlong go yo tšea thoto ya gagwe; le yo a tlago be a le mašemong a se hlwe a sa boela gae. ₃₂Gopolang se se ilego sa hlagela mosadi wa Lota! ₃₃Yo a ipabalelago o tla lahlega, eupša yo a itatolago o tla phelela sa ruri. ₃₄Ke le botša gore bošegong bjoo batho ba babedi ba tla re ba robetše malaong a tee, gwa tšewa yo mongwe, gwa šadišwa yo mongwe. ₃₅Basadi ba babedi ba tla re ba šila mmogo, gwa tšewa yo mongwe, gwa šadišwa yo mongwe.”

₃₇Barutiwa ba gagwe ba mmotšiša ba re: “Tšeo di tla direga kae, Morena?”

Yena a ba fetola a re: “Manong a kgobokana mo go lego setoto.”

₁Jesu a botša barutiwa ba gagwe seswantšho, a ba ruta gore motho o swanetše go dula a rapela le gona a sa fele pelo, ₂a re: “Motseng wo mongwe go kile gwa ba le moahlodi wa go se hlomphe Modimo, le gona wa go nyatša batho. ₃Gona motseng woo go be go dula mohlologadi yo mongwe yo a bego a fela a etla go yena a re: ‘Hle, nke o ntamolele go motho yola a mpharago molato!’ ₄Moahlodi yoo o ile a dika a gana go mo theeletša, fela ka morago a ithetolla a re: ‘Le ge Modimo ke sa mo hlomphe le batho ke ba nyatša, ₅mohlologadi yo ke tla no mo lamolela, ka gobane šo o a nngamola. Etse ge ke sa mo lamolele o tla no boaboa mo a ba a tla a ntena.’ ”

₆Morena a iša pele a re: “Ekwang se moahlodi yoo wa go hloka toka a se boletšego. ₇Na bjale Modimo yena a ka napa a se lamolele bao a ba kgethilego, ba ba mo llelago bošego le mosegare? A ka napa a diega go ba thuša? ₈Ke le botša gore o tla ba lamolela ka pela. Fela Morwamotho mohla a etla afa le re o tla hwetša go sa na le ba ba nago le tumelo mo lefaseng?”

₉Ba ba ipotšago gore ba lokile mme ba nyatša ba bangwe Jesu a ba botša ka go swantšha a re: ₁₀“Batho ba babedi ba kile ba ya Tempeleng go rapela. Yo mongwe e be e le Mofarisei, mongwe e le molekgetho.

₁₁“Mofarisei yoo a fihla a emelela a rapela ka pelong a re: ‘Ke a go leboga, Modimo, ge ke sa swane le batho ba bangwe ba bahlalefetši, ba baradia, ba diotswa; ebile ga ke swane le molekgetho yo. ₁₂Nna ke itima dijo gabedi ka beke, le gona ke ntšha karolo ya lesome go tšohle tše ke bago le tšona.’

₁₃“Ge e le molekgetho yola yena a ema kgole, a šia le go lebelela legodimong, a ikgonara a re: ‘Hle, Modimo, nkgaugele, nna, modiradibe!’ ₁₄Ke a le botša, yena o boetše gae a boelane le Modimo, e sego Mofarisei yola. Gobane mang le mang yo a ikgodišago o tla kokobetšwa, gwa re yo a ikokobetšago a godišwa.”

₁₅Batho ba bangwe ba tliša bana go Jesu gore a ba bee diatla. Barutiwa ba gagwe ge ba di bona ba kgalema batho bao, ₁₆fela Jesu a bitša bana bao, gomme go barutiwa ba gagwe a re: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo. ₁₇Ruri, ke le botša gore yo a sa dumelego go bušwa ke Modimo, a sa etšego ngwana, a ka se tsoge a tsene legodimong.”

₁₈Monna yo mongwe wa maemo a tla a botšiša Jesu a re: “Moruti wa go loka, ke direng gore ke tle ke be le bophelo bjo bo sa felego?”

₁₉Jesu a mo fetola a re: “O reng o mpitša wa go loka? Ga go yo a lokilego ge e se Modimo fela. ₂₀Melao o a e tseba, e re: ‘O se ke wa otswa; o se ke wa bolaya; o se ke wa utswa; o se ke wa bolela bohlatse bja maaka; o hlomphe tatago le mmago.’ ”

₂₁Yena a re: “Melao yeo ka moka e sa le ke e phetha go tloga bjaneng bja ka.”

₂₂Jesu ge a ekwa a realo a re go yena: “O sa hlaelelwa ke se sengwe. Eyo rekiša tšohle tše o nago le tšona, o tšee tšhelete ya gona o e abele badiidi, gomme o tla ba le lehumo legodimong. Ka morago ga moo o tle o ntatele.” ₂₃Ge monna yoo a ekwa Jesu a realo, a nyama kudu, ka gobane o be a humile e le ruri.

₂₄Jesu ge a mmona a nyamile bjalo a re: “Go bothata bjang gore mohumi a tsene legodimong! ₂₅Ebile go bonolo gore kamela e tsene ka lešobana la nalete, go na le gore mohumi a tsene legodimong.”

₂₆Ba ba mo kwelego ge a realo ba re: “Ge go le bjalo, ke mang yo a ka phologago?”

₂₇Jesu a ba fetola a re: “Tše di palelago batho Modimo yena ga di mo palele.”

₂₈Ke moka Petrose a re: “Bona, rena re tlogetše tšohle tše e lego tša rena ra go latela.”

₂₉Jesu a re go bona: “Ruri, ke le botša gore mang le mang yo a tlogetšego legae, goba mosadi, goba banababo, goba batswadi, goba bana ka lebaka la mmušo wa Modimo, ₃₀o tla boelwa kudu mehleng yeno, gomme mehleng ye e tlago o tla ba le bophelo bjo bo sa felego.”

₃₁Jesu a biletša barutiwa ba gagwe ba lesome le ba babedi thoko, a re go bona: “Theeletšang mo, re rotogela Jerusalema, mo go yogo phethega tšohle tše di ngwadilwego ke baprofeta mabapi le Morwamotho. ₃₂O tla gafelwa baditšhaba; bona ba mo kwera, ba mo tlaiša, ba mo tshwela ka mare. ₃₃Ba tla mo otla ka tshelane, ba mmolaya, eupša ka letšatši la boraro a tsoga bahung.”

₃₄Fela barutiwa ba Jesu ba ile ba se kwešiše selo; polelo ya gagwe ya ba širela, gomme ba se tsebe gore o ra go reng.

₃₅E rile ge Jesu a batamela motse wa Jeriko, gwa ba go na le monna yo mongwe wa sefofu a dutše ka thoko ga tsela a kgopela. ₃₆Ge a ekwa lešaba la batho le feta, a botšiša a re: “Go diregang?”

₃₇Ba mmotša ba re: “Ke Jesu wa Nasaretha o a feta.”

₃₈Ke moka a goelela a re: “Jesu, Morwa wa Dafida, nke o ntšhokele!”

₃₉Batho ba ba etilego pele ba mo kgalema ba re a homole. Eupša yena a goelela le go feta a re: “Morwa wa Dafida, nke o ntšhokele!”

₄₀Jesu a ema, a re sefofu seo se tlišwe go yena. Ge se batametše, a se botšiša a re: ₄₁“O rata gore ke go direle eng?”

Sona sa mo fetola sa re: “Morena, ke nyaka gore ke boele ke bone.”

₄₂Jesu a re go sona: “Gona bona! Tumelo ya gago e go fodišitše.”

₄₃A boela a bona le semeetseng, gomme a latela Jesu a reta Modimo. Lešaba ge le di bona la tumiša Modimo.