To The Word – Day 70

₁Theeletšang, lena ditšhaba ka moka!

Ekwang, lena badudi bohle ba lefase,

₂lena boramaemo le lena banyatšegi,

lena bahumi le lena badiidi mmogo!

₃Ke tla bolela tša bohlale;

ke tla nagana tša tlhaologanyo.

₄Ke tla ela maele hloko;

ke tla nyepolla nyepo ya ka ke letša sekgapa.

₅Ke tla be ke boifelang ge ke le tlalelong,

ge ke dikaneditšwe ke bomokadikadi wa morara,

₆ke ra tšona dikhorane tša go ipota,

tša go kgantšha mahumohumo a tšona?

₇Motho a ka se kgone go ithekolla,

a lefa Modimo se a ka itokollago ka sona,

₈gobane tefo ya bophelo bja motho ke ye ntši kudu,

gomme e ka se lekane

₉go mo kgontšha go phelela ruri gore a se tsoge a hwile.

₁₀Ke taba ye e tsebjago gabotse gore bahlale ba hwa go no swana le mašilo le ditlatla,

mahumo a bona ba a tlogelele bangwe.

₁₁Mabitla ke legae la bona go ya go ile;

ke bodulo bja bona go iša le go iša,

etšwe dinaga di be di theeletšwe bona.

₁₂Motho, le ge a ka ba le mahumo,

ga a phelele ruri,

o hwa go no swana le diphoofolo.

₁₃Se se lebanego ba ba ipotilego le ba ba kwanago le polelo tša bona Sela

₁₄ke go hwa bjalo ka dinku;

lehu e tla ba modiša wa bona,

baloki e tla ba bona babuši ba bona;

ba tla bola ka pela bodulabahu kgole le magae a bona a mabotse.

₁₅Nna Modimo o tla ntlhakodiša maatleng a bodulabahu,

o tla mphamola gona.

₁₆O se inyatše ge o bona motho a huma,

ge lehumo la gagwe le ata,

₁₇gobane mohla a ehwa a ka se tloge le selo;

a ka se ye le mahumo a gagwe ka lebitleng.

₁₈Le ge motho a ipona a na le mahlatse ge a sa phela,

mme a retwa ka gobane a atlega,

₁₉o tla no ya mo borakgolokhukhu ba gagwe ba ilego gona,

bona ba ba ka se sa tsogago ba bone seetša.

₂₀Mohumi yo a hlokago kwešišo o hwa bjalo ka diphoofolo.

₁Modimo Ramaatla, yena Morena,

o a bolela;

o bitša lefase lohle,

go tloga bohlabatšatši go ya bodikelatšatši.

₂Modimo o taga a le Sione,

motseng wo mobotsebotse.

₃Modimo wa rena o etla,

gomme a ka se homole;

o etilwe pele ke mollo wo o laumago;

o dikaneditšwe ke ledimo le le tšubutlago.

₄O bitša legodimo kua godimo,

o bitša le lefase go tlo hlatsela tshekong ya setšhaba sa gagwe.

₅O re:

“Nkgobokeletšeng babotegi ba ka,

ba ba tiišeleditšego kgwerano le nna ka sehlabelo.”

₆Magodimo a bega go loka ga gagwe,

gobane Modimo ka noši ke moahlodi. Sela

₇“Theeletša, wena setšhaba sa ka,

ke a bolela;

ke tla go latofatša, wena Israele.

Ke nna Modimo, Modimo wa gago.

₈Ga ke go kgalele dihlabelo tša gago,

goba dihlabelo tša ditšhungwakamoka tše o felago o ntlišetša tšona.

₉Powana ya šaka la gago ga ke e nyake,

le ge e le phooko ya mehlape ya gago,

₁₀gobane phoofolo tšohle tša sethokgwa ke tša ka,

le dibata tše diketekete dithabeng.

₁₁Ke tseba dinonyana tšohle tša thaba,

le diphedi tšohle tša lešoka ke tša ka.

₁₂“Ge nkabe ke swerwe ke tlala ke be nka se botše wena,

gobane lefase ke la ka le tšohle tša lona.

₁₃Kgane nna ke ja nama ya dipoo,

goba ke nwa madi a diphooko?

₁₄Ditebogo a e be sona sehlabelo sa gago se o se neelago Modimo,

gomme o phethe dikeno tše o di anetšego Yogodimodimo.

₁₅Ke mo ke tlago go hlakodiša ge o mpitša mohla wa mathata,

gomme wena o tla ntlhompha.”

₁₆Fela go yo kgopo Modimo o re:

“O reng o bolela melao ya ka,

o bile o ikamanya le kgwerano ya ka,

₁₇etšwe o gana go solwa ke nna,

o bile o nyatša ditaelo tša ka?

₁₈Ge o kopana le lehodu o gwerana nalo,

le diotswa o kgotsana le tšona.

₁₉“O bolela tše mpe o sa itshware;

o dula o radia batho ka dipolelo tša gago.

₂₀O dulela go bolela ngwaneno gampe le go seba ngwana wa mmago.

₂₁Na o re ke homole ge o dira tša mohuta wo?

Kgane o bona nke ke swana le wena?

Nna ke go sola ke go botša mahlong.

₂₂“Gopodišiša taba ye,

wena wa go itebatša nna;

go sego bjalo ke tla go rathaganya mme wa hloka mohlakodiši.

₂₃Yo a ntlhomphago ke yo a nneelago sehlabelo sa tebogo,

gomme yo ke tlago mo phološa ke yo a itlhokomelago mesepelong.”