To The Word – Day 50

₁“Ge motho a ka hwetšwa a bolailwe nageng mo lefaseng le Morena Modimo wa lena a yago go le fa lona, gomme la se tsebe gore o bolailwe ke mang, ₂baetapele ba lena le baahlodi ba tšwe mme ba ye ba ele bokgole bja go tloga moo setopo se hweditšwego gona go ya motseng wo mongwe le wo mongwe wa kgauswi le felo fao. ₃Baetapele ba motse wo o lego kgauswikgauswi le moo setopo seo se hweditšwego gona ba kgethe kgomo ya sethojana ye e sego ya ka ya panwa. ₄Ba e theošetše kgauswi le nokana ye e sa pšhego, moo mobu o sego wa ka wa lengwa goba wa bjalwa, gomme moo ba e robe molala. ₅Baprista ba Balefi le bona ba ye gona, ka gobane ba swanetše go ahlola molato wo mongwe le wo mongwe wo go wona go bilego ntwa le go tšholla madi. Morena Modimo wa lena o ba kgethile gore ba mo direle, ba be ba šegofatše ka leina la gagwe. ₆Ka morago baetapele ka moka ba motse wo o lego kgauswikgauswi le moo setopo se hweditšwego gona ba hlapele diatla godimo ga kgomo yeo ₇ba re: ‘Motho yo ga se a bolawa ke rena, ebile ga re tsebe gore o bolailwe ke mang. ₈Morena, lebalela setšhaba sa gago sa Israele se o se phološitšego Egepeta. Re lebalele mme o se ke wa re fega molato polaong ye ya motho yo a se nago molato.’ ₉Ka fao, ka ge le dirile se Morena a se nyakago, le ka se fegwe molato polaong yeo.”

₁₀“Ge Morena Modimo wa lena a le kgontšhitše go fenya ntweng mme la tšea mathopša, ₁₁gomme mo gare ga ona yo mongwe wa lena a bona mosadi yo mobotse yo a mo kganyogago mme a nyakago go mo nyala, ₁₂a mo iše lapeng la gagwe mme moo mosadi a ipoole hlogo, a ithipe dinala, ₁₃a apole diaparo tše a thopilwego ka tšona, gomme a apare tše dingwe. A dule lapeng la gagwe gomme a llele batswadi ba gagwe kgwedi ka moka; ka morago ga moo a ka mo nyala, a robala naye. ₁₄Mme ere ge a se sa mo kgahla, a mo lokolle, a mo lese a ikele mo a ratago. Ka ge monna yoo a mo gobošitše ka go mo gapeletša nyalo, a se ke a mo swara bjalo ka lekgoba, goba a mo rekiša.”

₁₅“Ge monna a na le basadi ba babedi gomme bobedi bja bona ba mmelegela barwa, fela morwa wa pele ya se be ngwana wa mosadi wa mmamoratwe, ₁₆ge monna yoo a arolela bana ba gagwe thoto ya gagwe, a se ke a kgetholla morwa wa mmamoratwe ka go mo fa karolo ye e lebanego morwa wa pele wa mosadi yo a sa ratwego. ₁₇O swanetše go fa morwa wa gagwe wa pele karolo ya dithoto tša gagwe gabedi, le ge e se morwa wa mmamoratwe. Monna yoo o swanetše go tseba morwa wa gagwe wa mathomo gomme a mo fe karolo yeo e lego ya gagwe ka molao.”

₁₈“Ge monna a na le morwa wa senganga yo a mo tsogelago maatla, morwa yo a sa theeletšego batswadi ba gagwe le ge ba mo kgala, ₁₉batswadi ba gagwe ba mo iše kgorong go baetapele ba motse wa gabobona. ₂₀Ba botše baetapele ba re: ‘Morwa wa rena o ngangabetše, o re tsogela maatla, gomme o gana go re theeletša; o senya tšhelete ebile ke letagwa.’ ₂₁Banna ba motse ba mmolaye ka maswika, mme ka go dira bjalo le ikhutše bobe bjo. Yo mongwe le yo mongwe mo nageng ya Israele o tla kwa se se diregilego mme a boifa.”

₂₂“Ge motho a obile molato mo a lebanego ke kotlo ya lehu, mme a bolawa a lekeleditšwe koteng, ₂₃setopo sa gagwe se se ke sa lala moo. O swanetše go bolokwa ka lona letšatši leo, ka gobane setopo se se fegilwego koteng se rogakilwe ke Morena. Le bolokeng setopo seo gore le se ke la kgotlela naga ye Morena Modimo wa lena a le fago yona.

₁“Ge o ka bona seruiwa sa Moisraele wa geno se timela, o se ke wa se hlokomologa; se boetše go yena. ₂Eupša ge mong wa sona a dula kgole, goba o sa tsebe gore ke sa mang, gona o ye naso gae. Ge mong wa sona a etla a se nyaka, o mo neele sona. ₃O dire bjalo le ge o ka hwetša pokolo, goba seaparo, goba se sengwe le se sengwe se Moisraele wa geno a ka bago a se timeditše.

₄“Ge o ka bona pokolo goba kgomo ya Moisraele wa geno e wele fase, o se ke wa e hlokomologa; o mo thuše le tsoše phoofolo yeo.

₅“Basadi ba se ke ba apara diaparo tša banna, le banna ba se ke ba apara diaparo tša basadi, ka gobane Morena Modimo wa lena o hlaswa batho ba ba dirago tše bjalo.

₆“Ge o ka hwetša sehlaga sa nonyana mohlareng goba fase le tshadi ya ntshe e alametše mae goba mafotwana, o se ke wa tšea nonyana yeo. ₇O ka tšea mafotwana, eupša nonyana o e lese e itshepelele, gore o tle o phele bophelo bjo botelele bja katlego.

₈“Ge o aga ngwako wo mofsa, o raretše magomo a tlhaka ka mmotwana, ke moo o ka se bego le molato ge motho a ka wa mme a hwa.

₉“O se ke wa bjala sebjalo se sengwe serapeng se o se bjetšego merara, gore o se tlo iletšwa diterebe le dibjalo tšeo tše dingwe.

₁₀“O se ke wa pana pholo le pokolo gotee wa lema ka tšona.

₁₁“O se ke wa apara seaparo se se dirilwego ka go logaganya boya bja nku le leokodi.

₁₂“O rokelele mašaphu dikhutlong tše nne tša diaparo tša gago.”

₁₃“Ge monna a ka nyala mosadi a robala naye, ka morago a re yena ga a sa mo nyaka, ₁₄ka gona a mo phara ka melato ya maaka, a re o be a kile a robala le monna yo mongwe pele ba nyalana, ₁₅batswadi ba kgarebe yeo ba tšee lešela le le nago le madi leo monna yoo a robetšego le kgarebe yeo go lona ge ba sa tšo nyalana, leo le laetšago gore kgarebe yeo e be e se ya ka ya robala le monna, mme ba le tliše kgorong pele ga baetapele ba motse. ₁₆Tatagokgarebe a re go bona: ‘Ke neetše monna yo morwedi wa ka ya ba mosadi wa gagwe, mme bjale ga a sa mo nyaka. ₁₇O mo pharile ka melato ya maaka, a re o be a kile a robala le monna pele yena a mo nyala. Fela bohlatse šebo bja gore morwedi wa ka o be a se a ka a robala le monna; lebelelang lešela le la madi le ba robetšego go lona ge ba seno nyalana!’ ₁₈Baetapele ba motse ba tšee monna yoo ba mo itie. ₁₉Ba be ba mo lefiše dipapetlana tša silibera tše lekgolo mme ba di neele tatagokgarebe, ka gobane monna yoo o gobošitše kgarebe ya Moisraele. Go feta moo kgarebe yeo e fele e le mosadi wa gagwe; a se ke a tsoga a mo hladile ge a sa phela.

₂₀“Eupša ge taba yeo e le therešo gomme go se bohlatse bja gore kgarebe yeo e be e se ya ka ya robala le monna, ₂₁gona ba swanetše go ntšhetša kgarebe yeo ntle mojakong wa ngwako wa tatagoyona, moo banna ba motse wa gabo ba mmolaye ka maswika. O dirile taba ya go leša dihlong gare ga batho ba gaborena ka go robala le monna ka ngwakong wa tatagwe mola a se a nyalwa. Ka tsela ye le ikhutše bobe bjo.

₂₂“Ge monna a ka swarwa a robetše le mosadi wa monna yo mongwe, bobedi bja bona ba swanetše go bolawa. Ka tsela ye le ikhutše bobe bjo.

₂₃“Ge monna a ka swarwa ka motseng a robetše le kgarebe ye e beeleditšwego ke monna yo mongwe, ₂₄bobedi bja bona le ba iše kgorong ya motse, le ba bolaye ka maswika. Kgarebe e bolawe ka gobane e se ya ka ya hlaba mokgoši ya nyaka thušo le ge e be e le ka motseng moo e ka bego e kwelwe. Mme monna yoo yena a bolawe ka gobane a gobošitše mosadi wa Moisraele wa gabo. Ka tsela ye le ikhutše bobe bjo.

₂₅“Ge monna a ka kata kgarebe kua nageng mola kgarebe yeo e beeleditšwe ke monna yo mongwe, gona go bolawe monna yoo fela; ₂₆kgarebe e se ke ya dirwa selo, ka gobane ga se ya dira sebe se a swanetšego go bolaelwa sona. Molato wo o swana le wa ge monna yo mongwe a ka hlasela yo mongwe mme a mmolaya. ₂₇Monna yoo o katile kgarebe kua nageng mola e beeleditšwe, mme le ge e be e lla e nyaka thušo, e hlokile wa go e thuša.

₂₈“Ge monna a ka swarwa a kata kgarebe ye e sego ya beeletšwa, ₂₉a lefe tatagokgarebe magadi ka dipapetlana tša silibera tše masome a a fetšago seatla, mme kgarebe yeo e be mosadi wa gagwe, ka gobane o mo gobošitše. A se ke a tsoga a mo hladile ge a sa phela.

₃₀“Monna a se ke a goboša tatagwe ka go robala le yo mongwe wa basadi ba tatagwe.”

₁“Monna yo a kgatletšwego goba yo a ripegilego bopele a se ke a balwa le setšhaba sa Morena.

₂“Lehlakanasela goba yo mongwe wa ditlogolo tša lona, le wa moloko wa lesome, a se ke a balwa le setšhaba sa Morena.

₃“Moamone goba Momoaba, goba yo mongwe wa ditlogolo tša bona, le wa moloko wa lesome, a se ke a balwa le setšhaba sa Morena. ₄Ba ganne go le fa dijo le meetse ge le be le le tseleng ya go tšwa Egepeta, le gona ba ile ba thwala Bileamo, morwa wa Beore, wa motse wa Petore kua Mesopotamia, gore a le rogake. ₅Fela Morena Modimo wa lena a se ke a theetša Bileamo, eupša a fetoša thogako yeo tšhegofatšo, ka gobane o be a le rata. ₆Ge le sa phela le se ke la tsoga le dirile selo go thuša ditšhaba tše, goba go di humiša.

₇“Le se ke la nyatša Baedomo; ke bomorwarragolena; le Baegepeta le se ke la nyatša; le kile la dula nageng ya bona. ₈Go tloga go moloko wa boraro go iša pele ditlogolo tša bona di ka balwa le setšhaba sa Morena.”

₉“Ge le hlomile mešaša nakong ya ntwa, le swanetše go tšhabana le se sengwe le se sengwe se se ka le tšhilafatšago. ₁₀Ge monna a ka tšhilafala ka gobane a lorile mme a ntšha matšhedi bošego, o swanetše go tšwa mešašeng mme a dule ka ntle ga yona. ₁₁Mathapama a hlape, gomme ge letšatši le diketše a ka boa mešašeng.

₁₂“Le swanetše go ba le lefelo ka ntle ga mešaša moo le ka yago gona ge le nyaka go ithoma. ₁₃Gare ga ditlabakelo tše le di swerego go be le phata gore, ge le eya go ithoma, le epe molete ka yona mme le phušetše mantle. ₁₄Ka mehla mešaša ya lena e swanetše go fele e hlweketše tirelo, ka gobane Morena Modimo wa lena o na le lena mešašeng ya lena go le šireletša le go le dira gore le fenye manaba a lena. Morena a se ke a bona ditšhila mešašeng ya lena, gomme a le furalela.”

₁₅“Ge lekgoba le ka tšhaba go mong wa lona gomme la tla go lena gore le le šireletše, le se ke la le boetša morago. ₁₆Lekgoba leo le ka dula go wo mongwe wa metse ya lena wo lona le o kgethago, gomme le se ke la le hlakiša.

₁₇“Moisraele, monna goba mosadi, e se ke ya ba segwebakathobalo sa tempele. ₁₈Le gona, tšhelete ye e hweditšwego ka tsela ye e se ke ya tlišwa ngwakong wa Morena Modimo wa lena go phethagatša keno. Morena o hloile digwebakathobalo tša tempele.

₁₉“Ge le adima Baisraele ba gabolena tšhelete, goba dijo, goba selo sefe le sefe, le se ke la ba tsoma mašokotšo. ₂₀Le ka tsoma mašokotšo go bafaladi, eupša Baisraele ba gabolena le se ke la ba tsoma ona. Le phetheng taelo ye, gomme Morena Modimo wa lena o tla šegofatša tšohle tše le di dirago nageng ye le yago go e thopa.

₂₁“Ge le enetše Morena Modimo wa lena, le se ke la tshela keno ya lena; Morena o tla nyaka gore le phethe keno yeo, gomme ke sebe go se e phethe. ₂₂Ga se sebe go se enele Morena, ₂₃eupša ge o ka ena ka go ithatela, o hlokomele gore o phethe keno yeo.

₂₄“Ge o sepela ka tsela ye e putlago serapa sa merara sa Moisraele wa geno, o ka ja diterebe ka moo o nyakago ka gona, eupša o se ke wa duta selo ka ntlatlana. ₂₅Ge o sepela ka tsela ye e putlago tšhemong ya mabele ya Moisraele wa geno, o ka ja magollelo ka moka ao o ka a thaolago ka diatla, eupša o se ke wa ripa mabele ka sekele.”

₁“Ge monna a ka nyala mosadi mme ka morago a kwa a se sa mo nyaka, ka gobane a lemogile se sengwe go yena se se lešago dihlong, a ngwale lengwalo la tlhalo, a le fe mosadi yoo, gomme a mo rake lapeng la gagwe. ₂Bjale ge mosadi yoo a ka nyalwa ke monna yo mongwe, ₃gomme le yena monna yoo a kwa a se sa mo rata, le yena a ngwale lengwalo la tlhalo, a mo fe lona, mme a mo rake lapeng la gagwe, goba le yena monna yoo wa bobedi a hwa, ₄gona monna yola wa gagwe wa pele a se ke a mo nyala gape; o swanetše go mo tšea gore o kgotletšwe. Ge a ka mo nyala gape, taba yeo e tla ba makgapha go Morena. Le se ke la dira sebe sa go šiiša ka tsela yeo nageng ye Morena Modimo wa lena a le fago yona.”

₅“Ge monna a sa tšo nyala, a se ke a išwa ntweng goba mošomong ofe le ofe wa setšhaba; a khutšišwe modirong ngwaga o tee, gore a tle a kgone go dula gae mme a thabiše mosadi wa gagwe.

₆“Ge o adima motho selo, a se ke a se beeletša ka tšhilo le lwala, le ge e le tšhilo fela, ka gore o tla be o tšeela ba lapa la gagwe dilo tša bona tša go iphediša.

₇“Yo a ka utswago Moisraele wa gabo mme a mo swara gampe, goba a mo rekiša gore e be lekgoba, a bolawe. Ka go dira bjalo le ikhutše bobe bjo.

₈“Ge o swerwe ke bolwetši bja letlalo bja go go tšhilafatša, o hlokomele go dira ka moo baprista ba Balefi ba go botšago ka gona; o phethe ditaelo tše ke ba filego tšona. ₉Le gopoleng seo Morena Modimo wa lena a se dirilego Miriamo tseleng ge le etšwa Egepeta.

₁₀“Ge o adima motho selo, o se ke wa tsena ngwakong wa gagwe go yo tšea kobo ye a beeletšago molato woo ka yona; ₁₁o eme ka ntle mme a go tlišetše kobo yeo ka boyena. ₁₂Ge e le modiidi o se ke wa robala le yona; ₁₃o e boetše go yena ge letšatši le dikela, gore a tle a kgone go robala ka yona. Ke moo a tlago go leboga, mme wena wa ba o dirile se Morena Modimo wa gago a bonago e le toka.

₁₄“O se ke wa pata mohlanka yo o mo thwetšego wa modiidi, wa mohloki, e ka ba Moisraele wa geno, goba mofaladi yo a dulago go wo mongwe wa metse ya lena. ₁₅Letšatši le lengwe le le lengwe pele ga ge letšatši le dikela o mo lefe, ka ge a dirile mošomo wa letšatši leo; ke modiidi mme o hloka tšhelete. Ge o ka se mo lefe, o tla llela go Morena ka lebaka la gago, mme wena o tla ba le molato wa sebe.

₁₆“Batswadi ba se bolaelwe melato ye e obilwego ke bana ba bona, le bana ba se bolaelwe melato ye e obilwego ke batswadi ba bona; motho a bolaelwe fela molato wo o obilego ke yena mong.

₁₇“O se ke wa amoga mofaladi le tšhuana ditokelo tša bona, goba wa tšea seaparo sa mohlologadi ya ba peeletšo ya se a se adimilego go wena. ₁₈O gopole gore o be o le lekgoba Egepeta, le gore Morena Modimo wa gago o ile a go lokolla; ke ka fao ke go fago taelo ye.

₁₉“Ge o ka re o buna wa lebala ngata mašemong, o se ke wa boela morago go yo e tšea; e swanetše go tlogelelwa bafaladi le ditšhuana le bahlologadi, gore Morena Modimo wa gago a tle a go šegofatše go tšohle tše o di dirago. ₂₀Ge o hlohlorile dienywa tša mehlware ya gago, o se ke wa boela go yo budutša tšeo di ka bago di sa šetše mehlareng; ke tša bafaladi le ditšhuana le bahlologadi. ₂₁Ge o futše diterebe tša merara ya gago, o se ke wa boela go yo budutša tšeo di šetšego; ke tša bafaladi le ditšhuana le bahlologadi. ₂₂O se ke wa lebala gore o be o le lekgoba Egepeta; ke ka lebaka leo ke go fago taelo ye.

₁“Ge Baisraele ba babedi ba ka išana kgorong go yo sekišwa, mme yo mongwe a se bonwe molato mola yo mongwe a bonwa molato, ₂ge wa molato a ahloletšwe go itiwa, moahlodi o swanetše go mo patlamiša mme a dire gore a otlwe ka kgati pele ga gagwe. Palo ya dikgati e ye ka molato wo a o obilego. ₃A ka otlwa dikgati tše masome a mane, eupša e sego go feta fao; go feta fao e ka ba go mo kokobetša phatlalatša.

₄“O se ke wa tlema pholo molomo ge o fola mabele ka yona.”

₅“Ge barwa ba motho ba agile felo gotee mme yo mongwe wa bona a hwa a se ne morwa, gona mosadi wa gagwe a se ke a nyalwa ke yo mongwe yo e sego wa lapa leo; ke tshwanelo ya morwarragomohu go tsenela mosadi yoo. ₆Morwa wa mathomo yo ba mmelegago a tšewe gore ke morwa wa mohu yola, gore lešika la lapa la gagwe le se timelele mo go Baisraele. ₇Eupša ge morwarragomohu a sa nyake go tsenela mosadi yoo, mosadi o swanetše go ya go bagolo kgorong ya motse mme a re: ‘Morwarragomogatšake ga a nyake go phetha tshwanelo ya gagwe; o gana go tsoša lapa la morwarragwe gare ga Baisraele.’ ₈Ke moo bagolo ba motse ba swanetšego go bitša monna yoo mme ba boledišane le yena. Ge a ka fela a sa gana go mo tsenela, ₉gona mohlologadi yoo wa morwarragwe a ye go yena moo pele ga bagolo bao ba motse, a mo role seeta mme a mo tshwele ka mare sefahlegong, a re: ‘Se ke se se hlagelago monna yo a ganago go tsošetša morwarragwe lapa.’ ₁₀Lapa la monna yoo le tsebje mo go Baisraele e le ‘lapa la morolwaseeta’.”

₁₁“Ge banna ba babedi ba elwa gomme mosadi wa yo mongwe wa bona a leka go thuša monna wa gagwe ka go swara monna yo mongwe yoo ka mapele, ₁₂le se ke la šokela mosadi yoo; le mo ripe seatla.

_13-14“Le se ke la hlalefetšana ge le šomiša dikeloboima le dikelo. ₁₅Le šomiše dikeloboima le dikelo tša mmakgonthe tše di tshephegago, gore le tle le phele nako ye telele nageng ye Morena Modimo wa lena a le fago yona. ₁₆Morena o hlaswa batho ba ba hlalefetšago.”

₁₇“Gopolang seo Baamaleke ba le dirilego sona ge le be le etšwa Egepeta. ₁₈Ba ile ba se ke ba boifa Modimo, mme ba le hlasela ka nthago ge le be le lapile le se na le maatla, mme ba bolaya bohle ba ba bego ba ikgoga ka morago. ₁₉Ka gona, ge Morena Modimo wa lena a le file naga yeo mme a le khutšišitše manaba ka moka ao a bapilego le lena, le boneng gore le bolaye Baamaleke ka moka, gore go se ke gwa ba le motho yo a ka hlwago a sa ba gopola. Le se ke la lebala!”

₁Ge ba batamela Jerusalema, ba etla Betfage le Bethania, Thabeng ya Mehlware, Jesu a roma barutiwa ba gagwe ba babedi, ₂a ba laela a re: “Eyang motseng wola le lebanego le wona, gomme ge le fihla le tla hwetša pokolwana ye e kgokilwego, ye e sego ya ka ya namelwa ke motho. Le e kgokolle, le e tliše mo. ₃Ge motho a ka le botšiša gore le e kgokollelang, le mmotše le re: ‘Morena o a e nyaka, o tla e buša ka pela.’ ”

₄Ba ya, ba fihla ba hwetša pokolwana e kgokilwe mojako wa ngwako go lebana le mokgotha. Ge ba sa e kgokolla, ₅ba bangwe ba ba bego ba eme moo ba ba botšiša ba re: “Le reng le kgokolla pokolwana ye?”

₆Bona ba ba fetola ka mokgwa wola Jesu a ba laetšego, gomme batho bao ba ba lesa. ₇Ba iša pokolwana yela go Jesu, ba bea diaparo tša bona godimo ga yona, mme Jesu a e namela. ₈Batho ba bantši ba ala diaparo tša bona mo tseleng, mola ba bangwe ba rema makala a dihlare ka mašemong, ba a ala tseleng. ₉Batho ba ba bego ba etile Jesu pele le ba ba bego ba mo šetše morago ba goa ba re: “A go tumišwe Modimo! A go retwe yo a tlago a romilwe ke Morena! ₁₀Modimo a šegofatše mmušo wo o tlago hlongwa wa Dafida, rakgolokhukhu wa rena! A go retwe Yogodimodimo magodimong!”

₁₁Jesu a tsena Jerusalema, a ya ka Tempeleng, a fihla a bogela tšohle moo, gomme ka ge e be e šetše e le mathapama, a tšwa a ya Bethania a na le barutiwa ba gagwe ba lesome le metšo ye mebedi.

₁₂Ka letšatši le le latelago ge ba boa Bethania a kwa a swerwe ke tlala. ₁₃A bona sehlare sa mogo bokgojana se na le matlakala; a ya go sona a holofetše gore o tla hwetša selo. Ge a fihla go sona a se hwetše selo ge e se matlakala fela, gobane e be e se lebaka la mago. ₁₄A re go sona: “Go se sa tsoga go bile le motho yo a jago seenywa sa gago le ka mohla wo mongwe!”

Barutiwa ba gagwe ba mo kwa ge a realo.

₁₅Ba fihla Jerusalema. Ge Jesu a fihla Tempeleng, a raka ba ba rekago le ba ba rekišago Tempeleng. A menola ditafola tša ba ba rekanyago ditšhelete, le ditulo tša ba ba rekišago maeba. ₁₆A se dumelele motho go putla kgoro ya Tempele a rwele morwalo. ₁₇A ba lemoša a re: “Ga ke re Mangwalo a Makgethwa a re: ‘Ngwako wa ka o tla bitšwa ngwako wa ditšhaba ka moka wa thapelo,’ eupša lena le o dirile legolo la bahlakodi!”

₁₈Ge baprista ba bagolo le boramangwalo ba ekwa a realo, ba rera go loga maano a go mmolaya, ka gobane ba be ba mmoifa, ka ge lešaba ka moka le be le kgotsa thuto ya gagwe.

₁₉Mathapama Jesu le barutiwa ba gagwe ba tloga motseng.

₂₀Mosong wa letšatši le le latelago, ge ba feta ka tsela, ba bona mogo wola o omeletše go tloga ka medu. ₂₁Petrose a elelwa, mme a re go Jesu: “Moruti, bona mogo wola o o rogakilego, o omeletše.”

₂₂Jesu a ba fetola a re: “Dumelang go Modimo. ₂₃Ruri, ke le botša gore yo a ka botšago thaba ye a re: ‘Tloga mo o yo itahlela ka lewatleng’ a sa belaele ka pelong ya gagwe, eupša a dumela gore tše a di bolelago di tla direga, di tla mo diregela. ₂₄Ka lebaka leo ke le botša gore tšohle tše le kago di kgopela ka thapelo, le dumele gore ruri le tla di fiwa, gomme le tla di fiwa. ₂₅Ge le ema le rapela, le lebalele ba le ba tsotago, gore le lena Tatagolena wa legodimong a le lebalele dibe tša lena.”

₂₇Ba buša ba tla Jerusalema. Ya re ge Jesu a sa sepelasepela ka Tempeleng, baprista ba bagolo, le boramangwalo, le bagolo ba setšhaba ba tla go yena, ₂₈ba mmotšiša ba re: “O romilwe ke mang go dira dilo tše? Gona ke mang yo a go boditšego gore o di dire?”

₂₉Jesu a ba fetola a re: “Le nna ke tla le botšiša taba e tee, gomme ge le ka mphetola, ke tla le botša gore ke romilwe ke mang go dira dilo tše. ₃₀Johanese o be a laetšwe ke mang go kolobetša – ke Modimo goba ke batho? Mphetoleng!”

₃₁Ba sebelana ba re: “Ge re ka re: ‘O be a laetšwe ke Modimo,’ o tla re: ‘Bjale ke ka lebaka lang le se la mo dumela?’ ₃₂Gomme ge re ka re: ‘O be a laetšwe ke batho ...’ ” (Gape ba be ba boifa batho, ka ge bohle ba be ba dumela gore Johanese e be e le moprofeta.) ₃₃Ka gona ba fetola Jesu ba re: “Ga re tsebe.”

Gomme yena a re go bona: “Gona le nna nka se le botše gore ke romilwe ke mang go dira dilo tše.”