To The Word – Day 2

₁Mathomong Modimo o hlodile legodimo le lefase. ₂Lefase le be le sa dulwe, le se na selo. Bodiba bjo bogolo bo be bo pipilwe ke leswiswi, mme moya wa Modimo o be o akaletše ka godimo ga meetse. ₃Gomme Modimo a laela a re: “A go be le seetša” – seetša sa ba gona. ₄Modimo a se bona, a kgahlega. A aroganya seetša le leswiswi, ₅mme a re seetša ke “mosegare”, leswiswi ke “bošego”. Gwa feta mantšiboa, gwa tla meso – leo e be e le letšatši la pele.

_6-7Modimo a laela gape a re: “A go be le lefaufau go aroganya meetse le go a dira gore a be mafelong a mabedi” – gwa direga bjalo. Ka gona Modimo a dira lefaufau mme a aroganya meetse a ka fase ga lona le a ka godimo ga lona. ₈A re lefaufau ke “legodimo”. Gwa feta mantšiboa, gwa tla meso – leo e be e le letšatši la bobedi.

₉Modimo a laela gape a re: “A meetse a a lego ka fase ga legodimo a kgobokane felo gotee gore naga e bonale” – gwa direga bjalo. ₁₀A re naga ke “lefase” mme meetse a a kgobokanego felo gotee a re ke “lewatle”. Modimo a di bona, a kgahlega. ₁₁Gomme a laela a re: “A lefase le be le mehuta yohle ya dimela – tšeo di hlagišago dithoro, le mehlare ye e enywago dienywa” – gwa direga bjalo. ₁₂Ka fao lefase la ba le mehuta ka moka ya dimela – tšeo di hlagišago dithoro, le mehlare ye e enywago dienywa. Gomme Modimo a di bona, a kgahlega. ₁₃Gwa feta mantšiboa, gwa tla meso – leo e be e le letšatši la boraro.

₁₄Modimo a laela gape a re: “A dietša di be gona legodimong go aroganya mosegare le bošego, le go bontšha nako yeo go thomago matšatši, le mengwaga, le matšatši a menyanya ya sedumedi; ₁₅di tage legodimong go bonega lefase” – gwa direga bjalo. ₁₆Ka gona Modimo a dira dietša tše pedi tše kgolo, letšatši go buša mosegare, le ngwedi go buša bošego; a dira le dinaledi. ₁₇A bea dietša legodimong gore di bonege lefase, ₁₈go laola mosegare le bošego, le go aroganya seetša le leswiswi. Gomme Modimo a di bona, a kgahlega. ₁₉Gwa feta mantšiboa, gwa tla meso – leo e be e le letšatši la bone.

₂₀Modimo a laela gape a re: “A meetse a nyeume diphedi tša mehuta yohle, mme legodimo le tlale dinonyana.” ₂₁Ka gona Modimo a hlola diphedi tše kgolokgolo tša lewatle, le diphedi tša mehuta ka moka ya ka meetseng, le dinonyana tša mehuta ka moka. Gomme Modimo a di bona, a kgahlega. ₂₂A di šegofatša ka moka, gomme a botša diphedi tša ka meetseng gore di ate di tlale lewatle, le dinonyana a di botša gore di ate. ₂₃Gwa feta mantšiboa, gwa tla meso – leo e be e le letšatši la bohlano.

₂₄Modimo a laela gape a re: “A lefase le be le diphedi tša mehuta yohle – diruiwa, le diphoofolo tša lešoka, le digagabi” – gwa direga bjalo. ₂₅Ka gona Modimo a di dira ka moka mme a kgahlwa ke tšeo a di bonago.

₂₆Gape Modimo a re: “Bjale a re direng batho ka seswantšho sa rena, ba swane le rena. Ba tla laola dihlapi, le dinonyana, le diruiwa, le diphoofolo tša lešoka, le digagabi ka moka tša lefase.” ₂₇Ka gona Modimo a hlola batho, a ba dira gore ba swane le yena. A ba dira e le monna le mosadi, ₂₈a ba šegofatša mme a re go bona: “Le beng le bana ba bantši gore ditlogolo tša lena di tle di phele gohle lefaseng mme di le laole. Ke le bea balaodi ba dihlapi le dinonyana le diphedi tšohle tša lefase. ₂₉Ke le file dimela tšohle tša peu lefaseng ka moka le mehlare yohle ya dienywa tša peu, gore e be dijo tša lena. ₃₀Ge e le diphoofolo tša lešoka le dinonyana le digagabi ka moka, tšona ke di file ditala tšohle gore e be dijo tša tšona” – gwa direga bjalo. ₃₁Modimo a lebelela tšohle tše a di dirilego mme a kgahlega kudu. Mantšiboa a feta, gwa tla meso – leo e be e le letšatši la boselela.

₁Ke ka fao Modimo a phethilego modiro wa go hlola legodimo le tšohle tše di lego go lona, le lefase le tšohle tše di lego go lona. ₂Ka letšatši la bošupa Modimo ke ge a feditše mediro ye a bego a e dira; mme ka letšatši leo a khutša, a feditše mediro ka moka ye a bego a e dira. ₃A šegofatša letšatši la bošupa mme a le dira letšatši le lekgethwa, ka gore ka letšatši leo ke ge a feditše tlholo ya gagwe mme a lesa mošomo ka moka. ₄Ke ka fao legodimo le lefase di hlotšwego ka gona.

Ge Morena Modimo a hlola legodimo le lefase, ₅go be go se na dimela lefaseng goba ditala tšeo di medilego, ka gore o be a se a ka a neša pula, gape go se yo a ka lemago. ₆Fela meetse ona a be a nyaganyaga fase a nošetša naga.

₇Morena Modimo a ntšha mobu fase a bopa monna ka wona; a budulela moya wa bophelo ka dinkong tša gagwe, gomme monna a thoma go phela.

₈Morena Modimo a dira serapa kua Edene ka bohlabela, mme a bea monna yola a mmopilego ka moo. ₉Fao a mediša dimela tše botse tša mehuta yohle, mme tša enywa dienywa tše bose. Gare ga serapa go be go na le mohlare wo o fago bophelo, le mohlare wo o fago tsebo ya se sebotse le se sebe.

₁₀Moo Edene gwa ba le moela wa meetse wo o nošetšago serapa. Ka ntle ga Edene moela woo o be o tšwile dinoka tše nne. ₁₁Noka ya pele ke Pishone, mme yona e ela go dikologa naga ya Habila mo go hwetšwago gauta. ₁₂Gauta yeo ga se ya tswakwa; senkgabose se e sego sa mehleng le mohuta wo mongwe wa magakabje di hwetšwa fao. ₁₃Noka ya bobedi ke Gihone. Yona e ela go dikologa naga ya Kushe. ₁₄Noka ya boraro ke Tigrise ye e fetago ka bohlabela bja Asiria, mme ya bone noka yona ke Yufratese.

₁₅Ka gona Morena Modimo a bea monna moo serapeng sa Edene gore a se leme, a se lete. ₁₆A mmotša a re: “O ka ja dienywa tša mohlare ofe le ofe mo serapeng ₁₇ntle le tša mohlare wo o fago tsebo ya se sebotse le se sebe. O se ke wa ja dienywa tša mohlare woo; ge o ka di ja, o tla hwa lehu ka lona letšatši leo.”

₁₈Ke moo Morena Modimo a itšego: “Ga go botse ge monna a phela a nnoši. Ke tla mo direla mothuši yo a mo swanetšego.” ₁₉Ka fao a ntšha mobu fase a bopa diphoofolo ka moka le dinonyana ka moka, a di tliša pele ga monna gore a bone gore o tla di rea maina afe. Ke ka moo ka moka di reilwego maina. ₂₀Ka fao monna a rea dinonyana le diruiwa tšohle le diphoofolo tšohle tša lešoka maina, fela a hloka le e tee ya tšona ye e ka bago mothuši yo a mo swanetšego.

₂₁Ke moo Morena Modimo a swarišitšego monna boroko bjo bogolo, mme a re a sa robetše, a ntšha kgopo e tee ya monna mme a thiba sekgala sela ka nama. ₂₂Ka kgopo yeo a dira mosadi mme a mo tliša go monna. ₂₃Ke fao monna a itšego:

₂₅Monna le mosadi bobedi ba be ba se ba tšwara, eupša ba be ba sa lewe ke dihlong.

₁Bjale noga e be e le phoofolo ya mahlajana kudu go feta diphoofolo tšohle tša lešoka tše Morena Modimo a di dirilego. Ka gona noga ya botšiša mosadi ya re: “A Modimo o tloga a le boditše gore le se ke la ja dienywa tša mohlare ofe le ofe ka mo serapeng?”

₂Mosadi a e fetola a re: “Re ka ja dienywa tša mohlare ofe le ofe ka mo serapeng, ₃ntle le tša mohlare wo o lego gare ga serapa. Modimo o re boditše gore re se ke ra ja dienywa tša mohlare woo goba ra o kgwatha; ge re ka dira bjalo, re tla hwa.”

₄Noga ya mo fetola ya re: “Taba yeo ga se therešo; le ka se hwe. ₅Modimo o boletše bjalo ka gobane a tseba gore ge le ka o ja, le tla ba le tlhaologanyo la swana le yena mme la tseba se sebotse le se sebe.”

₆Mosadi a bona gore mohlare woo ke wo mobotsebotse le gore dienywa tša wona e ka ba tše bose ge motho a di ja, gomme a gopodišiša gore e ka ba mo gobose bjang go ja dienywa tšeo le go ba le bohlale. Ka fao a fula tše dingwe tša tšona a di ja. A fa mogatšagwe tše dingwe, mme le yena a di ja. ₇Ge ba seno di ja, ba ba le tlhaologanyo mme ba lemoga gore ga se ba tšwara. Ka gona ba rokaganya matlakala a mogo, ba a tšwara.

₈Mantšiboeng ao ba kwa Morena Modimo a itshepelela ka mo serapeng, mme ba mo utamela gare ga mehlare. ₉Eupša Morena Modimo a bitša monna a re: “O go kae?”

₁₀Monna a mo araba a re: “Ke go kwele o sepela ka mo serapeng, ka tšhoga mme ka go utamela ka gore ke be ke se ka tšwara.”

₁₁Modimo a mmotšiša a re: “Ke mang yo a go boditšego gore ga se wa tšwara? A o lle dienywa tšela ke go boditšego gore o se ke wa di ja?”

₁₂Monna a mo fetola a re: “Mosadi yo o mmeilego mo le nna o mphile dienywa tšeo mme nna ka di ja.”

₁₃Morena Modimo a botšiša mosadi a re: “Ke ka lebaka lang o dirile taba ye?”

Mosadi a mo fetola a re: “Ke noga yeo e mphoraforeditšego gore ke di je.”

₁₄Ke moo Morena Modimo a itšego go noga: “Ka gobane o dirile taba yeo, o tla rwala thogako ye: O tla tšhabja ke diruiwa tšohle le diphoofolo tšohle tša lešoka; go tloga bjale o tla gogoba fase ka mpa mme wa ja lerole bophelo bja gago ka moka. ₁₅Ke tla dira gore wena le mosadi le hloyane, le gore ditlogolo tša gagwe le ditlogolo tša gago di hloyane ka mehla. Ditlogolo tša gagwe di tla go pšhatlaganya hlogo, mme wena o tla ba loma direthe.”

₁₆Gomme a re go mosadi: “Ke tla go atišetša mathata ge o ima, le bohloko ge o belega. Le ge go le bjalo, o tla no fela o duma mogatšago, mme wa laolwa ke yena.”

₁₇Mme a re go monna: “O theeditše mosadi wa gago mme wa ja dienywa tše ke go boditšego gore o se ke wa di ja. Ka lebaka la seo o se dirilego, mobu o rogakilwe. O tla tlemega go šoma ka boima bophelo bja gago ka moka gore lefase le go hlagišetše dijo tše di lekanego. ₁₈Lefase le tla hlagiša ditshehlo le meetlwa, wa ba wa tlemega go ja ditala tša naga. ₁₉O tla šoma ka boima wa tšwa kudumela go ikhweletša dijo mobung go fihlela o boela mobung, gobane o bopilwe ka wona. O bopilwe ka mobu mme o tla fetoga mobu gape.”

₂₀Adamo a rea mosadi wa gagwe leina la Efa, ka gobane e be e le mmagobatho ka moka. ₂₁Gomme Morena Modimo a direla Adamo le mosadi wa gagwe diaparo ka mekgopa ya diphoofolo, a ba apeša tšona.

₂₂Ke moo Morena Modimo a itšego: “Bjale batho ba swana le rena, ba na le tsebo ya se sebotse le se sebe. Ga ba a swanela go dumelelwa go ja dienywa tša mohlare wa bophelo mme ba phelela sa ruri.” ₂₃Ka fao Morena Modimo a ba raka serapeng sa Edene, mme a dira gore monna a leme mobu wo a bopilwego ka wona. ₂₄Ka lehlakoreng la ka bohlabela la serapa a bea bakerubi, le tšhoša ye e laumelago ka mathoko ohle go thibela motho go batamela mohlare wa bophelo.

₁Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo. ₂E sa le a eba go Modimo go tloga le go tloga. ₃Tšohle di hlodilwe ka yena, gomme go tše di hlodilwego ga go le se tee se se sego sa hlolwa ka yena. ₄Dihlolwa tšohle di hweditše bophelo ka yena, bophelo bjo e bilego seetša sa batho. ₅Seetša seo se bonega leswiswing, gomme leswiswi ga se la kgona go se fenya.

₆Modimo o kile a roma monna yo mongwe yo leina la gagwe e bego e le Johanese. ₇O be a tlile go begela batho seetša, gore bohle ba kwe se a se begago gomme ba se dumele. ₈Yena ka boyena e be e se seetša; se a bego a se tletše e be e le go bega seetša. ₉Seetšaetša sa go bonegela batho bohle se be se etla lefaseng.

₁₀Lentšu o be a le lefaseng, gomme le ge Modimo a hlodile lefase ka yena, batho ba lona ga se ba mo amogela. ₁₁O be a tlile ga gabo, fela ba gabo ba se mo amogele. ₁₂Eupša ba ba ilego ba mo amogela mme ba dumela go yena, bona a ba fa tokelo ya go ba bana ba Modimo. ₁₃Ya ba bana ba Modimo, e sego ka go tswalwa bjalo ka bana ba bangwe, e sego ka go tswalwa ka tumo ya nama, goba ka thato ya monna, eupša ka go tswalwa ke Modimo ka boyena.

₁₄Yena Lentšu e bile motho, a dula le rena e le yo botho kudu go rena, a re utollela ka botlalo se Modimo a lego sona. Ra bogela letago la gagwe, letago le a le filwego ke Tatagwe, e le yena Morwa a nnoši wa Tatagwe.

₁₅Johanese o be a bolela ka yena mola a goeletša a re: “Ke be ke era yena yo ge ke be ke re: ‘Yo a ntlhatlamago o mpheta ka maemo, ka gobane o be a le gona pele nna ke tswalwa.’ ”

₁₆Ka ge a re loketše kudu, o re šegofaditše bohle, a re šegofatša leboelela. ₁₇Melao Modimo o re file yona ka Moshe, gomme ka Jesu Kriste a re utollela ka mo e lego yo botho go rena ka gona, a ba a re utollela se a lego sona. ₁₈Ga go motho yo a kilego a bona Modimo. Batho ba mo tseba ka go mo utollelwa ke Morwagwe, Motswalwanoši, yo ka boyena e lego Modimo, yo a lego kgauswi le Tatagwe.

₁₉Mola baetapele ba Bajuda Jerusalema ba romile baprista le Balefi go Johanese gore ba ye go mmotšiša gore ke yena mang, yena o ile a ipega, ₂₀a se gane go ba fetola, a bolela phaa a sa iphihle a re: “Ga se nna Mesia.”

₂₁Ba mmotšiša ba re: “Bjale o mang? Kgane ke wena Eliya?”

Yena a re: “Aowa, ga ke yena.”

Ba re: “Kgane e ka ba o yena Moprofeta?”

A ba fetola a re: “Aowa.”

₂₂Ba napa ba re: “Gona re botše gore o mang, gore re yo botša ba ba re romilego. O reng ge o ipega?”

₂₃Johanese a ba fetola ka go tsopola se se boletšwego ke moprofeta Jesaya a re:

₂₄Baromiwa bao ba bego ba romilwe ke Bafarisei ₂₅ba botšiša Johanese ba re: “Bjale ge eba ga o Mesia, ga o Eliya, ebile ga o yena Moprofeta, o reng o kolobetša?”

₂₆Johanese a ba fetola ka go re: “Nna ke kolobetša ka meetse, fela mo gare ga lena go na le yo le sa mo tsebego. ₂₇Ke yena yo a ntlhatlamago, eupša nna le go mmofolla marala a dieta ga se gwa ntshwanela.”

₂₈Ditaba tšeo ka moka di diregile Bethania ka mošola wa noka ya Jordane, moo Johanese a bego a kolobetša gona.

₂₉Ka tšatši le le latelago Johanese a bona Jesu a etla go yena. A re: “Bonang Kwanyana ya Modimo ye e tlošago dibe tša lefase! ₃₀Ke yena yo ke bego ke bolela ka yena mola ke re: ‘Monna yo a ntlhatlamago o mpheta ka maemo, ka gobane o be a le gona pele nna ke tswalwa.’ ₃₁Le nna ke be ke sa tsebe gore ke ofe, etšwe ke tšwetše ke kolobetša ka meetse gore a tle a utollelwe setšhaba sa Israele.”

₃₂Johanese o hlatsetše ka go re: “Ke bone Moya o theoga legodimong nke ke leeba, wa fihla wa dula godimo ga gagwe. ₃₃Nna ke be ke sa tsebe gore ke yena, fela Modimo yo a nthomilego go yo kolobetša ka meetse o be a rile go nna: ‘Yo o bonago Moya o theogela go yena o dula godimo ga gagwe, ke yena yo a kolobetšago ka Moya wo Mokgethwa.’ ₃₄Bjale ke bone, gomme ke hlatsela gore ke yena Morwa wa Modimo.”

₃₅Ka tšatši le le latelago Johanese o be a le moo gape a na le ba babedi ba barutiwa ba gagwe. ₃₆Ya re ge a bona Jesu a feta, a re: “Bonang Kwanyana ya Modimo!”

₃₇Barutiwa bao ba babedi ba mo kwa ge a realo, gomme ba latela Jesu. ₃₈Jesu a retologa, a ba bona ba mo latela, a ba botšiša a re: “Etse le nyakang?”

Bona ba re: “Rabi,” (ke go re “Moruti”), “na o dula kae?”

₃₉A ba fetola a re: “A re yeng le yo bona.” E be e šetše e le iri ya bone mathapama. Ke moka ba ya le yena ba yo bona mo a dulago gona, ba hlwa le yena tšatši leo.

₄₀Yo mongwe wa bao ba babedi ba go re go kwa Johanese a bolela ba latela Jesu e be e le Andrease, ngwanaboSimone Petrose. ₄₁Yena a raka a yo nyaka Simone, mogolwagwe, gomme ge a mo hweditše, a re: “Re hweditše Mesia!” (Ke go re “Kriste”.)

₄₂A nama a iša Simone go Jesu.

Jesu ge a mmona a re: “Etse ke wena Simone, morwa wa Johanese, fela o tla bitšwa Kefase.” (Ke go re “Petrose”.)

₄₃Ka tšatši le le latelago Jesu ge a re o ya Galilea a hwetša Filipi, gomme a re go yena: “Ntatele!” ₄₄Yo Filipi ga gabo e be e le Betsaida, motse wa gaboAndrease le Petrose. ₄₅O rile go hwetša Nathaniele, a re go yena: “Re hweditše yola Moshe a ngwadilego ka yena ka pukung ya melao, le baprofeta ba ngwadilego ka yena; ke Jesu wa Nasaretha, morwa wa Josefa.”

₄₆Nathaniele a mmotšiša a re: “Na go na le se sebotse se se ka tšwago Nasaretha?”

Filipi a mo fetola a re: “A re ye o yo bona.”

₄₇Ge Jesu a bona Nathaniele a etla go yena, a bolela ka yena a re: “Šo Moisraele wa mmakgonthe yo a se nago bomenetša.”

₄₈Nathaniele a mmotšiša a re: “O ntsebela kae?”

Jesu a mo fetola a re: “Ke go bone o le mola moriting wa mogo, pele ga ge Filipi a go bitša.”

₄₉Nathaniele a mo fetola a re: “Moruti, o Morwa wa Modimo! Ke wena Kgoši ya Israele!”

₅₀Jesu a re: “Na o dumela ka ge ke go boditše gore ke go bone o sa le mola moriting wa mogo? O sa tlilo bona tše di fetago tšeo.” ₅₁A tšwela pele a re: “Ruri, ruri, ke le botša gore le tla bona legodimo le bulegile gomme barongwa ba Modimo ba namelela ba bile ba theogela go Morwamotho.”

₁Ge go seno feta matšatši a mabedi gwa ba le monyanya wa lenyalo motseng wa Kana, nageng ya Galilea. MmagoJesu le yena o be a le gona. ₂Jesu le barutiwa ba gagwe le bona ba be ba laleditšwe moo monyanyeng. ₃Ya re ge beine e hlaetše, mmagoJesu a re go yena: “Ga ba sa na beine.”

₄Jesu a mo fetola ka go re: “Mma, etse tša ka o di tsena bjang? Gape nna nako ya ka ga sešo ya fihla.”

₅MmagoJesu a botša bahlanka a re: “Le dire tšohle tše a le botšago tšona.”

₆Ka lapeng leo go be go beilwe dipitša tše di selelago tša maswika, ye nngwe le ye nngwe e tlatšwa ke metšega ye mebedi go iša go ye meraro. Go ya ka setlwaedi sa Bajuda meetse a gona a be a šomišetšwa go itlhwekiša. ₇Jesu a botša bahlanka a re: “Tlatšang dipitša tšeo meetse.” Ba di tlatša pshi. ₈A nama a re go bona: “Bjale egang le išetše moswaramarapo.” Ba mo išetša. ₉Ya re ge a ekwa meetse ao a fetogilego beine ye a sa tsebego gore e tšwa kae, go tseba bahlanka bale ba go ga meetse, a bitša monyadi ₁₀a re go yena: “Batho ka moka ba thoma ka go ntšha beine ye bose; ge batho ba nwele go kgolwa, ba kgone ba ntšha ye e sego bose kudu. Fela wena ke gona o ntšhitšego ye bose gonabjale!”

₁₁Mohlolo wo wa mathomo Jesu o o dirile motseng wa Kana, nageng ya Galilea, a bontšha batho bogolo bja gagwe, mme barutiwa ba gagwe ba dumela go yena.

₁₂Ka morago ga moo Jesu le mmagwe le banababo le barutiwa ba gagwe ba ya Kapernaume, ba fihla ba dula gona matšatšinyana.

₁₃Monyanya wa Bajuda wa Paseka o be o šetše o le kgauswi, ka gona Jesu a ya Jerusalema. ₁₄Kua Tempeleng a fihla a hwetša babapatši ba dikgomo le ba dinku le ba maeba, a hwetša go dutše le ba go rekanya ditšhelete. ₁₅A loga tshelane ka dithapo, a ba raka Tempeleng ka moka ga bona, le dinku le dikgomo, a gašanya ditšhelete tša barekanyi ba ditšhelete, a ba a menola ditafola tša bona, ₁₆gomme a laela babapatši bale ba maeba a re: “Ntšhang dilo tšeo ka mo! Le se sa dira ntlo ya Tate bobapaletšo!” ₁₇Barutiwa ba gagwe ba napa ba elelwa gore go ngwadilwe ka Mangwalong a Makgethwa gwa thwe: “Modimo, ke jewa ke go fišegela ntlo ya gago.”

₁₈Bajuda ba mmotšiša ba re: “O ka re bontšha ka mohlolo mang gore tše o di dirago tše di go lebane?”

₁₉Jesu a ba fetola ka go re: “Kgerešang Tempele ye, gomme ka matšatši a mararo ke tla e tsoša.”

₂₀Bona ba mmotšiša ba re: “Tempele ye go tšerego mengwaga ye masome a mane le metšo ye e selelago go e aga, wena o ka nama wa e tsoša ka matšatši a mararo?”

₂₁Jesu ge a re Tempele o be a era mmele wa gagwe. ₂₂E rile ge a šetše a tsogile bahung barutiwa ba gagwe ba elelwa gore taba ye o be a kile a e bolela, gomme ba dumela Mangwalo a Makgethwa le se Jesu a ilego a se bolela.

₂₃Mola Jesu a le Jerusalema ka nako ya Monyanya wa Paseka, batho ba bantši ba ile ba dumela go yena ge ba bone mehlolo ye a e dirago. ₂₄Eupša yena a se ikanye bona ka gobane o be a ba tseba bohle, ₂₅gomme go sa nyakege gore a botšwe ke motho tša yo mongwe, ka ge a be a itsebela ka boyena tša ka pelong ya motho.

₁Go be go na le leloko le lengwe la Kgorokgolo ya Bajuda yo leina la gagwe e bego e le Nikodemose, e le yo mongwe wa Bafarisei. ₂O kile a ya go Jesu e le bošego, a fihla a re go yena: “Moruti, re a tseba gore o moruti yo a tšwago go Modimo, gobane ga go motho yo a ka kgonago go dira mehlolo ye o e dirago ye, ge Modimo a se na le yena.”

₃Jesu a mo fetola ka go re: “Ruri, ruri, ke go botša gore ge motho a sa tswalwe gape, e ka se be wa mmušo wa Modimo.”

₄Nikodemose a mmotšiša a re: “Motho a ka tswalwa gape bjang e šetše e le mokgalabje? Kgane a ka boela ka popelong ya mmagwe, a tswalwa?”

₅Jesu a mo fetola a re: “Ruri, ruri, ke go botša gore ge motho a sa tswalwe ka meetse le ka Moya e ka se be wa mmušo wa Modimo. ₆Gape nameng motho o tswalwa ke batswadi ba nama, mola moyeng a tswalwa ke yena Moya. ₇O se makale ge ke go botša gore le swanetše go tswalwa gape. ₈Moya o fokela mo o ratago gona; wa kwa modumo wa wona, fela wa se tsebe mo o tšwago goba mo o yago gona. Go bjalo ge le go bohle ba ba tswetšwego ke Moya.”

₉Nikodemose a mmotšiša a re: “Go ka kgonega bjang?”

₁₀Jesu a mo fetola a re: “Mmalo! Wa re o le moruti yo mokaaka wa Israele wa nama wa se tsebe? ₁₁Ruri, ruri, ke go botša gore rena re le botša se re se tsebago, ebile re hlatsela se re se bonego, fela ga le amogele bohlatse bja rena. ₁₂Ge le sa nkgolwe mola ke le botša tša mo lefaseng, ge ke le botša tša legodimong gona le tla nkgolwa bjang? ₁₃Gape ebile ga go yo a kilego a rotogela legodimong, ge e se yena Morwamotho yo a theogilego gona.

₁₄“Bjalo ka ge Moshe a kile a fega noga ya mphiri koteng kua lešokeng, Morwamotho le yena o swanetše go fegwa bjalo, ₁₅gore mang le mang yo a dumelago go yena a tle a be le bophelo bjo bo sa felego.

₁₆“Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego. ₁₇Gape Modimo ga se a roma Morwagwe lefaseng gore a tle a le ahlole, o mo romile gore a tle a le phološe.

₁₈“Yo a dumelago go Morwa wa Modimo a ka se ahlolwe, eupša yo a sa dumelego, yena o šetše a ahlotšwe, ka ge a sa dumele go Morwa a le noši wa Modimo. ₁₉Kahlolo ya Modimo e tla ka mokgwa wo: Seetša se tlile lefaseng, fela batho ba ratile leswiswi go feta sona seetša, ka ge mediro ya bona e le ye mebe. ₂₀Gape motho yo a dirago tše mpe o hloile seetša gomme ga a tle go sona, ka ge a sa nyake gore mediro ya gagwe e bonwe. ₂₁Yo a dirago tša nnete yena o tla seetšeng gore mediro ya gagwe e bonwe e le ye e dirilwego ka go theeletša Modimo.”

₂₂Ka morago ga moo Jesu le barutiwa ba gagwe ba ya nageng ya Judea, moo a ilego a fihla a dula nabo lebakanyana a kolobetša. ₂₃Johanese le yena ke ge a kolobetša motseng wa Enone, kgauswi le Salime, ka ge felo moo go be go na le meetse a mantši. Batho ba be ba eya go yena gomme a ba kolobetša. ₂₄Ke pele ga ge a išwa kgolegong.

₂₅Barutiwa ba gagwe ba phegišana le Mojuda yo mongwe mabapi le taba ya go itlhwekiša. ₂₆Ka gona ba ya go Johanese, ba fihla ba re: “Moruti, monna yola a bego a na le wena ka mošola wa Jordane, yola o bego o bolela ka yena, le yena o a kolobetša gomme batho ka moka ba ya go yena!”

₂₇Johanese a ba fetola a re: “Gape ga go se motho a ka se dirago a se a laelwa ke Modimo. ₂₈Lena beng le ka ntlhatsela gore ke be ke bolela ke re: ‘Nna ga ke Mesia, ke dio ba ke romilwe go mo kgorela tsela.’ ₂₉Mong wa monyadiwa ke monyadi. Phelesi yena sa gagwe ke go ema a theeleditše ge monyadi a etla, gomme ge a ekwa lentšu la gagwe o thaba kudu. Ke ka mo le nna lethabo la ka bjale le phethagetšego ka gona. ₃₀Gape yena setumo sa gagwe se swanetše gore se gole, sa ka se fokotšege.”

₃₁Motšwagodimo ke wa maemo a go feta a bohle. Motšwalefaseng ke wa lefase gomme o bolela tša lefaseng, kganthe motšwalegodimong yena ke wa maemo a go feta a bohle. ₃₂O hlatsela tše a di bonego le tše a di kwelego, eupša bohlatse bja gagwe ga bo amogelwe ke motho. ₃₃Fela yo a amogelago bohlatse bja gagwe o tiiša gore Modimo ke yo a rerešago. ₃₄Yo a romilwego ke Modimo o bolela mantšu a Modimo, ka gobane Modimo o mo fa Moya wa gagwe ka botlalo. ₃₅TatagoMorwa o rata Morwagwe gomme o gafetše tšohle diatleng tša gagwe. ₃₆Yo a dumelago go Morwagwe o na le bophelo bjo bo sa felego; yo a hlomphollago Morwagwe yena a ka se be le bophelo, eupša o tla otlwa ke Modimo go ya go ile.