To The Word – Day 191

₁Morena o ntaetše a re: ₂“Wena motho wa nama, lebelela dithabeng tša Israele o di porofete ₃o re: Lena dithaba tša Israele, ekwang lentšu la Morena, Mong wa bohle. O re go dithaba le meboto le magaga le meedi: Ke tla romela madira gore a yo fediša dintotoma tšeo go tšona le khunamelago medimo ya diswantšho. ₄Dialetare tša lena di tla phušolwa, le dialetare tša lena tša diorelo tša pšhatlwa. Ditopo tša batho ba gabolena ke tla di lahlela pele ga medingwana ya lena. ₅Ke tla rapalatša ditopo tša Baisraele pele ga medingwana ya bona; ke tla gašanya marapo a badudi ba gabolena go dikologa dialetare tša lena. ₆Gohle mo le dulago gona, lena Baisraele, metse ya lena e tla fedišwa, le dintotoma tšeo go tšona le khunamelago medimo ya diswantšho di tla phušolwa gore dialetare tša lena di kgerege, di we, le medingwana ya lena e pšhatlege, e fedišwe, le dialetare tša lena tša diorelo di pšhatlagane, gomme medimo ya lena ya diswantšho e fedišwe. ₇Ge le bona batho ba bolawa le tla dumela gore Morena ke nna.

₈“Fela ke tla šadiša mašaledi, ka gobane ba bangwe ba lena ba tla phonyokga tšhoša ge ke le šwalalanya le ditšhaba le dinaga. ₉Ba ba phonyokgilego ba tla nkgopola ba le ditšhabeng tšeo ba thopetšwego go tšona, ba gopola ka mo ke ba otletšego bokgelogi bja bona le go duma go loba medingwana ga bona. Ba tla inyatša ka lebaka la tše mpe le tšohle tša go šišimiša tše ba di dirilego. ₁₀Ba tla lemoga gore ke nna Morena, le gore ke be ke sa swaswe mola ke re ke tla ba tlišetša kotsi ye.”

₁₁Morena, Mong wa bohle, a re: “Wena bethantšha diatla, o kibe fase ka leoto, o re: Jonna! Baisraele ba tlilo bolawa ka tšhoša le ka tlala le ka leuba la bolwetši ka lebaka la tše mpe tša go šišimiša tše ba di dirilego. ₁₂Bao ba lego kgole ba tla bolawa ka leuba la bolwetši; bao ba lego kgauswi ba tla bolawa ka tšhoša; ba ba šetšego ba tla hwa ba bolawa ke tlala. Ke ka mo ke tlago itefetša go bona ka gona. ₁₃Ditopo tša ba ba bolailwego di tla rapalala gare ga medingwana ya bona le go dikologa dialetare tša bona, le mebotong yohle ye e phagamego, le godimo ga dithaba tšohle, le ka fase ga mehlare yohle ye metala le meeike ya matlakala a mantši, le mafelong ohle ao ba bego ba direla medingwana ya bona dihlabelo tša monkgo wo mobose go ona. Bohle ba tla napa ba tseba gore ke nna Morena. ₁₄Ee, ke tla otlolla letsogo la ka ka ba otla, ka senya le naga ya bona. Gohle mo ba dulago gona, go tloga lešokeng la ka borwa go yo fihla motseng wa Ribla, ke tla go fetoša leganata. Ke gona ba tlago tseba gore ke nna Morena.”

₁Morena o re go nna: ₂“Wena motho wa nama, Morena, Mong wa bohle, o re go naga ya Israele: Bofelo bo fihlile, bofelo bja naga yohle!

₃“Israele, bofelo bja gago bo tlile. Ke tla go galefela kudu, ka go otla go ya ka maitshwaro a gago, ka ba ka go rweša molato wa tše di šišimišago tše o di dirilego. ₄Nka se go babalele goba ka go gaugela. Ke tla go rweša molato wa maitshwaro a gago, le wa tše di šišimišago tše o di dirilego. Ke mo o tlago lemoga gore ke nna Morena.”

₅Morena, Mong wa bohle, o re: “Dikotsi di tla go tlela ka go latelana. ₆Bofelo bo etla. Bofelo bo etla. Bo tla bo go lebile. Šeboowe bo etla. ₇O wetšwe ke madimabe, wena modudi wa naga ye. Nako e fihlile, letšatši le batametše la gore go se sa ba le menyanya kua dithabeng, e be fela kgakanego.

₈“Ke kgauswi le go tšhollela kgalefo ya ka godimo ga gago, ka itefeletša ka wena. Ke tla go otla go ya ka maitshwaro a gago. Ke tla go rweša molato go tše di šišimišago tše o di dirilego. ₉Nka se go babalele goba ka go gaugela. Ke tla go rweša molato wa maitshwaro a gago le wa tše di šišimišago tše o di dirilego. Ke mo o tlago tseba gore ke nna Morena, yena mootli.”

₁₀Letšatši la tahlego šele le fihlile. Go senyegile. Boikgantšho bo iphile maatla. ₁₁Ntwa e hlakile. Ga go motho le o tee yo a tlago phonyokga; ga go thoto ye e tlago šala; go ka se sa ba le megobo. Ga go se bohlokwa se se tlago šala.

₁₂Nako e etla, le letšatši le kgauswi la gore moreki a se ke a thabela go reka, le morekiši a se ke a itsholela go rekiša, ka gobane kgalefo ya Morena e tla wela batho ka moka. ₁₃Ga go morekiši yo a tlago phela go fihlela a bušetšwa tše a di rekišitšego, ka gobane kgalefo ya Morena e tla wela bohle. Motho, ka lebaka la dibe tša gagwe, a ka se phologe. ₁₄Go lla phalafala gomme yo mongwe le yo mongwe o a itokiša. Eupša ga go yo a yago ntweng, ka gobane kgalefo ya Morena e tla wela batho bohle.

₁₅Ka ntle ga motse batho ba bolawa ka tšhoša, ka gare ke leuba la bolwetši le tlala. Yo a lego šokeng o tla bolawa ka tšhoša, yo a lego ka motseng a hwa a bolawa ke tlala le leuba la bolwetši. ₁₆Batšhabi ba tla tšhabela dithabeng go swana le maeba a moedi. Bohle ba tla letšwa ke bokgopo bja bona. ₁₇Ka moka ba tla repha matsogo, ba ba ba itlhapologela ka lebaka la letšhogo. ₁₈Ba tla apara tša go ilela, ba thothomela. Bohle ba tla goboga mme ba ipoola dihlogo. ₁₉Ba tla lahlela silibera ya bona kua mekgotheng; gauta ya bona ba tla e tšholla mo nkego ke tšhila, gobane silibera ya bona goba gauta e ka se ba hlakodiše mohla Morena a ba galefetše. Ba ka se je gauta goba silibera ba ntšha tlala maleng goba ba khora. Ke gauta le silibera tše di ba dirišitšego sebe. ₂₀Ba kile ba ikgantšha ka magakabje a bona a mabotse, eupša ba tla bopa ya bona medimo ya diswantšho ya go šišimiša, ya go selekiša ka ona. Morena o re: “Ke ka lebaka leo ke tlago dira gore ba bone nke gauta ya bona le silibera ke tšhila. ₂₁Ke tla lesa batho ba šele ba ba hlakola tšona, gomme bakgopo ba lefase ba tla ba amoga tšona, ba di tšhilafatša. ₂₂Ge Tempele ya ka ye ke e ratago e tšhilafatšwa mola bahlakodi ba e šwahlela mme ba e tšhilafatša, nka se di tsene.

₂₃“Lokiša ditlemo, gobane naga e tletše dipolao, le motseng go tletše šiši. ₂₄Ka gona ke tla tliša ditšhaba tše dišorošoro, gomme ka dira gore ba ba amoge magae. Banna ba gabolena ba maatla ke tla ba lahliša makoko, gomme ditšhaba tšeo di tla ba tšhilafaletša mafelo a makgethwa. ₂₅Ge ba tlaletšwe ba tla nyaka khutšo, fela ba e hloka. ₂₆Dikotsi di tla tla di šalane morago, mabarebare le ona a tla latelana. Ba tla hlodia baprofeta ba re ba nyaka dipono. Baprista ba ka se sa ba le se ba ka se rutago setšhaba, le dikeletšo tša bagolo ba setšhaba di ka se sa ba gona. ₂₇Kgoši e tla ilela, bakgomana ba tla nyama, le bengnaga ba tla thothomela ka poifo. Ke tla ba otla go ya ka maitshwaro a bona, gomme ka ba ahlola ka tsela ye le bona ba bego ba ahlola ba bangwe ka yona. Ke mo ba tlago tseba gore ke nna Morena.”

₁Ka letšatši la bohlano la kgwedi ya boselela ya ngwaga wa boselela wa ge re le mathopša, bagolo ba setšhaba sa Juda ba be ba dutše le nna ka ntlong ya ka. Gateetee ka tsenwa ke maatla a Morena, Mong wa bohle. ₂Ge ke lebelela ka bona selo se nkego ke motho. Go tloga lethekeng go theogela fase mmele wa gagwe e be nke ke mollo, gomme go tloga lethekeng go ya godimo o be a phadima bjalo ka tshipi ye e phadimišitšwego. ₃O ile a obeletša se nkego ke letsogo a ntshwara ka moriri. Gona moo ponong yeo moya wa Modimo wa nama wa nkukela godimodimo wa nkiša Jerusalema, lesorong la kgoro ya ka gare ya ka leboa ya Tempele, moo go bego go na le modimo wa seswantšho wo o bego o seleka Modimo.

₄Moo ka bona letago la Modimo wa Israele, la go swana le lela ka go le bona kua moeding. ₅Morena a re go nna: “Wena motho wa nama, iša mahlo ka thoko ya leboa.” Ka lebelela, gomme mojakong wa ka leboa wa Lesoro la Aletare ka bona modimo wa seswantšho wo o bego o seleka Modimo.

₆Morena a re go nna: “Wena motho wa nama, na o bona tše setšhaba sa Israele se di dirago? Na o bona tše mpe tša go šišimiša tše ba di dirago mo, ba nthakela kgole le felo ga ka go gokgethwa? O sa tlilo bona tša go šišimiša le go feta tšeo.”

₇A nkiša lesorong la kgoro. Ya re ge ke lebelela ka bona lešoba mo morakong. ₈A re: “Wena motho wa nama, oketša lešoba leo.” Ka le oketša, mme ka bona lebati. ₉A re go nna: “Tsena o lebelele dilo tše mpe tša go šišimiša tše ba di dirago ka moo.” ₁₀Ka tsena, ka bona mo gohle mabotong go setilwe diswantšho tša digagabi, le tša diphoofolo tše dingwe tša go šišimiša, le tša medingwana ya setšhaba sa Israele. ₁₁Mo pele ga diswantšho tšeo go be go eme bagolo ba masome a a šupago ba setšhaba sa Israele; Jaasania, morwa wa Shafane, e le yo mongwe wa bona. Yo mongwe le yo mongwe o be a swere sethuntšhetšo ka seatla, seo go sona go bego go etšwa muši wo mobose wa seorelo. ₁₂Morena a mpotšiša a re: “Wena motho wa nama, na o bona tše bagolo ba setšhaba sa Israele ba di dirago ka sephiring, mongwe le mongwe a le ka felong go gokgethwa ga seswantšhobetlwa sa modimo wa gagwe? Ba gopola gore Morena ga a ba bone, o tlogetše naga ya bona.”

₁₃Ke moka Morena a re go nna: “O sa tlilo ba bona ba dira tše di šišimišago le go feta tšeo.” ₁₄Ya ba o nkiša lesorong la kgoro ya ka leboa ya Tempele ya gagwe, gomme ka bona basadi ba dutše moo ba llela modimo Tamuse.

₁₅A mpotšiša a re: “Wena motho wa nama, na o a di bona? O sa tlilo bona tše di šišimišago le go feta tšeo.” ₁₆Ya ba o nkiša ka kgorong ya ka gare ya Tempele ya gagwe. Mo lesorong la Felo mo Gokgethwa, mokgahlo ga mathudi le aletare, go be go na le banna ba e ka bago ba masome a mabedi le ba bahlano. Ba be ba furaletše Felo mo Gokgethwa, ba lebeletše bohlabatšatši, ba khunamela letšatši ge le hlaba.

₁₇Morena a re go nna: “Wena motho wa nama, na o a di bona? Kgane batho ba Juda ga se ba kgotsofala ka go dira tše di šišimišago tše ba di dirago mo, ge ebile ba tlatša naga bokgoa bja bona, ya ba ge ba nthumola le go feta? Bonang ka mo ba ntlhapaolago ka mokgwa wo o kgopišago kudu ka gona! ₁₈Le nna bjale ke tla ba gakalela ka kgalefo. Nka se ba babalele goba ka ba gaugela. Le ge ba ka ntelela bjang le bjang, nka se ba theeletše.”

₁Ka kwa Morena a goelela a re: “Etlang mo, lena baotli ba motse. Le tle le swere dibolao tša lena.”

₂Ka bona go etla banna ba ba selelago ba etšwa lesorong la ka godimo la ka leboa la Tempele, mongwe le mongwe a swere sebolao. Ba be ba na le monna yo mongwe yo a bego a apere diaparo tša lešela, a lekeleditše tša go ngwala lethekeng. Ba fihla ba ema kgauswi le aletare ya mphiri.

₃Gwa rotoga letago la Modimo wa Israele le etšwa go bakerubi, mo le bego le le gona, mme la fetela mojakong wa Tempele. Morena a bitša monna yola wa go apara diaparo tša lešela, wa go lekeletša tša go ngwala lethekeng, a re: ₄“Sepela le motse wohle wa Jerusalema, mme bohle ba ba nyamilego gape ba tshwenyegilego ka lebaka la tšohle tše di šišimišago tše di dirwago mo motseng, o tšame o ba swaya sefapano phatleng.”

₅Ka kwa Morena a re go banna bale ba bangwe: “Mo lateleng ge a sepela le motse mme le gagare batho. Le se ke la babalela motho, le se gaugele motho. ₆Le gagare bakgalabje le masogana le makgarebe le basadi le bana, eupša yo a swailwego yena le se mo dire selo. Le thome gona mo Tempeleng ya ka.” Ka gona ba thoma ka bagolo ba setšhaba ba ba bego ba eme pele ga Tempele.

₇Morena a re go bona: “Tšhilafatšang Tempele. Tlatšang dikgoro tša yona ka ditopo. Thomang!” Ba napa ba thoma go bolaya batho mo motseng.

₈Ge ba le gare ba gagara batho, nna ke be ke šetše ke nnoši. Ka itahlela fase ka sefahlego, ka goelela ka re: “Morena, Mong wa bohle, na e ka ba o befeletšwe Jerusalema mo e lego gore o yo bolaya yo mongwe le yo mongwe yo a šetšego mo Israele?”

₉Yena a mphetola a re: “Molato wa batho ba Israele le ba Juda ke wo mogolo e le ruri. Naga ya bona e tletše dipolao, le motseng wa Jerusalema ga go latelwe toka. Ba re nna Morena ke furaletše naga ya bona, le gona ga ke ba bone. ₁₀Eupša nna nka se ba babalele goba ka ba gaugela; ke tla ba otlela tše ba di dirilego.”

₁₁Ya ba gona monna yola wa go apara diaparo tša lešela, wa go lekeletša tša go ngwala lethekeng, a boago a tlile go begela Morena a re: “Ke phethile ditaelo tša gago.”

₁Ge ke sa lebeletše ka bona se nkego setulo sa bogoši se se dirilwego ka magakabje a botala bja legodimo se le ka godimo ga leratadima le le okametšego dihlogo tša bakerubi. ₂Morena a re go monna yola wa go apara diaparo tša lešela: “Tsena ka mola mokgahlo ga maotwana ka fase ga bakerubi o ntšhe magala ka diatla mokgahlo ga bona. O name o a gaše godimo ga motse.”

Ke ile ka mmona ge a tsena. ₃Bakerubi bale ba be ba eme ka borwa bja Tempele ge a tsena, gomme leru la tlala kgoro ya ka gare. ₄Letago la Morena la rotoga le etšwa go bakerubi bale la fetela mojakong wa Tempele. Leru lela la tlala Tempele, gomme kgoro ya tlala letago la Morena. ₅Modumo wa diphego tša bakerubi bale wa kwagala le ka kgorong ya ka ntle. O be o kwagala bjalo ka lentšu la Modimo Ramaatlaohle.

₆Ya re ge Morena a laela monna yola wa go apara diaparo tša lešela go tšea mollo mokgahlo ga maotwana le mokgahlo ga bakerubi, monna yoo a tsena mme a ema ka thoko ga leotwana le lengwe. ₇Mokerubi o tee a obeletša seatla ka mollong a le gare ga bakerubi ba bangwe, a tšea magala a mangwenyana a a tšhela ka diatleng tša monna yola wa go apara diaparo tša lešela. Monna yoo a tšea magala ale a tloga.

₈Ka fase ga lephego le lengwe le le lengwe la mokerubi go be go bonala selo se nkego ke seatla sa motho. _9-10Ka ba ka bona le maotwana a mane a go swana, kgauswi ga mokerubi yo mongwe le yo mongwe go na le leotwana. Maotwana ao a be a phadima bjalo ka magakabje, gomme le lengwe le le lengwe le tsenane le le lengwe ka bogare. ₁₁Maotwana ao ge a sepela a be a kgona go thwethwela ka mathoko ka mane a sa retologe. Mo go lebilego leotwana la ka pele a mangwe a be a le latela ntle le go retologa. ₁₂Mo gohle mebeleng ya bakerubi le mekokotlong le diatleng le diphegong le maotwaneng ka mane ba be ba tletše mahlo. ₁₃Maotwana ao ka kwa go thwe ke “maotwanasesedi”.

₁₄Mokerubi yo mongwe le yo mongwe o be a na le difahlego tše nne. Sa mathomo e be e le sa mokerubi, sa bobedi e le sa motho, sa boraro e le sa tau, gomme sa bone e le sa ntšhu. ₁₅Bakerubi bao ba rotoga. E be e le tšona diphedi tšela ke bego ke ile ka di bona kua nokeng ya Kebara. ₁₆Ge bakerubi ba sepela, maotwana ale a be a sepela nabo. Ge ba phurolla diphego gore ba fofe, maotwana le ona a be a kukega nabo. ₁₇Ge ba ema, maotwana a be a ema, ge ba fofa, maotwana a be a kukega nabo, ka gore diphedi tšeo di be di a laola.

₁₈Ke moka letago la Morena la tloga mogatong wa mojako wa Tempele la fihla la ema ka godimo ga bakerubi. ₁₉Bakerubi ba phurolla diphego ba fofela godimo nna ke ba lebeletše, gomme maotwana a kukega nabo. Ba fihla ba ema lesorong la ka bohlabela la Tempele ya Morena, gomme letago la Modimo wa Israele la ba ka godimo ga bona. ₂₀E be e le tšona diphedi tšela ke bego ke ile ka di bona ka fase ga Modimo wa Israele kua nokeng ya Kebara. Ka lemoga gore ke bakerubi.

₂₁Mokerubi yo mongwe le yo mongwe o be a na le difahlego tše nne, le diphego tše nne, le selo se nkego ke seatla sa motho ka fase ga lephego le lengwe le le lengwe. ₂₂Difahlego tša bona di be di no swana le difahlego tšela ke bego nkile ka di bona kua nokeng ya Kebara. Mokerubi yo mongwe le yo mongwe o be a sepela a eya kua a lebeletšego gona.