To The Word – Day 189

₁Joo, Jerusalema o bodutung bjo bokaakang,

motse wola o kilego wa tlala batho!

O swana le mohlologadi,

motse wola o kilego wa hlompšha ke ditšhaba;

wo e kilego ya ba mohumagadi wa dinaga,

bjale o dira mediro ya kgapeletšo.

₂O lala a lla gabohloko bošego,

dithama tša gagwe di ela megokgo.

O hloka mohomotši go ba ba bego ba mo rata.

Bathuši ba gagwe bohle ba mo lahleditše,

ba mo fetogetše manaba.

₃Juda e tlogetšwe ke batho ka go tlaišega le ka go thopša,

ya ba makgoba.

Ba phela ditšhabeng tše dingwe,

ga go mo ba ka agago gona.

Bahlomari ba bona ka moka ba ba swere,

ba ba dikanetša.

₄Tsela tša Sione di a lla, gobane ga go yo a tšeago ka tšona

go ya menyanyeng ye mekgethwa.

Dikgorong tša motse ga go motho,

baprista ba a tsetla;

banenyana ba ba bego ba opela menyanyeng ba nyamile –

motse o mathateng.

₅Batlaiši ba wona ba o fentše,

manaba a wona a iketlile.

Morena o o kwešitše bohloko ka lebaka la dibe tša wona tše dintši;

bana ba wona ba thopilwe ke manaba.

₆Botse bja Jerusalema bo fedile.

Baetapele ba wona ba bjalo ka dikgama tše di swerwego ke tlala,

di lapišitšwe ke go tšhaba batsomi.

₇Jerusalema ye bjale e tlaišegilego mme e tlogetšwego ke batho,

e ikgopotša dilo tša yona tše bohlokwa tša kgale,

mola batho ba yona ba wetše diatleng tša manaba,

mme go se yo a ba thušago.

Batlaiši ba yona ba ile ba e bogela,

ba e sega ge e thubega.

₈Jerusalema e itirile makgapha ka dibe tše di šiišago,

ka moka ba ba bego ba e hlompha bjale ba a e nyatša,

ka gobane ba bone gore ga e sa šireletšegile.

E a bobola,

e inamišitše sefahlego ka dihlong.

₉Go se hlweke ga yona go be go le pepeneneng,

fela ya se tshwenyege gore e tla feletša kae.

Go wa ga yona e bile mo go tlabago gwa se be le wa go e homotša.

E a lla e re:

“Morena, bona mahlomola a ka,

gobane manaba a ka a a ikgogomoša.”

₁₀Manaba a yona a e hlakotše dilo tša yona tše bohlokwa.

E a bone a tsena ka Tempeleng,

moo Morena a bego a ganetša baditšhaba

go kopana le setšhaba sa gagwe gona.

₁₁Batho ba yona bohle ba a bobola ge ba tsoma tša go ja.

Ba reka dijo ka dilo tša bona tše bohlokwa gore ba se ke ba hwa.

Motse o a goa o re:

“Ntebelele Morena,

o bone go nyatšega ga ka.”

₁₂O goelela bafeti ba tsela ka moka o re:

“Ntebeleleng,

kgane taba ye ga e le ame?

Ga se gwa ka gwa ba le yo a kwago bohloko go etša nna,

bohloko bjo Morena a ntlišeditšego bjona a galefile.

₁₃“O nthometše mollo wa go tšwa godimo,

mollo wa go ntšhuma ka teng.

O ntheile ka molaba gomme a ntanya.

A nkwiša ka sa morago,

a ntlogela ke le bohlokong.

₁₄“O kgomagantše dibe tša ka a di dira joko,

a nthweša yona molaleng

mme ka fokodišwa ke boima bja yona.

Morena o nkgafetše manabeng ao ke šitilwego ke go lwa le ona.

₁₅“Bagale ba ka bohle Morena o ba nyaditše,

o kgobokantše manaba a ka go fediša masogana a ka.

O pšhatlagantše batho ba ka bjalo ka diterebe ge di pitlwa ka maoto bopitlelong.

₁₆“Ke ka lebaka leo mahlo a ka a edišago meokgo.

Ga go yo a ka nkhomotšago,

a ka mphago maatla.

Batho ba ka ba gakanegile gobane manaba a mphentše.

₁₇“Ke obeleditše matsogo,

eupša ka hloka yo ke itshwarelelago ka yena.

Morena o mpileditše manaba ka mathoko ohle;

ba ntshwara boka makgapha.

₁₈“Eupša Morena o lokile,

gobane ke nna ke mo nyaditšego.

Hle, ntheeletšeng, lena ditšhaba tšohle,

bonang manyami a ka!

Masogana le makgarebe a ka a thopilwe.

₁₉“Ke biditše bathuši ba ka,

eupša bona ba ntahla.

Baprista le bagolo ba setšhaba ba feletše mekgotheng ya motse ba nyaka dijo

gore ba fele ba phela.

₂₀“Joo, Morena,

bona ka mo ke nyamilego ka gona;

ke huduegile moyeng!

Pelo ya ka e rotha madi

ka gore ke ile ka tsogela Morena maatla.

Mekgotheng batho ba bolawa ka ditšhoša,

ka magae ke leuba la bolwetši.

₂₁“Manaba a ka a nkwele ge ke tsetla ke re:

‘Ga go yo a nkhomotšago.’

Ka moka ga bona ba kwele tša masetlapelo a ka,

ba thabela ge o ntlišeditše ona.

A letšatši lela o le beilego le tle

gore ba tle ba tlaišege go swana le nna.

₂₂“Ba lahle ka lebaka la makgopo ohle a bona.

Ba otle bjalo ka ge le nna o nkotletše tša ka dibe.

Ke tsetla o šoro,

mme ke nyamile kudu.”

₁Joo! Mong wa rena o pipile Sione ka leswiswi a galefile.

O bataladitše motse wa bothakga wa Israele.

Mohla wola a galefile o be a sa re selo ka Tempele ya gagwe.

₂Mong wa rena o pšhatlagantše dintlo tšohle tša ditlogolo tša Jakobo a se na lešoko,

a kgereša dibo tša batho ba Juda a galefile.

A goboša mmušo le babuši ba gona.

₃Mohlang wola a tuka bogale o ile a fetša Baisraele maatla;

a lesa go ba šireletša ge manaba a ba hlasela,

a gakalela ditlogolo tša Jakobo bjalo ka mollo

wa go fiša se sengwe le se sengwe se se lego kgauswi.

₄A nganga bora boka lenaba,

a ba lebantšha,

a gagara baratwa bohle ba bona.

Kgalefo ya gagwe ye e tukago bjalo ka mollo

a e tšhollela godimo ga Tempele ya Jerusalema.

₅Mong wa rena o fedišitše Israele bjalo ka lenaba;

o pšhatlagantše dintlo tšohle tša mošate,

a tlogela dibo tša gona e le mašope.

O tlišeditše batho ba Juda manyami a go se fele.

₆O pšhatlagantše Tempele ya gagwe mo nkego ke mošašana ka serapeng,

a fediša lefelo leo la go kopanela.

Morena o fedišitše matšatši a menyanya le a Sabatha.

Ge a galefile o nyatša kgoši le moprista.

₇Mong wa rena o lahlile aletare ya gagwe,

mme a tlogela Tempele ya gagwe ye kgethwa;

a dumelela manaba go kgereša merako ya dibo tša gona.

Ba hlaba mekgolokwane ka ntlong ya Morena

bjalo ka tšatšing la monyanya.

₈Morena o be a feditše le pelo go thuba morako wa Sione.

O rile go o ela ka thapo a tšwela pele le go o phušola.

A kgereša ntotoma le morako.

₉Dikgoro di khupeditšwe ke thogorogo,

o robile mapheko a tšona a a robaganya.

Kgoši le bakgomana ba thopilwe.

Melao ya Modimo ga e sa rutwa,

le baprofeta ga ba sa bona dipono tša go tšwa go Morena.

₁₀Bakgalabje ba Jerusalema ba dutše fase ba homotše,

ba tletše marole dihlogong,

ba apere tša go ilela.

Dikgarebjana tša Jerusalema di inamišitše dihlogo.

₁₁Mahlo a ka a hwibiditšwe ke sello;

ke huduegile moyeng.

Go fedišwa ga tšhaba sa gešo le go idibala ga bana le masea

mekgotheng ya motse go nkgaola pelo.

₁₂Ba llela bommabo ba re:

“Sejonyana se kae? Senonyana se kae?”

Ba idibala mekgotheng ya motse mo nkego ke dikgobadi;

ba hwa bosele ba farilwe ke bommabo.

₁₃Jerusalema, moratiwa,

na nka go swantšha le eng?

Nka go bapiša le eng?

Nka go lekantšha le eng,

gore ke go bee pelo, wena Sione?

Masetlapelo a gago a lekana le lewatle ka bogolo.

Ke mang a ka go hlatlolago go ona?

₁₄Baprofeta ba gago ba go boditše dipono tša bofora le tša boradia,

ga se ba go lemoša bobe bja gago,

ba go phemiša go thopša.

Dipono tše ba go boditšego tšona ke tša maaka le bofora.

₁₅Bafeti ba tsela bohle ba letša tangwa,

ba a kgotsa,

ba šikinyetša Jerusalema dihlogo ba tlabegile ba re:

“Afa wo ke wona motse wola ba bego ba re ke wo mobotsebotse,

motse wo o bego o kgahla lefase lohle?”

₁₆Manaba a gago ohle a go kwera a go ahlametše,

a go kgotsa,

a go lomantšhetša meno a re:

“Swine! Re e fedišitše!

Le ke letšatši leo re dutšego re le emetše,

mme re feleditše re le bone!”

₁₇Morena o dirile se a bego a ikemišeditše sona.

O phethile se a rilego o tla se phetha.

O go fedišitše a se na lešoko

bjalo ka ge a be a beakantšhitše kgale.

O go gafetše diatleng tša manaba a gago,

a ba thabiša ka go fenywa ga gago.

₁₈Jerusalema, morako wa gago a o llele Mong wa rena!

Meokgo ya gago a e ele e etše dinoka bošego le mosegare;

o se ke wa kgaotša,

o se ke wa khutšiša mahlo a gago.

₁₉Bošego o lale o tsoga,

o llela go Morena;

o tšholle tša ka pelong ya gago pele ga Mong wa rena boka meetse.

Phagamišetša matsogo go yena o mo rapele gore a lote bana ba gago,

bana ba ba hwago ka tlala magahlanong a mekgotha.

₂₀Morena, lebelela, o di iše hlogong:

Ke mang yo o kilego wa mo swara ka tsela ye?

Kgane ke tshwanelo gore basadi ba je bana ba bona,

masea a ba a tswetšego?

Na go lebane gore baprista le baprofeta ba bolaelwe ka Tempeleng ya Mong wa rena?

₂₁Ba bagolo le ba banyenyane ba rapaletše mekgotheng,

masogana le makgarebe ba bolailwe ka tšhoša.

O ba bolaile mohlang wola o befetšwe,

wa ba ripitlela o se na lešoko.

₂₂O nthapetše dira ka mathoko ohle,

wa ba rapa mo nkego o ba rapela monyanyeng.

Mohlang wola o befetšwe ga go yo a ilego a phonyokga goba a phela.

Ba ile ba bolaya ba ke ba tswetšego,

ke ba godišitšego.

₁Modimo o nkotlile a galefile,

ka gona ke nna motsebamatshwenyego.

₂O nthaketše leswiswing,

a ntshepetša tseleng ya tlhokaseetša.

₃Ke nna fela yo a mphayago leboelela letšatši ka moka.

₄O ntlhagaditše letlalo le nama tša mmele,

a nthobaroba le marapo.

₅O ntikaneditše ka morako wa maima le mathata.

₆O mpeile leswiswing boka ba ba hwilego kgale.

₇O nkageleditše ka morako gore ke se phonyokge,

a ntlema ka ditlemo tše boima.

₈Le ge ke goelela ke llela thušo,

o gana go kwa thapelo ya ka.

₉O nthibetše tsela ka dinkgokolo tša maswika,

a nkgopamišetša ditsela.

₁₀Boka bere ye e laletšego,

boka tau ye e iphihlilego

₁₁o nthakile tseleng,

a nthathaganya,

a ntlogela ke nnoši.

₁₂O ngangile bora bja gagwe,

a ntebantšha ka mesebe ya gagwe.

₁₃A ntšha mesebe ka kgotlopong ya gagwe,

a ntsotsometša ka yona mmeleng.

₁₄Ke fetogile sesegiša sa ditšhaba tšohle;

letšatši lohle ba hlwela go nkopela koša.

₁₅O ntešitše tše di babago,

a ba a nnoša lengana.

₁₆O nkgotše meno ka lekgwara,

a ba a nkgohliša fase ka sefahlego.

₁₇Ke amogilwe boiketlo,

le lethabo ga ke sa le tseba.

₁₈Ke be ke re nka se sa phela go iša kae;

go tshepha Morena go mpheletše.

₁₉Go gopola matshwenyego a ka le go hloka legae ga ka

go mpabela bjalo ka lengana le santlhoko.

₂₀Ke dula ke nagana ka taba tše,

pelo ya ka e nape e karabe bodibeng.

₂₁Eupša e re ge ke elelwa taba e tee ye,

ke tlelwe ke lehutšo.

₂₂Leratorato la Morena ke le le sa felego,

dikgaugelo tša gagwe ke tša go ya go ile.

₂₃O di tsošološa mosong wo mongwe le wo mongwe,

potego ya gagwe ga e kaaka.

₂₄Ka pelong ke re:

“Morena ke yena kabelo ya ka,

ka gona ke botile yena.”

₂₅Morena o babalela ba ba mmotilego,

bona ba ba mo nyakago.

₂₆Ke mo gobotse ge motho a letela go imollwa ke Morena a sa fele pelo.

₂₇Ke mo gobotse go kgotlelela maima go tloga bjaneng.

₂₈A motho a itulele a nnoši a ikhomoletše,

ge eba a a rwešitšwe ke Modimo.

₂₉A a patlame fase, a ikokobetše,

mohlomongwe a ka thušega.

₃₀A a fe mmethi wa gagwe lehlaa,

a kgotlelele dikgobošo tšohle,

₃₁gobane Morena ga a lahlele motho sa ruri.

₃₂Le ge a hlokofatša o na le lešoko,

gobane lerato la gagwe ga le kaaka.

₃₃Ga a kgahlwe ke go hlokofatša goba go nyamiša batho.

₃₄Go tlaiša bagolegwa bohle mo nageng,

₃₅go ganela motho ditokelo tša gagwe

e le go nyatša thato ya Yogodimodimo,

₃₆go hlalefetša motho tshekong –

na tšeo ka moka Mong wa bohle ga a di bone?

₃₇Kgane o gona yo a ka ntšhago taelo,

mme ya phethwa e se thato ya Mong wa bohle?

₃₈A ke re ke ka taelo ya Yogodimodimo ge tše botse le tše mpe di hlaga?

₃₉Bjale motho o reng a belaela ge a otlelwa dibe tša gagwe?

₄₀A re lekoleng maitshwaro a rena,

a re a hlahlobeng,

gomme re sokologeleng go Morena.

₄₁A re ipatametšeng go Modimo legodimong

ka dipelo tša rena re phagamišitše matsogo,

re rapeleng re re:

₄₂“Re dirile dibe, re go rumotše,

mme wena, Morena, wa se re swarele.

₄₃“O iphuthetše ka kgalefo wa re hlomara,

wa re gagara ntle le lešoko.

₄₄O ikhurumeditše ka leru,

gore thapelo tša rena di se go fihlele.

₄₅O re dirile ditšhila le maudi ditšhabeng.

₄₆“Manaba ohle a rena a re sega a re ahlametše.

₄₇Re aparetšwe ke poifo le tšhio;

ba a re fetša, ba a re lobiša.

₄₈Mahlong a ka go ela dinoka tša meokgo

ge setšhaba sa gešo se fedišwa.

₄₉“Meokgo ya ka e tla ela e sa kgaotše,

nka se khutše go lla,

₅₀go fihlela Morena a okamela fase a le legodimong mme a di bona.

₅₁Ke babelwa ke mahlo ka go llela basadi bohle ba motse wa gešo.

₅₂“Manaba a nthakediša boka nonyana,

etšwe ke se ne molato.

₅₃Ba ntahletše ka moleteng ke phela,

ba ntswalelela ka gare ka leswika.

₅₄Meetse a thoma go nkhupetša hlogo,

ka ba ka re bjale gona go fedile.

₅₅“Ka go llela, wena Morena,

ke le fasefase moleteng.

₅₆Wa kwa kgopelo ya ka ge ke re:

‘Se ithibe ditsebe ge ke go kgopela thušo;

ntlhatlole.’

₅₇Wena wa mpatamela ge ke go llela,

wa re: ‘Se boife!’

₅₈“Wa tla wa nkemela, Mong wa ka,

wa ntamolela.

₅₉Morena,

o bone ka mo ke fošeditšwego ka gona;

ntirele ka toka.

₆₀Lehloyo la manaba a ka o le bone,

le tšohle tše ba ntakanego ka tšona.

₆₁“O ba kwele ge ba nthoga, Morena,

o kwele le tšohle tše ba ntakanego ka tšona,

₆₂le ge ba hlwela go ntsheba tšatši lohle le go ntogela maanomabe.

₆₃Bona, bošego le mosegare koša go opelwa nna.

₆₄“Morena,

ba otlele tše ba di dirilego.

₆₅Ba nole moko,

o ba pipe ka thogako!

₆₆Ba hlomare o ba galefetše,

o ba fediše lefaseng!”

₁Jonna! Gauta ya rena e fifetše;

gauta yela e bego e hlwekišitšwe e fetogile.

Maswika a makgethwa

a gašagane magahlanong a mekgotha.

₂Masogana a Sione ao e bego e le a bohlokwa boka gauta

ye e sego ya tswakwa,

bjale a swerwe nke dipitša tša mmopi.

₃Ešita diphukubje di nyantšha bana ba tšona,

eupša tšhaba sa ka sona ke se sehlogo baneng ba sona,

se etša dimpšhe šokeng.

₄Leleme la lesea le kgomarela magalagapa ka lebaka la lenyora;

bana ba kgopela dijwanyana,

wa go ba fa tšona a hlokega.

₅Batho ba ba bego ba eja tša matsaka bjale ba hwela mekgotheng ka tlala;

bomagolakamatsaka bjale ba fatafata dithobolong ba tsoma diyamaleng.

₆Tšhaba sa gešo se otlilwe le go feta motse wa Sodoma,

wa go thubja ka bjako ntle le go išwa diatla.

₇Bahlomphegi ba tšhaba sa gešo ba be ba hlwekile go feta leswela,

ka bošweu ba feta lebese,

ba phadima go feta magakabje,

botse bja bona nke bja magakabje a safire.

₈Bjale ba ntshofetše difahlego go feta mošidi,

ga ba sa tsebega mekgotheng.

Letlalo la bona le le omeletšego boka kota le kokoropane marapong a bona.

₉Ba ba bolailwego ka tšhoša ba phala ba ba bolailwego ka tlala,

bona ba ba hwilego bosele ba se ne tše di bunwago mašemong.

₁₀Ešita le basadi, bona bommalešoko,

ba be ba apea bana ba bona ka tša bona diatla,

ya ba dijo tša bona mola tšhaba sa ka se fedišwa.

₁₁Morena o gakaditšwe ke kgalefo ya gagwe;

kgalefo ya gagwe, setukamollo,

o e tšholletše godimo ga setšhaba sa gagwe.

O goditše mollo kua Sione,

wa e tšhuma thokgethokge.

₁₂Ga go le o tee,

ešita le ona magoši a lefase,

goba moduditsoko lefaseng

yo a bego a kgolwa gore go na le dira goba manaba

a a kago šwahlela ka dikgorong tša Jerusalema.

₁₃Seo se hlotšwe ke dibe tša baprofeta ba gona,

le dikarogo tša baprista ba gona

ba ba tšholotšego madi a bahlokamolato moo.

₁₄Baprofeta bao le baprista e be e le bomatlarumamekgotheng bjalo ka difofu.

Ba be ba thankgetše madi,

motho a šia le go kgwatha diaparo tša bona.

₁₅Ba be ba goelelwa ke batho, go thwe:

“Tlogang, le tšhilafetše!

Tlogang! Tlogang! Se re kgwatheng!”

Ka gona, ba be ba ebela le ditšhaba go setšhaba sa go ba amogela.

₁₆Morena ka sebele a ba šwalalanya;

a se sa ba le taba nabo;

baprista ba se hlompšhe,

batšofadi ba se šetšwe.

₁₇Ra letela thušo, ra ba ra lapa;

thušo ga se ya ka ya tla.

Toreng ya tlhapetšo ra letela tšhaba sa go se kgone go re hlakodiša.

₁₈Manaba a be a re dišitše mesepelong,

re bile re se sa kgona le go sepela mekgotheng.

Mafelelo a rena a be a batametše,

matšatši a rena a be a iketše;

mafelelo a rena a be a fihlile.

₁₉Barehlomari ba be ba šia ntšhu ka lebelo,

ntšhu ye e theogago leratadimeng e huba.

Ba re lota mohlala kua dithabeng,

ba re lalela kua lešokeng.

₂₀Morephediši, yena motlotšwa wa Morena,

a tanywa ke difu tša bona,

yena yo re bego re holofetše gore o tla re šireletša go baditšhaba.

₂₁Hlalalang, le thabe,

lena tšhaba sa Edomo,

le lena badudi ba naga ya Utse;

le lena le sa tlilo fiwa senwelo;

le tla se nwa, la tagwa, la itlhobola.

₂₂Wena Sione, o otlilwe ka mo go go swanelago;

Morena a ka se sa go bea bothopša.

Eupša wena, Edomo,

Morena o tlilo go otla;

o tla utolla dibe tša gago.

₁Morena, gopola tše di re hlagetšego.

Lebelela, o bone kgobogo ya rena.

₂Naga ye o re filego yona e gafetšwe bašele;

magae a rena a tšerwe ke bafaladi.

₃Re fetogile bana ba ba hwetšwego ke tatabo,

gomme bommagorena ba etša bahlologadi.

₄Meetse ao re a nwago re a a reka,

dikgong re a di lefela.

₅Re swerwe gampe ke bahlakiši ba rena;

ge re lapile ga re dumelelwe go khutša.

₆Re ithapeletša go Egepeta le Asiria gore re hwetše tša go ja.

₇Borakgolokhukhu ba rena ba dirile dibe mme ba ile,

mme rena re ba ba otlelwago dibe tša bona.

₈Makgoba ale ke ona a a re bušago,

gomme ga re na wa go re hlakodiša go bona.

₉Diyamaleng re di tsoma šokeng,

ra ipea kotsing ya go bolawa ke bahlakodi.

₁₀Re swerwe ke letadi ka lebaka la tlala,

gomme letlalo la rena le fiša boka sebešo.

₁₁Basadi ba gaborena ba katilwe mo Sione,

makgarebe le ona a katwa metseng ya Juda.

₁₂Baetapele ba rena ba bolailwe ka go fegwa ke manaba;

batšofadi ba gaborena ga ba hlompšhe.

₁₃Masogana a gaborena a gapeletšwa go šila;

bašemane ba thekesedišwa ke ngata tša dikgong.

₁₄Bakgalabje ga ba sa dula kgorong,

le bafsa ga ba sa letša diletšo.

₁₅Lethabo le re feletše;

go bina ga rena go re fetogetše manyami.

₁₆Re lahlegetšwe ke seriti;

re ba madimabe gobane re dirile dibe!

₁₇Pelo tša rena di bohloko,

le mahlo a rena a fifaditšwe ke sello,

₁₈ka gobane thaba ya Sione e šetše fela,

gomme diphukubje di tšhakatšhaka go yona.

₁₉Eupša wena, Morena,

o buša go ya go ile,

gomme o tla ba kgoši ka mehla yohle.

₂₀O reng o re lebaletše sa ruri?

O reng o re furalela galelele gakaaka?

₂₁Re sokollele go wena, Morena,

mme re tla sokologa.

Re bušetše sekeng,

₂₂ge e se ge e le gore o re lahlile lahlilahli,

o re galefetše go feta tekanyo.

₁Modimo Ramaatla, yena Morena,

o a bolela;

o bitša lefase lohle,

go tloga bohlabatšatši go ya bodikelatšatši.

₂Modimo o taga a le Sione,

motseng wo mobotsebotse.

₃Modimo wa rena o etla,

gomme a ka se homole;

o etilwe pele ke mollo wo o laumago;

o dikaneditšwe ke ledimo le le tšubutlago.

₄O bitša legodimo kua godimo,

o bitša le lefase go tlo hlatsela tshekong ya setšhaba sa gagwe.

₅O re:

“Nkgobokeletšeng babotegi ba ka,

ba ba tiišeleditšego kgwerano le nna ka sehlabelo.”

₆Magodimo a bega go loka ga gagwe,

gobane Modimo ka noši ke moahlodi. Sela

₇“Theeletša, wena setšhaba sa ka,

ke a bolela;

ke tla go latofatša, wena Israele.

Ke nna Modimo, Modimo wa gago.

₈Ga ke go kgalele dihlabelo tša gago,

goba dihlabelo tša ditšhungwakamoka tše o felago o ntlišetša tšona.

₉Powana ya šaka la gago ga ke e nyake,

le ge e le phooko ya mehlape ya gago,

₁₀gobane phoofolo tšohle tša sethokgwa ke tša ka,

le dibata tše diketekete dithabeng.

₁₁Ke tseba dinonyana tšohle tša thaba,

le diphedi tšohle tša lešoka ke tša ka.

₁₂“Ge nkabe ke swerwe ke tlala ke be nka se botše wena,

gobane lefase ke la ka le tšohle tša lona.

₁₃Kgane nna ke ja nama ya dipoo,

goba ke nwa madi a diphooko?

₁₄Ditebogo a e be sona sehlabelo sa gago se o se neelago Modimo,

gomme o phethe dikeno tše o di anetšego Yogodimodimo.

₁₅Ke mo ke tlago go hlakodiša ge o mpitša mohla wa mathata,

gomme wena o tla ntlhompha.”

₁₆Fela go yo kgopo Modimo o re:

“O reng o bolela melao ya ka,

o bile o ikamanya le kgwerano ya ka,

₁₇etšwe o gana go solwa ke nna,

o bile o nyatša ditaelo tša ka?

₁₈Ge o kopana le lehodu o gwerana nalo,

le diotswa o kgotsana le tšona.

₁₉“O bolela tše mpe o sa itshware;

o dula o radia batho ka dipolelo tša gago.

₂₀O dulela go bolela ngwaneno gampe le go seba ngwana wa mmago.

₂₁Na o re ke homole ge o dira tša mohuta wo?

Kgane o bona nke ke swana le wena?

Nna ke go sola ke go botša mahlong.

₂₂“Gopodišiša taba ye,

wena wa go itebatša nna;

go sego bjalo ke tla go rathaganya mme wa hloka mohlakodiši.

₂₃Yo a ntlhomphago ke yo a nneelago sehlabelo sa tebogo,

gomme yo ke tlago mo phološa ke yo a itlhokomelago mesepelong.”