To The Word – Day 17

₁Morena a re: “Bjale tseba ke tla go dira gore o be bjalo ka Modimo go kgoši, gomme Arone, morwarrago, o tla bolela naye a le bjalo ka moprofeta wa gago. ₂Wena o botše Arone ka moka tše ke go laelago tšona, gomme yena o tla botša kgoši gore a lese Baisraele ba tšwe mo nageng ye. _3-4Fela nna ke tla thatafatša pelo ya kgoši, mme a ka se go theeletše, le ge nka atiša mehlolo ya ka mo nageng ya Egepeta. Ke moo ke tlago swara Egepeta ka diatla ka e tlišetša kotlo ye šoro, mme ka ntšha dikgoro tša setšhaba sa ka nageng ye. ₅Baegepeta bona ba tla tseba gore ke nna Morena ge ke ba emela ka maoto, mme ke ntšha Baisraele go bona.”

₆Moshe le Arone ba dirile ka mo Morena a ba laetšego ka gona. ₇Moshe o be a na le mengwaga ye masome a seswai, Arone yena a na le ye masome a seswai le metšo ye meraro ge ba bolela le kgoši.

₈Morena o rile go Moshe le Arone: ₉“Ge kgoši a ka re le dire mohlolo, o botše Arone gore a tšee lepara la gagwe a le lahlele fase dinaong tša kgoši, gomme le tla fetoga noga.” ₁₀Ke gona Moshe le Arone ba ilego go kgoši mme ba dira ka moo Morena a ba laetšego ka gona. Arone a lahlela lepara la gagwe fase pele ga kgoši le bakgomana ba gagwe, mme la fetoga noga. ₁₁Ke moo kgoši a biditšego dihlalefi le didupe le boramaselamose, mme ka maselamose a bona le bona ba dira bjalo. ₁₂Yo mongwe le yo mongwe wa bona a lahlela lepara la gagwe fase, mme la fetoga noga. Eupša lepara la Arone la metša a bona. ₁₃Kgoši a fela a thatafetše pelo, a gana go theeletša Moshe le Arone, gwa ba bjalo ka ge Morena a boletše.

₁₄Ke moo Morena a rilego go Moshe: “Kgoši e retetše pelo mme e gana go lesa setšhaba se sepela. ₁₅Sepela o gahlane le yena e sa le ka meso ge a theogela nokeng ya Naele. O tšee lepara la gago lela la go fetoga noga, gomme o mo letele lekoribeng la noka. ₁₆O re go yena: ‘Morena, Modimo wa Baheberu, o nthomile go go botša gore o lese setšhaba sa gagwe se sepele, gore se yo mo khunamela lešokeng. Fela go fihlela bjale o ganne. ₁₇Bjale, Morena o re o tla tseba gore yena ke yena mang ka seo a tlago se dira. Šedio ge, ke tlile go itia meetse a noka ye ka lepara le, gomme meetse a tla fetošwa madi. ₁₈Dihlapi di tla hwa mme noka ya nkga mo e lego gore Baegepeta ba ka se sa kgona go nwa meetse a yona.’ ”

₁₉Morena a re go Moshe: “Laela Arone gore a tšee lepara la gagwe a le lobalatše ka godimo ga meetse a Egepeta: ka godimo ga dinoka le mekero le megobe ka moka. Meetse ohle a tla fetoga madi, gomme nageng ka moka go tla ba le madi, ešita le magopong le meeteng.”

₂₀Moshe le Arone ba ile ba dira ka mo Morena a ba laetšego ka gona. Ba le pele ga kgoši le bakgomana Arone a emiša lepara la gagwe a itia meetse a noka, mme meetse ohle a noka a fetoga madi. ₂₁Dihlapi tša ka nokeng tša hwa, gwa šala go nkga go re phu mo Baegepeta ba ilego ba šitwa go nwa nokeng. Nageng ka moka ya Egepeta gwa ba madi.

₂₂Eupša boramaselamose ba kgoši le bona ba dira sona seo ka maselamose a bona, pelo ya kgoši ya thatafalela go ya pele. Gwa phethagala le le boletšwego ke Morena, kgoši ya gana go theeletša Moshe le Arone. ₂₃A napa a retologa a ipoelela mošate, gomme le tšona tšeo tša se mo tsene. ₂₄Baegepeta ka moka ba epa didiba tša meetse a go nwa lebopong la noka, gobane ba be ba šitwa ke go nwa meetse a ka nokeng.

₂₅Go ile gwa feta matšatši a a šupago ka morago ga ge Morena a iteile meetse a noka.

₂₆Ya ba gona Morena a rego go Moshe: “Yaa go kgoši o mmotše gore Morena o re: ‘Lesa setšhaba sa ka se sepele, gore se yo nkhunamele. ₂₇Ge o gana ke tla otla naga ya gago ka go e tlatša digwegwe. ₂₈Noka ya Naele e tla re go tlala digwegwe tša ba tša pharuma tša tšwa ka nokeng, tša rotogela ntlong ya mošate, tša tsenelela phapošing ya gago, le godimo ga malao a gago, le nywakong ya bakgomana ba gago le ya setšhaba sa gago, ešita le dibešong le ka dipitšeng. ₂₉Di tla pharumela godimo ga gago le setšhaba sa gago le bakgomana ba gago ka moka.’ ”

₁Morena a re go Moshe: “Botša Arone a phagamiše lepara la gagwe ka godimo ga dinoka le mekero le megobe ka moka, gomme a dire gore digwegwe di rotoge di tlale naga ya Egepeta.” ₂Ke mo Arone a phagamišitšego lepara ka godimo ga meetse ohle, mme digwegwe tša unyologa tša tlala naga. ₃Eupša boramaselamose ba diriša maselamose a bona, mme le bona ba dira gore digwegwe di rotogele nageng.

₄Kgoši ya bitša Moshe le Arone, ya re go bona: “Rapelang Morena gore a tloše digwegwe tše, mme nna ke tla lesa setšhaba gore se sepele se yo direla Morena dihlabelo.”

₅Moshe a mo fetola a re: “Ke tla thabela go go rapelela. Wena bea nako mme ke tla go rapelela, ka rapelela le bakgomana ba gago le setšhaba sa gago gore o ikhutše digwegwe, go se ke gwa šala le se tee nageng ge e se ka nokeng ya Naele.”

₆Kgoši ya mo fetola ya re: “O nthapelele ka moswane.”

Moshe a re: “Ke tla dira ka moo o kgopelago, ke moo o tlago tseba gore ga go na le modimo yo a swanago le Morena Modimo wa rena. ₇Wena le bakgomana ba gago le setšhaba sa gago le tla ikhutša digwegwe, gomme go ka se šale le se tee ge e se ka nokeng ya Naele.”

₈Ke moo Moshe le Arone ba tlogilego pele ga kgoši, gomme Moshe a llela Morena gore a tloše digwegwe tšeo a bego a di rometše go kgoši. ₉Morena o ile a dira ka moo Moshe a kgopetšego, gomme digwegwe ka nywakong le malapeng le mašemong tša hwa gai. ₁₀Baegepeta ba di bokela ya ba dintotomatotoma, naga ya šala e nkga e re hang. ₁₁Ge kgoši e bona gore digwegwe di hwile, ya retela pelo gape, bjalo ka ge Morena a boletše, gomme ya gana go theeletša Moshe le Arone.

₁₂Morena a laela Moshe a re: “Botša Arone gore a itie mobu ka lepara la gagwe, gomme lerole nageng ya Egepeta ka moka le tla fetoga menang.” ₁₃Ke moo Arone a iteilego mobu ka lepara la gagwe, gomme lerole ka moka la naga ya Egepeta la fetoga menang, ya bokanela batho le diphoofolo. ₁₄Boramaselamose ba leka go diriša maletlana a bona go dira menang, eupša ba palelwa. Menang ya tsenelela mo gohle, ₁₅boramaselamose ba re go kgoši: “Tše ke ditiro tša Modimo.” Fela pelo ya kgoši ya thatafala bjalo ka ge Morena a boletše, gomme a gana go theeletša Moshe le Arone.

₁₆Morena a re go Moshe: “Ka la ka moswane o tsogele o yo letela kgoši ge a eya nokeng, gomme o mmotše o re Morena o re: ‘Lesa setšhaba sa ka se sepele, gore se yo nkhunamela. ₁₇Eupša ge o ka gana se sepela, ke tla go otla ka go go romela diboba, wena le bakgomana ba gago le setšhaba sa gago. Dintlo tša Baegepeta di tla tlala diboba, gomme fase e tla ba legogwa la tšona fela. ₁₈Fela ke tla šikologa selete sa Goshene mo go dulago setšhaba sa ka, gore kua ntshe go se be le diboba, gore o tle o lemoge gore nna, Morena, ke nna ke šomago nageng ye. ₁₉Setšhaba sa ka le sa gago nka se di sware go swana. Mohlolo wo o tla direga ka la ka moswane.’ ” ₂₀Morena a romela metšhitšhi ye megolo ya diboba mošate le mantlong a bakgomana ba mošate. Diboba tša lobiša naga ka moka ya Egepeta.

₂₁Ke moka kgoši a bitša Moshe le Arone, gomme a re go bona: “Sepelang le ye go direla Modimo wa lena dihlabelo mo nageng ye.”

₂₂Moshe a mo fetola a re: “Go ka se loke go dira ka mokgwa woo, ka gobane Baegepeta ba tla bona e le bohlola ka diruiwa tše re tlago di hlabela Modimo wa rena. Ge re ka dira dihlabelo ka diruiwa tše di iletšwago ke Baegepeta bona ba re lebeletše, a ba tla se re bolaye ka maswika? ₂₃Re swanetše go sepela leeto la matšatši a mararo re tšwele lešokeng go direla Morena Modimo wa rena dihlabelo ka moo a re laetšego ka gona.”

₂₄Kgoši ya re: “Ke tla le lesa la sepela la yo direla Morena Modimo wa lena dihlabelo kua lešokeng, fela le se ke la sepelela kgole kudu. Le nthapeleleng.”

₂₅Moshe a mo fetola a re: “Gona bjale ge ke seno tloga fa, ke tla rapela Morena gore ka la ka moswane diboba di tlogele kgoši le bakgomana ba yona le setšhaba sa yona. Fela kgoši a se ke a re fora gape ka go thibela setšhaba go ya go direla Morena dihlabelo.”

₂₆Moshe a tloga pele ga kgoši a ya go rapela, ₂₇gomme Morena a dira ka moo Moshe a kgopetšego ka gona. Diboba tša tlogela kgoši le bakgomana ba yona le setšhaba sa yona; gwa se šale le seboba se tee! ₂₈Fela le ka wona mohla woo kgoši o ile a thatafatša pelo, mme a gana gape go lesa setšhaba se sepela.

₁Morena a re go Moshe: “Yaa go kgoši o e botše gore Morena, Modimo wa Baheberu, o re: ‘Lesa setšhaba sa ka se sepele, gore se yo nkhunamela. ₂Ge o gana go ba lesa ba sepela, o fela o ba swareletše, ₃ke tla otla diruiwa tša gago ka moka ka bolwetši bjo bošoro: dipere, dipokolo, dikamela, dikgomo le dihuswane tša gago. ₄Nka se sware diruiwa tša Baisraele le tša Baegepeta go swana, mme le se tee seruiwa sa Baisraele se ka se hwe. ₅Nna, Morena, ke beile letšatši la ka moswane gore e be la go phethagatša taba ye.’ ”

₆Ka la ka moswane Morena a dira ka moo a bego a boletše, mme diruiwa ka moka tša Baegepeta tša hwa, eupša mo go tša Baisraele gwa se hwe le e tee. ₇Kgoši ya botšiša ka seo se diregilego, mme ya botšwa gore ga go na le seruiwa se tee sa Baisraele se se hwilego. Eupša a fela a retetše pelo, a gana go lesa setšhaba se sepela.

₈Morena a re go Moshe le Arone: “Gamarang magoswi a mošidi leubelong, gomme Moshe a o gaše moyeng pele ga kgoši. ₉Mošidi o tla tšitlana le naga ya Egepeta bjalo ka lerole, gomme nageng ka moka wa ntšha batho le diphoofolo dišo tše di pherilego.” ₁₀Ka gona ba gamara mošidi, ba ya ba ema pele ga kgoši. Moshe a gaša mošidi moyeng, gomme mošidi wa tšitlana wa tšama o ntšha batho le diphoofolo dišo tše di pherago. ₁₁Boramaselamose ba šitwa go tšea kgang le Moshe ka ge le bona ba be ba tšwile dišo bjalo ka Baegepeta ka moka. ₁₂Fela Morena a thatafatša pelo ya kgoši, gomme kgoši a se ke a theeletša Moshe le Arone, bjalo ka ge Morena a boditše Moshe.

₁₃Morena a re go Moshe: “Ka la ka moswane goseng o ye o eme pele ga kgoši, o mmotše gore nna, Morena, Modimo wa Baheberu, ke re: ‘Lesa setšhaba sa ka se sepele, gore se yo nkhunamela. ₁₄Lehono nka se otle bakgomana ba gago le setšhaba sa gago fela, ke tla itia le wena hlogo, gore o tle o tsebe gore ga go yo a swanago le nna lefaseng ka moka. ₁₅Bjale mola ke be ke ile ka emišetša letsogo la ka go otla wena le setšhaba sa gago ka bolwetši, nkabe ke go feleleditše sa ruri. ₁₆Fela ke go lesitše wa phela gore ke tle ke go bontšhe maatla a ka, le gore leina la ka le tle le tsebege lefaseng ka moka. ₁₇Eupša wena o sa ikgogomoša, o gana go lesa setšhaba sa ka sa sepela. ₁₈Ka la ka moswane ka yona nako ye ke tla neša sefako se se šiišago, seo Egepeta e sa lego e eba gona se sego sa ka sa na. ₁₉Bjale ntšha taelo ya gore diruiwa tša gago le tšohle tše di lego kua nageng di šireletšwe. Sefako se tla rothotha batho le diphoofolo tše di sego tša šireletšwa nageng, tša hwa ka moka.’ ” ₂₀Bakgomana ba bangwe ba kgoši ge ba ekwa taba ye ya Morena ba ile ba boifa, ba tliša makgoba a bona le diruiwa tša bona, ba di tšhabišetša ka mantlong mo go šireletšegilego. ₂₁Ba bangwe bona ba se ke ba šetša tshebotšo ya Morena, ba tlogela makgoba a bona le diruiwa tša bona kgakala.

₂₂Ke moka Morena a re go Moshe: “Emišetša letsogo la gago leratadimeng, ke gona sefako se tlago na nageng ka moka ya Egepeta; se tla rothotha batho, diphoofolo le dibjalo ka moka mašemong.” ₂₃Ka gona Moshe a emišetša lepara la gagwe leratadimeng – Morena a romela ledumaedi le sefako, tladi ya ratha fase. Morena a theoša ₂₄sefako se se šiišago, le dikgadima tša thalaganya. E bile ledimo le le šiišago le Egepeta e sa lego e eba gona e sego ya ka ya le bona. ₂₅Nageng ka moka ya Egepeta sefako sa rothotha se sengwe le se sengwe se se bego se le kgakala, batho le diphoofolo ka moka. Sa rothotha dibjalo ka moka mašemong, sa roba mehlare ka moka. ₂₆Selete sa Goshene sona, moo go bego go dula Baisraele, e bile sona se nnoši moo sefako se ilego sa se ne.

₂₇Kgoši a bitša Moshe le Arone, a re go bona: “Lehono gona ke sentše; Morena ga a na phošo, ba ba nago le phošo ke nna le setšhaba sa ka. ₂₈Rapelang Morena; ge e le ledumaedi le sefako tšona re di bone go lekane. Ke tla le lesa le sepele; ga le a swanela go hlwa le dutše le rena mo.”

₂₉Moshe a re go yena: “Ge ke seno tšwa mo motseng wo, ke tla emiša diatla ka rapela Morena. Dikgadima di tla homola, le sefako se tla kgaotša; ke moo o tlago lemoga gore lefase ke la Morena. ₃₀Fela ke a tseba gore wena le bakgomana ba gago ga se la tšwe le boifa Morena Modimo.”

₃₁Leokodi le garase di ile tša rothothelwa fase, gobane garase e be ya butšwa gomme leokodi le khukhuša. ₃₂Ge e le korong yona e ile ya se ke ya senyega, ka gobane e butšwetša morago.

₃₃Moshe a tloga go kgoši, a tšwa motseng, a napa a emiša diatla a rapela Morena. Dikgadima le sefako tša kgaotša, le pula ya khula. ₃₄Ge kgoši e bona go khudile ya senya gapegape. A retela pelo, yena le bakgomana ba gagwe. ₃₅Kgoši a thatafatša pelo, a gana go lesa Baisraele ba sepela, bjalo ka ge Morena a boletše ka Moshe.

₁Morena a re go Moshe: “Eya go kgoši, gobane ke nna ke mo reteditšego pelo, yena le bakgomana ba gagwe, gore ke tle ke dire mehlolo ye ya ka gare ga bona, ₂le gore wena o tle o kgone go botša bana ba gago le ditlogolo ka moo ke dirilego Baegepeta diebela ge ke dira mehlolo. Lena ka moka le tla tseba gore ke nna Morena.”

₃Ka gona Moshe le Arone ba ya go kgoši, ba fihla ba re go yena: “Morena, Modimo wa Baheberu, o re: ‘O tla gana go fihla neng go ineela go nna? Lesa setšhaba sa ka se sepele, gore se yo nkhunamela. ₄Ge o fela o gana, gona nna ke tla romela tšie nageng ya gago ka la ka moswane. ₅E tla ba leru la tšie gomme ya pipetša gohle fase gwa hloka le bobono. E tla ja se sengwe le se sengwe se se le šaletšego mola sefako se rothotha, le mohlare wo mongwe le wo mongwe wa lena wo o rego o a hloga o tla lewa. ₆Tšie e tla tlala nywakong ya gago le ya bakgomana ba gago le ya Baegepeta ka moka. E tla ba sehlogo kudu go fetiša ka moo borrago le borakgolwago ba kilego ba bona.’ ” Moshe a furalela kgoši a sepela.

₇Bakgomana ba re go kgoši: “Na monna yo o tla re tshwenya go fihlela neng? Lesa banna ba Baisraele ba sepele gore ba yo khunamela Morena Modimo wa bona. Afa o a lemoga gore naga ya Egepeta e šetše e senyegile?”

₈Ka gona Moshe le Arone ba bušetšwa pele ga kgoši, gomme kgoši ya re go bona: “Sepelang le yo khunamela Morena Modimo wa lena! Le re ke bomang ba ba yago?”

₉Moshe a mo fetola a re: “Rena ka moka re tla ya le bana ba rena le batšofadi ba rena. Re tla tšea barwa le barwedi ba rena le dihuswane tša rena le dikgomo tša rena ka moka, ka gobane re nyaka go yo direla Morena monyanya.”

₁₀Kgoši ya re: “Ruri, ke ena ka Morena gore nka se le lese la tšea basadi le bana ba lena! Go molaleng gore le fehla mpherefere. ₁₁Ke a gana! A go ye banna fela go yo khunamela Morena, ge e ka ba seo ke se le se nyakago.” Ba napa ba lelekwa pele ga kgoši.

₁₂Morena a re go Moshe: “Emišetša letsogo la gago godimo ga naga ya Egepeta gore tšie e tle. Yona e tla udubatša naga, ya ja dibjalo ka moka, tšohle tše di šetšego mohla wola wa sefako.” ₁₃Ka gona Moshe a emiša lepara la gagwe, gomme Morena a tsoša phefo ye e tšwago bohlabela, ya tšutla nageng letšatši leo ka moka le bošego bjoo ka moka. Ge go esa ke ge e tlišitše tšie. ₁₄Tšie ya tla e le metšhitšhitšhitšhi ya aparela naga ka moka. E be e le motšhitšhi wo mogologolo wo o bego o se wa ke o bonwa, goba wo o kago tsoga o bonwe gape. ₁₅Tšie ya pipetša naga, naga ya šala e fifetše; ya ja dibjalo le dienywa tšohle mehlareng tšeo sefako se di tshetšego. Gwa se ke gwa šala le lehlašana goba bjanyana bjo botalana nageng ka moka ya Egepeta.

₁₆Kgoši ya phakiša ya bitša Moshe le Arone ya re: “Ke senyeditše Morena Modimo wa lena, le lena ke le senyeditše. ₁₇Hle, ke a le rapela, ntebaleleng bosenyi bja ka mo lekgatheng le e be moka, gomme le rapeleng Morena Modimo wa lena, gore a upše a tloše kotlo ye ya go bolayago dimela tšohle.” ₁₈Moshe a re go tloga fao pele ga kgoši a rapela Morena. ₁₉Gomme Morena a fetoša phefo yela ya bohlabela a e dira phefo ye maatla ya bodikela; ya rwalelela tšie ya e gogolela ka Lewatleng la Mahlaka. Le e tee tšie ya se hlwe e bonwa nageng ya Egepeta ka moka. ₂₀Fela Morena a thatafatša pelo ya kgoši, gomme ya gana go lesa Baisraele ba sepela.

₂₁Morena a re go Moshe: “Emišetša letsogo la gago leratadimeng, gomme go tla wa leswiswi le legolo la go phopholwa la apeša naga ya Egepeta.” ₂₂Moshe a emišetša letsogo leratadimeng, gwa wa kgampipi ya leswiswi nageng ya Egepeta ka moka la tšea matšatši a mararo. ₂₃Baegepeta ba se ke ba kgona go bonana, gwa se ke gwa ba le o tee a tšwago ntlong ya gagwe lebakeng leo. Baisraele ka moka bona ba be ba na le seetša mo ba dulago gona.

₂₄Kgoši ya bitša Moshe ya re: “Sepelang le yo khunamela Morena; le basadi le bana ba lena ba ka no ya le lena. Ge e le dihuswane le dikgomo tša lena tšona le di tlogele mo.”

₂₅Moshe a mo fetola a re: “Gona wena o swanetše go re fa diruiwa tša dihlabelo tša go tšhungwa ka moka le tša dihlabelo tše dingwe go direla Morena Modimo wa rena. ₂₆Diruiwa tša rena le tšona di swanetše go ya le rena, go se šale le se tee, gobane mo go tšona re tla hlaola tšeo ka tšona re tlago direla Morena Modimo wa rena. Le gona rena ka noši re ka se kgone go tseba pele re fihla kua gore ke dife tšeo ka tšona re swanetšego go direla Morena.”

₂₇Morena a thatafatša pelo ya kgoši, gomme kgoši a gana go ba lesa ba sepela. ₂₈Kgoši ya befelelwa Moshe ya re: “Tloga mo! O hlokomele gore ke se hlwe ke go bona! Tšatši le ke go bonago o tla hwa!”

₂₉Moshe a mo fetola a re: “O boletše taba! Nnaena o ka se hlwe o mpone.”

₁Morena a re go Moshe: “Ke tla otla kgoši le Baegepeta ka moka ka kotlo e tee gape. Ka morago ga yona o tla le lesa la sepela. Gabotsebotse, o tla le koba la tšwa nageng ye. ₂Bjale ge, loma Baisraele tsebe, o ba botše gore yo mongwe le yo mongwe a kgopele dikgabišo tša gauta le tša silibera go moagišani wa gagwe.” ₃Morena a dira gore Baisraele ba hwetše botho go Baegepeta. Gomme le yena Moshe a hlompšha ke bakgomana le setšhaba ka moka; ba mmona e le motho yo mogolo kudu.

₄Moshe a re go kgoši: “Morena o re: ‘Mašegogare ke tla putlaganya naga ya Egepeta, ₅gomme maitšibolo ka moka a bašemane ba Baegepeta a tla hwa, go thoma ka morwa wa pele wa kgoši, mojalefa wa bogoši, go fihlela ka morwa wa pele wa lekgoba la mosadi, leo sa lona e lego go šila. Le maitšibolo a dikgomo le ona ka moka a tla hwa. ₆Go tla ba sello se segolo nageng ya Egepeta ka moka, sello se se sa kago sa ba gona, le gona se ka se tsogego se bile gona gape. ₇Fela mo go Baisraele go ka se ke gwa ba le mpša le e tee ye e gobago motho goba phoofolo. Ke gona le tlago tseba gore nna, Morena, ga ke sware Baegepeta le Baisraele go swana.’ ” ₈Moshe a iša pele a re: “Bakgomana ba gago ka moka ba tla tla go nna, ba ntotšha, ba nthapela gore ke tšee setšhaba sa gešo ka moka ke se huduše. Ka morago ga fao ke tla huduga.” Ke moka Moshe a tloga pele ga kgoši a befetšwe kudu.

₉Morena o be a rile go Moshe: “Kgoši e tla tšwela pele le go gana go le theeletša, gore ke atiše mehlolo ya ka nageng ya Egepeta.” ₁₀Moshe le Arone ba dirile mehlolo ye ka moka pele ga kgoši, fela Morena a thatafatša pelo ya gagwe, gomme a se lese Baisraele ba etšwa nageng ya gagwe.

₁Morena o boletše le Moshe le Arone nageng ya Egepeta a re: ₂“Ye kgwedi ke yona e tlago ba kgwedi ya mathomo ya ngwaga wa lena. ₃Botšang setšhaba sa Israele ka moka le re: Ka letšatši la lesome la yona kgwedi ye, monna yo mongwe le yo mongwe a hlaolele lapa la gagwe kgapana goba phookwana. ₄Ge lapa la gagwe e le le lennyane mo le ka palelwago ke go ja sehuswane seo la se fetša, a lapa leo le kwane le moagišani go abagana sehuswane seo go ya ka palo ya batho, le ka moo motho o tee a ka jago ka gona. ₅Monna a hlaole kgapana goba phookwana mohlapeng, e be tona ya ngwaga o tee ye e se nago bosodi. ₆Gomme a e hlahlelele thoko go fihlela ka maabane a letšatši la lesome le metšo ye mene la kgwedi, mme setšhaba sa Israele ka moka se hlabe dihuswane tšeo. ₇Ba tšee madi ba a tlotše direpoding ka godimo le ka mathoko mejakong ya nywako yeo dihuswane di tlago jelwa go yona. ₈Bošegong bjoo nama e bešwe, e lewe le mešunkwane ye e galakago le dinkgwa tše di se nago komelo. ₉Go se be le nama ye e lewago e le ye tala goba e apeilwe, eupša nama yohle e bešwe e sa na le hlogo le meomo le dikateng. ₁₀E se ke ya šadišwa molatša go lewa ka la ka moswane; ye e ka šalago e tšhungwe. ₁₁Le e je le itlhaganetše – le apere tša maeto, le rwele dieta dinaong, le swere mapara ka diatla. Ke wona Monyanya wa Paseka wa go nkgodiša, nna, Morena.

₁₂“Bošegong bjoo ke tla putlaganya naga ya Egepeta ka bolaya bašemane ba maitšibolo, le maitšibolo a diruiwa a dipholwana, ka otla le medimo ya Egepeta ka moka. Ke nna Morena. ₁₃Madi a mo direpoding e tla ba leswao la nywako ye le dulago ka go yona. Ge ke bona madi ke tla le feta gomme ka se ke ka le dira bošula ge ke otlaka Baegepeta. ₁₄Tšatši le e be letšatši la segopotšo go lena, mme ka lona le bine monyanya wa Morena go ikgopotša se nna, Morena, ke se dirilego. Ka lona lena le ditlogolo tša lena le bine monyanya e le molao wa ka mehla le mabakeng a a tlago.”

₁₅Morena a re: “Mo matšatšing a a šupago le se ke la ja dinkgwa tše di nago le komelo, le jeng fela dinkgwa tše di se nago komelo. Ka letšatši la mathomo le tloše komelo ka moka mo nywakong ya lena, ka gobane ge yo mongwe wa lena a ka ja selo se se ometšwego mo matšatšing a a šupago, o tla kgaolwa setšhabeng sa Israele. ₁₆Ka letšatši la mathomo le ka letšatši la bošupa le phuthegele tirelo ye kgethwa. Mo matšatšing ao a šupago go se ke gwa dirwa modiro wo mongwe ge e se fela tše motho a swanetšego go dija. ₁₇Le bineng monyanya wo ka mehla gobane ke ka lona letšatši le mo ke ntšhitšego dikgoro tša lena Egepeta. Ka mehla yohle ye e tlago, go iša ditlogolwaneng, le sware letšatši le e le la monyanya wa molao. ₁₈Go tloga mantšiboa a letšatši la lesome le metšo ye mene la kgwedi ya pele go fihlela mantšiboa a la masome a mabedi le motšo o tee, le se ke la ja dinkgwa tše di nago le komelo. ₁₉Mo matšatšing a a šupago go se ke gwa hwetšwa hlabego nywakong ya lena, gobane ge yo mongwe a ka ja se se hlabegilwego, o tla kgaolwa setšhabeng sa Israele, e ka ba ngwana wa mobu goba mofaladi. ₂₀Le se ke la ja selo se se ometšwego; nywakong ya lena ka moka le je dinkgwa tše di sego tša hlabegwa.”

₂₁Moshe o ile a bitša bagolo ka moka ba Israele, a re go bona: “Yaang le yo hlaolela lapa le lengwe le le lengwe kgapana goba phookwana, le di hlabe gore le je Paseka. ₂₂Le tšeeng motšitlo wa hisopo, le o ine mogopong wo o nago le madi a sehuswane, le tlotše direpodi tša mojako ka godimo le ka mathoko. Go se be le o tee yo a tšwago ngwakong wa gagwe go be go se. ₂₃E tla re ge Morena a putlaganya naga go bolaya Baegepeta, a bona madi direpoding, a feta mme a se dumelele Morongwammolai go tsena nywakong ya lena go le bolaya. ₂₄Lena le bana ba lena le swareng ditaelo tše e be molao wa lena go ya go ile. ₂₅Ge le goroga nageng ye Morena a tlago le fa yona bjalo ka ge a boletše, le direng tirelo ye leboelela. ₂₆Ge bana ba lena ba le botšiša ba re: ‘Tirelo ye e šupa eng?’ ₂₇le ba fetole le re: ‘Ke sehlabelo sa Paseka go godiša Morena, gobane o fetile nywako ya Baisraele kua Egepeta. O ile a bolaya Baegepeta, mme a šireletša malapa a rena.’ ”

Baisraele ba obama ba rapela. ₂₈Ba ile ba tloga, ba dira tšeo Modimo a di laetšego Moshe le Arone.

₂₉Bošegogare Morena a bolaya bašemane ba maitšibolo nageng ya Egepeta, go thoma ka morwa wa kgoši yo e bego e le yena mojalefa wa bogoši, go fihlela ka morwa wa sebofša se se lego ka kgolegong; maitšibolo ka moka a diruiwa le wona a bolawa. ₃₀Bošego bjoo kgoši le bakgomana ba gagwe le Baegepeta ka moka ba ile ba phafoga. Gwa kwala sello se segolo nageng ya Egepeta, ka gobane go be go se le lapa le tee moo go bego go se na le mohu. ₃₁Bošegong bjoo kgoši a bitša Moshe le Arone, a ba laela a re: “Tlogang! Etšwang setšhabeng sa ka, lena le Baisraele ba gabolena; eyang le yo khunamela Morena ka moo le kgopetšego ka gona. ₃₂Gapang mehlape ya lena le sepeleng. Le nna le nkgopeleleng tšhegofatšo.”

₃₃Baegepeta ba tutuetša Baisraele gore ba potlake ba tšwe Egepeta; ba re: “Re tla hwa ka moka ge le sa sepele.” ₃₄Ka gona Baisraele ba tšea maupi a bona a a dubilwego ka ntle le komelo, ba phuthela megopo ka mašela, ba e šikara magetleng. ₃₅Baisraele ba be ba dirile ka mokgwa woo Moshe a ba laetšego, ba kgopetše Baegepeta dikgabišo tša gauta le tša silibera, le diaparo. ₃₆Morena o ile a dira gore Baisraele ba hwetše botho go Baegepeta, mme Baegepeta ba neela Baisraele se ba se kgopelago. Ka tsela ye Baisraele ba hula Baegepeta.

₃₇Baisraele ba ile ba thoma leeto go tloga Ramsese go ya Sukote. Ge go sa balwe le basadi le bana, e be e ka ba banna ba 600 000 ba ba sepelago ka maoto. ₃₈Batho ba bangwe ba bantši ba mahlakanasela ba sepela le bona, le dihuswane le dikgomo tše dintši. ₃₉Ba apea diphaphatha ka maupi a a se nago komelo ao ba a dubilego ge ba etšwa Egepeta. Ba be ba lelekilwe Egepeta ka lephakuphaku mo ba hlokilego le nako ya go dira mefago le go duba maupi a a nago le komelo.

₄₀Baisraele ba dutše Egepeta nywaga ye 430. ₄₁Ka lona letšatši la ge go fela nywaga ye 430, dikgoro ka moka tša setšhaba sa Morena tša huduga Egepeta. ₄₂E be e le bošego bjo Morena a bego a letše a letetše go ba ntšha nageng ya Egepeta. Ngwaga ka ngwaga bošegong bjo Baisraele bohle le ditlogolo tša bona ba swanetše go lala ba letetše, e le go godiša Morena.

₄₃Morena o rile go Moshe le Arone: “Še melawana ya Paseka: Motho o šele a se ke a ja dijo tša Paseka, ₄₄eupša lekgoba le motho a le rekilego le ka ja Paseka ge le boloditšwe. ₄₅Moeng goba mothwalwa a se ke a ja Paseka. ₄₆Dijo tša Paseka a di jelwe ngwakong woo di apeetšwego ka go wona; nama ya sehuswane e se ke ya ntšhetšwa ntle. Mašapo a sona a se ke a robja. ₄₇Setšhaba ka moka sa Baisraele se bine monyanya wo. ₄₈Monna yo a sego a bolla a se ke a ja Paseka. Ge mofaladi a dula le lena gomme a rata go ja Paseka go godiša Morena, banna le bašemane ka moka lapeng la gagwe ba bolotšwe pele. Ka morago ga fao o tla ba bjalo ka Moisraele ka go tswalwa, gomme a ka batamela a keteka monyanya. ₄₉Melawana yeo e ama Baisraele ka matswalo le bafaladi ba ba dutšego gare ga bona.”

₅₀Baisraele ka moka ba ile ba phetha melawana ye Morena a e laetšego Moshe le Arone.

₅₁Ka lona tšatši leo Morena o ntšhitše dikgoro ka moka tša Baisraele nageng ya Egepeta.

₁Morena a re go Moshe: ₂“O nneele maitšibolo ka moka a matona. Leitšibolo le lengwe le le lengwe la Moisraele le e lego mošemane ke la ka, le leitšibolo le lengwe le le lengwe la seruiwa le letona ke la ka.”

₃Moshe a re go setšhaba: “Gopolang letšatši le; ke letšatši le ka lona le tšwilego Egepeta, mo le bego le le makgoba. Le ke lona letšatši le Morena a le ntšhitšego ka maatla a gagwe a magolo. Go se ke gwa lewa se se ometšwego. ₄Le huduga Egepeta lehono mo kgweding ya mathomo, kgwedi ya Abibi. ₅Morena o enetše borakgolokhukhu ba lena gore o tla le fa naga ya Bakanana le Bahete le Baamore le Bahibe le Bajebuse. Ke naga ya mokhora le monono. Ge Morena a le goroša nageng yeo, le keteke monyanya wo mo kgweding ya mathomo ya ngwaga wo mongwe le wo mongwe. ₆Matšatši a a šupago le je dinkgwa tše di se nago komelo, gomme ka letšatši la bošupa go be le monyanya wa go godiša Morena. ₇Matšatši a a šupago ao le se ke la ja dinkgwa tše di nago le komelo; go se ke gwa ba le komelo goba selo se se nago le komelo mo gohle nageng ya lena. ₈Tšatšing leo yo mongwe le yo mongwe a hlathollele morwa wa gagwe gore o bina monyanya ka lebaka la seo Morena a mo diretšego sona mohla a etšwa Egepeta. ₉Tirelo ye e tla ba segopotšo bjalo ka selo se se tlemeletšwego seatleng goba phatleng; e tla le gopotša go fela le ikgakolla le ithuta melao ya Morena, ka gobane Morena a le ntšhitše Egepeta ka maatla a magolo. ₁₀Le keteke monyanya wo ka nako ye e beilwego, ngwaga ka ngwaga, e le molao.”

₁₁“Morena o tla le goroša nageng ya Bakanana ye a e enetšego lena le borakgolokhukhu ba lena. Mohla a le abela yona, ₁₂lena le abele Morena mošemane yo mongwe le yo mongwe wa leitšibolo. Leitšibolo le lengwe le le lengwe le letona la seruiwa ke la Morena; ₁₃ge e le leitšibolo le letona la pokolo lona le rekollwe go Morena ka kgapana. Ge le sa rate go rekolla pokolo, gona le e robeng molala. Le rekolleng morwa wa lena wa leitšibolo. ₁₄Ka moso ge morwa wa gago a go botšiša gore tirelo ye e šupa eng, o mo fetole ka go re: ‘Ka maatla a magolo Morena o re ntšhitše Egepeta, mo re bego re le makgoba. ₁₅Mola kgoši ya Egepeta e ngangabetše e gana go re lesa re sepela, Morena o ile a bolaya maitšibolo ka moka a matona nageng ya Egepeta, go thoma ka a batho go iša go a diruiwa. Ke ka lebaka leo re direlago Morena sehlabelo ka leitšibolo le letona, barwa ba rena ba maitšibolo bona ra ba rekolla. ₁₆Tirelo ye e tla ba segopotšo, go swana le selo se se tlemeletšwego diatleng goba diphatleng tša rena; e tla re gopotša gore Morena o re ntšhitše Egepeta ka maatla a gagwe a magolo.’ ”

₁₇E rile ge kgoši ya Egepeta e lesa Baisraele ba sepela, Modimo a se ke a sepediša Baisraele ka tsela ya go ipata ka lewatle go leba nageng ya Bafilista, le ge tsela ye e be e kgaoletša kudukudu. Modimo o itše: “Ga ke nyake gore setšhaba se hlanoge mme se gomele Egepeta ge se bona gore se tlile go swanelwa ke go lwa.” ₁₈Ka lebaka leo a ba tepoša ka tsela ya morarela, ba putla lešoka, ba leba Lewatlekhubedu. Ba tšwile Egepeta ba itlhamile ba ipeakanyeditše tlhabano.

₁₉Moshe o ile a tšea mašapo a Josefa a sepela nao, ka ge Josefa a be a ile a eniša Baisraele gore ba tloge nao. O be a ile a re: “Ka kgonthe Morena o tla le hlakodiša, gomme mohla a le hlakodiša, le rwale mašapo a ka le tloge nao fa.”

₂₀Ba tlogile Sukote, ba ya ba hloma mešaša kua Ethamo, mafelelong a lešoka. ₂₁Mosegare Morena o be a ba eta pele ka thololo ya leru go ba laetša tsela, gomme bošego a ba eta pele ka thololo ya mollo go ba bonegela, gore ba sepele bošego le mosegare. ₂₂Thololo ya leru e be e fela e ba eta pele mosegare, mme thololo ya mollo e ba bonegela bošego.