To The Word – Day 151

₁Ke a go rapela, Morena;

₂ke botile wena, Modimo wa ka.

Nke ke se segišwe batho;

se dumelele manaba a ka a ntshega.

₃Bohle ba ba go botilego ba ka se segišwe batho;

ba ba go hlanamelago ka go se šetše bona ba tla segišwa batho.

₄Morena, ntsebiše thato ya gago;

o nthute ka mo o ratago gore ke phele ka gona.

₅O ntlhahle gore ke phele ka therešo ya gago;

o nthute,

gobane o Modimo, Mophološi wa ka.

Ka mehla ke botile wena.

₆Morena, gopola botho bja gago le leratorato la gago,

e lego tšona dilo tša kgale.

₇O lebale dibe tša ka tša bofseng le dikarogo.

Fela nna, Morena, o nkgopole ka leratorato la gago le botho bja gago.

₈Morena ke yo botho, o a botega;

ka gona o bontšha badiradibe tsela.

₉O etetša baikokobetši tseleng ya go loka,

mme a ba ruta thato ya gagwe.

₁₀Ka leratorato la gagwe le potego

o etetša bohle ba ba botegelago kgwerano ya gagwe gape ba phethago ditaelo tša gagwe.

₁₁Ka ge o le Morena wa lešoko,

o ntshwarele bokgopo bja ka le ge e le bjo bogolo.

₁₂Ge motho a theeletša Morena,

Morena o mo ruta ka mo a swanetšego go phela.

₁₃Ka mehla o tla atlega,

le ditlogolo tša gagwe e tla ba bengnaga.

₁₄Morena o kwana le ba ba mo theeletšago,

mme o ba tsebiša kgwerano ya gagwe.

₁₅Ke dula ke lebeletše Morena ke re a nthuše,

gobane ke yena fela yo a kago ntanyolla sefung.

₁₆Retologela go nna o nkgaugele,

gobane nna ke mmotlana ebile ke a hlaka.

₁₇Ntamolele ditlalelong tša ka,

o nntšhe mathateng.

₁₈Šetša mohlako le ditlaišego tša ka,

mme o ntebalele dibe tša ka ka moka.

₁₉Bona boati bja manaba a ka;

ba ntlhoile o šoro.

₂₀Ntšhireletše o mphološe;

o se ntese ke segwa ke batho,

gobane ke tšhabela go wena.

₂₁Anke go hloka bosodi ga ka le go loka ga ka go ntote,

gobane ke botile wena.

₂₂Hle, Modimo,

phološa setšhaba sa Israele ditlalelong tšohle tša sona!

₁Kahlolo ya gago a e nthekge, Morena,

gobane ke phela ke se na bosodi,

mme ke botile wena ke sa tekateke.

₂Ntlhahlobe o ntekole, Morena;

ntlhwekiše pelo le menagano.

₃Leratorato la gago le a nketetša;

ke phela go ya ka therešo ya gago.

₄Ga ke ikopanye le baradia;

ga ke sepele le baikaketši.

₅Ke hloile go dula le batho ba babe,

ebile ga ke ikopanye le bakgopo.

₆Morena, ke hlapa diatla go itatola molato,

le gona ke dikologa aletare ya gago ke go rapela

₇ke opela sefela sa tebogo,

ke bile ke anega mehlolo ya gago.

₈Morena, ke rata ngwako wo o dulago go wona,

felo mo go dulago letago la gago.

₉Hle, o se mpheleletše gotee le badiradibe,

o se ntloše tšatšing le babolai.

₁₀Ke bona ba ba dirago tša bokebeka,

ba ba phelago ka tsogolekobong.

₁₁Ge e le nna ke phela ke se na bosodi.

Hle, nkgaugele mme o mphološe!

₁₂Ke iketlile,

mme ke tla reta Morena ke na le phuthego yohle ya gagwe.

₁Morena ke seetša sa ka le Mophološi wa ka –

nka se boife motho.

Morena ke botšhabelo bja ka –

nka se tšhoge motho.

₂Ge batho ba babe ba ntlhasela gore ba mpolaye,

e lego bona batlaiši le manaba a ka, go thetšwa bona ba wa.

₃Le ge madira a ka ntikanetša,

nka se ke ka boifa;

le ge manaba a ka ntlhasela,

ke tla no fela ke botile Modimo.

₄Ke selo se tee se ke se kgopetšego Morena,

seo ke sona ke tlago se nyaka:

ke go ba ka ngwakong wa Morena bophelo bja ka ka moka,

go bogela botho bja gagwe,

le go kgahlwa ke bjona.

₅Mohla wa matshwenyego o tla ntšhireletša ka ngwakong wa gagwe,

o tla nkutamiša ka Tempeleng ya gagwe ka bolokega;

o tla nkuka a mpea godimo ga lerako.

₆Ka gona ke tla fenya manaba a a ntikologilego;

ke tla duduetša mekgolokwane ke dira dihlabelo Tempeleng;

ke tla opela ke tumiša Morena!

₇Ntshekegele tsebe, Morena,

ge ke go llela,

nkgaugele o nkarabe!

₈Ke gopola taelo ya gago ye e rego:

“Tlaang le nkhunamele.”

Ka gona ke tletše go go khunamela,

wena Morena.

₉O se ke wa nkhutela, hle!

O se ke wa nthaka o nkgalefetše,

nna, mohlanka wa gago.

O hlwa o nthuša;

hle, se ntlogele, se ntahle,

wena Modimo, Mophološi wa ka!

₁₀Le ge tate le mme ba ka ntahla,

Morena yena o tla mpabalela.

₁₁Nthute ditsela tša gago, Morena,

mme o ntlhahle tseleng ya polokego,

gore manaba a ka a se atlege.

₁₂Hle, se nkgafele thatong ya manaba a ka,

gobane dihlatse tšeo tša maaka di nkemetše ka maoto,

di ntsošetša mpherefere.

₁₃Ge nkabe ke se ka dumela gore ke tla bona botho bja Morena

mo bophelong bjo nkabe ke hwile.

₁₄Bota Morena! O se ke wa tlalelwa!

Ee, bota Morena.

₁Morena, wena Montšhireletši,

ke a go bitša, o se nkhomolele.

Ge o sa nkarabele,

ke tla ba bjalo ka ba ba theogelago bodulabahu.

₂Hle, o nkwe ge ke go llela ke nyaka thušo,

ke phagamišeditše matsogo Felong mo Gokgethwakgethwa ga Tempele ya gago.

₃O se mpheleletše le bakgopo,

batho ba ba dirago tše mpe,

ba ba bolelago gabotse le bangwekabona,

etšwe pelo tša bona di tletše bobe.

₄Ba otle ka lebaka la tše ba di dirilego,

ka lebaka la mediromebe ya bona.

Ba otle ka lebaka la ditiro tša bona;

ba dire se se ba lebanego.

₅Ga ba šetše ditiro tša Morena, goba tše Morena a di hlodilego;

ka gona yena o tla ba fediša,

a se sa ba tsoša.

₆A go retwe Morena!

O nkwele ge ke mo llela ke nyaka thušo.

₇Morena o mpha maatla,

ebile ke kotse ya ka.

Ke botile yena, o a nthuša;

ka gona ke a gobela,

ke mo reta ka sefela.

₈Morena o fa setšhaba sa gagwe maatla.

Motlotšwa wa gagwe o tšhabela go yena mme a phološwa.

₉Phološa setšhaba sa gago, Morena,

o šegofatše bao e lego ba gago.

Eba modiša wa bona,

o ba babalele go ya go ile.