To The Word – Day 143

₁Opelelang Morena kopelo ye mpsha!

Opelelang Morena,

lena bohle ba lefase!

₂Opelelang Morena le mo tumišeng!

Letšatši ka letšatši tsebagatšang gore o re phološitše.

₃Begelang ditšhaba letago la gagwe,

le batho ka moka dimakatšo tša gagwe.

₄Morena ke yo mogolo mme o tumišega kudu;

o boifega go feta medimo ka moka.

₅Gobane medimo yohle ya ditšhaba tše dingwe ke lefeela,

eupša Morena yena o hlodile magodimo.

₆Letago le bogoši di mo go yena,

Tempele ya gagwe e tletše maatla le lethabo.

₇Retang Morena,

lena ditšhabatšhaba,

retang letago le maatla a gagwe.

₈Retang leina la Morena la letago;

tšeang sehlabelo le tleng ka dikgorong tša gagwe.

₉Le obame pele ga Yomokgethwa ge a hlaga;

thothomelang pele ga gagwe,

lena batho bohle ba lefase.

₁₀Botšang ditšhaba ka moka le re:

“Morena ke kgoši!

Lefase le tsemilwe mme le ka se šutišwe.

Morena o tla ahlola ditšhaba ka toka.”

₁₁A legodimo le thabe, lefase le hlalale;

a lewatle le rore le tšohle tše di lego ka go lona.

₁₂Naga a e goe ka lethabo,

le tšohle tše di lego mo go yona!

Mehlare ya dithokgwa e tla hlaba mekgolokwane

₁₃pele ga Morena,

gobane o tlilo ahlola lefase.

O tla buša ditšhaba tša lefase ka toka le go se kgetholle.

₁Lebogang Morena, le mo rapele;

begelang ditšhaba ditiro tša gagwe.

₂Mo opeleleng le mo tumiše,

le anege mehlolo yohle ya gagwe.

₃Mo tumišeng ka ge e le yo mokgethwa;

bohle ba ba mo khunamelago a ba hlalale.

₄Nyakang thušo go Morena,

le dule le mo khunamela.

_5-6Lena ditlogolo tša Abrahama,

mohlanka wa Morena,

lena bana ba Jakobo le kgethilwego,

gopolang mehlolo ye Morena a e dirilego,

dimakatšo le dikahlolo tša gagwe.

₇Morena ke yena Modimo wa rena;

ke yena a ahlolago lefase ka moka.

₈Kgwerano ya gagwe ga a e lebale,

e lego se a se holofeditšego meloko ye sekete,

₉kgwerano ye a e dirilego le Abrahama,

keno ye a e enetšego Isaka.

₁₀A tiišetša kgwerano ya ba molao mo go Jakobo,

kgwerano ye e tlago dulela sa ruri go yena Israele,

₁₁a re: “Ke tla go fa naga ya Kanana,

ya ba lefa le ke go abelago lona.”

₁₂Ke ge e sešo ya ba ba bantši,

e le ba mmalwa fela,

le gona e le bafaladi mo nageng,

₁₃ba ralala le ditšhaba,

ba tloga mmušong wo mongwe ba eya go wo mongwe.

₁₄Fela Morena a se dumelele motho go ba gatelela,

a kgala magoši e le go ba šireletša a re:

₁₅“Le se kgome batlotšwa ba ka;

baprofeta ba ka le se ba kweše bohloko.”

₁₆A wiša tlala mo nageng;

dijo ka moka tša fela.

₁₇A roma monna a ba etelela pele,

e lego Josefa,

yo a bego a rekišitšwe ya ba lekgoba.

₁₈A kgokwa maoto ka diketane, a tlengwa le molala,

₁₉go fihlela go phethega se a se boletšego.

Lentšu la Modimo la mo hlatsela gore o rerešitše.

₂₀Ke mo kgoši a laetšego gore a kgokollwe;

a lokollwa ke yena mmuši wa ditšhaba.

₂₁A mmea molaodi ka lapeng la gagwe,

ya ba mohlokomedi wa thoto yohle ya gagwe,

₂₂gore a laole bahlankedi ba ka mošate ka mo a bonago go lebane,

le gore a rute bakgomana bohlale.

₂₃Ya ba gona Israele a yago Egepeta,

ee, Jakobo a falalela nageng ya Hamo.

₂₄Morena a atiša tšhaba sa gagwe,

gomme a se tiiša go feta manaba a sona.

₂₅A hloiša tšhaba sa gagwe manaba,

a a dira gore a sware bahlanka bao ba gagwe ka bomenetša.

₂₆A roma Moshe, mohlanka wa gagwe,

le Arone yo a bego a mo kgethile.

₂₇Ba dira mehlolo gare ga manaba,

le dimakatšo nageng ya Hamo.

₂₈A romela leswiswi mme la swara,

fela ba gana.

₂₉A fetola meetse a bona madi,

mme a bolaya hlapi tša bona.

₃₀Naga ya bona ya tlala digwagwa,

ešita le ka diphapošing tša mošate.

₃₁A laela gore diboba le menang di tle,

mme tša tlala naga.

₃₂A ba nešetša sefako bakeng sa pula,

le magadima a ratha mo nageng ya bona.

₃₃A rothotha merara le mego ya bona,

a ratha le mehlare ya naga ya bona.

₃₄A laela tšie gore e tle,

gwa nyeuma metšhitšhi ya bojane.

₃₅Ya ja dimela lailai mo nageng,

e lego dibjalo tšohle tša bona.

₃₆A bolaya maitšibolo ohle mo nageng,

maitšibolo ka moka a bona.

₃₇Ke moka a huduša Baisraele ba rwaleletše silibera le gauta,

dikgorong tša bona go se na yo a šalelago.

₃₈Baegepeta ba thaba ge Baisraele ba tloga,

gobane ba be ba ba boifa kudu.

₃₉Morena a ba apeša leru la ba khurumetša,

bošego a ba bonegela ka mollo.

₄₀Ya re ge ba kgopela a tliša dikhwiri,

a ba khoriša ka dijo tša legodimong.

₄₁A pharola leswika, meetse a falala,

a ela lešokeng bjalo ka noka.

₄₂Ke ka gobane a be a se a lebala kholofetšo ye kgethwa ye a e filego Abrahama,

mohlanka wa gagwe.

₄₃A huduša setšhaba sa gagwe ka tlhalalo,

bona ba a ba kgethilego a ba ntšha ka megobelo.

₄₄A ba fa dinaga tša baditšhaba,

ba tšea le tše merafe ye mengwe e ikhweleditšego tšona ka bothata,

₄₅gore ba phethe ditaelo tša gagwe,

ba hlomphe melao ya gagwe.

Retang Morena!

₁Retang Morena!

Mo tumišeng ka gobane ke yo botho;

lerato la gagwe ke la go ya go ile.

₂Ke mang yo a ka anegago ditiro tša gagwe tše maatla?

Ke mang yo a ka begago ditumišo tša gagwe ka botlalo?

₃Go lehlogonolo ba ba phethago taelo tša gagwe,

ba ka mehla ba dirago tše di lokilego.

₄Morena,

o nkgopole ge o dira tšhaba sa gago ka botho;

o mpale le bona ge o ba phološa,

₅gore ke bone katlego ya ba o ba kgethilego,

gore ke thabe le tšhaba sa gago se se thabilego,

gore ke ikgantšhe ka wena le ba e lego ba gago.

₆Re dirile dibe ra etša borakgolokhukhu ba rena;

re ikobetše molato.

₇Borakgolokhukhu ba rena kua Egepeta

ba be ba sa hlathe mehlolo ya gago,

ba be ba sa nagane ka lerato la gago le o ba bontšhitšego lona gantšintši,

ba go tsogela maatla kua lebopong la Lewatle la Mahlaka.

₈Le ge go le bjalo,

Morena a fela a ba phološa ka ge e le Modimo,

gore a ba bontšhe maatla a gagwe.

₉A kgalema Lewatle la Mahlaka, la pšha;

a ba sepetša ka bodibeng boka mo go omilego.

₁₀A ba hlakodiša dinaleng tša bahloi ba bona,

a ba phološa diatleng tša manaba a bona.

₁₁Meetse a khupetša manaba ao,

gwa se šale le o tee.

₁₂Ke mo setšhaba se dumetšego tše a ba holofeditšego tšona,

gomme sa mo opelela ditumišo.

₁₃Fela ba lebala ka pela tše a ba diretšego tšona;

ba se letele maele a go tšwa go yena.

₁₄Ba laolwa ke ditumo tša bona šokeng,

gomme ba leka Modimo leganateng.

₁₅Yena a ba fa se ba se kgopelago,

kganthe o tla ba tlišetša le bolwetši bja go ba otiša.

₁₆Kua mešašeng ba be ba tsebafela Moshe,

le yena Arone, mokgethwa wa Morena.

₁₇Ke mo lefase le pharogilego la metša Datane a wela;

le Abiramo a ribegetšwa le lekokwana la gagwe.

₁₈Gwa tuka mollo ka gare ga lekokwana leo,

bakgopo bao ba tšhungwa ke kgabo ya wona.

₁₉Ba bopa powana kua thabeng ya Horebe,

ba khunamela seswantšhobopša seo.

₂₀Bakeng sa go khunamela Modimo yo a swanelwago ke go tumišwa,

ba khunamela seswantšho sa poo ye e fulago bjang.

₂₁Ba lebala Modimo, Mophološi wa bona,

yena wa go dira tše dikgolo kua Egepeta,

₂₂wa go dira mehlolo nageng yeo ya Hamo,

le tše di gakgamatšago Lewatleng la Mahlaka.

₂₃Yena a re o a ba fediša,

eupša Moshe,

yo Modimo a mo kgethilego,

a ba phophothela,

gore a se sa ba fediša a ba galefetše.

₂₄Ba galala naga ye botse ka ge ba be ba sa kgolwe se a ba holofeditšego sona.

₂₅Ba munamuna ba le mešašeng ya bona,

ba se theeletše tše Modimo a di bolelago.

₂₆Ke ge a ikana go bona a emišitše letsogo a re o tla ba lesa ba hwela lešokeng,

₂₇ditlogolo tša bona a di phatlalatša le dinaga,

a di lesa di hwela baditšhabeng.

₂₈Ba khunamela Baale, modimo wa Bapeore;

ba ja didimo tša medingwana ya go se phele.

₂₉Ba rumola Morena ka ditiro tša bona,

mme ba tsenwa ke bolwetši bja leuba.

₃₀Finease a nanoga a otla basenyi;

ya ba gona leuba le kgaotšago.

₃₁Se Finease a se dirilego sa bonwa se lokile go iša go sa felego.

₃₂Kua meetseng a Meriba ba ile ba galefiša Morena,

Moshe a ba a senyegelwa ke ditaba ka lebaka la bona.

₃₃Ba be ba mo tenne mo a ilego a ba a phonyokgwa ke leleme.

₃₄Le gona ba be ba se ba fediša baditšhaba ka mo Morena a bego a ba laetše;

₃₅ba nyalelana le bona, ba phela bjalo ka bona.

₃₆Ba khunamela medingwana ya bona,

mme yona ya ba mereo go bona.

₃₇Ba direla bademone didimo ka barwa le barwedi ba bona.

₃₈Ba bolaya bana ba ba se nago molato ka go direla medingwana ya Kanana didimo ka barwa le barwedi ba bona.

₃₉Ba itšhilafatša ka ditiro tše dibjalo,

gomme ka mediro ya bona ba bontšha go se botegele Modimo.

₄₀Ka gona Morena a galefela tšhaba sa gagwe;

a šišimišwa ke ba e lego lefa la gagwe.

₄₁A ba gafela ditšhaba,

gomme ba bušwa ke dira tša bona.

₄₂Manaba a bona a ba gatelela,

a ba šitiša go tsoša hlogo.

₄₃Ke gantši a ba hlakodiša,

eupša bona ba mo tsogela maatla ka boomo;

ba bolawa ke bokgopo bja bona.

₄₄Le ge go le bjalo,

ge a ekwa ba lla ba le tlalelong,

o be a ba šokela.

₄₅Ka lebaka la bona a se lebale kgwerano ya gagwe,

a upša a ba hlomogela pelo,

ka ge a ba rata kudu.

₄₆A dira gore bathopi bohle ba bona ba ba kwele bohloko.

₄₇Re phološe, Morena,

Modimo wa rena;

re kgoboketše re boe ditšhabeng,

gore re tle re go tumiše, wena Yomokgethwa,

re ikgantšhe ka ditiro tša gago tše di makatšago.

₄₈A go tumišwe Morena Modimo wa Israele,

go tloga le go tloga,

le go iša go sa felego!

A setšhaba ka moka se re: “Amene!”

Retang Morena!