To The Word – Day 104

₁Theeletšang,

lena ditlogolo tša Jakobo,

lena le ipitšago setšhaba sa Israele,

lena peu ya Juda:

Le ikana ka leina la Morena,

le re le khunamela Modimo wa Israele,

etšwe le sa rereše,

le se la tiiša.

₂Le ge go le bjalo le sa ipitša badudi ba motse wo mokgethwa,

le re le botile Modimo wa Israele,

yo leina la gagwe e lego Morena Ramaatlaohle.

“Ke le boditše kgale tše di bego di tlile go direga,

ka di bega – gateetee ka di phetha.

₄Ke tsebile gore le tla ngangabala,

la ba le melala ye methata bjalo ka tshipi,

la hloka dihlong ka dibe tša lena.

₅Ka le botša e sa le pele tše di tlago le hlagela ka moso,

ka le begela ditiragalo di sešo tša phethagala,

ya ba go le thiba melomo gore le se re di dirilwe ke medimo ya lena,

goba di phethagaditšwe ke diswantšhobopša le diswantšhobetlwa tša lena.

₆“Bonang,

tšohle tše ke di boletšego pele di hlagile;

le swanetše go dumela gore ke boletše nnete.

Go tloga bjale ke tlilo le botša tše difsa tša ka moso,

diphiri tše le sa di tsebego.

₇Bjale ke gona ke di dira –

ga se ka di dira pele;

ga se la ka la kwa tša go swana le tše.

Ge nkabe le kile la di kwa,

le be le ka re le a di tseba.

₈Ke tsebile gore ga le tshephege,

le gore ke kgale le ntsogela maatla.

Ke ka lebaka leo le sego la kwa goba la tseba selo ka dilo

tše di sego tša ka tša fihla ditsebeng tša lena.

₉“Gore batho ba tle ba nkgodiše,

le ge ke galefile bjalo ke a itshwara,

mme ga ke le fediše.

₁₀Ke le lekile mollong wa matshwenyego,

bjalo ka silibera ge e tološwa.

Fela ka hwetša le se ne mohola.

₁₁Tše ke di dirago ke tše di holago nna mong –

nka se lese leina la ka le hlomphollwa,

goba ka lesa yo mongwe a godišwa ka mo go swanetšego nna fela.”

“Ntheeletšeng, lena Baisraele,

setšhaba se ke se biditšego,

lena ditlogolo tša Jakobo!

Ke nna Modimo,

ke nna Mathomo,

ebile ke nna Mafelelo;

ke nna fela ke lego Modimo!

₁₃Ka atla tša ka ke beile lefase metheong ya lona,

ka phurolla le legodimo.

Ge ke bitša lefase le legodimo di tla ka pela tša ema mmogo.

₁₄“Kgobokanang bohle le ntheeletše!

Ke ofe wa medimo wo o bego o ka porofeta

gore monna yo ke mo kgethilego yo o tlilo hlasela Babilone?

O tla be a dira se ke se nyakago go Bababilonia.

₁₅Ke nna ke di boletšego mme ka mmitša;

ka dira gore leina la gagwe le tsebege,

gomme o tla atlega.

₁₆“Bjale ge,

mpatameleng le kwe se ke se bolelago.

Go tloga mathomong ke be ke bolela phatlalatša;

ge di thoma go direga ke be ke le gona.”

“Ke nna Morena Modimo wa lena yo ke nyakago go le ruta tše di tlago le hola,

yo ke nyakago go le sepetša tseleng ye le swanetšego go tšea ka yona.

₁₈“Nke nkabe le theeleditše ditaelo tša ka!

Ke mo ditšhegofatšo di ka bego di eletše go lena bjalo ka noka.

Go hlakodišwa ga lena go ka be go ile gwa swana le maphoto a lewatle ge a eya lebopong.

₁₉Ditlogolo tša lena e ka be e le tše ntši bjalo ka lešabašaba,

bana ba lena ba atile bjalo ka dithorwana tša lona,

gomme ke be ke tla dira gore ba se fedišwe.”

₂₀Itlhaganeleng le tloge Babilone!

Goang, le phatlalatšeng taba tše ka lethabo;

di gašeng gohle le re:

“Morena o hlakodišitše Baisraele,

bahlanka ba gagwe!”

₂₁Mola Morena a sepetša setšhaba sa gagwe lešokeng,

sona se be se sa swarwe ke lenyora.

O ile a se phulelela meetse leswikeng,

a pharola letlapa gomme meetse a ela.

₂₂“Bakgopo bona ba ka se bolokege,”

o realo, Morena.

₁Ntheeletšeng,

lena ba dinaga tša kgole!

Mpheng tsebe, lena ditšhaba tše di dulago kgakala!

Morena o nkgethile pele ke belegwa,

a ntira mohlanka wa gagwe ge ke seno tswalwa.

₂Mantšu a ka a a dira bogale boka tšhoša.

A mphihla ka seatleng sa gagwe.

A ntira ka swana le mosebe wo bogale,

a ntsenya ka kgotlopong ya gagwe.

₃A re go nna: “Lena Baisraele,

le bahlanka ba ka;

ka lebaka la lena batho ba tla nkgodiša.”

₄Nna ka re: “Ke itapišeditše lefeela.

Ke sentše maatla a ka,

eupša ga se ka phetha selo.”

Le ge go le bjalo,

ke botile gore Morena o tla ema le nna;

o tla mputsetša tše ke di dirago.

₅Morena o mpopile pele ke belegwa gore ke tle ke be mohlanka wa gagwe,

ke bušetše setšhaba sa gagwe go yena,

ke mo kgobokanyetše sona.

Morena o a ntlhompha;

ke yena maatla a ka.

“Mohlanka wa ka,

ke go beetše modiro wo mogolo.

Sa gago ga se fela go tlo bušetša

mašaledi a Israele nageng ya ona le go a boetša sekeng sa ona,

eupša ke tla go dira seetša sa ditšhaba gore bohle ba lefaseng ba phološwe ka wena.”

₇Modimo yo mokgethwa, Mophološi wa Israele,

o botša monyatšwanyatšwa,

mošišingwakeditšhaba,

mohlanka wa babuši, o re:

“Ge magoši a go bona o godišitšwe gape,

a tla ema a go hlompha;

le bakgomana ge ba go bona,

ba tla obama.”

Tšeo di tla direga ka gobane Morena o kgethile mohlanka wa gagwe,

le ka gore Modimo yo mokgethwa wa Israele o a botega.

“Ge nako ye ke ratago go le phološa ka yona e fihla,

ke tla kwa dillo tša lena ka le thuša.

Ke tla le šireletša,

gomme ka dira kgwerano le ditšhaba ka lena.

Ke tla buša ka le dudiša nageng ya lena ye bjale e sentšwego,

gomme ka dira gore le e bušetše sekeng sa yona.

₉Dibofša ke tla di botša ka re:

‘Lokologang!’

Go ba ba lego swiswing ke tla re:

‘Tšwelang ntle seetšeng!’

Ba tla swana le diruiwa tše di fulago ditseleng le mebotong ye e sego ya mela selo.

₁₀Ba ka se sa swarwa ke tlala goba lenyora.

Letšatši le phišo ye kgolo di ka se ba tšhume,

ka ge ba tla be ba hlahlwa ke yo a ba ratago.

O tla ba iša methopong ya meetse a iketlile.

₁₁“Ke tla phula tsela ya go putla dithaba,

ka lekaneletša setšhaba sa ka ditselakgolo.

₁₂Ba bangwe ba setšhaba sa ka ba tla tla ba etšwa kgole,

bangwe ba etšwa leboa le bodikela,

bangwe ba etšwa Aswane ka borwa.”

₁₃Goang ka lethabo, lena magodimo!

Letša mokgolokwane, wena lefase!

Dithaba a di duduetše ka gobane Morena o tlilo homotša setšhaba sa gagwe;

o tla se šokela ka ge se tlaišega.

₁₄Eupša ba Jerusalema bona ba re:

“Morena o re lahlile!

Mong wa rena o re lebetše.”

₁₅Fela Morena yena o re:

“Kgane mosadi a ka lebala lesea la gagwe,

a se rate ngwana yo a mmelegego?

Le ge eba a ka mo lebala,

nna nka se tsoge ke lebetše lena,

setšhaba sa ka.

₁₆Wena Jerusalema,

nka se tsoge ke go lebetše!

Ke ngwadile leina la gago ka diatleng tša ka.

Merako ya gago ke dula ke e gopotše.

₁₇“Ba ba tlago go go aga ka lefsa ba kgauswi le go tla,

gomme babolai le bafediši ba gago ba tla tloga.

₁₈Lebelela ka gohle o bone tše di diregago!

Batho ba gago ba a kgobokana –

ba boela go wena.

Ke ikana ke le Modimo yo a phelago,

ke re batho ba gago ba tla go kgabiša boka monyadiwa ge a kgabišitšwe ka dikgabišo.

₁₉“Naga ya geno e be e hlakotšwe,

e sentšwe e le marope,

eupša bjale e ka se lekane bao ba tlago dula go yona.

Bale ba go go pšhatla ba tla ba kgole le wena.

₂₀Ka letšatši le lengwe batho ba gago ba ba tswetšwego bothopša ba tla re go wena:

‘Naga ye ga ya re lekana –

re okeletše yona gore re tle re be le madulo!’

₂₁Ke moka wena o tla ipotšiša wa re:

‘Ke mang yo a re tswaletšego bana ba ka moka?

Etse ba ka ke ba lobile,

mme ka se sa ba le ba bangwe!

Ga ke re ke be ke rakilwe mme ke thopilwe –

bjale ke mang yo a godišitšego bana ba?

Ke be ke tlogetšwe ke le tee –

bjale bana ba ba tšwa kae?’ ”

“Ke tla hlaeletša ditšhaba,

ka emišetša merafe sefoka gore ba tliše bana ba gago gae ka lerato.

₂₃Go lena magoši a tla swana le bahlokomedi ba bana,

bommakgoši ba ba bjalo ka baledi.

Ba tla le obamela ba le hlompha ka boikokobetšo.

Ke gona le tlago tseba gore Morena ke nna;

yo a botilego go thušwa ke nna a ka se lewe ke dihlong.”

₂₄Kgane o ka amoga mogale tše a di thopilego?

Afa lethopša la mogateledi lona le ka tšhaba?

₂₅Morena o a fetola o re:

“Go tlilo ba ka wona mokgwa woo.

Mogale o tla amogwa lethopša la gagwe,

mogateledi le yena o tla tšeelwa tše a di thopilego.

Ke tla lwa le ba ba lwago le lena,

le bana ba lena ka ba hlakodiša.

₂₆Ke tla dira gore bagateledi ba lena ba bolayane,

ba tla phegelela go bolayana mo nkego ba tagilwe.

Ke mo batho ka moka ba tlago tseba gore ke nna Morena,

Mophološi le Molokolodi wa lena.

Ba tla lemoga gore ke nna Modimo yo maatla wa Israele.”

“Na le nagana gore ke rakile setšhaba sa ka bjalo ka monna ge a hlala mosadi wa gagwe?

Bjale lengwalo la tlhalo le kae ge?

Kgane le gopola gore ke le rekišitše la ba makgoba go swana le

monna yo a rekišago bana ba gagwe gore e be makgoba?

Aowaa, bokgobeng le be le išwa ke dibe tša lena;

le ile la rakwa ka lebaka la melato ya lena.

₂“Ke ka lebaka la eng setšhaba sa ka se ile sa se ke sa dira selo mola ke ile go yo ba phološa?

Ba be ba reng ba sa arabe ge ke ba bitša?

Kgane ga ke ne maatla a go ba phološa?

Na ga ke kgone go ba hlakodiša?

Nka kgalema lewatle ka le pšheša,

gomme dinoka ka di fetoša leganata,

dihlapi tša tšona tša hwa,

tša nkga ka ge go se ne meetse.

₃Nka apeša leratadima boso,

ya nke ke ge le iletše.”

₄Morena, Mong wa bohle, o nthutile gore ke bolele eng,

ke tle ke kgone go fa ba ba lapilego mafolofolo.

Mosong wo mongwe le wo mongwe o dira gore ke hlwaye tsebe

ke theeletše tše a nthutago tšona.

₅Morena o ntirile gore ke kwešiše,

gomme nna nka se mo tsogele maatla,

goba ka gana.

₆Ba ba nkotlago ke ba hloboletše mokokotlo,

ka ba lesa ba nthoga ba ntumola le maledu,

ka se široše sefahlego ge ba ntshwela ka mare.

₇Eupša mahlapa a bona a ka se ntire selo,

ka ge ke thušwa ke Morena,

Mong wa bohle.

Ke beta pelo ka a kgotlelela;

ke tseba gore nka se goboge,

₈ka gobane Modimo o kgauswi,

gomme o tla bontšha gore ga ke ne molato.

Ke mang yo a ka lekago

go mphara ka molato?

A a ye le nna kgorong ya tsheko!

Ke mang yo a ka phegišanago le nna?

A a bege molato wo a mpharago ka wona!

₉Morena, Mong wa bohle,

ka boyena o ema le nna –

bjale ke mang yo a ka mponago molato?

Bohle ba ba mpharago ka molato ba tla timelela

bjalo ka lešela le le llwego ke tšhwele.

₁₀Lena ba le boifago Morena gape le theeletšago mantšu a mohlanka wa gagwe –

le ge le sepela swiswing le sa bone seetša,

le tshephe Morena,

le bote Modimo wa lena.

₁₁Lena ka moka le epelago ba bangwe melete,

lena beng le tla wela ka meleteng yeo.

Morena ka boyena o tla phethagatša taba ye;

le tla welwa ke masetlapelo a mašoro.

“Ntheeletšeng,

lena le nyakago go phološwa,

lena le tlago go nna gore ke le thuše.

Gopodišišang borakgolokhukhu ba lena, bona e lego

leswika le le betlilwego go lona,

le molete wo le epilwego go wona.

₂Gopolang rakgolokhukhu wa lena,

Abrahama, le Sara, makgolokhukhu wa lena.

Mola ke bitša Abrahama o be a se ne ngwana,

eupša ka mo šegofatša mme ka mo atišetša ditlogolo.

₃“Ke tla homotša Jerusalema,

gomme ba ba dulago maropeng a yona ka ba bea pelo.

Le ge naga ya yona e le leganata,

ke tla e fetoša serapa sa Edene;

le ge e le lešoka,

ke tla e dira sona serapa seo sa Modimo.

Go tla ba le lethabo le boipshino,

gwa kwala dikoša tša ditebogo le medumo ya diletšo.

₄“Ntheeletšeng, lena setšhaba sa ka,

le mpheng tsebe, lena morafe wa ka.

Ke ruta ditšhaba;

melao ya ka e tla ba tlišetša seetša.

₅Ke batametše go ba phološa;

nako ya gore ke fenye e kgauswi.

Ke tla ahlola ditšhaba ka maatla a ka.

Dinaga tša kgole di botile nna,

di holofetše gore ke tla di phološa.

₆Lelalelang magodimong,

le be le lebelele fase lefaseng!

Magodimo a tla timelela bjalo ka muši,

lefase le tla hlagala boka seaparo,

gomme badudi ba lona ka moka ba tla hwa bjalo ka dilabi.

Eupša nna ke tla ba hlakodišetša sa ruri;

toka ya ka e tla bonagala go ya go ile.

₇“Ntheeletšeng,

lena le tsebago tše di lokilego,

lena le swerego dithuto tša ka ka dihlogo.

Le se ke la boifa ge batho ba le roga,

goba la kwa bohloko ge ba le nyefola.

₈Ba tla timelela bjalo ka diaparo tše di llwego ke tšhwele!

Eupša nna ke tla ba hlakodišetša sa ruri;

toka ya ka e tla bonagala go ya go ile.”

₉Morena, tsoga o re thuše!

Re hlakodiše ka maatla a gago,

go swana le mehleng yela ya kgale,

mabakeng ale a pele.

Ga ke re ke wena yola wa go phuleletša Rahaba,

wa ripaganya mmamokebe woo wa ka lewatleng?

₁₀Gape ke wena wa go pšheša lewatle,

meetse a bodiba bjo bogolo,

gomme wa phula tsela mo go bego go le meetse,

gore bale o bego o ba phološa ba kgone go tshela.

₁₁Bao o ba hlakodišitšego ba tla boela Jerusalema ka lethabo,

ba hlaba mekgolokwane ba thabile;

ba tla iketla go ya go ile,

manyami le metsetlo tša felela sa ruri.

“Ke nna ke le homotšago.

Motho wa nama le mmoifelang,

yena a hwago bjalo ka bjang?

₁₃Kgane le lebetše Morena yo a le bopilego,

yo a phurolotšego magodimo gomme a bea metheo ya lefase?

Ke ka lebaka lang le swanetše go phela le boifa bogale bja bao ba le gatelelago,

bao ba itokišeditšego go le fediša?

Bogale bja bona bo ka se sa le dira selo.

₁₄Bao ba tlemilwego ka diketane ga ba sa le kgole le go lokollwa;

ba ka se hwele kgolegong,

gape ba ka se hloke dijo.

₁₅“Ke nna Morena Modimo wa lena;

ke biloša lewatle gomme maphoto a lona a duma.

Ke nna Morena Ramaatlaohle!

₁₆Ke phurolotše magodimo,

ka bea le metheo ya lefase;

ke botša ba Jerusalema ke re:

‘Le setšhaba sa ka!

Ke le dirile batseta ba ka,

gomme ke le šireletša ka seatla.’ ”

₁₇Wena Jerusalema, tsoga!

Phafoga, o emelele!

O nwele beine ya kotlo,

beine ye Morena a go filego yona a galefile;

o e kgaritlile gomme ya go thekesediša.

₁₈Ga go le o tee wa badudi ba gago yo a go hlahlago.

Gare ga bao ba godilego go wena ga go yo a go swerego ka letsogo a go thuša.

₁₉Masetlapelo a ka mabedi a go wetše:

Naga ya geno e sentšwe ke ntwa,

le setšhaba sa geno se bolailwe ke tlala.

O tla kwelwa ke mang bohloko?

Ke mang yo a tlago go homotša?

₂₀Batho ba gago ba idibetše;

ba rapaletše gohle magahlanong a mekgotha;

ba bjalo ka phuti ye e tantšwego.

Modimo o ba kgadile kudu,

Morena o ba otlile gabohloko a galefile.

₂₁Lena batho ba Jerusalema ba le tlaišwago,

lena ba le thekeselago bjalo ka ditagwa,

₂₂Morena Modimo wa lena o a le emelela o re:

“Ke tloša senwelo sela ke le filego sona ke galefile.

Le ka se sa nwa beine yela ya go le thekesediša.

₂₃Ke tla e fa bale ba bego ba le tshwenya,

ba le patlamiša mekgotheng,

ba le gataka bjalo ka mobu.”

₈“ ‘Setšhaba se se ntheta ka molomo,

eupša dipelo tša bona di kgole le nna.

₉Go nthapela ga bona ga go ba hole ka selo,

ka gobane ba ruta batho melawana ye e beilwego ke bona

mo nkego ke melao ye e beilwego ke nna.’ ”