Tlaišego, tsogo le lerato la Bakriste – letšatši la 4

Temana ye mabapi le serapa sa Getsemane e thoma go Lukase 22:39 ge Jesu a laela barutiwa ba gagwe gore ba rapele. Mafelelong a nako ya Jesu serapeng (temana ya 46), o ba laela gape go rapela. Barutiwa ba swanetše go rapela gore ba se lekwe. Jesu o tsebile seo se bego se tlo direga. O tsebile gore thapelo e be e tla ba selo se le noši seo se bego se tla dira gore ba se robale. Le ge Jesu a be a phethagetše, moya wa thapelo o be o le bohlokwa go yena.

Ke beetše thoko nako ya go rapela le go nyaka bohlale bja Modimo, kudukudu dinakong tša mathata a magolo gomme tumelo ya ka e matlafaditšwe kudu. Ke nagana gore ge batho ba rapela kudu, ba tla kgona go lebeletšana le diteko tša lefase le mathata a a tlago maphelong a bona bokaone. Thapelo ke boitshwaro bja go ikthekga go Modimo. Thapelo ke tsela ye re amogelago go ithekga ga rena go Modimo. Ge re rapela gantši, ke moo re lemogago kudu gore ga re kgone go fihlelela dilo ka borena, eupša gore re ithekgile go Modimo. Ge re phela re ithekgile go Modimo ka dinako ka moka le go lemoga bogona bja gagwe, re tla matlafatšwa bokaone kudu go ka lebeletšana le diteko le mathata maphelong a rena. Jesu ga a nyake go re netefaletša gore re tla lokollwa go manyami ka moka le sebe, eupša o re nea taelo ya gore re rapele gore re kgone go lebeletšana le diteko, ditlhohlo le mathabo a bophelo ka go ithekga go Modimo.

Re keteka Labohlano le Lebotse – letšatši leo ka lona Jesu a bapotšwego sefapanong ka lebaka la dibe tša rena. Ke letšatši la go ema o se dire selo le thapelo. Ke letšatši la ngwaga ge balapa la ka le nna re botšanago kanegelo ya Jesu Mophološi wa rena. Matšatši a mararo ka morago, Jesu o tsogile bahung gomme a thuba ditlemo tša lehu, gatee ya ba moka. Ke ka lebaka leo Bakriste ba ketekago tsogo lehono, Sontaga ka morago ga Labohlano le Lebotse, ka gobane ke go ketekwa ga bophelo bja rena bjo boswa go Kriste.